Xixón al día

Etiqueta: sanidá

  • Asturies rexistra 36 díes menos d’espera por una intervención que la media nacional, según Sanidá

    Asturies rexistra 36 díes menos d’espera por una intervención que la media nacional, según Sanidá

    La espera media por una intervención quirúrxica n’Asturies ta en 85 díes, 36 menos que la media nacional (121 díes), lo qu’asitia al Principáu como una de les comunidaes que meyores datos rexistra del país, según l’últimu informe del Ministeriu de Sanidá sobre la situación de les llistes d’espera por autonomíes.

    Esti estudiu comparativu tamién señala que’l porcentaxe de persones qu’espera más de 180 díes por una intervención n’Asturies ye del 12,90 %, seis puntos perbaxo de la media nacional, que’l so indicador asitia nel 18,95 %.

    Los datos publicaos pol ministeriu reflexen que la pandemia afectó a les llistes d’espera de tol país, al concentrase los recursos sanitarios na llucha contra la covid. Sicasí, el Serviciu Públicu de Salú del Principáu (Sespa) llogró qu’estos dos indicadores de referencia nel estáu de les llistes d’espera nun se resintieren tanto como n’otres comunidaes.

  • La supervivencia de les asturianes de 45 a 64 años al cáncer de mama algama’l 92%

    La supervivencia de les asturianes de 45 a 64 años al cáncer de mama algama’l 92%

    La supervivencia de les muyeres de 45 a 64 años con cáncer de mama algama n’Asturies el 92% al llustru del diagnósticu. Son datos del Rexistru de Tumores del Principáu, dependiente de la Conseyería de Salú. Nos últimos exercicios amenorgóse la mortalidá por esta causa en toles franxes d’edá, especialmente ente les más moces.

    Anguaño rexístrense cerca de 800 nuevos casos añales nel Principáu, lo que convierte al de mama nel tumor más frecuente ente les muyeres. Les campañes de detección temprana fixeron posible’l diagnósticu n’estadios más tempranos. Más del 75% de la población diana; esto ye, muyeres de 50 a 69 años, participa nel programa de detección precoz, que consiste na realización d’una mamografía. Con esta prueba detéctase la patoloxía en cuatro muyeres de cada mil que participen nel programa. El 70% d’elles nun tien afectación de ganglios y unu de cada trés tumores mide menos d’un centímetru, lo que trai un meyor pronósticu y tratamientos menos agresivos.

    La Conseyería de Salú actualizó la información sobre esti peneráu, que per primer vegada reflexa los sos resultaos p’ayudar a les muyeres a decidir sobre la so participación nel programa. Esti añu yá se repartieron más de 13.000 folletos nes distintes zones sanitaries, a les que se va sumar nes próximes selmanes l’área III, que correspuende a Avilés y contorna. Per otra parte, Asturies va acoyer el 39º Congresu de la Sociedá Española de Senoloxía y Patoloxía Mamaria, que se va celebrar n’Uviéu n’ochobre de 2020, y nel que van participar unos 600 especialistes de too el país.

  • L’HUCA axunta a 450 profesionales pa impulsar la calidá na asistencia sanitaria

    L’HUCA axunta a 450 profesionales pa impulsar la calidá na asistencia sanitaria

    L’Hospital Universitariu Central d’Asturies (HUCA) axunta esti martes a 450 profesionales del sistema públicu de salú na xornada Calidad y gestión clínica. Una mirada al futuro, qu’entamen l’Institutu Asturianu d’Alministración Pública Adolfo Posada y el Serviciu de Salú del Principáu (Sespa). El conseyeru de Salú, Pablo Fernández Muñiz, inauguró esta mañana la xornada, qu’impulsa la cultura de la calidá na asistencia sanitaria n’hospitales y centros de salú, mediante’l desenvolvimientu del modelu de xestión clínica.

    En total, presentáronse 68 trabayos científicos en formatu póster que tán espuestos na redoma del salón d’actos del HUCA. D’ellos, 22 compiten na categoría d’atención hospitalaria, 7 na d’atención primaria, 14 en coordinación, 19 en xestión y 6 en servicios básicos.

    L’actu empezó con un debate sobre’l futuru de la xestión clínica n’Asturies. De siguío, van constituyise cinco meses de trabayu nes que van compartise les esperiencies de les unidaes de xestión clínica de los centros de Trevías, El Llano y El Natahoyo-Tremañes y les árees de xestión clínica de Corazón y d’Urxencies del HUCA. Amás, va analizase la integración del modelu de xestión clínica na rede de salú mental y l’atención centrada nos pacientes. Otra de les meses va tratar sobre’l Plan Nacional frente a la Resistencia a Antibióticos.

