Xixón al día

Etiqueta: Asturies

  • Salú confirma’l primer casu n’Asturies de la variante Ómicron silenciosa

    Salú confirma’l primer casu n’Asturies de la variante Ómicron silenciosa

    La Conseyería de Salú confirmó güei el primer casu de variante Ómicron silenciosa n’Asturies. Trátase d’una muyer d’ente 40 y 50 años, non vacunada, que presentó síntomes leves el 19 de xineru de los que yá ta restablecida.

    La sección de Viroloxía del Llaboratoriu de Microbioloxía del Hospital Universitariu Central d’Asturies (HUCA) detectó esta variante nuna amuesa d’una PCR positiva de la paciente, que nun presentaba les mutaciones habituales de la Ómicron clásica.

    Esti tipu de muestreo aleatoriu ye habitual del procedimientu de vixilancia y control de la covid pa buscar variantes y llinaxes del SARS-COV-2, polo que nun se refuga que se diagnostiquen más casos de la conocida como Ómicron sigilosa (BA.2), que se denomina asina al pasar desapercibida porque nun tien tantes mutaciones como la variante clásica (BA.1).

    La Ómicron silenciosa caracterízase epidemiológicamente por tener una mayor transmisibilidá y ser una infección de calter leve, según esplicó’l coordinador de area asistencial de la Dirección Xeneral de Salú Pública, Mario Margolles.

  • Asturies y la so Cocina de Paisaxe representen la gastronomía nacional nel Festival de Curtiumetraxes de Clermont-Ferrand

    Asturies y la so Cocina de Paisaxe representen la gastronomía nacional nel Festival de Curtiumetraxes de Clermont-Ferrand

    El Principáu y la so Cocina de Paisaxe van representar la gastronomía nacional nel 44.u Festival Internacional de Curtiumetraxes de Clermont-Ferrand, que se va celebrar a partir de mañana, vienres, y hasta’l 5 de febreru na localidá francesa. El certame, que cuntó nel 2019 con más de 170.000 espectadores y 3.500 profesionales, ye ún de los más reconocíos na so especialidá.

    Asturies va ser la referencia gastronómica nesta edición nueva, onde España participa como país convidáu. A lo llargo de tola selmana, la chef xixonesa Lara Roguez, embaxadora de la Cocina de Paisaxe, va ellaborar los sos platos pa los participantes nel festival nel restaurante oficial del eventu Grandes Tables de la Comédie.

    Roguez, cocinera al frente del restorán Kraken en Xixón, forma parte del colectivu de 31 profesionales asturianos reconocíos como embaxadores de Cocina de Paisaxe.

    La participación d’Asturies tamién ta dirixida al ámbitu cinematográficu al traviés de Llaboral Cinemateca Curtios, que va tar presente nel estand Shorts from Spain, qu’acueye una delegación compuesta por catálogos de promoción internacional de curtiumetraxes de les distintes comunidaes. Nel catálogu asturianu figuren Fita, de Diego Flórez; Europa, de Lucas Fresno; L’Obscurité, de Carlos Navarro; Manual de la siega, de Samuel Fernandi, y Vas a ser mi memoria siempre, de Marina Munárriz. Tamién tán presentes distribuidores de curtios españoles, aparte de representantes de festivales y productores.

    Asina mesmo, la comunidá tamién va difundir nel festival los sos condiciones óptimes pa la realización de producciones de cine y otres propuestes audiovisuales.

  • El Muséu Arqueolóxicu recibe en depósitu’l fondu de José Manuel González, clave na investigación asturiana del sieglu XX

    El Muséu Arqueolóxicu recibe en depósitu’l fondu de José Manuel González, clave na investigación asturiana del sieglu XX

    El Muséu Arqueolóxicu d’Asturies presentó güei’l fondu de José Manuel González y Fernández Abarganes, del qu’apocayá se fixo cargu la institución cultural del Principáu en llegando a un alcuerdu cola familia para la cesión. El muséu va acometer la catalogación, estudiu y espardimientu de la colección pol so gran interés históricu, artísticu, arqueolóxicu, etnográficu, documental y bibliográficu.

