La conseyera de Presidencia, Rita Camblor, presentó güei na Xunta Xeneral el presupuestu del so departamentu pal 2022, que xube hasta los 233.651.108 euros, un 11,4 % más qu’anguaño. Les cuentes empobínense escontra’l saltu dixital que tien de dar l’Alministración autonómica pa consolidase como una gran plataforma de servicios electrónicos, basada na ciberseguridá y el datu, que dea soporte a los servicios públicos y atienda les necesidaes de la ciudadanía.
Nesti contestu, l’área de Seguridá y Estratexa Dixital va cuntar con 97.517.796 euros, lo qu’implica un aumentu de cuasi’l 17 %. La mayor parte d’esi incrementu va destinase a sistemes d’información y telecomunicaciones, cola mira d’ameyorar la seguridá y los servicios de la sede electrónica del Principáu, amás de fomentar l’usu de tecnoloxíes nueves en prestaciones con especial incidencia social y allixerar trámites. Tamién van optimizase l’anchu de banda y la robustez de les comunicaciones y van fortalecese los servicios de movilidá, la conexón a internet y los sistemes de videoconferencia.
Toes estes midíes enmárquense nun ambiciosu plan de xestión qu’incluye un programa d’habilitación dixital pa la ciudadanía y los emplegaos públicos, l’usu d’asistentes virtuales pa la prestación de servicios y la prioridá del datu como base pa la toma de decisiones.
Modernización de la xusticia
La dotación pa xusticia establezse en 67.813.819 euros, lo que representa una xubida del 10,19 % (6.272.829 euros). Nel apartáu d’inversiones, inclúyese una partida pa la rehabilitación integral de la sede xudicial de Cangas, que va encarase a partir del 2023 con fondos autonómicos y estatales. Nel 2022 va financiase la redacción del proyectu, que la so execución ta valorada en 2,7 millones.
Va cubrise tamién la redacción del proyectu de meyora d’instalaciones, accesibilidá, iluminación y evacuación de sedes del Tribunal Superior de Xusticia, una intervención que va rondar los 1,3 millones.
Les cuentes incluyen 300.000 euros p’actuaciones d’eficiencia enerxética nes instalaciones de Comandante Caballero, n’Uviéu, y 285.000 pa l’adecuación de los espacios axacentes al xulgáu nuevu de violencia contra les muyeres de Xixón.
Destaquen los 3,6 millones correspondientes a l’anualidá de les obres de construcción de la sede xudicial nueva de Llangréu, un proyectu que va esixir una inversión de 6,5 millones y pal que se prevé un plazu d’execución de 20 meses. Amás, recuéyese una partida pa la redacción del proyectu de la futura sede de Pravia.
No que fai al personal, la plantiya va aumentar en 17 persones: dos de xestión pa los xulgaos de primera instancia de Xixón 10 y 11; trés de tramitación pa los de Cangues d’Onís, Llanes y Villaviciosa; otros dos de xestión pa l’Audiencia Provincial, dos más pa la Fiscalía, nes secciones d’Avilés y Llangréu, y ocho pal xulgáu nuevu d’Avilés.
Sofitu a los conceyos
El refuerzu de la collaboración coles entidaes locales tien el so reflexu nes cuentes. Asina, la Dirección Xeneral d’Alministración Local va disponer de 9,7 millones, 157.600 euros más qu’anguaño, y el Fondu de Cooperación Municipal aumenta en 150.000, hasta llegar a los 8.350.000 euros. Amás, inclúyense 450.000 euros más qu’esti exerciciu pa obres en cooperación colos conceyos.
Serviciu d’Emerxencies
El presupuestu del Serviciu d’Emerxencies del Principáu (Sepa) xube un 1,8 %, al pasar de 36.896.510 a 37.560.680 euros, cola mira d’ameyorar los medios materiales, sobre manera los vehículos. El plan renovación y axuste de la flota increméntase un 28,7 %, dende 1.100.000 a 1.416.000 euros. Les partíes más importantes destínense a equipos motoventiladores, moblame pa los parques de bomberos, renovación de vehículos, mázcares y cascos. Tamién aumenten les subvenciones a los conceyos incluyíos nel Plan de Salvamentu en Playes.
Emigración y Memoria Democrática
Esti departamentu va xestionar 1.508.365 euros —incluyendo los fondos del Conseyu de Comunidaes Asturianes— que van destinase, principalmente, a ayudes a la comunidá asturiana nel estranxeru, con atención especial a les persones en situación de vulnerabilidá. El principal oxetivu ye reforzar l’atención social a la colectividá asturiana nel esterior, por aciu la creación de nuevos espacios permanentes d’asistencia, orientación y asesoramientu.
Les cuentes incluyen 184.000 euros pa desenvolver la Llei pa la Recuperación de la Memoria Democrática.
Gobernanza pública, tresparencia y bon gobiernu
La creación na Universidá d’Uviéu d’una Cátedra del Bon Gobiernu y otra de l’Axenda 2030, la meyora y ampliación de los servicios d’atención ciudadana y l’aumentu del catálogu de datos abiertos son oxetivos básicos d’esta dirección xeneral, que tamién va implementar meyores nos portales corporativos. Pela primer vez, el Principáu ellaboró un informe d’alliniadura de los presupuestos autonómicos colos oxetivos de l’Axenda 2030.
Institutu Asturianu de Mocedá
L’área de Mocedá va cuntar con 2,3 millones. Caltiénse la dotación del Institutu Asturianu de la Mocedá y van anovase los convenios coles 24 oficines nueves, que suponen un costu de 356.719 euros. Les subvenciones a asociaciones xuveniles consolídense con 146.000 euros.
Los fondos destinaos a les polítiques referíes al colectivu LGTBI crecen en 10.000 euros —pasen de 65.000 a 75.000— y asúmese’l compromisu d’ellaborar una llei en defensa de los derechos d’esti grupu, tal qu’anunció’l presidente del Principáu.
Axencia de Cooperación al Desenvolvimientu
Esti órganu aumenta’l so presupuestu hasta 5,3 millones col fin d’afondar nos retos de llexislatura. Amás, l’exerciciu próximu va ellaborase’l nuevu plan director de cooperación, qu’aspira a incorporar un enfoque innovador y estratéxicu a partir de la esperiencia adquirida.
El sofitu a los proyectos de desenvolvimientu increméntase con 120.000 euros, hasta algamar los 2.885.000, una de les mayores cuantíes dende’l 2015. Pela so parte, les ayudes al empoderamientu y la promoción de los derechos de les muyeres xuben hasta los 250.000 euros, más del doble que nel 2018, añu de la so puesta en marcha.
