Llaboral Ciudá de la Cultura acueye la segunda edición del Festival d’Artes Escéniques n’Espaciu Singular Rincones y Recovecos. Va celebrase del 19 al 21 de setiembre. Teatru, maxa, clown y títeres van enllenar distintos espacios de la Llaboral con propuestes escéniques abiertes a tolos públicos a partir de 6 meses. Va haber hestories dientro d’una caravana, n’una carpa, dientro de la Ilesia y na Sala de Pintures. Estes obres van somorguiar a los espectadores nuna esperiencia teatral distinta.
‘Secreto de familia’ de Tras la Puerta Títeres, ‘La máquina’ de Héctor Sansegundo, ‘La Encerrona’ de Pepe Viyuela son los primeros espectáculos confirmaos pa esta edición del festival Rincones y Recovecos de Llaboral. Amás, van representase ‘Pinxit’ de Baychimo Teatro y ‘En un rincón de la galaxia’ de Teatro del Cuervo. Tamién va tener llugar l’estrenu absoltu de ‘Umbilical’ de Cal y Canto. El programa va completase en selmanes vinientes con nueves obres.
Los abonos para Rincones y Recovecos tan yá a la vienta. Pueden comprase na Recepción de la Llaboral, nel Centru Niemeyer d’Avilés, na Oficina d’Información Turística d’Asturies (CITPA) n’Uviéu, na web entradas.liberbank.es, nel teléfonu 902 106 601 y na rede de caxeros Liberbank.
Tornen les visites guiaes n’asturianu de XixónTours. Tres l’ésitu de la iniciativa esti iviernu, la plataforma d’información sobre ociu y turismu VerAsturies y Cuatro Gotes Producciones retomen esti branu’l ciclu de visites guiaes temátiques n’asturianu. XixónTours ye una iniciativa pa dar a conocer Xixón a los propios habitantes del conceyu y a los asturianos en xeneral, asina como a cualesquier persona que viniendo d’otros llugares quieran averase a conocer distintos aspectos de la mesma sintiendo la visita n’asturianu.
Les visites guiaes n’asturianu de XixónTours tán diseñaes pa buscar un averamientu orixinal a la hestoria de la ciudá, tratando de da-y un enfoque diferente. Les visites d’esta segunda edición del ciclu XixónTours diseñáronles espertos nes cuestiones trataes en caúna de les temátiques de les mesmes, como Arantza Margolles, Daniel García de la Cuesta ya Inaciu Galán. Nesta ocasión van volver a facese trés rutes temátiques:
Xixón mete mieu. Vienres 14, 21 y 28 a les 22 hores.
Una ruta que va averar a los visitantes a los llugares hestóricos de la ciudá onde se produxeron asesinatos, matances, invasiones sangrines, apaiciones de pantasmes y lleendes. Una visita n’horariu nocherniegu pa conocer los sitios más escuros, terroríficos y misteriosos de la hestoria de Xixón.
Escritores n’asturianu en Xixón. Sábadu 22 a les 12 hores.
Munches cais y places de Xixón escuenden trozos de la hestoria de la lliteratura asturiana. El desapaecíu quioscu de Pachín de Melás na Plaza del 6 d’agostu, el Teatru Xovellanos, el conventu de Cimavilla, asina como espacios qu’apaecen na obra d’autores contemporáneos como María Teresa González, Pablo Antón Marín Estrada o Vicente García Oliva. Una visita onde lliteratura y hestoria xúntase pa dar a conocer la ciudá.
Muyeres na hestoria de Xixón. Sábadu 8, 15 y 29 a les 12 hores.
La muyer, tapecida siempres na hestoria, apruz nesta visita guiada per Xixón. Una visita a la ciudá onde se falará de muyeres importantes na hestoria de la ciudá. Xosefa Xovellanos, Aurora Sánchez, Corín Tellado, María González La Pondala, Concha Mori, Pepa Osorio, María Teresa González… Too ensin escaecer a los colectivos de muyeres anónimes que tanto marcaron el carácter d’esta villa, como les cigarreres y les pescaderes, nin les tradiciones como la de les comadres. Falaráse del papel de la muyer na sociedá, dende la falta de visibilidá hasta llegar a cuntar con alcaldeses.
Les visites tienen un costu de 6 euros pal públicu xeneral y 3 euros pa menores de 18 años. Ye obligatorio inscribise na páxina web verasturies.com a lo menos con un día d’antelación. El pagu faise al entamu de la visita n’efectivu. Pa más información o duldes pueden ponese en contacto nel corréu redaccion@verasturies.com
El proyectu xestiónalu VerAsturies.com, al traviés de Cuatro Gotes Producciones y cunta col sofitu de la Oficina de Normalización Llingüística de Xixón y la collaboración de Xixonaldia.com.
