Xixón al día

Etiqueta: Serviciu de Salú del Principáu (Sespa)

  • COVID-19: ¿qué ye’l coronavirus y cómo prevenir contaxos?

    COVID-19: ¿qué ye’l coronavirus y cómo prevenir contaxos?

    El mundu vive anguaño pendiente de la evolución del nuevu coronavirus COVID-19. La medrana ente una posible pandemia mundial aumentó cola medría de nuevos casos fora de China. Italia sufrió un biltu mientres la fin de selmana que riquió’l zarru d’escueles y comercios y que s’espera qu’aumente significativamente. Tampoco ta controláu l’andanciu de Corea del Sur, onde probablemente vamos ver una segunda China. Informáronse de casos n’Oriente Mediu, incluyíes les primeres infecciones n’Israel y Llíbano, y 40 casos con siete muertes n’Irán, lo que suxure que se trata de la punta d’un iceberg.

    Tamién n’España detectáronse un total de ocho casos: cuatro en Canaries, dos en Madrid, unu en Cataluña, otru en Castellón. N’Asturies, descartóse que’l posible casu detectáu’l domingu tuviera venceyáu finalmente al nuevu coronavirus. Los coronavirus son virus que circulen ente los animales, pero dalgunos d’ellos tamién pueden afectar a los seres humanos. El COVID-19 foi identificáu en China a finales de 2019 y ye una cepa que nun se vio primeramente n’humanos.

    Les autoridaes sanitaries recuerden que les midíes xenerales de prevención pal COVID-19 son les mesmes que pa otros virus respiratorios. La llavadura frecuente de manes con agua y xabón ye una de les midíes más eficaces pa evitar los contaxos. En casu de tusir o espirriar tienen d’usase pañuelos desechables d’un solu usu pa tapar la boca o la ñariz, o bien el buecu del coldu pa evitar contaminar les manes.

    Coles mesmes, la Conseyería de Salú encamienta a aquelles persones que viaxaren apocayá a les zones afectaes y que tengan sintomatoloxía respiratoria, esto ye, fiebre, tos o sensación de falta d’aire, llamen al 112, onde-yos facilitarán información ya-yos indicarán les actuaciones precises.

  • El Bancu de Lleche Materno alimentó a 237 neños prematuros dende la so creación

    El Bancu de Lleche Materno alimentó a 237 neños prematuros dende la so creación

    El Bancu de Lleche Materno d’Asturies suministró nos postreros trés años lleche materno a 237 naciellos prematuros. Na mayor parte de los casos tratábase de ñácaros menos de 33 selmanes de xestación, con un pesu inferior a 1.500 gramos o neonatos enfermos que nun disponen d’abondu alimentu de la so propia madre.

    Dende la so apertura nel 2017, esta unidá especializada cuntó col altruísmu de 178 madres, qu’a lo llargo de meses simultaniaron la lactancia de los sos fíos cola estracción de lleche pa otros naciellos. Estes muyeres apurrieron 840 llitros. Desque pasteurizao, 710 llitros destináronse a les Unidaes de Neonatoloxía del HUCA y del Hospital Universitariu de Cabueñes p’atender a los naciellos ingresaos que lo precisaron.

    El Bancu de Lleche Materno púnxose en marcha n’Hospital Universitariu Central d’Asturies (HUCA) y, dende xunu del añu pasáu, pa facilitar les donaciones, los Hospitales Universitarios de Cabueñes y San Agustín son centros receptores de lleche materno procedente de madres residentes en Xixón y Avilés, respectivamente.

    Beneficios de la lleche materno

    La Organización Mundial de la Salú (OMS) aconseya la lactancia materna poles sos cualidaes nutricionales y los sos componentes bioactivos, que previenen múltiples enfermedaes en comparanza cola lleche artificial. Estos beneficios poténciense nos naciellos mui prematuros o enfermos porque los protexe frente a problemes gastrointestinales graves como la enterocolitis. Amás, mengua’l riesgu d’infección y aumenta les posibilidaes de recuperación, supervivencia y desenvolvimientu d’estos naciellos.

