Xixón al día

Etiqueta: Conceyu de Xixón

  • Xixón va tresformar la ciudá al traviés de más de 42.800 puntos d’allumáu intelixente

    Xixón va tresformar la ciudá al traviés de más de 42.800 puntos d’allumáu intelixente

    La Xunta de Gobiernu aprobó estos díes el contratu d’allumáu intelixente col que se va tresformar la ciudá a lo llargo de los próximos 15 años, al traviés de la infraestructura del allumáu. Cuenta con un presupuestu de 204’1 millones d’euros y va garantizar un aforru mínimo d’enerxía del 45’33% y unu amenorgamientu d’emisiones de CO2 d’un 30% al añu.

    Mientres los trés primeros años tienen d’invertise 23 millones d’euros, a razón de: 19’5 millones na renovación integral del allumáu, 2’3 millones pa l’aplicación intensiva de tecnoloxía y del internet de les coses, col envís de consiguir una meyora de la eficiencia enerxética, 3’5 millones que se van invertir en, pelo menos, 25 edificios del Conceyu.

    L’axudicataria d’esti contratu va ser la encargada d’invertir esos 23 millones d’euros, ente que’l Conceyu va presentar a convocatories de sovenciones d’ayudes al traviés del Plan Nacional de Recuperación, Tresformamientu y Resiliencia; l’Axenda Dixital Española 2025; el Plan Nacional Integráu d’enerxía y Clima; el Pactu Verde Européu; y el fondu de recuperación européu ‘Next Generation’. Con too ello el Consistoriu va poder siguir invirtiendo en nuevos espacios intelixentes que xeneren mayores aforros y prestaciones para les persones.

    Ente otres midíes, el plan contempla la renovación de 42.800 puntos d’allumáu, la totalidá de los esistentes na ciudá, la renovación de 24.800 dispositivos consumidores d’enerxía n’edificios, la instalación de 250 puntos d’accesu a internet con wifi per tol conceyu y la instalación de 6.446 detectores de presencia pa consiguir más aforros d’enerxía.

  • ‘Hasta aquí hemos llegado’, de Antonio Fontana, Premiu Café Xixón 2020

    ‘Hasta aquí hemos llegado’, de Antonio Fontana, Premiu Café Xixón 2020

    La novela Hasta aquí hemos llegado, de Antonio Fontana (Málaga, 1964) resultó ganadora de la edición d’anguaño del Premiu Café Xixón. El gallardón convoca’l Conceyu de Xixón con una dotación de 20.000 euros. Fontana yá fuera finalista nesti mesmu premiu en 2003 con El perdón de los pecaos.

    Aconceyáu, per primer vegada telemáticamente, el xuráu compuestu por Mercedes Monmany, Rosa Regàs, Antonio Colinas, Marcos Giralt Torrente y José María Guelbenzu, en calidá de presidente, decidió conceder el galardón a la novela por dos cualidaes fundamentales: «La primera ye que se trata d’una visión tan sutil como insólita de la ancianidad; la segunda, el riesgu qu’asumió l’autor al crear un conxuntu de voces bien caracterizaes, que ruempen colos estereotipos que más circulen na nuesa sociedá y dan una perspectiva complexa, dinámica y tragicómica de dicha etapa vital».

    La hestoria d’Hasta aquí hemos llegado céntrase nun grupu de vieyes que conviven na residencia Peña Hincada, allugada nun llugar indetermináu de la provincia de Málaga. Son muyeres a les que’l tiempu váse-yos en rumiar les sos obsesiones y remembrar les vides que dexaron tras. Elles, feministes ensin sabelo, tracen una semeya despiadada de los homes, con grandes dosis d’incorreición y, sobremanera, d’humor negro, nesti modernu Decamerón nel qu’una de les residentes sume y otra empéñase en topar el so cadabre.

