Xixón al día

Etiqueta: elecciones

  • Podemos-Equo apuesta por que’l Grau de Deportes s’implante en Xixón

    Podemos-Equo apuesta por que’l Grau de Deportes s’implante en Xixón

    «L’actividá deportiva ye un de les pilastres fundamentales del Estáu del Bienestar y, nesti sentíu, l’apueste pol deporte de Podemos-Equo Xixón en tolos niveles y modalidaes ye claro”, afirma Yolanda Huergo, candidata a l’alcaldía pola coalición. Dende esti convencimientu, la candidatura defende que Xixón sía la see del Grau de Ciencies de l’Actividá Física y el Deporte: “Equí cúmplense los requisitos fundamentales para faelo posible, dende la Universidá pública y, más allá de localismos, entendemos que Xixón axunta les meyores condiciones para ello”, caltien Huergo.

    Al empar, teniendo en cuenta que los clubes y equipos deportivos son una pata fundamental del texíu social de la ciudá, la coalición considera que ye necesario da-yos toles facilidaes posibles: «Más qu’acorvia-yos con burocracia, tenemos qu’acompañar a esti texíu entainando les ayudes, yá que hai munchos d’esos clubes que nos dan tantes allegríes nos deportes dependen d’esta collaboración pública para sobrevivir, pero frecuentemente tienen de faelo dende’l voluntarismu y los esfuerzos personales polos retrasos continuos colos que s’abonen les subvenciones”, apunta la númberu unu de Podemos-Equo Xixón.

    Na mesma llínea, la coalición quier garantizar que tola ciudadanía tenga accesu a la práctica del deporte n’igualdá de condiciones: “Para ello precisamos tener toles infraestructures al altor de lo que merecen los xixoneses y por eso vamos realizar un plan de choque para revisar cuál ye l’estáu de toles instalaciones de tolos barrios y espacios de Xixón y cubrir les faltes que se detecten. L’oxetivu ye que toles persones que quieran practicar l’actividá física nes nueses siendes, nel nuesu mediu natural tan maraviyosu o nes instalaciones deportives tengan les mesmes oportunidaes moren onde moren”, añede Laura Tuero, númberu dos de la candidatura.

  • Juan Vázquez: «Celebro qu’otros partíos empiecen a falar de les oportunidaes d’Asturies»

    Juan Vázquez: «Celebro qu’otros partíos empiecen a falar de les oportunidaes d’Asturies»

    El candidatu de Ciudadanos (Cs) a la presidencia d’Asturies, Juan Vázquez, celebró esti xueves que los mensaxes de la so formación tean empezando a calar y vaigan per delantre na campaña. «Yá veo qu’otros partíos empiecen a falar de les oportunidaes d’Asturies», dixo. Vázquez manifestó amás que la posición de centru de Ciudadanos, «ye agora acobiciada por munchos pero llamentó que sía una posición que revele «poco convencimientu porque son cambeos de fin de selmana».

    «Veo tamién un desfile de ministros continuu del gobiernu de Pedro Sánchez per Asturies, aprovechen pa velos agora», aseguró Vázquez, «porque depués nun sé si van volver». Ye l’amuesa del preste y la sumisión” que’l PSOE de Pedro Sánchez n’Asturies tien respectu del Gobiernu Central, añedió’l candidatu de Cs. Y esi sentíu aprovechó pa #preguntar a la Ministra d’Economía, Nadia Calviño, “si la meyor Asturies ye l’Asturies que según los datos qu’apaecieron apocayá, tuvo’l peor rexistru de crecedera económica nos diez últimos años, a lo cabero con una crecedera negativa de 4 puntos y medio, mientres otres comunidaes crecieron el 12, el 10”.

    Tamién se quixo referise Vázquez a la Ministra de Sanidá, María Luisa Carcedo, «querdría preguntar si la so dedicación a la campaña n’Asturies déxa-y resolver el problema seriu de desabastecimiento farmacéuticu que tien a munchos asturianos de farmacia en farmacia, buscando melecines fundamentales pa los sos tratamientos». Mentanto, concluyó la cabeza de llista autonómicu de Cs, nós tamos «conociendo l’Asturies real, l’Asturies de les oportunidaes, l’Asturies con capacidá pa xenerar actividá, dinamismu, empléu, que ye lo que precisa esta rexón».

  • Adrián Barbón comprométese a duplicar les places de 0 a 3

    Adrián Barbón comprométese a duplicar les places de 0 a 3

    Na visita a la escuela de 0 a 3 ‘El Carmín’, en La Pola Siero, Adrián Barbón recordó que “la rede d’escueles de 0 a 3 foi una creación del PSOE. Aprobóse nun Congresu socialista y una alministración socialista punxo en marcha dempués ta rede de centros educativos como esta escuela de Siero, que lleva 16 años funcionando”, destacó.