    La OMS aconseya la lactancia materna de forma esclusiva nos primeros seis meses de vida y complementada con otros alimentos polo menos hasta los dos años d’edá. Los beneficios de la lactancia tamién s’estienden a les madres porque mengua’l riesgu de cáncer d’ovarios y de mama. El Bancu de Lactancia Materna d’Asturies estima la collaboración altruista de les muyeres donantes. La Conseyería de Salú anima a les madres que puedan donar lleche a que se pongan en contactu con esta unidá especializada nel teléfonu 985 652 456.

  • Convocaes 36 places pa los servicios de plancháu y llavandería

    Convocaes 36 places pa los servicios de plancháu y llavandería

    El Serviciu de Salú del Principáu d’Asturies (Sespa) convoca un concursu oposición del so personal estatutariu pal accesu de 22 places pal serviciu de llavandería y 14 pal de plancháu. La resolución de la convocatoria según les bases publicáronse esti martes nel Boletín Oficial del Principáu d’Asturies (BOPA). Trátase d’un total de 36 places correspondientes a la Ufierta Pública d’Empléu (OPE) empecipiada pola Alministración del Principáu d’Asturies. El procesu selectivu va realizase al traviés del sistema concursu oposición pol turnu d’accesu llibre y cupu xeneral.

    Pa poder presentase a una de les places el requisitu específicu de titulación que se precisa ye tar en posesión, o en condiciones de llogralo a la fecha de finalización del plazu de presentación de solicitú, del títulu de certificáu oficial d’estudios obligatorios. El Sespa sigue cola llinia entamada pa executar la OPE pa consolidar empléu estable y amenorgar la tasa d’interinidá, que pasó d’un 34%, en 2015, al 14%, en 2019. Pa esti añu, la previsión ye que s’amenorgue al 8%.

  • Asturies lidera la donación d’órganos en casos de muerte encefálica

    Asturies lidera la donación d’órganos en casos de muerte encefálica

    Asturies lidera la donación d’órganos en casos de muerte encefálica, con 52 por millón d’habitantes. La media nacional asítiase en 33,1. Cantabria y Murcia, con 48 y 44, respectivamente, ocupen la segunda y tercera posición na tabla. Ye ún de los datos de memoria d’actividá de donación y tresplantes d’Asturies 2019 de la Organización Nacional de Tresplantes (ONT). La comunidá ye tamién la primera en tresplantes cardiacos, la segunda en renales y la tercera n’hepáticos.

    El Principáu ocupa, amás, la séptima posición en númberos absolutos de donación, namás superada por Cantabria, La Rioxa, País Vascu, Navarra, Murcia y Baleares. La edá media de les persones afectaes foi de 60,6 años, per debaxo de los 61 de media nacional. El 79% de los casos fueron donaciones multiórgániques, lo qu’asitia a Asturies como la tercera del país, per detrás de la Comunidá Valencia y Galicia, con un 82 y un 80%, respectivamente.

    L’Hospital Universitariu Central d’Asturies (HUCA), centru de referencia rexonal para esti tipu d’intervenciones, realizó 16 tresplantes de corazón. Esta cifra equival a una tasa de 15,6 por millón d’habitantes y asitia al Principáu a la cabeza d’esti tipu d’intervenciones, siguida de Cantabria (13,8), Murcia (10,7) y Baleares (9,6), y bien percima de la media nacional, un 6,4.

    En 2019, Asturies rexistró la segunda mayor actividá trasplantadora de reñones de la so historia, con 84 ensiertos, que la asitió en segunda posición, namás superada por Cataluña, que realiza más intervenciones de donante vivu. Otramiente, ye la tercer comunidá en tresplantes hepáticos, con 37 d’ellos y una tasa de 36,3, per detrás de Galicia (42,4) y Murcia (36.9) y percima de la media española, que ye de 26,1.

