El gobiernu d’Asturies va empecipiar en marzu les obres de restauración ambiental de les escombreres de l’antigua mina de mercuriu María de la Encarnación, asitiada en Caunéu, nel conceyu de Somiedu, con una inversión de 851.676 euros y un plazu d’execución de siete meses. Asina lo anunció güei el vicepresidente y conseyeru d’Alministración Autonómica, Mediu Ambiente y Cambéu Climáticu, Juan Cofiño, nuna visita a la zona xuntu col alcalde del conceyu, Belarmino Fernández.
El vicepresidente esplicó que’l proyectu, financiáu colos fondos del Mecanismu de Recuperación y Resilencia, inclúi l’actuación sobre les dos escombreres de la esplotación, productu de los llabores mineros que se realizaron mientres los años 60 del pasáu sieglu. La finalidá ye devolver a estos espacios unes condiciones similares a les orixinales. “Trátase d’una cuestión de rexeneración ambiental bien relevante y más teniendo en cuenta l’altu valor medioambiental de la redolada, asitiáu nel Parque Natural de Somiedu”, sorrayó Cofiño.
Una de les escombreres, con una superficie 5.500 metros cuadraos, ta allugada a un kilómetru al nordeste del pueblu, y l’otra, qu’ocupa 2.500 metros cuadraos, asítiase na localidá.
En dambos vertideros executarán actuaciones comunes previes a los llabores de restauración, como l’adecuación d’accesos, roces y la retirada de la cubierta vexetal. Igualmente, van realizase sondeos pa la caracterización inicial y final del allugamientu, de cara a analizar potenciales afecciones ambientales.
Na escombrera más alloñada del pueblu, que presenta mayor cantidá de material con presencia de mercuriu, va llevar a cabu, ente otres midíes, l’acondicionamientu xeométricu con perfiláu y estabilización de turries. Amás, va instalase xuna barrera permeable reactiva na base, col fin de retener los posibles contaminantes que contengan les agües de escorrentía superficial y les de percolación. Tamién se va dotar a la parte de cunetes perimetrales, que van torgar que l’agua esterior enfuse y lixivie les borrafes mineres. El desaguadoriu de les cunetes va executar pol fondu de la escombrera sobro un filtru verde. Finalmente, va cubrise la superficie pal so selláu con material impermeable y con una capa de tierra y cubierta vexetal.
Nel vertideru más próximu a la localidá escavaránse los materiales depositaos na zona sur, que se van utilizar para terraplenado de la zona centro y norte si nun presenten niveles de contaminación per mercuriu o metales pesaos que lo torgar. Les mesmes práctiques van emplegase na zona norte. Una vegada reperfilados les turries y xestionaos les borrafes, va habilitase la zona como posible área d’aparcamientu, pa rematar cola estensión d’una capa d’asfaltu y rodadura.
El proyectu inclúi la baltadera de toles instalaciones de l’antigua mina (casetes, zona de compresores y centru de tresformamientu).
Estes actuaciones d’aislamientu, selláu y, nel so casu, estracción de les borrafes mineres, van facilitar la recuperación ambiental de la zona. D’esta forma, van amenorgase ya inclusive se van desaniciar les posibles afecciones qu’estos materiales puedan producir sobre’l suelu y les agües.
Otres actuaciones nel conceyu
Per otra parte, Cofiñu avanzó qu’el so departamentu va concluyir el próximu branu la construcción de los nuevos depósitos pal suministru d’agua potable de Llaín.llar de Vildas y Robléu. Estes obres, que tán n’execución, tienen un presupuestu de 114.467 euros y cunten con financiamientu de los fondos europeos Next Generation EU.
Amás, Mediu Ambiente remató apocayá les obres de saneamientu de Robléu, nes que s’invirtieron 421.870 euros. L’actuación consistió na execución d’una rede pa la recoyida d’arramaos d’agües residuales doméstiques de les 39 viviendes de la localidá y la so conducción hasta una nueva planta depuradora de tratamientu biolóxicu, allugada cerca del calce del ríu Pigüeña, al que se realiza l’arramáu final, una vegada tratáu. El conxuntu de los colectores que conformen la rede tien un llargor de 1.575 metros.