    Nel actu de presentación del legáu y l’inauguración nel Arqueolóxicu d’una amuesa temporal intervinieron el director xeneral de Cultura y Patrimoniu, Pablo León; la directora del muséu, María Antonia Pedregal, y Carlos García Rodríguez, sobrín nietu de José Manuel González.

    Según los deseos de la familia, y n’evaluando el valor del fondu, Cultura formalizó’l pasáu ochobre la cesión y el treslláu de la colección y del archivu personal de José Manuel González al Muséu Arqueolóxicu. El legáu, bien valoráu por investigadores, historiadores y arqueólogos, ta compuestu por pieces arqueolóxiques, llibros, documentos, fotografíes y otros bienes muebles. La esposición producida pol Arqueolóxicu inclúi dalgunos de los oxetos más relevantes, amás d’una proyección d’imáxenes qu’ilustren la vida y trayectoria del estudiosu. L’amuesa va tar abierta dende güei hasta’l 4 de marzu.

    Materiales del fondu arqueolóxicu

    El conteníu de la manda de José Manuel González ye tan estensu como valiosu pola información que contién. En cuantes a los materiales del fondu arqueolóxicu, localizó munchos xacimientos del Paleolíticu inferior y mediu n’esploraciones personales y recoyó materiales líticos en superficie. Ente les pieces más relevantes destaquen los grandes bifaces de cuarcita apaecíos en Llagú (Uviéu), Les Regueres y Busto (Ḷḷuarca). Per otru llau, son especialmente singulares los siguientes materiales:

    • Hacha de la Edad del Bronce atopada en 1971 en Figares (Salas).
    • Tesorín de monedes romanes localizaes en Foxó (Tameza) en 1917. Ye ún de los más afayos más interesantes de monedes romanes n’Asturies. Trátase d’un conxuntu de 173 monedes de bronce, de les que la mayor parte pertenecen al emperador Diocleciano (284‐305 d.C.) y alcancen hasta Constantino (306‐337 d.C.), toes en bon estáu y de llectura posible.
    • Fragmentu del mosaicu de la villa romana d’Andayón (Les Regueres).
    • Fragmentos de cerámica prerromana, romana y medieval.
    • Molín de Ricabo. Una muela manuaria decorada que procede del castru de La Picona y que constituye una pieza estraordinaria.

    Materiales del fondu documental

    Respectu al fondu documental del legáu, correspuende al periodu que va dende 1930 hasta la muerte del investigador, en 1977, y alterna documentación inédita ya impresa. Predominen les obres referíes a la lexicografía, la llingüística, la hestoria, la prehistoria y l’arqueoloxía. Destaquen dos colecciones encargaes pol investigador, qu’axunten tola so obra disperso y ordenao en 5 volumes por fecha d’edición.

    La documentación manuscrito recoyío por González en fiches, cuadernos y carpetes apurre munchos detalles sobre los xacimientos atopaos por él y los materiales recoyíos, amás desobre la so metodoloxía de trabayu p’afayar dólmenes, túmulos o castros.

    Mención aparte merez la so colección de fotografía, cuantitativa y cualitativamente estraordinaria, y que se nutre d’imaxes que van dende semeyes familiares a trabayos de campu. Ente los oxetos ingresaos nel Arqueolóxicu figuren les sos cámares fotográfiques.

    Otru llote de materiales relevante ye’l que correspuende a la cartografía, planos y dibuxos, que son soporte pa les sos publicaciones. La donación inclúi tamién pieces etnográfiques y artístiques ya inclusive el moblame del so despachu de trabayu: mesa, siella, vitrines de pieces, ficheru metálicu, cuadros, fotografíes enmarcaes, máquina d’escribir y otros oxetos acomuñaos al trabayu investigador de José Manuel González. Un espaciu que la Conseyería de Cultura tien previsto recrear nel mesmu Muséu Arqueolóxicu nuna futura esposición.