    Negatives familiares

    Les negatives familiares a la donación vuelven ser inferiores a les que se rexistren nel restu del país, con un 9,6% frente al 14%. Asturies asítiase ente les siete primeres comunidaes con menos refugos, xunto con Cantabria, País Vascu, Navarra, Aragón, Comunidá Valenciana y Murcia. Esta cifra reflexa l’alta concienciación de la población asturiana escontra la donación d’órganos.

    La Conseyería de Salú recuerda la importancia de la donación d’órganos. Cada persona qu’opte por ello regala un promediu de 30 años de vida. Dellos estudios demuestren qu’un donante de seis órganos puede dar hasta 55,4 años de vida a los distintos receptores.

  • Facua pide esplicaciones al Sespa por dexar de financiar delles melecines

    Facua pide esplicaciones al Sespa por dexar de financiar delles melecines

    FACUA-Consumidores n’Acción dirixióse al Sespa pa reclama-y qu’esplique por qué dexó de financiar delles melecines a usuarios de la comunidá y garantice que vuelvan tar disponibles para quien lo precisen. Distintos usuarios denunciaron que yá nun tienen accesu a determinaes melecines. En concretu, dalgunos d’ellos dieron a conocer qu’inclusive tuvieron que pidir l’empadronamientu n’otra comunidá autónoma pa poder costearse el Regorafenib, un fármacu contra’l cáncer de fégadu, yá que en ciertos supuestos el Sespa nun-yos financia dichu tratamientu.

    FACUA recuerda que la Llei de Salú del Principáu d’Asturies establez como derechu de los usuarios del serviciu de salú, ente otros, «llograr les melecines y productos sanitarios que se consideren necesarios pa promover, caltener o restablecer el so salú», y que se van utilizar «tolos sistemes de compra de melecines, tecnoloxía y productos sanitarios coles mires d’aforrar costos, de cuenta que dexe aumentar la eficacia y eficiencia».

    Esti últimu principiu, sicasí, nun puede contravenir la Llei de garantíes y usu radional de les melecines y productos sanitarios, que reconoz «el derechu de tolos ciudadanos a llograr melecines en condiciones d’igualdá en tol Sistema Nacional de Salú» y que «les midíes tendentes a racionalizar la prescripción y usu de melecines y productos sanitarios que puedan adoptar les comunidaes autónomes nun van producir diferencies nes condiciones d’accesu a les melecines y productos sanitarios financiaos pol Sistema Nacional de Salú».

    L’asociación encamienta al Sespa a qu’esclarie cuálos son los motivos polos que decidió escluyir ciertes melecines del so sistema de financiamientu. Amás, encamienta al serviciu públicu de salú que garantice qu’aquellos usuarios que los precisen vuelvan tenelos disponibles.

  • Cabueñes incorpora les nueves técniques endoscópiques pa tratar les patoloxíes de columna

    Cabueñes incorpora les nueves técniques endoscópiques pa tratar les patoloxíes de columna

    El Serviciu de Ciruxía Ortopédica y Traumatoloxía del Hospital de Cabueñes practicó a trés pacientes de estenosis de canal lumbar y hernia discal, les primeres intervenciones coles nueves técniques endoscópiques. El centru incorporóles pa tratar les lesiones de columna. Esti nuevu procedimientu aplicáu pola Unidá de Columna de Cabueñes resulta mínimamente invasivu y apurre a los pacientes una recuperación más rápida con menores molesties posoperatories, lo qu’amenorga tamién los tiempos d’estancia hospitalaria.

    La endoscopia de columna permite la esploración de la canal espinal por aciu una óptica d’alta definición que namás rique d’una incisión menor d’un centímetru. Esto da como resultáu un abordaxe de la lesión muncho menos agresivu quirúrgicamente.

    El doctor Ghassan Elgeadi, espertu internacional nesti tipu de técniques, va asisitió al desenvolvimientu d’estes microciruxíes, que permiten tratar de manera eficaz patoloxíes tan habituales como la hernia discal cervical y lumbar. Estes enfermedaes dexeneratives de la columna afecten a gran parte de la población adulta y acarreten costos tanto asistenciales como sociales en términos de baxes llaborales y discapacidá residual permanente.

