El Gobiernu d’Asturies confirmó l’afayu de dos torques áureos en Cavandi, nel Valle Bah.u de Peñamellera. La Viceconseyería de Cultura, Política Llingüística y Deporte destaca l’estraordinariu interés históricu y arqueolóxicu de dambes pieces pola so calidá técnica y la riqueza y diversidá de los motivos decorativos. Los torques son una especie de collares ríxidos, abiertos nel so parte anterior. Son una de les xoyes más representatives de la orfebrería de la Edá del Fierru (na Península Ibérica, aprosimao, ente los sieglos IX ya II antes de Cristu)
Les circunstancies del afayu fueron casuales. El relatu, resumíu, ye’l siguiente. El 29 d’agostu, la dirección del Muséu Arqueolóxicu d’Asturies recibió comunicación, al traviés de Pablo Arias Cabal, catedráticu de Prehistoria de la Universidá de Cantabria, de l’apaición d’un torque áureu nes proximidaes de Panes. El descubrimientu ficiérase por un operariu de la empresa d’agües contratada pol Conceyu del Valle Bah.u de Peñamellera mientres rastrexaba la trayida pal pueblu de Cavandi.
Esi mesmu día pela tarde, personal del muséu visitó la zona en compañía del descubridor y de Pablo Arias. Mientres la prospección superficial del llugar esactu onde se produxera l’afayu atoparon cuatro fragmentos pertenecientes a un segundu torque. Les pieces fueron recuperaes en superficie, sobre los materiales procedentes d’una fana de tierres producíu sobre una fastera pindia
La Dirección Xeneral de Patrimoniu Cultural y el Muséu Arqueolóxicu promovieron una intervención urxente que dexó recuperar, hasta completalo, les partes restantes del segundu torque.
El primeru de los exemplares, el qu’alcontró’l trabayador de la empresa d’agües, ye un collar ríxidu de superficie dorada que puede asimilase al conxuntu de torques denominaos de manera xenérica como ástur-norgalaico, caracterizaos por banielles con remates en doble escocia y decoraciones que desenvuelven motivos ornamentales xeométricos.
Nesti casu, reproduzse una distribución ornamental bien similar a la del conocíu como Torque de Llangréu, güei depositáu nel Muséu Instituto Valencia de Don Juan, en Madrid. Un aru que’l so tramu central ye percorríu por seis falsos gordones con decoración incisa que flanqueen dos tales espirales interpuestes ente los tramos distales decoraos con revestimientu d’alambre. Remata en dos tal4s cabezales de doble escocia.
La segunda pieza, que s’alcontró estazada en seis partes, pudo ser remontada provisionalmente nel Muséu Arqueolóxicu, y comprobóse que ta completa. Trátase d’un collar ríxidu de superficie dorada con aru de sección rectangular rematada en cabezales de sección en doble escocia. La decoración caltien una distribución clásica con motivos sogueaos nos discos, tramu central llisu y acanaladures nel so desenvolvimientu llateral.
