La compañía Fantastique Company alcuéntrase ensayando la obra Descubriendo a Verne en Llaboral Ciudá de la Cultura hasta’l xueves 4 de payares.
Nesti espectáculu pa públicu familiar, Valéry, nieta ficticia del escritor francés Julio Verne, descubre que foi un gran aventureru que vivió toless histories qu’escribió. Passepartout, un erizo parlachín que vive nel gabinete del so güelu, le va desvelar que Verne unvió un cohete a la lluna, pero enxamás llegó a aterrizar y dende entós orbita alredor d’ella. Como’l so güelu ya nun ta, Valéry decide ayudar al cohete a aterrizar na lluna y pa ello va cuntar cola collaboración de dalgunos de los personaxes más emblemáticos de les noveles de Verne, como’l Capitán Nemo o Phileas Fogg, ente otros.
Teatro y nueves tecnoloxíes fusiónense en Descubriendo a Verne, obra na que se utilicen los medios actuales pa recrear la tecnoloxía futura que’l propio Verne imaxinó fai más de cien años.
Irene Santos ye la autora y directora d’esti espectáculu que tamién interpreta, con dirección artística ya ilustraciones y animaciones de Adrián Cuervo. Esta compañía de teatru contemporáneu desarrolla nuevos modelos de narración escénica onde integra tecnoloxía dixital. Dende la so fundación en 2017 la compañía desarrolló proyectos nos que la escenografía toma un papel activu na narración, usando imaxe proyectada y videomapping, como nes sos obras El viaje de Dorothy y La pintora Flora.
Fantastique Company alcuéntrase trabayando na Llaboral nel marcu del Programa de Residencies del Centro de Recursos Escénicos del Principáu d’Asturies, un proyectu con sede en Llaboral Ciudá de la Cultura qu’ufre apoyu a la creación artística de les compañíes profesionales asturianes, poniendo a la so disposición recursos económicos, instalaciones y medios técnicos qu’impulsen la creación escénica de profesionales de la rexón. Llaboral Ciudá de la Cultura ye un equipamientu dependiente de la Conseyería de Cultura, Política Llingüística y Turismu y xestionáu pola Sociedá Pública de Xestión y Promoción Turística y Cultural del Principáu d’Asturies.