    Nesti sentíu, el candidatu a la presidencia del Principáu, amosó’l so compromisu en “sofitar la necesidá de doblar el númberu de places de 0 a 3 en Siero pola demanda qu’esiste y que ye entendible”. Anunció que “les nueses propuestes, que se recueyen nel nuesu programa a nivel xeneral, son doblar, a lo menos, el númberu de places de 0 a 3 n’Asturies y, en tolos conceyos onde haya demanda d’una escuela de 0 a 3, lleguemos a toos nesta llexislatura”. Nestos momentos hai 39 escueles “y tenemos qu’ampliar pa llegar a tolos conceyos onde haya demanda”

    Per otra parte, Adrián Barbón espresó públicamente, en declaraciones a los medios, el so “sofitu a la candidatura d’Ángel García, Cepi, la única que da estabilidá y futuru y tien esperiencia de gobiernu. L’alcalde de Siero y candidatu a la reeleción, Ángel García, informó que se va construyir una nueva escuela de 0 a 3 en Pola de Siero para doblar les plaza y que se van ampliar les places de la de Llugones “por que nenguna neña nin neñu de Siero quede ensin plaza”.

  • Carmen Moriyón: «Asturies ta en tiempu de descuentu»

    Carmen Moriyón: «Asturies ta en tiempu de descuentu»

    La candidata de Foru a la presidencia d’Asturies, Carmen Moriyón, presentó esti miércoles  les midíes del programa electoral del so partíu en materia fiscal, concebíes para “impulsar l’actividá económica, frenar la despoblación y acabar cola discriminación d’Asturies con d’otres Comunidaes”. “Estes midíes fiscales son les primeres que presentamos porque busquen llograr un impactu socioeconómicu relevante y son la canal pela que más rápido pueden fluyir los cambeos que precisa Asturies”, indicó Moriyón. “Asturies ta nel tiempu de descuentu; hemos de ser prácticos y centranos nes soluciones a los graves problemes d’emponen a esti territoriu a la desertización industrial y demográfico”, alvirtió.

    Ente les propuestes de Foru, Moriyón destacó l’amenorgamientu de la tarifa autonómica del IRPF en tolos sos tramos y de forma progresiva nun superando’l postreru d’ellos el tipu del 21%. Nel mediu rural, Foru propón midíes de discriminación diferenciada. “Nun pueden pagar lo mesmo quien carecen de servicios que sí disponen les ciudaes”. En materia d’IRPF plantégase una deducción de 30% de los gastos n’escueles infantiles, centros infantiles o personal contratáu pal cuidáu de fíos de 0 a 3 años pa contribuyentes qu’afiten la so residencia habitual y caltener la fecha de devengu del impuestu.

    Foru tamién propón ameyorar la deducción por arriendu de vivienda habitual, con oxetu d’atender les necesidaes de colectivos que nun pueden aportar a la compra d’una vivienda (menores de 35 años ente otros), frenar la perda de población nel mundu rural y promover la reactivación d’esti sector.

    Moriyón recordó tamién que Foro vien reclamando un nuevu sistema de financiamientu autonómicu. Con esi oxetivu va promover la reforma del modelu actual que garantice la suficiencia y l’igualdá nos servicios públicos fundamentales, redefiniendo les necesidaes de gastu y teniendo bien en cuenta, les singularidaes que presenta Asturies, como la dispersión y l’avieyamientu de la nuesa población.

  • TPA va emitir el llunes l’únicu debate ente candidatos autonómicos

    TPA va emitir el llunes l’únicu debate ente candidatos autonómicos

    La Televisión del Principáu d’Asturies (TPA) va emitir el prósimu llunes 20 de mayu a les 22 hores l’únicu debate de candidatos a la presidencia del Gobiernu d’Asturies. N’él participarán los llíderes de los principales partíos: Adrián Barbón, del PSOE; Teresa Mallada, del PP; Lorena Gil, de Podemos; Ángela Vallina, de IX; Carmen Moriyón, de Foru; Juan Vázquez, de Ciudadanos; ya Ignacio Blanco, de Vox.

    L’espaciu va tar presentáu y moderáu pol editor d’informativos Nacho Monserrat. Los siete candidatos a la Presidencia confrontarán idees y programes pa que los ciudadanos puedan conocer los detalles de los mesmos. El debate va plantegase en bloques temáticos sobre política industrial, movilidá, infraestructures y Area Metropolitana, mundu rural y crisis demográfica, cultura, cooficialidá, reforma estatutaria y servicios públicos. Ye l’únicu alderique de candidatos a presidente que se celebra n’Asturies.