    La figura de José Manuel González

    José Manuel González (Paladín, Les Regueres, 1906-Uviéu, 1977) ta consideráu una figura relevante na arqueoloxía asturiana del sieglu XX. Llicenciáu en Filoloxía en 1944, empezó les sos investigaciones recoyendo la toponimia menor de la so parroquia natal, Valdunu, que constituyó la so tesis doctoral. Depués del descubrimientu del cercu romanu de Valdunu en 1947, el so llabor investigador empobinóse pa l’arqueoloxía, y dedicó el so tiempu llibre más de 30 años a percorrer Asturies p’alcontrar y documentar xacimientos al aire llibre con industria lítico del paleolíticu, delles estaciones con arte rupestre de la Edá del Bronce, más de 600 túmulos megalíticos, unos 265 castros, xacimientos de dómina romana y murueques de castiellos medievales.

    González combinó nuna completa metodoloxía de trabayu la prospección y el trabayu de campu col estudiu de la topografía de los xacimientos. Publicó dellos llibros y numberosos artículos en revistes especializaes, y les sos investigaciones tomaron tamién campos como la llingüística, la onomástica, la hestoria o’l folclore. Miembru de númberu del Instituto d’Estudios Asturianos, dende 1952 punxo clases na Universidá d’Uviéu y en 1955 ingresó na Real Academia de la Historia.

    Foi autor del primer gran mapa arqueolóxicu d’Asturies, que diba valir de base a les xeneraciones d’historiadores y arqueólogos que llegaron dempués. Nos sos 30 años de llabor investigador, formó un archivu valiosísimu compuestu por fiches de trabayu, cartes, fotografíes y otros documentos, amás d’una biblioteca especializada. Tamién organizó les más de 3.000 pieces arqueolóxiques recoyíes nes sos prospecciones.​​​

  • L’estand d’Asturies en Fitur acoyó unes 350 reuniones profesionales y favoreció 1.784 contactos comerciales

    L’estand d’Asturies en Fitur acoyó unes 350 reuniones profesionales y favoreció 1.784 contactos comerciales

    L’espaciu d’Asturies na Feria Internacional de Turismu (Fitur), premiáu como Meyor estand de comunidaes autónomes y instituciones, acoyó anguaño 343 reuniones profesionales del sector y favoreció 1.784 contactos comerciales.

    Estes cifres reflexen que la decisión d’aumentar la zona espositiva —un 30 % más amplia que l’añu pasáu— llogró bonos resultaos. Tamién influyó nestos rexistros la capacidá d’atracción del propiu estand, dedicáu al turismu de naturaleza y reflexu del apueste del Principáu pol compromisu medioambiental como exa de la competitividá turística.

    La participación d’Asturies na feria tamién tuvo una repercusión importante nos medios de comunicación, reforzada gracies a la realización nel mesmu estand de más d’un centenar d’entrevistes en distintu formatu a representantes institucionales y empresariales del sector turísticu rexonal.

    Pela so parte, los perfiles de Turismu Asturies llograron unes 300.000 visualizaciones nes distintes redes sociales. La retresmisión de presentaciones nel estand tuvo cuasi 13.500 visualizaciones y les fotografíes de los eventos publicaes en redes superaron les 40.000 visites.

    La edición de Fitur, clausurada apocayá, recuperó les presentaciones y actividaes nel espaciu d’Asturies, qu’acoyó una ventena d’actos. Ente otros, destaquen la mesa redonda sobre la cultura sidrera asturiana y l’espaciu temáticu dedicáu a la Cocina de Paisaxe, onde se celebraron diverses demostraciones gastronómiques.

  • Asturies amplía’l so espaciu en Fitur

    Asturies amplía’l so espaciu en Fitur

    El Gobiernu d’Asturies va participar na 42 Feria Internacional de Turismu (Fitur) col enfotu de reforzar énte profesionales y visitantes el lideralgu de la comunidá como destín de naturaleza y bienestar, seguro y sostenible. La Cocina de paisaxe y la candidatura de la cultura sidrera a patrimoniu inmaterial de la Unesco van tener tamién el so protagonismu nel estand asturianu.

