Xixón al día

Etiqueta: Xixón Turismu

  • Xixón presenta en FITUR «Xixón Data Lab» una ferramienta pa conocer la ocupación en tiempu real

    Xixón presenta en FITUR «Xixón Data Lab» una ferramienta pa conocer la ocupación en tiempu real

    Conocer con detalle la ocupación hotelera de la ciudá, ver la evolución de reserves pa un momentu concretu, saber el preciu al que s’ufren los cuartos… Toos estos datos van afayase en Gijón Data Lab, una ferramienta creada por Xixón Turismu pal sector d’agospios turísticos de la ciudá. Esta ferramienta estadística, frutu de la colaboración del sector públicu y priváu, va valir p’ameyorar la competitividá de los agospios y la de la ciudá de Xixón.

    La presentación de Gijón Data Lab fíxose güei nel marcu de FITUR y nel actu afayáronse la alcaldesa de la ciudá, Ana González, Berta Piñán, conseyera de Cultura, Política Llingüística y Turismu del Principáu d’Asturies, y el direutor de Xixón Turismu, Daniel Martínez Junquera.

    La alcaldesa destacó que esta ferramienta sal de la estay pública cola colaboración necesaria del sector priváu, una collaboración imprescindible pa faer realidá esta ferramienta. Destacó y agradeció tamién el trabayu del equipu de Xixón Turismu.

    Gijón Data Lab ye un espaciu pa que los agospios intercambien los sos datos y conocer asina la ocupación real. Gracies a esta ferramienta y l’analís de la información dada poles empreses, va prevese la ocupación futura. Un conocimientu de gran valir pa que los agospios puean tomar decisiones como asoleyar campañes de promoción.

    En Gijón Data Lab los agospios van poder:

    • Analizar el so rendimientu y comparalu con los sos cuatro competidores direutos, incluyendo:

    o    Datos d’hotel vs competidores a pasáu (ADR, RevPar, ocupación).

    o    Datos d’hotel vs competidores a futuru (Ocupación y evolución de les reserves).

    o    Comparativa vs competidores, plaza y agospios de la mesma categoría.

    • Monitorizar en tiempu real la ocupación y los precios medios de la plaza, tanto nel momentu actual como con un horizonte temporal de tres meses.
    • Consultar los eventos de la ciudá y venceyalos a la evolución de les sos reserves y la so ocupación.

    Pa la fase de desendolcu, Xixón Turismu cuntó cola colaboración de cinco hoteles de la ciudá. Agora, tolos agospios de la ciudá van poder xunise al proyeutu y beneficiase, de baldre, de la ferramienta.

  • Xixón Turismu lleva’l Cantábricu a Madrid

    Xixón Turismu lleva’l Cantábricu a Madrid

    “Perdona, ¿sabes ónde ta la sablera de San Llorienzo?”. Con esta entruga, dellos figurantes representando surferos y surferes percorrieron esta fin de selmana les cais aledañes de la Gran Vía, en Madrid, para espertar l’interés de los viandantes per Xixón y convidalos a pasar per una carpa informativa instalada na céntrica plaza de Pedro Zerolo. Una vegada ellí, l’artista Rafa Leafar tuvo pintando en directu ilustraciones en gran formatu de distintos rincones de Xixón. Les persones comenenciudes recibieron información sobre la ciudá asturiana, dellos regalos y participaron en sorteos de viaxes a Xixón.

    Esta ye l’acción de street marketing que punxo en marcha Xixón Turismu estos díes en Madrid y busca tresmitir la imaxe de la ciudá asturiana como un destín ideal pa los amantes de surf y otros deportes d’aventura. Amás, tamién se van poner en valor otros aspeutos de la ciudá, como la gastronomía, la ufierta de turismu activu, la ufierta cultural o la identidá diferenciadora del destín.

    Madrid Surf Filme Festival

    Amás, Xixón Turismu patrocinó’l Madrid Surf Filme Festival, que se celebró del 9 al 11 d’avientu tamién na capital. Asina, la imaxe de la ciudá tuvo presente en toles acciones del festival, onde se proxectó’l spot de “Xixón tol Cantábricu a los tos pies” y onde se sortearon regalos de Xixón, actividaes de turismu activu y dos viaxes a la ciudá asturiana.

    Dientro de la programación del festival, el sábadu 11 d’avientu, el director de Xixón Turismu, Daniel Martínez Junquera, participó, antes de la proyección de zarru, nun alderique xuntu con Manuel Ruiz, seleccionador de la Federación de Surf del Principáu d’Asturies. Nesti alderique punxo sobre la mesa la hestoria y presente del surf en Xixón y falóse del valor que tien na ciudá como curiosu turísticu.

