Nun yeren les 21 hores, momentu nel qu’entamaba l’apertura de puertes, y la Sala Albéniz yá presentaba un ambiente de gran nueche, como asina foi la velada xixonesa del xueves. Una nueche que VibraMahou preparara con ciñu pa pesllar la so xira de conciertos n’Asturies con artistes de tol estáu, como Arde Bogotá, Sexy Zebras o el propio VibraMahou Fest, ente otros.
L’artista elexíu pa zarrar l’añu foi Rayden, qu’amás ta plenamente somorguiáu na so xira de despidida y que volvía a Europa tres siete conciertos en nueve díes en Llatinoamérica. Resentíu pola carga d’espectáculos (asina avisaba al entamu del conciertu), Rayden y la so banda salieron al escenariu de la Sala Albéniz. La nueche nun precisó de teloneros. Del primer al último cantar el públicu xixonés brindó a la banda madrilana tola so calor y sofitu pa siguir les lletres, con un ambientu mui festivu.
Rayden, que quier esfrutar de toles emociones de los sos últimos conciertos, fíxolo tamién en Xixón. Con un espectáculu de casi dos hores y onde pudieron sentise más de 20 cantares, fixo un repasu a la so trayectoria musical, con interpretaciones de la conocida Calle de la Llorería, La patria de los ausentes o El mejor de tus errores.
Sicasí, la traca final foi lo que tol mundu esperaba, inclusive’l propiu artista. Tres tocar cantares bien conocíos como Ubuntu, Haz de luz o La mujer cactus y el hombre globo, Rayden daba avisu de que tol conciertu fuera una preparación pa la siguiente canción. D’esta manera, los acordes de Multiverso dieron pasu a la comunión perfecta ente banda y públicu, que nun duldó en coriar el cantar. Asina, llegó’l momentu de la despidida, con Matemática de la carne.
Rayden, de la mano de VibraMahou, fixo vibrar a la xente de Xixón que s’averó a la Sala Albéniz nuna noche que va quedar pal recuerdu na xente que, ayeri, s’atrevieron a vivir y salieron a ganar col artista madrilanu.