Nueva visita guiada solidaria pela ciudá. Turismu Xixón entama un percorríu pel cascu hestóricu de la mano d’escritores qu’escoyeron el barriu como escenariu pa les sos noveles. Atravesando les places más típiques de Cimavilla, dende la plaza’l Marqués, pasando pela Plaza Mayor, la Tabacalera o la Plazuela Xovellanos, vamos escubrir aspeutos del Xixón de la so dómina que van aidanos a comprender un poco más la nuesa hestoria. Los rellatos de Pachín de Melás, José Fernández Barcia, Manuel Vega y Joaquín Alonso Bonet, ente otros, van acompañanos nun paséu nel que Xixón va ser la protagonista auténtica.
‘Xixón lliterariu’ ye la propuesta pa esti mes de xunu que forma parte del ciclu de visites guiaes solidaries que Xixón Turismu entama a lo llargo de 2019. Nesti casu, tolo recaudao va detinase al programa de sofitu a la infancia, adolescencia y families en riesgu de dixebra y pobreza n’ España, xestionáu por Ayuda en Acción.
La visita va realizase tolos sábados del mes (1, 8, 15, 22 y 29 de xunu) a les 12:00h y tien un coste de 5 euros. El puntu d’alcuentru va ser la oficina d’Infoxixón (Fomento). La visita tien una duración aproximada de 2 hores. Ye preciso inscribise previamente llamando al 985 341 771 o escribiendo al corréu lletrónicu: infogijon@gijon.info
La xira del musical de West Side Story va llegar Xixón a finales d’añu. La versión orixinal íntegra cola qu’esti musical míticu debutó nel Winter Garden Theatre(Broadway, 1957) estrenaráse per primer vegada n’Asturies. Hai siete funciones programaes: xueves 28 de payares de magar les 20.30 hores, el vienres 29 y el sábadu 30 a les 18 y les 22 hores, y el domingu 1 d’avientu a les 17 y les 20.30 hores.
Dende la primer nota hasta l’últimu suspiru, ‘West Side Story’ ye ún de los musicales más importantes y representativos del teatru universal. La partitura al cargu de Leonard Bernstein y Stephen Sondheim ye unánimemente reconocida como una de los meyores na hestoria de los musicales. El testu d’Arthur Laurens sigue siendo tan conmovedor y actual como’l primer día. Y les coreografíes orixinales de Jerome Robbins ocupen un llugar d’honor na lleenda del baille contemporaneu. De la so mano, la más grande hestoria d’amor toma les cais de Broadway para convertise n’ún de los iconos del teatru musical.
La más grande hestoria d’amor toma les cais de Broadway para convertise n’ún de los iconos del teatru musical
Arthur Laurens tresporta al Romeu y Xulieta de Shakespeare a la ciudá de Nueva York. Dos nuevos namoraos vense atrapaos pol enfrentamientu ente dos bandes caleyeres, los americanos Jets y los puertorriqueños Sharks. La so llucha por sobrevivir nun ambiente d’odiu, violencia y prexuicios tresfórmase nuna de les hestories más emocionantes, desgarradores, belles y relevantes del teatru musical.
Les entraes pa ver el musical de ‘West Side Story’ en Xixón tan yá a la venta a un preciu d’ente 42 y 59 euros. Pueden comprase na recepción de Laboral Ciudad de la Cultura, nel Centru d’Información Turística del Principáu d’Asturiesd’Uviéu, nel Centro Niemeyerd’Avilés, n’entradas.liberbank.es, nel 902 106 601 y red de cajeros Liberbank. Los usuarios del Pasaporte Cultural y socios del Club Cultura Asturiaspueden beneficiase d’un descuentu del 10% aplicable a un máximu de 75 localidaes/función hasta’l 6 de payares.
L’Asociación Cultural D’Aky celebra esti domingu de mayu’l so yá tradicional mercáu de muyeres artesanes na Ciudadela de Capua. L’horariu va ser ininterrumpíu de 11 a 18 hores. Amás de 12 a 13.30 hores va haber un taller gratuitu de «ellaboración d’un cuélebre volador» entamáu pola asociación Desfaciendo Maíz.
Una ventena de puestos van acoyer a muyeres artesanes de toa Asturies con una gran cantidá de productos: xoyes, complementos, bolsos, bixutería en magre poliméricu y vidriu recicláu, sombreros y tocaos, madera, cueru, cordura, puntu y crochet, xuguetes, muebles restauraos y repostería.