    Estes acciones de promoción complementen esta selmana con una xornada de trabayu profesional y un alcuentru con periodistes y blogues de viaxes. Dambes acciones tán entamaes per Xixón Turismu y van celebrase el próximu 15 d’avientu. Nesta xornada van participar 10 empreses del sector turísticu xixonés, que van recibir a una ventena d’axencies de viaxes y turoperadores de Madrid. Nel alcuentru con periodistes y bogueros van allegar más de 70 profesionales especializaos en viaxes.

  • Xixón Turismu premia la sostenibilidá

    Xixón Turismu premia la sostenibilidá

    Xixón Turismu premia de nueves a profesionales y empreses que trabayen pola sostenibilidá. Güei, Daniel Martínez Junquera, direutor de Xixón Turismu, entregó, acompangáu del decanu de la Facultá de Comerciu, Turismu y Ciencies Sociales Xovellanos, Levi Pérez Carcedo, el VII Premiu Xixón Turismu al Meyor Trabayu Fin de Máster sobro Sostenibilidá Turística a María de Paz Orviz pol so trabayu “Análisis de los destinos turísticos sostenibles y su comunicación comercial”. El premiu ta dotáu con 300€ y certificáu acreditativu.

    El trabayu gallardonáu define los trazos de los destinos turísticos sostenibles y los elementos necesarios p’afitar un modelu turísticu sostenible. Arriendes d’ello, analiza y compara Xixón, Londres y Estocolmo no que cinca a la forma forma de comunicar y espardir el so apueste pola sostenibilidá, aportando delles meyores pa Xixón.

    Tamién se fizo entrega de un certificado acreditativo a su tutora, Primitiva Pascual Fernández, profesora de la Universidá d’Uviéu y coordinadora del Máster Universitario en Dirección y Planificación del Turismo.

    Certificaciones Biosphere Sustainable Lifestyle

    Nel actu, tamién s’entregaron les certificaciones Biosphere Sustainable Lifestyle a les empreses y entidaes que puen amosar tolos sos esfuercios venceyaos cola consecución de los Oxetivos de Desarrollu Sostenible de Naciones Xuníes y les sos 169 metes.

    Les empreses y servicios de Xixón puen acceder a la certificación Biosphere Sustainable Lifestyle de magar el mes d’abril y, nos primeros meses, algamaron la certificación estes empreses:

    El Parador de Gijón Molino Viejo: trabaya activamente na realización de actuaciones col envís d’amenorgar la so buelga ambiental y aumentar la so contribución a los Oxetivos de Desarrollu Sostenible n’estayes como’l cambéu climático, la proteición de la biodiversidá o’l meyor aprovechamientu y control de los residuos. Tien una política de Responsabilidá Social Corporativa y ta adheríu al Pactu Mundial de les Naciones Xuníes al traviés de la Red de Paradores.

    El Hotel San Miguel: trabaya baxo la filosofía de ser un “hotel responsable”, involucrando a los veceros y veceres nel cuidáu del entornu. Destaca’l so compromisu social, al traviés de la collaboración activa cola ONG “Asturies por África”, el so compromisu col reciclaxe y reutilización de residuos y el puxu por una movilidá más sostenible.

    El Mercado Artesano y Ecológico: ye una iniciativa pionera n’España. La so filosofía, alliniada dafechu col cumplimientu de los Oxetivos de Desarrollu Sostenible, básase en fomentar y sofitar l’artesanía tradicional asturiana y los productos de proximidá. Arriendes d’ello, destaca por participar en proyeutos solidarios y por averar a la ciudadanía y turistes a la cultura y realidá asturiana d’una forma participativa y didáutica.

     

  • Infoxixón treslládase a la Casa Paquet

    Infoxixón treslládase a la Casa Paquet

    El serviciu d’información Infoxixón inauguró la so nueva oficina nel emblemáticu edificiu de la Casa Paquet. La nueva oficina, asitiada nuna de les zones más céntriques y cercanes a los recursos turísticos de la ciudá, va ufiertar tola información necesaria a los visitantes de Xixón. El serviciu cunta con un ampliu abanicu de productos turísticos diseñaos por Xixón Turismu, que tamién ta previstu que s’allugue nes instalaciones tres la so adecuación nos próximos meses.