    El gran esplegue final va ser el domingu 26, la xornada electoral. TPA va informar durante tol día del desenvolvimientu de les elecciones con conexones en directu con colexos electorales y el centru de datos. Amás de la cita habitual de ‘TPA Noticies’ a les 14 y les 20.30 hores va haber avances informativos a les 13, les 18 y les 19 hores. A les 20 hores va entamar l’especial ‘Elecciones 26-M‘. Presentáu poles periodistes María Herrero, Beatriz Fernández y Diana Sánchez, l’espaciu va cuntar con mesa d’analistes políticos, periodistes y alcaldes hestóricos y un esplegue de quince puntos de directu nes sedes de los partíos y de los principales conceyos. Un ampliu equipu técnicu y humanu que va trabayar hasta que se conoza’l desenllaz final de les trés cites electorales: municipales, autonómiques y europees.

  • Huergo: «Queremos facer de Xixón un referente tecnolóxicu n’I+D+i»

    Huergo: «Queremos facer de Xixón un referente tecnolóxicu n’I+D+i»

    Yolanda Huergo, candidata a l’alcaldía de Podemos-Equo Xixón, y Juan Chaves, integrante de la candidatura, caltuvieron esti miércoles una xunta cola Asociación Cluster TIC d’Asturies para presenta-yos les sos propuestes en materia económica y d’empléu con valor añedíu de la coalición. “Esta ciudá tien blimes, tien persones con iniciativa y una Universidá innovadora. Con too ello, la coalición Podemos-Equo Xixón venimos xenerar les polítiques y les sinerxes que faigan de Xixón un referente tecnolóxicu n’I+D+i y dinamizador d’un empléu llimpiu y con valor diferencial”, afirmó Huergo, candidata a l’alcaldía.

    Pa consiguilo, la coalición considera que ye preciso “dar continuidá a la collaboración público-privada de los programes impulsaos pol Conceyu venceyaos con Europa, el Cluster TIC, el Parque Tecnolóxicu y l’Universidá pa crear un texíu social, económicu y empresarial que xenere empléu calidable y de valor añedíu cola implicación de too el texíu tecnolóxico que yá esiste en Xixón y que realiza la so actividá en redol al Cluster TIC”, caltuvo Juan Chaves.

    Asina, el principal oxetivu ye la «xeneración d’oportunidaes d’empléu y autu empléu» pa les persones qu’estudien tantu na Universidá como en centros de formación profesional. El papel de l’alministración nesti sentíu va ser «facilitar les infraestructures que dexen xenerar valor pa la creación d’empléu calidable», dende Xixón, pa intentar evitar la fuga de la mocedá. Un puntu que tien de complementase col sofitu a les empreses locales pa que puedan retrucar los servicios de Xixón n’otres ciudaes fomentando la so internacionalización, señala la coalición nuna nota de prensa.

    Igualmente, la coalición tien por oxetivu desenvolver una base económico-industrial diversificada y d’altu valor añedíu. Nesta llínea va l’apueste pol Parque Tecnolóxicu y del Mar na nueva zona industrial d’El Natahoyo, contemplada nel Plan Xeneral d’Ordenación [PDF]: “Esti desenvolvimientu tien de ponenos na sienda de la economía azul y pa ello pretendemos impulsar la creación d’empreses innovadores por aciu mecanismos d’incubación de xeneración centrífuga (spin-off) nes actividaes de acuicultura, turismu costeru, biotecnoloxía, enerxía oceánica y esplotación de los fondos marinos”, espuso la candidata de Podemos-Equo Xixón. Nel marcu d’esta estratexa, la coalición va encamentar al Principáu a introducir los estudios de Ciencies del Mar nel campus de Xixón.

    La candidatura liderada por Huergo apuesta poles enerxíes llimpies y comprométense a  crear una comercializadora enerxética pública d’enerxía anovable. “Esta comercializadora suministraría, nuna primer fase, a les instituciones municipales, pa abrir dempués a otres entidaes y a la ciudadanía”, señala.

    En sintonía con esta iniciativa diría tamién l’apertura d’una Oficina d’Asesoría Enerxética  coles mires d’ameyorar la eficiencia enerxética, tantu nos ámbitos municipales como de les empreses que quieran sumase al programa. Esta Oficina, amás, va asesorar a la ciudadanía en relación a les grandes suministradores (llectura de factures, potencia contratada, solución de problemes). Al empar, va asumir les xestiones y costos derivaos de que cualquier particular o grupu de particulares qu’exerzan el so derechu al autoconsumo enerxéticu puedan sacar rendimientu económicu venciendo a la cooperativa enerxética’l so escedente de producción.

    Estes apuestes en materia enerxético van dexar afondar nesa collaboración público-privada en cuestiones rellacionaes cola eficiencia enerxética: “Esta collaboración ye la base pa que surdan empreses auxiliares capaces de crear puestos de trabayu calidable”, apunta Chaves.