    Autor de cinco noveles

    Fontana ye autor de cinco noveles: Sol poniente (Premio Málaga 2017), Hostal Parisien, Planu detalláu del infiernu, El perdón de los pecaos y De home a home. Llicenciáu en Periodismu, la so trayectoria profesional tuvo amestada al diariu ABC mientres trenta años, diecinueve d’ellos como coordinador de llibros nel suplementu ABC Cultural.

    El Premiu de Novela Café Xixón, que convoca’l Conceyu de Xixón, tien una dotación de 20.000 euros. Dende 2007 Ediciones Siruela publica les obres ganadores del certame. Ente la so nómina de ganadores figuren nomes como César González-Ruano, Ana María Matute, Carmen Martín Gaite y Luis Mateo Díez. José Morella foi’l ganador del añu pasáu cola so novela West End, que va tar presente nesta edición de la Feria de Llibru de Xixón.

  • La Policía Local incorpora diez nuevos axentes como refuerzu de branu

    La Policía Local incorpora diez nuevos axentes como refuerzu de branu

    La Policía Local de Xixón va cunta esti branu con 10 auxiliares. Los nuevos axentes, que fueron presentaos esti xueves na Casa Conceyu, van ser contrataos mientres trés meses, del 15 de xunetu al 15 d’ochobre, como refuerzu para’l branu. Na firma tuvieron presentes el conceyal de Policía Local, José Luis Fernández Fernández, el xefe de la Policía Local, Alejandro Martínez Gallo, y l’inspector de la Policía Local Juan Jesús de la Vega.

  • La Casa Conceyu va allumase colos colores de la bandera LGTBI

    La Casa Conceyu va allumase colos colores de la bandera LGTBI

    La fachada de la Casa Conceyu allumará esta nueche, y mientres tola fin de selmana, colos colores de la bandera LGTBI. El Conceyu de Xixón súmase d’esta forma a la celebración del Día del Arguyu que va tener llugar el domingu 28 de xunu. Al traviés d’esta iniciativa, la ciudá va participar del conxuntu d’acciones y actividaes reivindicatives que se van desenvolver n’Asturies a lo llargo d’esta fin de selmana.

    L’equipu de Gobiernu municipal tomó esta decisión, como alternativa a la bandera que cada añu asitia nel balcón del Consistoriu. El Tribunal Supremu vetó l’allugamientu de banderes ‘non oficiales’ n’edificios públicos.

    El llume de la fachada del edificiu consistorial súmase a los diez bancos colos colores del arcu la vieya distribuyíos por parques y places de la ciudá. Son diez en total repartíos en La Serena, Nuevo Roces, Cimavilla, El Coto y El Polígono. Con too ello, el Conceyu de Xixón quixo manifestar la so defensa de la diversidá y de les llibertaes de cada persona, nun momentu en que los discursos d’esclusión tán tan vixentes.

  • La Biblioteca Xovellanos reabre al públicu

    La Biblioteca Xovellanos reabre al públicu

    La Biblioteca Xovellanos de Xixón reabrió esta mañana al públicu. Les puertes del edificiu van tar, dende les 10:30 hores de mañana, en disposición d’ufiertar a los usuarios los servicios de préstamu previu pidimientu, consulta, información bibliográfica y préstamu interbibliotecariu. Toos ellos emprestaránse na planta baxa de la biblioteca. Pel momentu va caltenese cerraes al públicu les plantes primera y segunda y la sala de prensa y revistes.

    La Biblioteca Xovellanos va tar abierta nos siguientes horarios: de llunes a vienres de 10:30 a 13:00 hores y de 17:30 a 20:45 hores, sábados de 10:30 a 14:00 hores y de 17 a 19:45 hores, y domingos y festivos de 10:30 a 13:45 hores. La Dirección Xeneral de Cultura tien previsto abrir tamién la Biblioteca d’Asturies Ramón Pérez de Ayala, n’Uviéu, nos vinientes díes.