    A les cinco y media de la tarde, el presidente de la Fundación Hospital Optimista, Florent Amion, va pronunciar la conferencia Soñar un hospital optimista: cómo transformar la cultura de la queja en la cultura del agradecimiento, que va preceder a la clausura, al cargu de la directora xerente del Sespa, Concepción Saavedra.

  • José Ignacio Altolaguirre va asumir la Dirección de Seguridá Alimentaria, Sanidá Ambiental y Consumu

    José Ignacio Altolaguirre va asumir la Dirección de Seguridá Alimentaria, Sanidá Ambiental y Consumu

    José Ignacio Altolaguirre (Madrid, 1958) va facese cargu de la Dirección de Seguridá Alimentaria, Sanidá Ambiental y Consumu. Veterinariu y funcionariu de carrera, ye espertu européu na xestión de la calidá de los servicios sanitarios y tien una esperiencia amplia nes materies que va exercer. Tamién desempeñó delles responsabilidaes na Alministración.

    La Conseyería de Salú, dirixida por Pablo Fernández Muñiz, ta estructurada en cuatro direcciones xenerales: Salú Pública; Política y Planificación Sanitaria; Calidá, Tresformación y Xestión de la Conocencia y, a lo último, Curiaos, Humanización y Atención Sanitaria. L’últimu Conseyu de Gobiernu yá aprobó’l nomamientu de los sos titulares. Van ser, respectivamente, Rafael Cofiño, Lidia Clara Rodríguez, Elena Llorente y Sergio Valles. L’Executivu tamién alcordó que María Concepción Saavedra asuma la xerencia del Serviciu de Salú del Principáu (Sespa).

    El nomamientu de José Ignacio Altolaguirre va facese efectivu esta selmana próxima. La so dirección, dependiente de Salú Pública, va sustituyir a l’Axencia de Sanidá Ambiental y Consumu. Altolaguirre (axúntase currículum) yá ocupó puestos de responsabilidá na mesma, como xefe del serviciu de riesgos ambientales y alimentarios y responsable de programes de control oficial d’alimentos. Miembru del Comité Permanente de Seguridá Alimentaria de l’Axencia Española de Seguridá Alimentaria y Nutrición y de la Comisión de Seguridá Alimentaria del Colexu de Veterinarios d’Asturies, tamién participó nel desenvolvimientu del Plan de Salú del Principáu.

  • Asturies rexistra un casu de listeriosis ensin vinculación cola carne mechada

    Asturies rexistra un casu de listeriosis ensin vinculación cola carne mechada

    L’Hospital Universitariu Central d’Asturies (HUCA), n’Uviéu, rexistró un casu de listeriosis nun paciente de 64 años ingresáu na Unidá de Cuidos Intensivos (UCI). Trátase d’un casu clínicu aislláu d’afección pola bacteria Listeria monocytogenes, que nun guarda nenguna relación col biltu aniciáu n’Andalucía por consumu de carne mechada de la marca La Mechá. L’enfermu permanez na UCI, ta recibiendo tratamientu y evoluciona favorablemente.

    El conseyeru de Salú, Pablo Fernández Muñiz, axuntóse esti miércoles nel HUCA col xerente de la área IV, Luis Hevia, el director xeneral de Salú Pública, Antonio Molejón, y el xefe del Serviciu de Microbioloxía, Fernando Vázquez, para recibir información sobro’l casu.

    El 10% de la población ye portadora de la bacteria ensin qu’haya riesgu pal so salú. Nesta ocasión, trátase d’un enfermu inmunodeprimíu, con tratamientos antibióticos previos pa tratar otros xermes. L’hospital echó voz del casu al serviciu de Vixilancia Epidemiolóxica, como marca’l protocolu n’enfermedaes de declaración obligatoria (EDO). Amás, como en tolos casos d’afección por esta bacteria, el HUCA va unviase una amuesa del cultivu tomáu al Institutu Carlos III pa que faiga un tipaxe del xenoma del xerme, que se va incluyir na so base de datos. Mientres anguaño, rexistráronse 13 casos aisllaos por listeriosis n’Asturies.

  • Pablo Ignacio Fernández Muñiz, conseyeru de Sanidá

    Pablo Ignacio Fernández Muñiz, conseyeru de Sanidá

    Pablo Ignacio Fernández Muñiz (Avilés, 1966) ye’l nuevu conseyeru de Sanidá del Gobiernu d’Asturies. Llicenciáu en Medicina y Ciruxía pola Universidá d’Uviéu, empecipió la so trayectoria profesional como médicu d’accidentes na mina de Tormaleo y darréu nel serviciu d’Urxencies d’Atención Primaria d’Avilés. En cursando’l MIR na especialidá de Ciruxía Xeneral y del Aparatu Dixestivu, incorporóseó al Hospital Xeneral d’Asturies, onde trabayó dende 1992 hasta 1996 y onde llogró xuna beca de l’Asociación Española de Ciruxanos pa formación específica en Ciruxía Hepato-Bilio-Pancreática. Tamién exerció como ciruxanu nel Hospital Valle del Nalón (1997-2010) y nel Hospital San Agustín hasta 2016. Anguaño ocupaba’l cargu de director de la área IV del Serviciu de Salú del Principáu (Sespa), qu’inclúi la xestión del Hospital Monte Naranco y l’Hospital Universitariu Central d’Asturies (HUCA).

