El Gobiernu asturianu decidió eseti martes suspender l’actividá docente en cinco centros educativos énte la medra de la tresmisión del nuevu coronavirus. Esta midida, de calter temporal, entró en vigor esta mañana. Va durar 14 díes revisables, y afecta tamién a les actividaes escolares complementaries. Los centros nos que se suspenden les clasesles clases son los siguientes: Colexu Fundación Masaveu (Uviéu), Santu Domingo de Guzmán y San Ignacio (Uviéu) y los institutos d’Educación Secundaria Monte Naranco (Uviéu) y Ramón Areces (Grau).
Amás, n’Asturies, al igual que nel restu del territoriu nacional los grandes eventos deportivos van realizase a puerta zarrada. Inclúyense los partíos de primera y segunda división de fútbol y los sos equivalentes de baloncestu, mesmo qu’aquellos que movilicen a un importante númberu d’aficionaos.
Nel ámbitu llaboral encamiéntase’l teletrabayu y la flexibilidá horaria. Otres de les midíes aconseyaes son les siguientes: fomentar el cuidu domiciliariu de mayores, evitar que persones con síntomes respiratorios leves alleguen a centros sanitarios y qu’aquelles con enfermedaes cróniques o importantes factores de riesgu asistan a llugares allegaos. Les autoridaes suxuren, amás, que s’eviten viaxes innecesarios.
Primer alta hospitalaria por coronavirus
Per otra parte, l’Hospital Universitariu Central d’Asturies (HUCA) dio güei a mediudía la primer alta hospitalaria a un afectáu pol nuevu coronavirus. Hasta agora, permanecen ingresaos nel HUCA 9 pacientes. La muyer de 85 años afectada por una neumonía foi treslladada al Hospital de Cabueñes al escartase que fuera un casu de nuevu coronavirus.
La situación clínica de los afectaos nun varió nes últimes hores: dos permanecen estables dientro de la gravedá ingresaos na UCI y otros siete caltiénense n’aislamientu con síntomes leves, sacante un varón de 48 años qu’empecipió una neumonía. El restu sigue n’aislamientu nes sos cases, con siguimientu telefónicu. El númberu de persones diagnosticaes de COVID-19 n’Asturies asítiase en 25. Trece d’estos casos tán venceyaos a un centru educativu d’Uviéu. El 112 atendió hasta les 15:30 hores un total de 890 llamaes rellacionaes col nuevu coronavirus nel Principáu.
Encamientos
Les autoridaes sanitaries recuerden que los encamientos siguen siendo los mesmos. Les persones que viaxaron a dalguna de les zones consideraes de riesgu (China, Corea del Sur, Xapón, Singapur, Irán y les rexones italianes de Lombardía, Veneto, Emilia-Romagna y Piamonte) y que presenten los síntomes de tos, fiebre o dificultá respiratoria tienen de ponese en contactu col 112. Tamién s’insiste en que la midida más eficaz para prevenir la tresmisión de los virus respiratorios, ente ellos el nuevu coronavirus, ye la llavadura frecuente de les manes con agua y xabón. Tamién s’aconseya utilizar la flexura del coldu o pañuelos desechables d’un solu usu pa tusir o espirriar.