    La viceconseyera de Turismu, Graciela Blanco, presentó güei los detalles xenerales del espaciu del Gobiernu d’Asturies na feria, que va abrir les sos puertes el miércoles, día 19, y va rematar el domingu 23. L’espaciu crez nesta edición un 30%, hasta algamar 901 metros cuadraos, de cuenta que gana amplitú pal área destinada a los alcuentros profesionales y pa la zona de presentaciones.

    D’acordies col apueste del Principáu pola sostenibilidá y el compromisu medioambiental, l’espositor se construyó y decoró con materiales sostenibles, reciclaos y reciclables. Nel so interior van asocedese más d’una ventena de presentaciones de proyectos, iniciatives y eventos impulsaos por promotores del sector turísticu, tantu públicos como privaos. Ente los actos más destacaos figura la celebración xuna mesa redonda sobro la cultura sidrera y l’esposición de los planes de sosteniblidad turística financiaos con fondos europeos. La gastronomía tamién va ser protagonista, con talleres desenvueltos por embaxadores de Cocina de paisaxe.

    Per otra parte, Asturies va tar presente en dalgunos de los eventos temáticos que s’entamen de forma paralela a la feria, como Fitur MICE, destináu al turismu de xuntes, congresos, eventos ya incentivos pa la contratación especializada nel ámbitu nacional ya internacional. Tres les xornaes dedicaes a profesionales y empreses, mientres la fin de selmana Fitur va abrir les sos puertes al públicu xeneral.

    L’espaciu d’Asturies na feria va ufiertar diverses actividaes d’animación centraes fundamentalmente na gastronomía y realizaes por aciu xuegos y interaccciones colos visitantes

  • Asturies lidera la recuperación del sector turísticu en payares con un aumentu de visitantes d’aproximao’l 700 %

    Asturies lidera la recuperación del sector turísticu en payares con un aumentu de visitantes d’aproximao’l 700 %

    Los agospiamientos asturianos recibieron en payares 98.952 turistes que xeneraron 202.132 pernoctaciones, según los datos publicaos güei pol Institutu Nacional d’Estadística (INE). Estos datos suponen xubíes del 698,7 % y 592,9 %, respectivamente, sobre los del mesmu mes del 2020.

    La xubida produzse nun contestu de crecedera global tanto pa España como pa la España Verde, y asitia a Asturies a la cabeza d’esta medría, que pal conxuntu del país xubió al 360,37 % en turistes y al 360,73 % n’estancies sobre payares del 2020. Tocantes a les comunidaes de la España Verde la crecedera foi del 408,55 % y 297,97 %, respectivamente.

    GLOBAL AGOSPIAMIENTOS – Númberu de Viaxeros – Payares 2021

    2020 2021 Evol.2020–2021
    Asturies 12.389 98.952 698,71%
    Cantabria 10.909 69.918 540,92%
    Galicia 57.351 245.794 328,58%
    Euskadi 47.008 234.530 398,92%
    España Verde 127.657 649.194 408,55%
    ESPAÑA 1.390.251 6.400.337 360,37%

     

    GLOBAL AGOSPIAMIENTOS – Númberu Pernoctaciones – Payares 2021

    2020 2021 Evol.2020–2021
    Asturies 29.172 202.132 592,90%
    Cantabria 24.959 145.682 483,69%
    Galicia 147.962 468.232 216,45%
    Euskadi 117.102 454.246 287,91%
    España Verde 319.195 1.270.292 297,97%
    ESPAÑA 4.330.842 19.953.526 360,73%

    El datu acumuláu del periodu xineru-payares rexistró xubíes pa tolos tipos d’agospiamientu n’Asturies. Destaca l’alza n’hoteles, con un 43 % más de turistes y 45 % más de pernoctaciones. Asina mesmo, la ocupación nos apartamentos xubió’l 27,3 % y 42,8 % respectivamente, y el 24 % y el 22 % en dambos parámetros nos campings. A lo últimos, los agospiamientos de turismu rural crecieron el 19,7 % en turistes y el 19,3 % en pernoctaciones.