  • Xixón recuperó esta selmana un 76% del tráficu

    Xixón recuperó esta selmana un 76% del tráficu

    Xixon va siguir adaptándose a la nueva normalidá apostando por dar más espaciu a pasiantes y bicicletes. Asina lo defendió esta mañana el conceyal de Movilidá y Mediu Ambiente, Aurelio Martín, nuna entrevista n’Onda Cero. L’edil aseguró que la ciudá recuperó esta selmana’l 76% del tráficu y adelantó que l’equipu de Gobiernu va presentar nos vinientes díes un plan de peatonalización que va llegar «a tolos barrios».

    El conceyal valoró los resultaos de la peatonalización provisional d’un carril n’El Muro. Martín reonoció qu’esta ye una zona «mui simbólica» de la ciudá, pero mostróse satisfechu porque «ta viéndose’l resultáu». Nesti sentíu, l’edil adelantó que’l pieslle al tráficu rodáu d’un carril ente la rotonda del Piles y El Naútico va ampliase «polo menos hasta setiembre». Tamién se van caltener los ciclo-carriles como’l qu’entró en funcionamientu nel carril izquierdu de l’avenida de la Costa. «Queremos que la bicicleta nun seya namás un elementu d’ociu, sinón tamién de tresporte». Martín insistió na necesidá de «dar seguridá» a los ciclistes y destacó qu’hai proyectaos 29 d’estes víes compartíes por coches y bicicletes proyectaos en tola ciudá. «Entamemos pol más conflictivu pa ver cómo evoluciona la situación pa ver cuál ye’l comportamientu del ciclocarril y del tráficu».

    El conceyal refirióse a los trabayos de peatonalización de Claudio Alvargonzález. «Ye un ensanchamientu de lo más natural y urxente que vamos completar esti mes». La peatonalización d’esta cai, que se va caltener tol branu, pretende ampliar l’espaciu de paséu y permitir la instalación de terraces na zona d’aparcamientos. Esi fechu provocó la protesta de los vecinos, que refuguen que s’esanicien 69 places. Martín aseguró que tan sintiendo les sos reivindicaciones. «Ficimos yá una modificación de la nuestra propuesta y agora tamos trabayando n’otra».

    Les peatonalizaciones van siguir. Aurelio Martín adelantó que la so conceyalía ta trabayando nun plan que va ser presentáu nos vinientes díes. «Tenemos d’algamar una ciudá más amigable y vamos facelo en sintonía colos vecinos».

  • Conceyu, patronal y sindicatos alcuerden destinar 53 millones a «reiniciar» Xixón

    Conceyu, patronal y sindicatos alcuerden destinar 53 millones a «reiniciar» Xixón

    El Conceyu de Xixón va destinar 26,8 millones d’euros en 2020 pa desenvolver midíes de promoción económica, empléu y turismu. Esta inversión forma parte del alcuerdu ‘Xixon Reinicia‘. L’alcaldesa de Xixón, Ana González, robló esti xueves l’alcuerdu de concertación social colos axentes sociales y económicos de la ciudá. L’actu, que se celebró nel Salón de Recepciones de la Casa Conceyu, cuntó cola presencia del presidente de la Federación Asturiana d’Empresarios (FADE), Belarmino Feito; y los secretarios de les uniones comarcales d’UXT y Comisiones Obreres, Fernando Díaz y Víctor Manuel Roza, respectivamente, amás con representantes de la Corporación municipal.

    Con esti alcuerdu, el Conceyu de Xixón comprométese a destinar 26,8 millones d’euros esti añu y otros 26,2 millones en 2021 a acciones de promoción económica, empléu y turismu. Na primer fase va poner en marcha un plan de choque destináu a apangar les consecuencies de les midíes de contención del COVID 19. Ente les midíes destaca una convocatoria d’ayudes empobinaes a persones autónomes y micropymes nos sectores más afectaos pol cese d’actividá. Esta convocatoria, dotada con 5 millones d’euros, va ponese en marcha en xunu.