    Ye miembru del Comité de Bioética d’España y del Comité Científicu de la Sociedá Internacional de Bioética (SIBI). Como docente, dende 2016 exerció como director del Máster d’Especialización en Patoloxía Mamaria de la Universidá Autónoma de Madrid. Ye espertu en ciruxía oncoplástica y reconstructiva de la mama, especialista n’ecografía mamaria, máster en Bioética poles Universidaes del País Vascu, Zaragoza, La Llaguna, Les Palmes de Gran Canaria y Rovira i Virgili, máster en Dirección y Alministración d’Empreses pola Universidá Camilo José Cela, y máster en Dirección y Alministración d’Empreses (MBA) y especialidá en Xestión Sanitaria por IMF Business School.

  • Sanidá remata l’arreglu de la cubierta del centru de salú de Laviada

    Sanidá remata l’arreglu de la cubierta del centru de salú de Laviada

    La Conseyería de Sanidá remató les obres de restitución y arreglu de la cubierta metálica del centru de salú de Laviada. Estos trabayos supunxeron una inversión de 300.000 euros. La intervención, que cuntó con financiación de la Unión Europea al traviés del Fondu Européu de Desenvolvimientu Rexonal (Feder), consistió nel arreglu integral del teyáu, de más de dos décades d’antigüedá.

    L’estáu anterior de la cubierta favorecía les filtraciones pola so escasa rimada y una insuficiente rede d’evacuación de les agües pluviales. Estos defectos causaron daños na estructura qu’obligaron a sustituyila por una nueva, con un diseñu reformáu de les baxantes que facilita la recoyida de l’agua.

  • L’HUCA recibe la máxima certificación internacional de calidá n’asistencia a enfermos de cáncer

    L’HUCA recibe la máxima certificación internacional de calidá n’asistencia a enfermos de cáncer

    El doctor Emilio Esteban, xefe del serviciu d’Oncoloxía del Hospital Universitariu Central d’Asturies (HUCA), y la doctora Pilar Solís, oncóloga del mesmu hospital, recoyeron el sellu de calidá que los acredita como centru d’excelencia n’asistencia a pacientes con cáncer. Ye’l quintu centru sanitariu español en consiguir la máxima certificación internacional pall tratamientu de persones cola enfermedá.

    Nel actu, celebráu en Chicago, l’HUCA recibió la distinción de manes de Vicente Guillem, presidente de la Fundación ECU (Excelencia y Calidá de la Oncoloxía), y de Stephen Grubbs, vicepresidente del departamentu de Clinical Affairs de l’American Society of Clinical Oncology (ASCU). La entrega enmárcase nel Annual Meeting d’ASCU, qu’axuntó a más de 40.000 profesionales de la especialidá.

    La certificación supón un impulsu pal centru asturianu, que diagnostica 2.200 nuevos casos de cáncer cada añu. La mayoría son tumores de mama, de pulmón y dixestivos. Pa llograr el sellu, el serviciu sometióse a una rigorosa auditoría sobre distintos aspectos claves na asistencia. El so cumplimientu acredítalu como centru d’altu rendimientu.

    La entrega enmárcase nel Annual Meeting d’ASCU, qu’axuntó a más de 40.000 profesionales de la especialidá

    Los espertos valoraron el nivel de salú de los pacientes, les sos necesidaes y mires, el so bienestar emocional y el siguimientu del so dolor, según la preparación de quimioterapia per parte del equipu de farmacia y la so alministración nel hospital de día, ente otres cuestiones.

    La oncóloga Pilar Solís coordinó esti proyectu pol que, nun añu aprosimao, el serviciu d’Oncoloxía del HUCA pudo autoevaluar les sos práctiques asistenciales en base a criterios d’excelencia. Esti procesu realízase n’España al traviés de la Fundación ECU pa la Excelencia y la Calidá de la Oncoloxía. Esta entidá ensin ánimu d’arriquecimientu trabaya pa llograr los máximos niveles na docencia, l’asistencia y la investigación na especialidá.

    España ye’l segundu país, depués d’Estaos Xuníos, con más centros acreditaos. Anguaño disponen de la certificación QOPI los hospitales Ramón y Cajal de Madrid, Xeneral de Valencia, Institutu Valencianu d’Oncoloxía y Clínicu Universitariu de Santiago de Compostela, a los qu’agora se suma l’HUCA.