    Nel cómputu global de los once primeros meses del añu rexistráronse 1.698.186 turistes y 4.701.666 estancies, lo que supón xubíes del 36,1 % y 34,7 % sobre’l 2021. Los hoteles aportan el 70 % de viaxeros y el 56,3 % de les nueches vendíes.

  • Sofía Castañón ye la nueva líder de Podemos Asturies

    Sofía Castañón ye la nueva líder de Podemos Asturies

    Sofía Castañón ta acabante d’algamar la victoria nes disputaes eleiciones primaries de Podemos Asturies. La candidata, que lluchaba pol puestu escontra Daniel Ripa, anterior líder de la formación morada, va ser dende agora la figura clave del partíu n’Asturies, abriendo una nueva etapa que, según la so campaña, que llevaba por nome «Puxu!», sedrá d’asturianismu y feminismu.

    Les primaries fueron mui disputaes ya inclusive Daniel Ripa, antiguu líder, pidió la paralización del recuentu por apreciar irregularidaes. Sicasí, nun hebo parón y esta mañana fízose oficial el resultáu de los comicios de la formación morada, namás con una diferencia de 100 puntos ente los dos candidatos.

  • Asturies participa per primera vez nun ensayu clínicu de persones con enfermedá de Huntington

    Asturies participa per primera vez nun ensayu clínicu de persones con enfermedá de Huntington

    La unidá multidisciplinar pa la enfermedá de Huntington del Hospital Universitariu Central d’Asturies (HUCA) participa per primer vez nun ensayu clínicu financiáu pol Institutu de Salú Carlos III con persones portadores d’esta patoloxía neurodexenerativa poco frecuente y complexa. El centru sanitariu va portar una docena de pacientes nos próximos dos años al estudiu doble ciegu sobre la metformina, un antidiabéticu que demostró la so eficacia pa frenar el deterioru que causa esta dolencia n’animales.

    L’Institutu d’Investigación Sanitaria de La Fe (Valencia) llidera la investigación na que participen, amás del hospital de referencia d’Asturies, l’Hospital Xeneral Universitariu d’Elx; los hospitales de San Pablo y Mare de Deu de la Mercè, de Barcelona; y l’Hospital Universitariu de Burgos.

    Les persones con enfermedá de Huntington manifiesten trestornos del movimientu, como corees (movimientos involuntarios abruptos, irregulares y de duración curtia), distonías, alteraciones de la marcha o parkinsonismo; deterioru cognitivu y trestornos psiquiátricos (depresión y psicosis). La edá media a la qu’apaecen estos síntomes asítiase alredor a los 50 años.

    N’Asturies, envalórase que más de 150 persones tienen la mutación que provoca la enfermedá, que la so prevalencia ye de 58 casos por millón d’habitantes.

    N’Europa, más de 40.000 persones sufren esta patoloxía y calcúlase que 160.000 tán en riesgu de desenvolvela, yá que son portadores de la mutación de la proteína denominada huntingtina (encargada del tresporte y la comunicación dientro de les célules nervioses del celebru) qu’anicia esta patoloxía. Esta mutación ye autosómica dominante, esto ye, que la metá de los descendientes tienen la posibilidá d’heredala.

    Conseyu xenéticu

    La unidá multidisciplinar d’enfermedá de Huntington del HUCA, creada en marzu, ta ellaborando un rexistru epidemiolóxicu d’esta patoloxía, que va permitir la participación n’ensayos clínicos ya investigaciones. Amás, centraliza l’atención de pacientes sintomáticos y el diagnósticu precoz de los portadores asintomáticos. Al tiempu, apurre a estos últimos conseyu xenéticu y accesu a técniques de selección d’embriones, con cuenta de los sos descendientes nun seyan portadores de la mutación.

    L’equipu ta integráu por profesionales de neuroloxía, psiquiatría, neuropsicoloxía y enfermería, y recibe el sofitu de los servicios de xenética, rehabilitación, nutrición, trabayu social y llogopedia, al repercutir esta patoloxía na calidá de vida de pacientes y families, amás de causar un gran impactu sociosanitariu.

