Xixón al día

Etiqueta: Serviciu de Salú del Principáu (Sespa)

  • Segunda paciente con cornavirus que sal de la UCI en Cabueñes

    Segunda paciente con cornavirus que sal de la UCI en Cabueñes

    Una muyer de 55 años ye la segunda paciente con coronavirus en salir de la UCI nel Hospital de Cabueñes. La noticia dióla la propia Conseyería de Sanidá al traviés del so perfil oficial en Twitter. «Encántanos compartir bones noticies. Infórmennos dende’l Hospital de Cabueñes que güei dieron l’alta UCI a la so segunda paciente, una muyer de 55 años. ¡Norabona!», pue lleese na cuenta d’Astursalud.

    La Conseyería tamién informó de que la primer paciente que salió de la UCI del hospital foi una muyer de 82 años. «Nun se celebró yá que’l so home finara, pero tamién queremos recordala y manda-y un cariñosu abrazu». Na planta de cuidos intensivos del centru hospitalariu xixonés hai 6 pacientes positivos en Covid-19 pendientes de resultancia y 27 cames disponibles.

  • Asturies, dispuesta a acoyer pacientes de coronavirus d’otres comunidaes

    Asturies, dispuesta a acoyer pacientes de coronavirus d’otres comunidaes

    Asturies ta dispuesta a acoyer a pacientes de coronavirus d’otres comunidaes autónomes si fuera necesariu. Sicasí, el Principáu aclaró que, hasta’l momentu, nun recibió solicitú oficial dalguna. La Conseyería de Salú esplica que trabaya intensamente pa ufiertar la meyor respuesta sanitaria posible a esta enfermedá. «La prioridá ye garantizar l’atención afayadiza a los asturianos, tanto l’actual como la que pueda precisase mientres les selmanes vinientes en función de la evolución de la pandemia», explica nuna nota. Aclaren que cualquier pidimientu que pudiera recibise va evaluase d’alcuerdu con estos criterios. Anguaño, nun hai previsión oficial dalguna de recibir pacientes d’autonomíes vecines.

  • Salú confirma cuatro nuevos casos de coronavirus n’Asturies

    Salú confirma cuatro nuevos casos de coronavirus n’Asturies

    La Conseyería de Salú confirmó esti miércoles 35 casos del nuevu coronavirus n’Asturies. Un incrementu que tien llugar depués de qu’esti martes se produxera’l primer sanamientu de la enfermedá nun mozu de 32 años. D’estes persones afectaes, 21 tán venceyaes al biltu nel centru escolar Fundación Masaveu d’Uviéu. La mayoría, 15, son profesores y alumnos del centru. Los seis restantes son familiares o amigos, esto ye, contactos estrechos d’estos pacientes.

    Nestos momentos, 12 persones -7 rellacionaes col biltu nel citáu centru educativu- tán ingresaes n’aislamientu nel HUCA. Otros dos pacientes, dambos negativos al COVID-19, permanecen hospitalizaos al ser contactos estrechos de casos positivos por coronavirus n’Asturies. El restu d’afectaos permanez n’aislamientu domiciliariu, con siguimientu telefónicu pol serviciu d’atención primaria.

    Al respective de la situación clínica de los ingresaos nel HUCA, na UCI permanez estable dientro de la gravedá’l primer positivu, un home de 70 años. Pela so parte, el varón de 68 años venceyáu col focu del mentáu centru escolar d’Uviéu esperimentó un empeoramientu. Otres diez persones positives en COVID-19 permanecen aisllaes en planta. Trés tienen neumonía ensin gravedá y el restu presenten sintomatoloxía inespecífica leve.