    Esti programa va cuntar con una primer llinia, con un presupuestu de 3,5 millones d’euros. Podrán beneficiase les empreses que quieran reincorporar trabayadores n’ERTE. Concederánse 1.500 euros por cada trabayador a xornada completa que se reincorpore al trabayu. D’acordies colos cálculos del equipu de gobiernu, esta llinia va beneficiar a más de 2.300 trabayadores per cuenta ayena.

    Dientro d’esti primer paquete d’ayudes va incluyise una llínia de subvenciones a los gastos causaos pola reapertura d’establecimientos asina como gastos d’adecuación y alquisición d’elementos de protección de trabayadores y veceros. La dotación d’esta llínea va ser de 1,5 millones d’euros y va poder beneficiar a 3.000 establecimientos. Van poder acoyese a esta convocatoria autónomos y empreses afectaos pola suspensión d’actividá y que tuvieren concedíu un ERTE, que vieren menguar la so facturación un 75% o que, daes les circunstancies, zarraren el so negociu.

    Nesta primer fase tamién se va destinar un millón d’euros al financiamientu de pequenes empreses y autónomos al traviés de Asturgar. Tamién se van poner en marcha un plan de sofitu a la dixitalización del comerciu urbanu dotáu con 300.000 euros, o la realización de campañes de promoción del comerciu y l’hostelería locales.

    Plan d’empleu

    Nel ámbitu del empléu alcordóse, ente otres midíes, la puesta en marcha d’un plan d’empléu estraordinariu. Tendrá un costu de casi 3 millones d’euros, financiáu íntegramente con presupuestu municipal y que va llegar a 100 persones. Prevese la contratación, nuna primer fase, de 30 persones de les bolses yá creaes pa la selección de beneficiarios de los actuales planes d’empléu. Nel mes de payares incorporaríense los 70 restantes tres un procesu selectivu nel que van primar criterios de calter social. Nesta riola incorporaríense les 20 persones previstes nel plan de choque de cultura pal desenvolvimientu de proyectos.

    En cuanto al turismu, reorientáronse tolos programes escontra’l turismu nacional. L’oxetivu ye destacar los valores que faen de Xixón un destín estremáu: espacios abiertos, mar, naturaleza, paseos, gastronomía, compres y cultura. Destaca nesti ámbitu’l diseñu d’una campaña, en collaboración con hoteles y hosteleros, con programes específicos pa xixoneses, convirtiendo la ciudá nel destín turísticu de la mesma ciudadanía.

    L’equipu de Gobiernu y los axentes económicos y sociales comprometiéronse a faer d’ésti un alcuerdu «abiertu y flexible» que s’afaiga a les necesidaes. Pa ello, va crease una comisión de siguimientu y evaluación, que se va axuntar mensualmente.

  • Los partíos ceden 54.666 euros de les sos asignaciones a programes sociales

    Los partíos ceden 54.666 euros de les sos asignaciones a programes sociales

    Pocos son los asuntos que davezu algamen l’alcuerdu unánime de tolos grupos políticos con representación na Casa Conceyu. Sicasí, les siete formaciones presentes n’actual corporación pactaron ceder dos mensualidaes de les sos asignaciones a programas sociales.  Esto ye, 54.666 euros. Trátase d’una partida que los grupos reciben pa desendolcar la so actividá como representantes de los ciudadanos. L’alcuerdu algamóse por unanimidá de los voceros municipales na comisión permanente celebrada’l vienres pela mañana.

    Nel conceyu, tamién se punxo fecha al viniente Plenu ordinariu. Va tener llugar el miércoles 27 de mayu. N’él, presentaránse les primeres modificaciones presupuestaries destinaes a programes venceyaos a la xestión de la crisis de la COVID-19. Otramanera, alcordose convocar el Conseyu Social de la ciudá pal viniente día 25. Nesti conceyu, informaráse de les midíes previstes pa recuperar l’actividá económica y l’empléu. Los voceros municipales tamién pactaron la torna de les comisiones municipales, que van celebrase de manera presencial nel Salón de Plenos.

