El Gobiernu d’Asturies pon en marcha un proyectu pilotu cola fin d’amenorgar la fienda dixital, especialmente nes poblaciones más alloñaes de los principales núcleos urbanos, y garantizar un accesu equitativu a los servicios dixitales a tola población.
La iniciativa consiste n’ufiertar a la ciudadanía servicios presenciales a distancia al traviés de dispositivos denominaos ARPPA (axentes remotos de puntos d’atención), que se van allugar en dependencies municipales o autonómiques. Al traviés d’ellos, un emplegáu del Serviciu d’Atención a la Ciudanía (SAC) del Principáu va facilitar les xestiones que demanden los usuarios, de la mesma manera que lo fadría de forma presencial.
Los puestos d’atención funcionen con dos monitores: ún permite aportar al sistema de xestión y facilita una sesión de videoconferencia col usuariu, la xestión de pagos y el restu de servicios de control, ente que l’otru da accesu a la web corporativa de la entidá cola que quier interactuase y ye onde l’emplegáu públicu realiza les xestiones, consultes ya interacciones propies del serviciu.
D’esta forma, un únicu emplegáu públicu va poder atender les necesidaes de persones alcontraes n’espacios xeográficos diseminaos, colo que se garantiza un serviciu integral, tresversal y áxil, independientemente del perfil del solicitante o del serviciu riquíu.
Nun primer momentu, podrán xestionase trámites rellacionaos cola información xeneral sobre l’Alministración autonómica, notificaciones, rexistros, empléu, pagu de tases, llicencies de caza y pesca y visites a Muniel.los, ente otros servicios.
Presentación a la Federación Asturiana de Conceyos
La conseyera de Presidencia, Rita Camblor, y los directores xenerales de Función Pública, de Gobernanza Pública, Tresparencia y Participación Ciudadana, y de Seguridá y Estratexa Dixital, Miguel Ángel Rodríguez, José Antonio Garmón y Javier Fernández, respectivamente, presentaron güei el proyectu pilotu a la Federación Asturiana de Conceyos.
Na xunta alcordóse que’l programa arrinque con trés mostradores ARPPA en Villaviciosa, concretamente en dalguna localidá del occidente del conceyu; en Berducedo, n’Ayande, y en Sevares, en Piloña. Darréu, una vegada analizaos los resultaos, prevése aumentar el númberu de dispositivos, mesmo que los allugamientos nos que se van dir instalando.
Los terminales pueden incorporar servicios pa minoríes con discapacidá visual o auditiva. Complementariamente, el proyectu podría convertise nel mediu perfectu p’abordar otros retos, como la simplificación de los servicios alministrativos, la inclusión de nuevos servicios pa población mayor, discapacitaos y minoríes étniques o culturales, ente otros.
El siguimientu de los servicios va realizase pol procedimientu de control incorporáu nel mesmu sistema Arppa y va permitir a l’Alministración monitorizar parámetros venceyaos a los servicios como datos estadísticos, calidá, poblacionales, etcétera. La esplotación d’esa información va permitir, al empar, ameyorar estos servicios, adaptándolos a les demandes reales.