    Mientres les caberes selmanes trabayóse nel acondicionamientu de la planta baxa, onde s’asitia Infogijón. L’espaciu cumple con tolos criterios d’accesibilidá dientro de la llínea de trabayu marcada per Xixón Turismu como exa estratéxica pa la ciudá y marcaos na llínea de trabayu de Destín Turísticu Intelixente. L’actu oficial de presentación d’esti nuevu allugamientu de Infogijón va tener llugar esta selmana.

  • Rodrigo Cuevas protagoniza la nueva campaña turística de Xixón

    Rodrigo Cuevas protagoniza la nueva campaña turística de Xixón

    “Ye playa y ye prau / Ye de chigre y de mantel / Ye l’horizonte cercanu / Ye historia y ye vanguardia… / ¡Ye mundial! / Xixón, en toles ocasiones”. Con estos gabitos, y de la mano de Rodrigo Cuevas, que tamién aporta la música, Xixón quier afitase a capital turística del Norte d’España. L’artista protagoniza una campaña que quier atrayer al turista que busca reencontrase cola ciudá asturiana.

    La campaña tien l’enfotu de recuperar l’interés de Xixón ente la xente que quiera faer una escapada o tomase unos díes n’acabando les restricciones de movilidá y pensando en caltenela nes foles vinientes, como na seronda. La campaña va tar empobinada al mercáu nacional más averáu: Madrid, Castiella y Llión, Cantabria, Galicia, Navarra y Euskadi. Toles creatividades fixéronse en castellán, asturianu, gallegu y euskera.

    Anguaño, y pola mor de la situación actual, na que la movilidá va tar llendada, la campaña tamién va empobinase al públicu llocal: Xixón y el restu d’Asturies. La campaña remanecerá güei y va tar activa tol branu, con especial incidencia a finales de xunu y entamu de xunetu, momento nel que se prevé que se faigan la mayor parte de les reserves. La campaña podría reactivase de cara a les pontes de la seronda.

    Rodrigo Cuevas y Xixón

    El compositor ya intérprete asturianu ye’l protagonista de la campaña. Rodrigo Cuevas ye un artista de sonadía tanto dientro como fuera d’Asturies. Tresmite, a la vez, esa autenticidá y singularidá que reflexa de Xixón como destín únicu, singular, estremáu, con una cultura fuerte y con calter. Arriendes d’ello, xune na so imaxe la visión d’esi Xixón qu’avanza, que s’abre a mundos nuevos, modernu, pero siempres respetando les sos tradiciones. Son valores colos que los y les xixoneses s’identifican. Rodrigo Cuevas vencéyase muncho no tocante a valores colo que ye Xixón: asturiana, moderna, abierta, acoyedora, creativa, tresgresora, cosmopolita, artística, gayolera…

    Asina, esti nuevu spot amuesa duples de conceutos que s’asocien a Xixón: playa/prau; horizonte/cercanu; historia/vanguardia; chigre/mantel. Los escenarios son la playa de San Llorienzo, el Puertu Deportivu, el Xardín Botánicu Atlánticu, la cai La Merced, Llaboral Ciudá de la Cultura, Llaboral Centru d’Arte, el Muséu del Pueblu d’Asturies, Llagar Trabanco, el restorán La Salgar y l’Eloxu del Horizonte, que nun podía faltar nel so 30 aniversariu.

  • Xixón patrocina una serie documental sobre’l surf

    Xixón patrocina una serie documental sobre’l surf

    Xixón acoyó esti xueves la presentacíon de la serie Caminado sobre las Olas. Ye una serie documental patrocinada por Xixón Turismu y compuesta por 13 episodios de media hora de duración, na que s’entemez el viaxe de los pelegrinos del Camín de Santiago y el viaxe d’un surfista. El protagonista ye Kepa Acero, surfista y viaxeru de sonadía. La serie ye una coproducción ente Surf Channel y RTVE, cola collaboración de R-Grupo Euskaltel.

    Caminando sobre las olas va emitise en Grupo Euskaltel, al que pertenez Telecable; Surf Channel; La2; Canal Internacional de TVE; y TVE a la carta. El patrociniu d’esta serie forma parte de la estratexa nueva de Xixón Turismu pa promocionar la ciudá asturiana como un destín de surf y turismu activu. “Queremos posicionar a Xixón como un destín de surf y de turismu activu y venceyar la imaxe de la ciudá colos valores qu’estes actividaes tresmiten. Xixón tien unes playes con foles de primer nivel”, comentó’l conceyal d’Educación y Cultura, Alberto Ferrao.