  • Los chigres van poder ampliar les terraces pa evitar la perda de meses

    Los chigres van poder ampliar les terraces pa evitar la perda de meses

    El Conceyu de Xixón va autorizar la duplicación de la superficie de les terraces pa garantizar que nun se pierdan meses. L’equipu de gobiernu quier asegurar que los establecimientos caltengan les condiciones de la so llicencia. La ocupación de les terraces va llindase al 50% mientres la fase I del procesu de desescalada. Esta ye una de les midíes de sofitu a la hostelería previstes pol Consistoriu, que se van poner sobre la mesa na xunta que van caltener con representantes de OTEA, la Federación d’Asociaciones de Vecinos (FAV), la Unión de Comerciantes y COCEMFE.

    Pa qu’esto sía posible tienen de dase delles circunstancies, ente elles, que se permita’l pasu de persones. Amás, nel casu de que l’aumentu de la terraza ocupe l’escaparate d’una tienda o portal, tendrá de cuntase cola autorización del propietariu o de la comunidá.
    El Conceyu de Xixón nun va cobrar nada por esta ampliación d’espaciu. Los establecimientos hosteleros tamién van tar exentos del pagu de la tasa por instalación de terraces mientres el restu del añu.

    Esta midida va entamar el llunes 11 de mayu y va riquir d’un cambéu na ordenanza reguladora. La propuesta de Conceyu va más allá del períodu de desescalada, permitiendo l’ampliación del espaciu de les terraces hasta’l 30 de setiembre de 2021, por aciu un senciellu procedimientu de prórroga. Amás, va permitise la instalación de más meses si les circunstancies sanitaries lo permiten. La tasa por instalación de terraces volverá a cobrase en 2021, pero ensin tener en cuenta les posibles ampliaciones consecuencia d’esta situación. Los establecimientos que nun cunten con terraza van poder asitiala pa poder abrir yá.

  • L’Estáu d’Alarma retrasa dos meses el fin de les obres de Tabacalera

    L’Estáu d’Alarma retrasa dos meses el fin de les obres de Tabacalera

    La Xunta de Gobiernu, axuntada esta mañana de forma telemática, dio lluz verde a l’ampliación del plazu d’execución de les obres de l’Antigua Fábrica de Tabacos de Cimavilla. Foi la empresa axudicataria, UTE Tabacalera, la que lo solicitó’l pasáu 15 d’abril. La finalización d’estos trabayos taba prevista pa esta fecha, magar que nun foi posible por mor de l’actual crisis sanitaria. Esta situación alterió’l ritmu de los trabayos por cuenta de la adopción de nueves midíes de seguridá y dificultó l’abastecimientu de suministros de materiales y maquinaria.

    Les obres tamién se vieron afectaes pol cese de les actividaes non esenciales dende’l 30 de marzu al 9 d’abril y la esistencia de ciertos trabayos n’antigua Vicaría pendientes d’aprobación pola Conseyería de Cultura. La Xunta de Gobiernu entiende que l’ampliación del plazu d’execución «ta xustificada». D’esta manera, el plazu va ampliase por 2 meses y 15 díes, afitando la fecha de finalización de la obra’l 13 de xunetu de 2020.

    La Xunta de Gobiernu aprobó, amás, una partida de 80.565,67 euros pa la supresión de barreres arquitectóniques en cuatro comunidaes de vecinos. En dos de los edificios va sovencionase la instalación d’un ascensor. Nos otros dos casos el presupuestu va destinase a baxar l’ascensor a cota de cai. Amás, aceptóse’l desistimiento de la subvención nominativa de Expoacción Organización Solidaria pal proyectu Vacaciones en paz 2020. La entidá presentó un escritu onde esplicaba qu’esti proyectu nun va poder llevase a cabu na so totalidá debíu les midíes del estáu d’alarma.