    Nuna primer consulta y nuna mañana, los profesionales realicen les valoraciones neurolóxica, psiquiátrica y neuropsicológica de los pacientes, tres la qu’ellaboren un informe médicu colos encamientos terapéuticos, farmacolóxicos y non farmacolóxicos.

    Nel casu de los pacientes sintomáticos, sométese-yos a siguimientu trimestral o semestral, en función del so estáu; ente que los portadores asintomáticos tienen una revisión añal con valoración neurolóxica, neuropsicolóxica y psiquiátrica.

    La unidá protocolizó la posibilidá de consulta virtual colaborativa col médicu de familia de les persones trataes, de manera qu’haya una continuidá asistencial qu’evite desplazamientos innecesarios al hospital. Amás, habilitóse una consulta telefónica n’horariu de 8 a 15 hores y un corréu electrónicu p’atender duldes.

    Dende la puesta en marcha d’esta unidá, incluyéronse trés pacientes asturianos con esta patoloxía nel rexistru internacional ENROLL-HD, una plataforma d’investigación clínica integrada por más de 23.000 afectaos de tol mundu. Esti rexistru inclúi un bancu de datos y muestres biolóxiques que permite la selección de participantes n’ensayos clínicos.

  • Asturies ye la comunidá con más municipios reconocíos por Unicef como ciudaes amigues de la infancia, con un total de 44

    Asturies ye la comunidá con más municipios reconocíos por Unicef como ciudaes amigues de la infancia, con un total de 44

    Asturies ye la comunidá con más conceyos reconocíos por Unicef como ciudaes amigues de la infancia, con un total de 44, y la que llogró más distintivos d’estes característiques en relación col númberu d’habitantes. El sellu reconoz el compromisu de les alministraciones locales col cumplimientu de los derechos de los menores, acordies con la Convención sobrr los Derechos del Neñu.

    La conseyera de Derechos Sociales y Bienestar, Melania Álvarez, destacó estes cifres nel actu conmemorativu del Día Universal polos Derechos de la Infancia celebráu esta mañana en Les Arriondes, onde recordó que más 1.500 menores asturianos formen parte de los grupos de participación infantil y xuvenil y que dos de cada trés son neñes.

    La conmemoración incluyó la presentación del programa Infancia por un conceyu saludable, la esplicación del proyectu La lliga pola Tierra, curiemos el mediu ambiente; a cargu del grupu de participación infantil y xuvenil del conceyu de Parres, y l’esposición de trabayos realizaos pol alumnáu del Colexu Públicu Ríu Sella.

    Álvarez señaló qu’el so departamentu trabaya nuna nueva Llei d’Infancia y Adolescencia que garantiza y promociona los derechos de los menores y pon l’acentu na so dignidá como persones, mesmo que na so condición de ciudadanos. “El siguiente trámite previstu ye la redacción del primer testu de la norma pa la so posterior información pública. Tamos convencíos de qu’esta lexislación va actualizar l’atención a la infancia, adaptándose a les sos necesidaes y blindando los sos derechos”, aseguró.

    La conseyera tamién destacó la participación de la población infantil na ellaboración de la llei. Nesti sentíu, recordó que dende’l so departamentu púnxose en marcha una campaña, qu’inda sigue vixente, na qu’al traviés de los grupos de participación infantil y xuvenil, los conceyos y los centros de menores anima a los pequeños a que plantegen les sos aportaciones a la norma pa recoyeles nun documentu.

    “Esti Gobiernu sabe que lo que piensen los neños y los adolescentes ye fundamental y les sos aportaciones van tenese en cuenta, non solo agora, col diseñu de la llei, sinón col trabayu constante que faemos dende l’Institutu Asturianu pa l’Atención Integral a la Infancia y les Families al traviés de les xornaes de participación”, afirmó Álvarez.