L’asociación considera «bien importante visibilizar el trabayu de les muyeres artesanu y empresariu y promover les sos opciones d’empléu». Por ello, reivindiquen la creación d’espacios d’alcuentru «onde les muyeres puedan esponer les sos moliciones y arriquecese mutuamente». Amás, esixen la dinamización de l’actividá comercial de les muyeres artesanes.
L’Asociación Cultura D’AKY ta constituyida por muyeres con una especial sensibilidá escontra la situación de desigualdá de xéneru. Conscientes d’esta realidá, y pa facer más visible’l so trabayu, surde la idea d’entamar esti Mercáu Artesanal de Muyeres onde esponer los sos productos.
La compañía asturiana Proyecto Piloto va representar Danza para niños kinkis esti domingu 26 de mayu, a les 17:30 hores, nel Teatru de la Llaboral. Proyecto Piloto va llevar al públicu dende les fondures marines hasta l’espaciu esterior con cuatro micro histories coloristes y surrealistes encetaes dende la música, la danza y les artes visuales.
Ángel Zotes, Rosario Granell, Mariate García y Rebeca Martín van ser los baillarinos encargaos de tresportar a los espectadores a distintos ya insólitos mundos al traviés del color, el ritmu y la fantasía, dexando fluyir llibremente la imaxinación de tol públicu como si d’un ensoñamiento colectivu se tratara. Danza para niños kinkis cuenta con música en directu de Violeta Nureyev y cola escenografía y visuales de Patricia y Carmen Vázquez.
Proyecto Piloto ye una compañía de danza que naz en Xixón nel añu 2007, cola molición y necesidá d’investigar sobro’l llinguaxe del cuerpu, la so vida, el so movimientu y tolo que lu arrodia. Atopar nun momentu de desenvolvimientu tres la realización de pieces como …En construcción… (2008), Agospiando Coraes y La Masa Dancia (2009), Espaciu Improvisáu (2011) y ALICIA en… la primera propuesta que la compañía dirixió al públicu infantil, abriendo un nuevu campu d’investigación.
Les localidaes pueden adquirise a un preciu xeneral de 6 euros y amenorgáu de 5 euros pa socios del Club Cultura Principáu d’Asturies y Pasaporte Cultural hasta esti sábadu. Les entraes pueden mercase na Recepción de la Llaboral, nel Centru Niemeyer n’Avilés, na Oficina d’Información Turística d’Asturies n’Uviéu, na web entraes.liberbank.es, nel teléfonu 902 106 601 y na rede de caxeros Liberbank.
Laboral Cinemateca estrena nes slmanas vinientes tres imprescindibles títulos del cine d’animación européu y que fueron yá proyectaes y premiaes nos más prestixosos festivales internacionales del xéneru: ‘Funan‘ (premiu n’Annecy), ‘Buñuel en el laberinto de las tortugas‘ (premiada en Málaga y Los Ánxeles) y ‘Ruben Brandt, collector‘ (presentada en Locarno y premiada en Sevilla).
En ‘Buñuel en el laberinto de las tortugas‘, Salvador Simó fai una emocionante y lluminosa adaptación del cómic de Fermín Solís pa remembrar los acontecimientos anteriores y posteriores al rodaxe de ‘Las Hurdes: tierra ensin pan’, el desolador documental col que’l cineasta de Calanda volvió escupuliciar al mundu y que lo tresformaría para siempres. Simó recrea’l momentu en que Buñuel dexa atrás la solombra de Dalí y el surrealismu y embárcase nel rodaxe d’una película que cuestiona lo que ye la mirada documental, l’autor frente a la realidá y sobremanera, si tolos medios son lícitos para consiguir una obra cinematográfica… anque ésta sía, a lo postrero, una obra maestra de la Hestoria del Cine. ‘Buñuel en el laberinto de las tortugas’ proyectaráse’l sábadu 25 de mayu a les 20 hores nel Paraninfu de la Llaboral.
La reconocencia como Meyor llargumetraxe nel Annecy International Animated Filme Festival, el certame d’animación más prestixosu del mundu, y el Premiu Cinéfilos del Futuru del Festival de Sevilla, ente otros, avalen a ‘Funan‘ como una de les películes d’animación del momentu, que podrá vese en Xixón el domingu 19 de xunu a les 19:30 hores. Denis Do debuta nel cine como director y guionista reconstruyendo la memoria del xenocidiu camboyanu que-y tresmitió la so madre. Asina, asítianos en Camboya, en 1975, para cuntar, con gran sensibilidá y un estilu conteníu, la increíble y poderosa hestoria d’una madre moza que llucha por salvar al so fíu y por caltener la familia xunida nos crueles tiempos de los Jemeres Coloraos.