    Refuerzu

    El Llaboratoriu de Viroloxía del Hospital Universitariu Central d’Asturies (HUCA) realizó 1.035 pruebes con resultancia negativa. El teléfonu 112 atendió ayeri 1.179 llamaes sobre’l nuevu coronavirus n’Asturies. Esti serviciu reforzóse con un médicu en cada turnu y con seis nueves enfermeres y cuatro operadores. El Sespa reforzó l’atención sanitaria cola incorporación de 139 profesionales. Nueve son facultativos de les especialidaes de Medicina Intensiva, Interna, Neumoloxía y Microbioloxía. A ellos súmense 64 enfermeres, 30 técnicos auxiliar d’enfermería, 30 celadores, cuatro técnicos de llaboratoriu y dos técnicos de rayos.

    Les autoridaes sanitaries recuerden que los encamientos siguen siendo les mesmes. Les persones que viaxaron a dalguna de les zones consideraes de riesgu y que presenten los síntomes tienen de contactar col 112.

  • Cinco profesores y dos escolinos d’un colexu uvieín, contaxaos con coronavirus

    Cinco profesores y dos escolinos d’un colexu uvieín, contaxaos con coronavirus

    Yá son 17 les persones contaxaes por coronavirus n’Asturies. La Conseyería de Salú confirmó esta mañana que se trata de cinco profesores y dos escolinos d’un colexu uvieín. Unu de los mayestros afectaos, de 68 años, alcuéntrase n’estáu grave nel Hospital Universitariu Central d’Asturies. Nesti momentu ta investigándose l’orixe del focu, que podría tar venceyáu a un viaxe reciente d’unu d’estos profesionales a Madrid. El colexu va permanecer peslláu hasta esclariar la cadena de tresmisión. Salú va informar del resultáu del estudiu a la dirección del centru educativu pa que lu comunique al alumnáu y les sos families.

    Les autoridaes sanitaries recuerden que’l 81 % de los casos son leves y les afectaciones más graves prodúcense en persones mayores con enfermedaes previes. Les autoridaes sanitaries recuerden que les persones que viaxaron a dalguna de la zones consideraes de riesgu (China, Corea del Sur, Xapón, Singapur, Irán y les rexones italianes de Lombardía, Veneto, Emilia-Romagna y Piamonte) y que presenten los síntomes de tos, fiebre o dificultá respiratoria tienen de ponese en contactu col 112.

    Les autoridaes sanitaries insisten en que la midida más eficaz pa prevenir la tresmisión de los virus respiratorios, ente ellos el coronavirus nuevu, ye llavase de cutiu les manes con agua y xabón. Tamién s’encamienta utilizar la zona del coldu o pañuelos desechables d’un solu usu pa tusir o espirriar.

  • El 112 recibió nun día 249 llamaes sobro’l nuevu coronavirus

    El 112 recibió nun día 249 llamaes sobro’l nuevu coronavirus

    El teléfonu del serviciu d’emerxencies 112 Asturies atendió ayeri 249 llamaes sobre’l nuevu coronavirus. A lo llargo d’esta mañana produciéronse 42. La sala del serviciu reforzóse con personal sanitariu p’atender les consultes de la ciudadanía. Les autoridaes sanitaries recuerden qu’el 112 ye’l teléfonu de referencia pa les persones que viaxaron a zones afectaes pola enfermedá y que presenten los síntomes de fiebre, tos o falta d’aire.

    El Centru Nacional de Microbioloxía (CNM) de Majadahonda (Madrid) escartó esti vienres el positivu por coronavirus na muyer de 85 años institucionalizada nuna residencia xeriátrica. Tres estes últimes resultancies, Asturies cuntaría con seis casos positivos. Los caberos dos nuevos casos positivos de COVID-19 confirmáronse esta mañana. Trátase de dos de los trés acompañantes en siguimientu del varón de 48 años con venceyos epidemiolóxicos en Madrid al que se-y diagnosticó la enfermedá ayeri. Son dos muyeres, de 48 y 46 años d’edá, que comunicaron al 112 que presentaben síntomes. El primer casu positivu, el varón de 70 años, caltiense estable dientro de la so gravedá. La so muyer de 66 años evoluciona favorablemente d’una neumonía. El restu de los pacientes tán estables.