  • El nuevu plan de vialidá invernal refuerza los protocolos de seguridá na rede de carreteres del Principáu

    El nuevu plan de vialidá invernal refuerza los protocolos de seguridá na rede de carreteres del Principáu

    El Principáu punxo en marcha’l plan de vialidá ivernizu col que cada añu busca garantizar la seguridá nes carreteres asturianes, tanto de les persones usuaries como de quien trabayen para caltener en bon estáu de la rede de titularidá autonómica. El plan va tar vixente hasta’l 30 d’abril.

    El conxuntu d’actuaciones previstes, que s’integren dientro del plan de Protección Civil énte’l riesgu de nevaes, céntrase en prevenir, evitar y embrivir los efectos que los fenómenos meteorolóxicos (nieve, xelu, xarazu, agua, borrina y vientu) causen nes víes mientres la temporada iverniza.

    La Dirección Xeneral d’Infraestructures Viarias y Portuaries cuenta pa esti fin con un equipu humanu compuestu por más de 50 trabayadores y un parque móvil integráu por 28 quitanieves, 7 fresadores y 2 vehículos touterrén provistos con cuñes, a los que nes próximes selmanes van sumase otres 9 quitanieves y un camión-grúa.

    Los recursos humanos y materiaes tán dividíos en nueve zones d’actuación per tol territoriu, especialmente preparaos pa intervenir nes carreteres que sufren con mayor frecuencia les consecuencies de fenómenos meteorolóxicos adversos. La rede rexonal suma 374 kilómetros de viales allugaos a altitúes superiores a los 800 metros, de los que 175 asítiense pencima de los mil metros.

    El nuevu plan prevé facilitar les actuaciones d’emerxencia cuando les envernaes tengan especial incidencia en víes asitiaes per debaxo de los 800 metros. Tamién clasifica los escenarios meteorolóxicos en trés tipos: envernaes de nieve o de xelu ensin peligru d’ádenes o con baxu riesgu; riesgu d’ádenes tres envernada de nieve y ventisques, a los qu’asigna un conxuntu d’actuaciones singulares.

    Otra novedá ye que’l personal responsable del caltenimientu y el caltenimientu ivernizu va dir provistu d’un sistema de rescate de víctimes d’ábanu que se va caltener operativu mientres tola xornada llaboral.

     

    Nuevu protocolu d’actuación énte situaciones de riesgu

    El plan de vialidá ivernizu integra un nuevu protocolu d’actuación énte situaciones de riesgu y/o emerxencies meteorolóxiques como ventisques, foles de fríu, xelaes, nevaes y ádenes. Va tar operativu en tola rede y va emprestar especial atención a cinco carreteres: l’accesu a Sotres (AS-264) y los puertos de Tarna (AS-117), San Isidro (AS-112), Ventana (AS-227) y Somiedu (AS-228).

    Pa evaluar el riesgu d’ádenes va cuntase col sofitu de técnicos especialistes n’observación nivometeorolóxica y d’ádenes (nivólogos) que se van coordinar col personal de la Dirección Xeneral d’Infraestructures Viaries y Portuaries. El funcionamientu va basase nel siguimientu de les alertes que xenera l’Axencia Estatal de Meteoroloxía (Aemet), que los nivólogos van verificar y van ampliar sobre’l terrén.

    Esti protocolu inclúi cuatro escenarios distintos: riesgu baxo (nivel 1), previsión de riesgu n’aumentu (nivel 2), riesgu alto (nivel 3) y riesgu bien alto (niveles 4 y 5). Cuando s’afiten niveles de riesgu superior al 3 o nivel altu, la Dirección Xeneral d’Infraestructures Viarias y Portuaries va avisase al 112 y va proponese el zarru de la carretera a la Central Operativa de Tráficu (COTA), que va ser l’órganu que tome la decisión.

    Una vegada evaluáu’l riesgu pola COTA, la Dirección Xeneral d’Infraestructures Viaries y Portuaries va señalizar el tramu de carretera como abiertu, abiertu con precuru, abiertu con cadenes o zarráu. En casu de zarru, van tomase les midíes oportunes pa restablecer el tráficu lo antes posible en condiciones de seguridá pa usuarios y trabayadores.