Poques animaciones pa adultos tan sorprendentes y briosas como esta hipnótica y fascinante ‘Ruben Brandt, collector‘, que tuvo’l so estrenu mundial na famosa Piazza Grande de Locarno énte 7.000 espectadores y que s’alzó colos premios a Meyor guion y a meyor ópera prima nel Festival de Sevilla. va poder vese en Llaboral Cinemateca’l vienres 21 de xunu a les 20:00 hores.
L’arte, el psicoanálisis y el cine entemécense nel primer llargumetraxe de Mirosrad Krstic, un entreteníu y azogosu homenaxe a la hestoria del arte que se mueve ente’l noir posmoderno y el thriller pa cuntar la hestoria de Ruben Brandt, un psicoanalista que sufre tarrecibles velees protagonizaes por trece famoses pintures -de Botticelli a Hopper, pasando por Velázquez o Picasso- que tendrá de robar pa superar les sos traumas.
Les entraes para les proyecciones pueden adquirise, a un preciu xeneral de 4 euros y reducíu de 3 euros na Recepción de Llaboral Ciudá de la Cultura en Xixón, na Recepción del Centru Niemeyer n’Avilés, nel Centru d’Información Turística del Principáu n’Uviéu, n’entraes.liberbank.es, nel teléfonu 902 106 601 y na rede de caxeros Liberbank.
Pint of Science (PoS) 2019, el festival de divulgación científica que propón un alcuentru ente el investigadores y el públicu nos chigres, llega los díes 20, 21 y 22 de mayu a Xixón. La quinta edición sigue batiendo récords: 387 eventos en 148 chigres de toa España, cola participación de 784 científicos como ponentes y más de 400 voluntarios na organización. El programa completu, con direcciones de chigres, temes y horarios, yá puede consultase na web https://pintofscience.es/.
España ye anguaño’l segundu país con más sedes de PoS nel mundu, namá superada per Brasil, con 87 ciudaes. El festival tien calter internacional y va celebrase nes mesmes feches en más de 400 ciudaes de 24 países de los cinco continentes. «Tanto la ciencia como los que la faen posible inda siguen siendo unos desconocíos pal ciudadanu d’a pies. Por ello, PoS pretende averar a el investigadores al públicu, aprovechando l’ambiente relaxao y amigable de los chigres, pa facilitar la so interacción», señala Laurent Ladépêche, unu de los trés coordinadores nacionales de PoS 2019.
A la quinta edición del festival sumir 17 ciudaes más qu’en 2018 (56). Nun llinguaxe comprensible y cercano, los investigadores más piqueros del panorama nacional van falar sobro proyectos de les árees más variaes, de Neurociencia a Astrofísica, de Medicina a Hestoria, de Supercomputación a Matemátiques, d’Economía a Zooloxía.
En Xixón van ser los chigres Savoy Club y El Patio de la Favorita los escenarios escoyíos por que científicos realicen estes charres afeches y especialmente diseñaes pa llegar al públicu sobro les últimes investigaciones científiques. Esta actividá ta enmarcada dientro de les xornaes de Divulgación Científica ‘Xixón con Ciencia’.
Conocer la hestoria industrial de Xixón y, al mesmu tiempu, collaborar col Centro de Iniciativas, Solidaridad y Empleo (CISE). Ye la propuesta pa mayu que forma parte del ciclu de visites guiaes solidaries que Xixón Turismu entama esti añu.
La visita empecipia en Fomentu, llugar que sirvió como puertu pesqueru, carboneru ya industrial. El percorríu sigue per Cimavilla y l’antigua Fábrica de Tabacos. Darréu, visítase la Casa Natal de Xovellanos, la plaza Mayor, Campu Valdés y la Escalerona, zona d’espardimientu y de balnearios a finales del XIX. La visita termina na Ciudadela Celestino Solar, ún de los pocos exemplos de vivienda obrera que se caltuvo hasta los nuesos díes y que sirve pa conocer les condiciones de vida de les families obreres de finales del XIX y principios del XX.
La visita va realizase los díes 18 y 26 de mayu a les doce de la mañana y y va costar cinco euros. El puntu d’alcuentru ye la oficina d’Infoxixón en Fomentu. La duración aproximada de la visita ye de dos hores. Ye preciso inscribise llamando al teléfonu 985 341 771 o escribiendo un corréu lletrónicu a infogijon@gijon.info. Tolo recaudao nes visites va dase al Centro de Iniciativas, Solidaridad y Empleo (CISE).