    Pa prevenir la tresmisión de la infección, les autoridaes sanitaries encamienten la llavadura frecuente de manos con agua y xabón, según utilizar la flexura del coldu o pañuelos desechables d’un solu usu pa tusir o espirriar. La Conseyería de Salú caltiense en contactu permanente col Ministeriu de Sanidá p’adoptar les midíes precises y coordinar toles actuaciones de control y prevención.

  • Dos nuevos positivos eleven a siete los casos por coronavirus n’Asturies

    Dos nuevos positivos eleven a siete los casos por coronavirus n’Asturies

    Yá son siete los pacientes con coronavirus n’Asturies. La Conseyería de Salú confirmó esta mañana dos nuevos positivos, que se sumen a los cinco qu’hasta esti xueves se teníen contabilizaos. Trátase de dos contactos contactos estrechos, que taben en siguimientu, rellacionaos col quintu positivu, rexistráu ayeri. El varón, de 48 años y residente en Madrid,  púnxose en contactu’l xueves col 112 al sentise mal. El paciente, con síntomes catarrales y fiebre, llegó’l llunes de Madrid, nel so coche particular y en compañía de trés familiares, pa pasar unos díes nel Principáu. Sigue n’aislamientu domiciliariu.

    El Serviciu de Vixilancia Epidemiolóxica empecipió la identificación de los denominaos contactos estrechos col fin d’activar les midíes de control y prevención. Estes actuaciones consisten en xixilar el so estáu de salú, lo qu’inclúi tomase la temperatura y llevar una vida social lo más llindada posible. Si presenten síntomes, tienen de ponese en contactu col 112.

    Evolución de los pacientes

    Per otra parte, el primer positivu por COVID-19 d’Asturies, un varón de 70 años, sigue estable dientro de la gravedá ingresáu n’aislamientu nel HUCA. La so esposa, de 66 años, dio negativu nes pruebes al COVID-19 del Centru Nacional de Microbioloxía de Majadahonda (Madrid). El mozu de 32 años, segundu positivu detectáu, sigue leve y evoluciona favoratiblemente. Amás, la muyer de 85 años institucionalizada nuna residencia privada permanez grave con bona evolución clínica. Dambos tán na área d’aislamientu del HUCA.

    El cuartu positivu, un varón de 48 años, sigui presentando una clínica leve y, nestos momentos, permanez aislláu na so casa. El Sespa reforzó l’atención del 112 con personal sanitario p’atender les consultes de la ciudadanía. Este ye’l teléfonu de referencia pa les persones que viaxaron a zones afectaes pola enfermedá y que presenten los síntomes de fiebre, tos o falta d’aire.

    Pa prevenir la tresmisión de la infección, les autoridaes sanitaries encamienten la llavadura frecuente de manos con agua y xabón, según utilizar la flexura del coldu o pañuelos desechables d’un solu usu pa tusir o espirriar. La ciudadanía dispon d’información sobro esti nuevu virus na páxina webAstursalud , según nes redes sociales de les alministraciones sanitaries.

  • Yá son cinco los positivos por coronavirus n’Asturies

    Yá son cinco los positivos por coronavirus n’Asturies

    Quintu casu de coronavirus n’Asturies. Trátase d’un xixonés de 48 años que permanez nel so domiciliu con síntomes leves. Salú confirmó ayeri el tercer y cuartu casu venceyaos a esta epidemia. Una d’elles ye una muyer de 85 años, paciente d’una residencia xeriátrica privada. Ingresó’l llunes por una neumonía atípica nel Hospital Universitariu de Cabueñes, onde foi aislada. Desque se-y tomaron dos muestres, la segunda resultó positiva anueche. La paciente permanez estable, dientro de la gravedá, nel área d’aislamientu del HUCA. El cuartu positivu ye un varón de 48 años, que nestos momentos permanez aisláu na so casa.