    L’alcuerdu de collaboración ente Surf Channel y Xixón Turismu inclúi la producción d’un spot de Xixón con temática de surf y la so emisión en Surf Channel d’avientu a setiembre. Amás va grabase un programa de Surfing Reports dedicáu a Xixón, nel que la surfista xixonesa Lucía Martiño va ser la protagonista. “Ún de los nuesos atractivos mayores ye’l mar, qu’ufre delles oportunidaes pal desendolcu d’actividaes qu’arriquezan la nuesa ufierta turística”, esplicó Ángela Baños, direutora de Xixón Turismu.

  • Vídeu: asina se viende Xixón esta seronda

    Vídeu: asina se viende Xixón esta seronda

    Xixón quier conquistar a los turistes esta seronda vendiéndose como la ciudá más animada del norte d’España. Xixón Turismu ta acabante d’asoleyar el nuevu vídeu de promoción turística enfocada a la temporada de seronda/iviernu. El mayor impautu de la campaña va realizase nos principales mercaos nacionales emisores de turistes a la ciudá asturiana (Madrid, Castiella y Llión, Euskadi, Galicia, Barcelona, Andalucía y Cantabria) y nes árees xeográfiques de Francia d’especial interés (Isla de Francia, Bretaña, Países del Loira, Centru-Valle del Loira, Nueva Aquitania, Occitania). Esta campaña de seronda, que tien como principal oxetivu atrayer turistes acullá de los meses de temporada alta. Ta empobinada a llegar a usuarios más allegaos y cualificaos per aciu de l’emplegu de soportes nuevos como la Smart TV o formatos nuevos como’l rich media.

    La campaña empobínase a pareyes que puean faer una escapada aprovechando los puentes de seronda

    La campaña publicitaria, que sigue emplegando l’eslogan Xixón Tu lugar, céntrase nun spot qu’amuesa los atractivos de Xixón. Nesti casu, la campaña empobínase a pareyes que puean faer una escapada aprovechando los puentes de seronda y reforciando la imaxe de Xixón como destín cultural y gastronómicu. Pa esparder la imaxe de Xixón van emplegase soportes online, d’esterior y revistes de viaxes, tanto na so versión impresa como online. Ente los soportes online, esbilláronse los qu’almiten el formatu vídeu: TV online, redes sociales (Facebook, Instagram y Youtube), revistes online y rich media. En Francia tamién s’incluyó’l portal meteorolóxicu La Chaine Météo y la rede social Snapchat, pola so fuerte penetración.

    Amás de tener presencia en móvil, tableta y PC, añadióse’l dispositivu Smart TV a la planificación por mor del incrementu del emplegu ente los españoles (el medru mediu ye del 35% respeuto al añu 2018). Dientro d’esti dispositivu nuevu vamos faer campaña nes televisiones líderes, Mitele y Atresplayer, y en Youtube, plataforma de vídeu online líder. Con ello, ta previstu algamar un total de 8,4 millones d’impautos y cerca de 1,4 millones de spots vistos.

  • Xixón afítase como referente turísticu nel norte d’España

    Xixón afítase como referente turísticu nel norte d’España

    La cifra de viaxeros agospiaos n’establecimientos hoteleros rexistrada en xunetu en Xixón ye de 49.691 persones, con un incrementu del +8,1% respeuto al mesmu mes del añu caberu. La cifra de nueches d’agospiu algama les 111.255, con un medru del +12,7%. La estancia media afítase en 2,2 nueches y medra un 0,1% respeuto al añu caberu.

    Estos datos remanecen de la Encuesta d’Ocupación Hotelera espublizada güei pol Institutu Nacional d’Estadística y tres los axustes realizaos pola consultora Invesmark p’actualizalos según les places hoteleres disponibles anguaño. L’incrementu rexistráu por Xixón (+8,1%) en númberu de viaxeros asítiase perriba de la media rexonal (+5,5%) y per delantre de los siete principales destinos de la España Verde.

    No tocante al númberu de nueches d’agospiu, l’incrementu ye del +12,7% respeuto a xunetu de 2018. Poro, la cifra afítase como la meyor de la serie hestórica. Esti incrementu ye tamién el más bultable de la España verde. La tasa d’ocupación rexistrada en xunetu asítiase nel 71,6%. Medra un +9,3% respeuto al añu pasáu y afítase como la más bultable de la serie hestórica.

    Acumulao xineru-xunetu

    La cifra total de viaxeros en Xixón nos siete meses primeros del añu xube a les 250.351 persones. Representa un incrementu del +2,5% respeuto al mesmu periodu del añu caberu. La cifra de nueches d’agospiu algama les 491.676, con un incrementu del +5,4%. Tanto una como otra son los valores máximos de la serie hestórica pal semestre primeru del añu.