  • Asina se prepara Asturies énte posibles casos de coronavirus

    Asina se prepara Asturies énte posibles casos de coronavirus

    Asturies prepárase ente posibles contaxos de coronavirus. La Dirección Xeneral de Salú Pública y el Serviciu de Salú distribuyeron la selmana pasada en toles árees sanitaries el protocolu d’actuación énte posibles casos d’infección pol nuevu coronavirus 2019-nCoV. El protocolu caltiense n’actualización continua. Los profesionales del sistema sanitariu asturianu yá cunten col protocolu. Tamién les xerencies de les ocho árees sanitaries y les direcciones d’hospitales, enfermería y atención sanitaria. Tolos casos sospechosos van derivase al Hospital Universitariu Central d’Asturies (HUCA).

    Dende’l Principáu tán siguiéndose les pautes del Ministeriu, que se van revisando de forma continua y adáptense a la realidá asturiana pa poder adoptar les midíes que seyan necesaries. La sospecha d’un casu va realizase en base a criterios clínicos y epidemiolóxicos. Anguaño nun existe un tratamientu específicu pal nuevu coronavirus. El tratamientu sintomáticu del mesmu va depender de la situación clínica.

    El Gobiernu asturianu ta en contactu permanente col Ministeriu de Sanidá y el restu de comunidaes autónomes pa facer un siguimientu de la situación. L’autoridá sanitaria recuerda qu’hai una serie de midíes preventives que son de gran utilidá. Encamienta una correcta hixene de manes, evitar el contactu estrechu con persones que presenten signos d’afección respiratoria y cubrir la boca y la ñariz con pañuelos desechables al tusir o espirriar.

  • Laura Muñoz, nueva directora del Hospital de Cabueñes

    Laura Muñoz, nueva directora del Hospital de Cabueñes

    El conseyu d’alministración del Serviciu de Salú del Principáu (Sespa) designó esti vienres a Laura Muñoz Fernández como directora del Hospital de Cabueñes. La doctora ye l’actual coordinadora funcional de proyecto TIC nel Serviciu de Calidá, Sistemes y Tecnoloxíes de la Conseyería de Salú. Especialista en Medicina Familiar, cuenta con una dilatada esperiencia na xestión. Ocupó la dirección médica d’Atención Primaria na área V (Xixón), la dirección d’Asistencia Sanitaria y Salú Pública y la dirección d’Atención y Evaluación Sanitaria del Sespa.

    El conseyu d’alministración aprobó otros cinco nomamientos: los directores Económicu y de Profesionales del área sanitaria I (Xarrio) y VI (Les Arriondes), Luis Fernández-Trabadelo y Benito García Proenza, respectivamente, y los directores d’Atención Sanitaria y Salú Pública de les árees I y VII (Mieres), Luis Sánchez Álvarez y Ramón Rodríguez González, respectivamente. A lo último, Roberto Sáiz Fernández va ser coordinador del nivel I del Sespa.

    El nuevu director Económicu y de Profesionales de Xarrio, Luis Fernández-Trabadelo, ye llicenciáu en Ciencies Económiques pola Universidá d’Uviéu y cuenta col títulu d’Espertu en Xestión d’Organizaciones Sanitaries pola Universidá Carlos III de Madrid. Foi director de Compres nel Hospital de Xove, onde formó parte del equipu directivu. Tamién desempeñó llabores como subdirector de Xestión del Hospital San Agustín y xefe de Control de Xestión del Hospital Universitariu Central d’Asturies. Anguaño trabaya nos Servicios Centrales del Sespa en funciones relatives a la organización y xestión de programes y contrataciones sanitaries.