    Estos tres últimos casos súmense al mozu de 32 años, qu’evoluciona favorablemente, y al varón de 70, que se caltién estable dientro de la gravedá. Dambos permanecen aislaos nel HUCA, xunto a la muyer de 66 años que ta pendiente del resultáu del Centru Nacional de Microbioloxía de Majadahonda (Madrid).

    El Sespa repite los conseyos empobinaos a los profesionales, que consisten n’estremar les midíes d’hixene de manes. El serviciu desaconseya a los profesionales l’asistencia a congresos, xornaes, seminarios y cursos de formación presenciales. Amás, retardóse tola actividá docente nos centros sanitarios con casos positivos. Tamién se restrinxó temporalmente la presencia de visitadores médicos y voluntarios a hospitales y centros de salú. Tamién se ta llimitando l’acompañamientu de pacientes hospitalizaos o n’Urxencies a un únicu familiar que nun presente fiebre nin síntomes respiratorios agudos.

  • Salú aplica midíes adicionales pa ralentizar la tresmisión del coronavirus

    Salú aplica midíes adicionales pa ralentizar la tresmisión del coronavirus

    La Conseyería de Salú va aplicar midíes adicionales pa ralentizar la tresmisión del coronavirus nuevu. Asina lo comunicó esti miércoles el conseyeru, Pablo Fernández Muñiz, al Comité de Coordinación d’Asturies frente al coronavirus nuevu. Muñiz esplicó qu’España «sigue en fase de contención» y precisó que «s’aumentó la sensibilidá del sistema de detección y midíes pa ralentizar la tresmisión de la enfermedá».

    El Sespa repite los conseyos empobinaos a los profesionales, que consisten n’estremar les midíes d’hixene de manes, y l’usu de mázcares quirúrxiques pa pacientes con clínica respiratoria y el personal sanitario que los atiende. Amás, han usar l’equipu de protección individual pa realizar la toma de muestres a persones con sospecha de sufrir esta patoloxía. El personal considerao contactu estrechu va controlase polos servicios de prevención de riesgos llaborales del área sanitaria y de Vixilancia Epidemiolóxica.

    Conseyos

    El Sespa desaconseya a los profesionales l’asistencia a congresos, xornaes, seminarios y cursos de formación presenciales, sacante les sesiones clíniques de los servicios. Amás, el Serviciu de Salú retardó tola actividá docente nos centros sanitarios con casos positivos. Tamién restrinxó temporalmente la presencia de visitadores médicos y voluntarios a hospitales y centros de salú. Aparte, decidió llimitar l’acompañamientu de pacientes hospitalizaos o n’Urxencies a un únicu familiar que nun presente fiebre nin síntomes respiratorios agudos.

    Pa prevenir la tresmisión de la infección, les autoridaes sanitaries aconseyen la llavadura frecuente de manes con agua y xabón, amás d’usar el flexu del coldu o pañuelos desechables d’un solu usu pa tusir o espirriar. La ciudadanía dispón d’información sobre esti virus respiratoriu nuevu na páxina web Astursalud. El Principáu va siguir informando de la evolución de la situación cuando haya novedaes.

  • Asturies confirma dos nuevos positivos por coronavirus

    Asturies confirma dos nuevos positivos por coronavirus

    Asturies sumó esti martes dos nuevos casos positivos por coronavirus. La Conseyería de Salú confirmó na tarde del martes del segundu casu de SARS-CoV-2 nel país. Trátase d’un varón de 32 años d’edá, que tuvo apocayá nel norte d’Italia con otres siete persones procedentes de Madrid. Una d’elles tamién dio positivo nesti virus y les demás considérense «contactos estrechos», polo que se-yos va realizar un siguimientu. El mozu asturianu empezó a sentir malestar xeneral y fiebre na xornada d’ayeri, polo que se recluyó en casa y, en llamando al 112, activóse’l procedimientu cola tomar de muestres de la vivienda.