  • Prohibío fumar en cuatro playes d’Asturies

    Prohibío fumar en cuatro playes d’Asturies

    Acabóse fumar en cuatro playes d’Asturies. La Conseyería de Sanidá va prohibir esti branu’l consumu de tabacu nes sableres de Misiego, Miami y El Puntal, en Villaviciosa, y Los Quebrantos, en Sotu’l Barcu. El programa Sableres ensin fumu tien por oxetivu promover una vida llibre d’esti productu, prevenir el consumu y fomentar el respetu a les persones y al mediu ambiente. La iniciativa va desenvolvese anguaño como esperiencia piloto. La intención ye estendelo darréu a otros conceyos y constituyir una rede autonómica de sableres ensin fumu. Esta propuesta educativa y de concienciación social pa promocionar estilos de vida saludables va desenvolvese en collaboración colos dos conceyos.

    Nos cuatro arenales calificaos como Sableres ensin fumu va promovese que nun se fume en tola zona o n’árees señalizaes, sacante los espacios abiertos de los locales d’hostelería. Preténdese, amás, protexer del fumu del tabacu a neños y adolescentes. La esposición al fumu del tabacu ye nociva en toles etapes de la vida y especialmente nes edaes más tempranes.

    Nun se va poder fumar en tola zona o n’árees señalizaes, sacante los espacios abiertos de los locales d’hostelería

    El Gobiernu asturianu destaca que la prohibición de fumar n’estes cuatro playes fomenta tamién el respetu al mediu ambiente. Los filtros de los pitos nun son biodegradables y pueden tardar hasta 10 años en descomponese. Tán diseñaos p’atropar los componentes del tabacu, incluyíes les sustances químiques más peligroses, que son lliberaes en contactu cola agua y lleguen a ríos y mares. Una colilla contamina ocho llitros d’agua. Amás, al refundiales nes sableres, pueden ser inxeríes por especies marines o acabar en manos de neños.

    Dalgunes de les sustances nocives que se toparon nes colilles son pesticides, que provoquen un potencial efectu tóxicu sobro’l mediu y pueden atropase na cadena alimentaria. Tamién se detectaron otres como’l etilfenol, la nicotina, el mentol, metales o alquitrán y carcinóxenos, ente otres.

    Esta situación supon una seria amenaza pal mediu ambiente, yá que n’España fumen unos 89 millones de pitos al día, lo que supon 32.455 millones de filtros añalmente, según un informe del Comité Nacional pa la Prevención del Tabaquismu. Tán fechos d’acetato de celulosa, una sustanza non biodegradable que se disgrega en pequenes pieces, pero que’l so material fonte nunca desapaez. Nes sableres, el 14% de borrafes retiraes son filtros de pitos. La campaña quier sensibilizar a la población infantil y xuvenil énte’l tabaquismu ya informar sobro los efectos nocivos del fumu.

  • La última prueba de la ufierta d’empléu del Sespa, en payares

    La última prueba de la ufierta d’empléu del Sespa, en payares

    El Serviciu de Salú del Principáu (Sespa) va celebrar el 10 de payares la postrera de les pruebes de la ufierta pública d’empléu (OPE) 2018. Trátase d’un exame conxuntu para les categoríes profesionales d’ayudante de serviciu y técnicu d’Anatomía Patolóxica, Llaboratoriu, Radioloxía y Radioterapia. Los exámenes, pa los que s’inscribieron un total de 6.235 opositores, van sirvir para cubrir 179 places y van celebrase nel recintu ferial Luis Adaro, en Xixón.

    El Sespa va volver utilizar el mesmu sistema que punxo en marcha pa los exaámenes más multitudinarios de la OPE que se desenvolvieron esti añu. Asina, pal accesu al recintu onde se van realizar les pruebes, y col fin d’entainar el procesu, los opositores van usar una acreditación similar a les tarxetes d’embarque de los aviones na que figuren un códigu d’entrada, les instrucciones xenerales y dalgunes de los encamientos. Al igual que n’ocasiones anteriores, estes acreditaciones podrán descargase nun portal web.

    Dende avientu de 2016, fecha del primeru de los exames de la ufierta d’empléu públicu, hasta esti mes, el Sespa convocó a más de 60.000 persones para cubrir un total de 2.746 puestos. Amás, n’este mesmu periodu, tamién se desenvolvió un concursu de tresllaos con 1.743 solicitúes almitíes, de les que 1.020 saldáronse con un cambéu de destín.

    La ufierta pública d’empléu contribúi a consolidar l’empléu de calidá nel sistema públicu y a amenorgar la interinidá. En 2015, la tasa de temporalidá nel Sespa yera del 34%. Na actualidá esta cifra ta en redol al 20% y ta previsto que s’amenorgue hasta’l 8 % en 2020.