    La tasa d’ocupación rexistrada nos siete meses primeros del añu algama’l 47,9%, con un incrementu respeuto al añu caberu del +0,6%. Ye la meyor tasa d’ocupación de la serie hestórica pa esti periodu.

  • Xixón cuelga’l cartel de ‘completu’ na Selmana Grande

    Xixón cuelga’l cartel de ‘completu’ na Selmana Grande

    La ocupación hotelera en Xixón na Selmana Grande algamó’l 95,4%. Esti ye’l datu mediu que se rexistra del 9 d’agostu, fecha na que s’inauguró la principal selmana festiva de la ciudá, al 18 d’agostu, según un sondéu ellaboráu güei por Infoxixón ente los 49 hoteles y pensiones de la ciudá asturiana. Nel casu de contabilizar les nueches dende’l 14 d’agostu hasta’l 18 d’agostu, coincidiendo cola ponte festiva, la ocupación llegó al 98,2%. En 2018, la ocupación media na Selmana Grande llegó al 81,3%.

    Por categoríes, los hoteles de 4 estrelles zarraron la Selmana Grande con una ocupación media del 93,1% (97,7% les cuatro nueches de la ponte festiva); los hoteles de 3 estrelles llegaron al 91,2% (95,4% na ponte); los de 2 estrelles algamaron el 98,1% (99,4% na ponte); y los de 1 estrella llenaron y rexistraron una ocupación del 99,3% (100% les cuatro nueches de la ponte).

    No que cinca a los agospios estrahoteleros (apartamentos turísticos, campings, agospios de turismu rural), la ocupación media los 9 díes de Selmana Grande llegó al 79%. Si contabilizamos namái los díes de la ponte festiva, del 14 al 18 d’agostu, la ocupación nesti tipu d’agospios xubió hasta’l 80,5%.

  • Xixón amuesa los sos siete maraviyes

    Xixón amuesa los sos siete maraviyes

    L’estand de Xixón na Feria de Muestres acoyó esti llunes la presentación del cómic ‘Les 7 maraviyes de Xixón’. Esti trabayu, realizáu por Ruma Barbero col puxu de Xixón Turismu y la collaboración de la Oficina de Normalización Llingüística, amuesa, per aciu de personaxes de la mitoloxía asturiana, los siete recursos turísticos más destacaos na ciudá asturiana: l’Acuariu, les sableres, el parque Isabel La Católica, Llaboral Ciudá de la Cultura, el Xardín Botánicu, l’estadiu d’El Molinón Enrique Castro Quini y Cimavilla.

    El trabayu ye parte de les aiciones entamaes por Xixón Turismu de collaboración colos ciudadanos de la ciudá pa implicalos na promoción turística. La idega surdió nel cursu escolar 2017-18, cuando Xixón Turismu trabayó colos escolinos del C.P. Santa Olaya pa escoyer los 7 recursos qu’ellos recomendaríen a los nuesos visitantes más pequeños. D’aquel trabayu surdió un planu infantil con diseños de Ruma Barbero, que s’espublizó n’asturianu y que se reparte nes oficines d’Infoxixón.

    Tres la bona acoyida d’esti planu, plantegóse realizar una guía turística en forma de cómic na que se cuenta la hestoria de Trasgu y Serena, dos de los personaxes ideaos por Ruma Barbero, visitando colos sos collacios y collacies los siete recursos. El restu de personaxes son la Guaxa, l’Espumeru, la Xana, el Nuberu, la Busgosa y el Cuélebre. El cómic espublízase n’asturianu, castellán, inglés y francés y va repartise nes oficines d’Infoxixón.

    Sobre Ruma Barbero

    Ruma Barbero ye llicenciáu en Belles Artes pola Universidá de Salamanca. Tien ganaos premios autonómicos de cómic como: ‘El llapiceru’, ‘Comarca de la Sidra’ y en dos ocasiones el prestixosu ‘Alfonso Iglesias’. Cofundaor de la editorial ‘Cactus Comics’ 1997. Miembru fundaor de los grupos de folk asturianu Felpeyu y Los Ciquitrinos. Lletrista pa grupos como Felpeyu, Los Ciquitrinos, Tejedor, Blima, Pandereteres de Fitoria, Vrienden, ¿Aú? o los proyectos Aire y Bestiariu. Con un Premiu de la Música en 2008. Diseñador y maquetador de llibros y de carátules de discos de: Felpeyu, La Bandina, DRD, Verdasca, Blima, Tuenda, Herr Manos etc. Autor de cartelos teatrales, cinematográficos, de conciertos y festivales de música.