    L’actual responsable del serviciu de farmacia d’Atención Primaria nes xerencies V ya III (Avilés), Luis Sánchez Álvarez, va ser el nuevu director d’Atención Sanitaria y Salú Pública de Xixón. Enantes foi técnicu de fármacovigilancia nel Centru Rexonal del Principáu y director técnicu nel Centru Comuñal de Sangre y Texíos del Principáu d’Asturies. Sánchez ye llicenciáu en Farmacia pola Universidá de Santiago de Compostela y doctor pola Universidá d’Uviéu. La so formación inclúi dellos másteres y posgrados para la xestión.

    Ramón Rodríguez González, que se va facer cargu de la dirección d’Atención Sanitaria y Salú Pública del área VII (Mieres), ye especialista en Medicina de Familia y hasta agora desempeñaba’l so llabor como director del área de Xestión Clínica d’Urxencies del Hospital Álvarez Buylla. Pela so parte, Benito García Proenza va ser el director Económicu y Profesionales de la área VI. Anguaño ye director xefe del Serviciu de Recursos Humanos del área de Xixón. Llicenciáu en Derechu pola Universidá d’Uviéu, desenvolvió tol so llabor na alministración, onde desempeñó distintos cargos tanto nel Sespa como na conseyería.

  • L’andanciu de gripe algama una intensidá alta

    L’andanciu de gripe algama una intensidá alta

    L’andanciu del gripe siguió aumentando na tercer selmana del añu hasta algamar una tasa de 623 casos por cien mil habitantes, lo que supón un nivel d’intensidá altu. La medría de los contaxos produzse sobre manera nos menores de 5 años y na mocedá, y caltiénse ente’l restu de la población. La presión asistencial n’Atención Primaria y Urxencies caltiénse estable y tiende a baxar nesta selmana.

    El virus gripal predominante sigue siendo l’A (nH1N1), anque tamién circulen de manera relevante del virus respiratoriu sincitial. L’HUCA rexistró hasta esta tercer selmana del añu 161 ingresos por gripe, de los que 55 foron graves. La estimación pal conxuntu d’Asturies xubió a 495 hospitalizaciones. Los más de los ingresos y casos graves presentaben dalgún factor de riesgu, y yeren mayores de 50 años. Los datos nacionales reflexen que’l gripe espardióse per tol país, sacante en Cantabria y Andalucía, onde’l nivel d’espardimientu ye local. Asturies, Navarra y La Rioxa son les úniques comunidaes onde la intensidá de la epidemia ye alta.

  • Estudien posibles casos de paperes n’adolescentes de dos institutos

    Estudien posibles casos de paperes n’adolescentes de dos institutos

    La Conseyería de Salú ta estudiando posibles casos de paperes ente los alumnos de bachilleratu de dos escueles, amás de n’otros centros educativos del área sanitaria IV. El Serviciu de Vixilancia Epidemiolóxica recibió esti mes la notificación médica de trés casos, que correspuenden a varones de les árees VIII (Nalón), V (Xixón) y IV (Uviéu). Esti postreru ye una sospecha clínica ensin confirmación pol llaboratoriu d’un alumnu de 17 años del Colexu Internacional Meres, en Siero. Aparte, nes últimes selmanes el Llaboratoriu de Microbioloxía del HUCA recibió delles muestres que resultaron negatives.

    El mes pasáu notificáronse siete casos con edaes ente los 12 y 74 años. En total, nel 2019 rexistráronse 53 casos n’Asturies, de los que 9 yeren adolescentes de 15 a 19 años d’edá. Nesti sieglu hubo trés brotos epidémicos de paperes, nel 2002, 2007 y 2012-13. Nesti últimu periodu confirmáronse 2.900 contaxos.

    La inmunización de les paperes, incluyida nel calendariu vacunal infantil dende 1982, forma parte de la llamada triple vírica (sarampión, parotiditis y rubeola). Alminístrase a los 12 meses con un recuerdu a los 3 años d’edá. Esta profilaxis foi quién a menguar nun 86 % la incidencia d’esta enfermedá que cursa fiebre y inflamación d’una o delles glándules salivales parótides.