  • Ana González: “El carné del Real Oviedo col mio nome ye falsu”

    Ana González: “El carné del Real Oviedo col mio nome ye falsu”

    La candidata del PSOE a l’Alcaldía de Xixón, Ana González, aseguró esti martes que nunca foi socia del Real Oviedo, y que’l carné que se distribuyó peles redes sociales la fin de selmana del derbi asturianu “solo buscaba desacreditame”. González realizó estes declaraciones enantes de la visita a les instalaciones del Muséu del Real Sporting nel estadiu d’El Molinón, “claru iconu de la ciudá”.

    La candidata socialista aseguró que too respondió a una artimaña política “pa intentar faeme dañu” y que nunca foi socia de nengún equipu porque “nun soi futbolera”. González dixo saber d’ónde salió esa falsificación y bromió cola torpeza” de quien fixo esi carné, expedíu supuestamente nun añu nel que’l Real Oviedo cuntaba con más de 12.000 socios y “a mi axudicáronme’l 5.615”.

    González llamentó que “persones que recurren a estos métodos, como mentir y falsificar, pretendan tener dalguna opción dientro d’una institución pública”. Per otra parte, aseguró que la relación ente’l Sporting y la ciudá ye absoluta y ye bien importante tar col equipu yá que forma parte de la marca Xixón”.

  • Martín: «Fairemos de Xixón una ciudá más inclusiva ya con más oportunidaes»

    Martín: «Fairemos de Xixón una ciudá más inclusiva ya con más oportunidaes»

    El candidatu a l’Alcaldía de Xixón por la Izquierda, Aurelio Martín, visitó esti martes les instalaciones de l’asociación Una ciudad para todos onde aconceyó con usuarios del Centru Especial d’Empléu. Martín comprometióse a facer de Xixón «una ciudá más inclusiva y con más oportunidaes pa toos y toes, especialmente no que cinca a la integración llaboral«. Nesta visita, tuvo acompañáu polos candidatos de la coalición Ana Castaño, Javier Suárez Llana y María Antuña.

    Martín afirmó que, pa la coalición, les polítiques sociales concíbense como derechos de ciudadanía que tiene que ser garantizaes pol gobiernu, pero nel que debe xugar un papel muy importante’l movimientu asociativu ya’l tercer sector, poniendo como exemplu la esperiencia d’esta asociación. «Esta entidá, que lleva casi mediu sieglu lluchando polos más desfavorecíos, ye una muestra de lo que ye capaz el movimientu asociativu».

    El candidatu a l’Alcaldía de la ciudá dixo que quier que’l primer oxetivu del prósimu gobiernu municipal seya atender a tola ciudadanía y nun dexar a nadie fuera. «El prósimu gobiernu municipal deberá reforzar tolos programes d’atención a les persones, para que funcionen como ferramientes de redistribución de los recursos y contribuyan a equilibrar les desigualdaes». Xixón por la Izquierda propón crear nel próximu gobiernu un área municipal qu’incorpore les polítiques d’empléu, servicios sociales y vivienda para favorecer el desenvolvimientu d’estratexes d’atención integral a les persones, dar continuidá a los programes d’ayudes finalistes complementaries al Salariu Social Básicu y reforzar los servicios d’ayuda a casa y teleasistencia.

  • Juan Vázquez: “Vamos procurar ganar el 26 de mayu”

    Juan Vázquez: “Vamos procurar ganar el 26 de mayu”

    El candidatu de Ciudadanos (Cs) a la presidencia d’Asturies, Juan Vázquez, dixo güei “que vamos procurar ganar, vamos faer que’l día 26 de mayu verdaderamente abocane y n’Asturies salga’l sol”. Asina lo dixo mientres l’arranque de la campaña eleutoral, al pie de los miembros de la so candidatura y la llista de Ciudadanos a l’alcaldía de Xixón, nun actu celebráu na Plaza’l Marqués.

    “Arrancamos con muncha ilusión por delles razones, primero porque tenemos unes bones mires, les últimes elecciones xenerales ponenlo de manifiesto, que somos una fuerza ascendente, una fuerza en crecedera en cada elección qu’hai, con unes mires favorables qu’inda vamos intentar ameyorar”.

    Ye’l cometíu de Ciudadanos nesta campaña eleutoral, dixo Vázquez, “a partir d’esti momentu, y de esta nueche, salimos a les cais, a falar cola xente, a falar cola ciudadanía, venimos faciéndolo yá, pero dende güei con más enfotu, col convencimientu de que tenemos idees, tenemos discursu, que somos necesarios n’Asturies y que vamos procurar ganar”.