    Les pruebes procesaes nel Llaboratoriu de Viroloxía del Hospital Universitariu Central d’Asturies (HUCA) dieron positivo. El paciente foi treslladáu al HUCA, onde va permanecer n’aislamientu. El Serviciu de Vixilancia Epidemiolóxica de la Dirección Xeneral de Salú Pública identificó a les persones de la redolada familiar y social del paciente p’activar les midíes de control y prevención. Estes midíes consisten nuna vixilancia del so estáu de salú: tomar la temperatura y llevar una vida social lo más restrictiva posible. Nel casu de presentar síntomes han ponese en contactu col 112.

    Pela nueche conocióse un tercer casu de positivu por coronavirus. L’afectada ye una xixonesa de 85 años, anque pel momentu desconócense más detalles. La Conseyería de Salú realizó 63 activaciones del protocolu, con 2 casos positivos. El Serviciu Públicu de Salú (Sespa) reforzó l’atención del 112 con personal sanitario p’atender les consultes de los ciudadanos.

  • Descartaos dos nuevos casos sospechosos de coronavirus n’Asturies

    Descartaos dos nuevos casos sospechosos de coronavirus n’Asturies

    La Conseyería de Salú escartó esta madrugada dos nuevos casos sospechosos de coronavirus rellacionaos col biltu COVID-19 n’Asturies. Les persones fueron atendíes nel Hospital Universitariu Central d’Asturies (HUCA) en activándose el protocolu d’actuación. Presentaben fiebre y síntomes respiratorios dempués de tornar de viaxe nes rexones afectaes d’Italia. Al presentar estos síntomes llamaron al 112.

    El Llaboratoriu de Viroloxía del HUCA procesó les amueses que dieron negativu al nuevu coronavirus y positivu para otres infecciones respiratories. La Conseyería de Salú caltien actualizáu’l protocolu d’actuación p’afaelo a la nueva realidá del coronavirus. Una nuevu cambéu qu’ayeri s’alcordó nel Conseyu Interterritorial celebráu en Madrid y al qu’allegó’l Conseyeru de Salú, Pablo Fernández Muñiz.

    El nuevu procedimientu amplía’l criteriu epidemiolóxicu d’árees de riesgu. Amás de China, les zones de riesgu son Xapón, Corea del Sur, Singapur, Irán y les rexones del norte d’Italia: Vénetu, Lombardía, Emilia Romagna y Piamonte. Anque estes zones pueden dir camudando. Sía que non, si tuvo en dalguna de les zones de riesgu, y presenta los síntomes respiratorios, tos, o fiebre encamiéntase llamar al 112.

    Les autoridaes sanitaries encamienten nun viaxar a les árees de riesgu, sacantes sía imprescindible. Nesi casu, si presenta dalgún síntoma aconséyase siguir les indicaciones de les autoridaes sanitaries locales. Tolos casos d’España son importaos y tase intentando contener la situación con distintes midíes pa que’l país nun sía un área de tresmisión.

    Encamientos

    Les autoridaes sanitaries recuerden que les midíes xenerales de prevención pal COVID-19 son les mesmes que pa otros virus respiratorios. La llavadura frecuente de manos con agua y xabón ye una de les midíes más eficaces pa evitar les andaes. En casu de tusir o espirriar tienen d’usase pañuelos desechables d’un solu usu pa tapase la boca o la ñariz, o bien el buecu del coldu pa evitar contaminar les manos.

    Coles mesmes, la Conseyería de Salú encamienta a aquelles que persones que viaxaren apocayá a les zones afectaes y que tengan sintomatoloxía respiratoria, esto ye, fiebre, tos o sensación de falta d’aire, llamen al 112, onde-yos facilitarán información ya indicarán-yos les actuaciones precises.