El sábadu 27 va tener llugar una preba abierta nel Palaciu de Congresos onde se van poder probar sidres d’Europa, América y Asia. Dar mayor visibilidá a la sidre y a la cultura asturiana ente’l públicu estranxeru, acercar al consumidor local a la producción internacional y a les ellaboraciones asturianes que van más allá de la sidre tradicional y, al mesmu tiempu, reforzar los llazos comerciales y la cooperación ente profesionales sidreros de distintos llugares del planeta. Estos son los oxetivos que persigue’l Salón Internacional de les Sidres de Gala (SISGA), que va celebrar la so decimoquinta edición en Xixón del 25 al 28 de setiembre.
L’actu principal del eventu va ser l’Asamblea anual de Cider Cities, que se va celebrar el vienres 26 de setiembre. Pa’l públicu xeneral, habrá una preba abierta nel Palaciu de Congresos, nel recintu ferial Luis Adaro. Va celebrase’l sábadu 27 de setiembre, en horariu de 11 a 15 hores y de 16.30 a 20 hores. Esti añu, amás, va coincidir con Agropec. Sacante esta actividá, la programación ta pensada principalmente pa especialistas del sector.
Por eso, l’eventu va completase con propuestes previes y posteriores al congresu, col envís de poner en contautu a los visitantes con productores locales y facilitar un itinerariu afayadizu a los sos intereses. Asina, los asistentes van poder afondar más na sidre, na gastronomía y na cultura asturianes per mediu d’iniciatives como la Ruta’l Quesu y la Sidre, visites a llagares, sidreríes o pumaraes, ente otres opciones.
L’alcuentru va cuntar cola presencia de llagareros de tres continentes. Anque’l grupu más númerosu ye’l européu, tamién van acudir representantes d’Asia y d’América.
