El Gobiernu d’Asturies organiza alredor del 3 de xunu una programación curiosa pa celebrar el Día Mundial de la Sidra, nel añu en que la cultura sidrera asturiana foi reconocida pola Unesco como Patrimoniu Cultural Inmaterial de la Humanidá. Pa conmemoralo, el Principáu punxo en marcha una partida d’eventos especiales que se van desenvolver a lo llargo del mes de xunu, con epicentru nesa fecha señalada.
Alredor d’una ventena d’actividaes van enllenar de conteníu museos, archivos, biblioteques, centros d’arte, escueles y espacios patrimoniales de tol Principáu, con propuestes pa tolos públicos: talleres, proyecciones, conciertos, esposiciones, xuegos educativos, escenificaciones escolares, charles, lliteratura, gastronomía y muncho más.
• Un xuegu de mesa
Ente les iniciatives más destacaes figura la presentación del xuegu de mesa El camín de la sidra, diseñáu pol alumnáu del CRA Les Mariñes de Villaviciosa como proyectu d’innovación educativa a lo llargo del cursu 2022-2023.
El xuegu, que s’editó cola collaboración de la Conseyería de Cultura, Política Llingüística y Deporte pola mor del Día Mundial de la Sidra, propón una esperiencia lúdica y pedagóxica qu’asemeya’l procesu de producción de sidra asturiano. Con una mecánica de colocación de trabayadores y xestión de recursos, El camín de la sidra percuerre en siete roldes anuales tolos pasos de la escoyeta, ellaboración y comercialización de la sidra, incluyida la producción de sidra con Denominación d’Orixe Protexida.
• La sidra como cultura viva
La cultura sidrera asturiana protagoniza tamién les actividaes en tou tipu d’equipamientos:
– El Centru Niemeyer va acoyer la proyección del documental La gran manzana, del director asturianu David de la Cruz, onde retrata la historia d’una familia de tradición llagarera llarga nel so procesu de producción y esportación de la sidra.
– La Biblioteca d’Asturies va entamar una charla impartida pol espertu Lluis Nel Estrada onde va tratar la utilización de la sidra na gastronomía asturiana. Amás, va editar un mural con testos lliterarios sobre dellos aspectos de la sidra y va repartir poemes decoraos con etiquetes históriques de sidra.
– L’Archivu Históricu d’Asturies y el Muséu Arqueolóxicu van mostrar esposiciones sobre los testimonios documentales y materiales d’esta tradición milenaria.
– Llaboral, Centru d’Arte y Creación Industrial va impartir un taller al cargu de David Feito, de Satori Fermentos, sobre’l potencial de la mazana asturiano y van ellaborase recetes formentaes.
– Centros como’l MUXA, el Parque de la Prehistoria de Teberga, el Centru d’Arte Rupestre Tito Bustillo, el Muséu Etnográficu Pepe El Ferreiro o’l Centru del Prerrománicu Asturianu van ufiertar talleres creativos y actividaes familiares.
– La compañía asturiana d’artes escéniques Elektrafiktion va representar l’espectáculu Cuentos y sidra baxo’l pomar, pa públicu escolar. Tamién se va presentar públicamente’l xuegu de mesa mentáu: El camín de la sidra.
– La Orquesta Sinfónica del Principáu d’Asturies (OSPA) va zarrar el ciclu’l 27 de xunu a les 20 hores col conciertu Patrimoniu de la Humanidá nel Auditoriu Príncipe Felipe d’Uviéu, con pieces de grandes compositores clásicos y un homenaxe final a la cultura sidrera con Escenas Asturianas, de Benito Lauret.
• Un símbolu colectivu que se tiñe de verde
Como xestu d’identidá y celebración compartida, los principales edificios públicos d’Asturies van allumase col color verde d’una botella tan icónica como la de sidra. El Gobiernu del Principáu anima a particulares, asociaciones, instituciones y entidaes de dientro y fuera del territoriu a sumase a esta iniciativa, allumando fachaes, balcones o espacios emblemáticos con esi color que recuerda la sidra, la esperanza y el paisaxe asturianu.
• La cultura sidrera nes los museos y centros asturianos
La celebración del 3 de xunu va trespasar les llendes xeográfiques d’Asturies al traviés de los centros asturianos del esterior, que se van sumar a la efeméride demostrando que la cultura sidrera ye un vínculu universal qu’axunta a la comunidá asturiana allá onde tea.
Ún de los actos centrales va ser l’echáu institucional simbólicu de sidra nel Muséu de la Sidra d’Asturies (Nava), el mesmu 3 de xunu al mediudía, con participación del sector sidreru y representantes de les instituciones autonómiques y locales. Esi mesmu día, na plaza del Conceyu d’Uviéu, va celebrase un gran echáu popular de sidra organizáu por OTEA con repartu de botelles y llectura d’un manifiestu en defensa y celebración d’esta tradición.
• Asturies brinda y celebra
Esti Día Mundial de la Sidra ye’l primeru que se celebra baxo’l paragües de la reconocencia internacional de la Unesco tres de la so declaración efectiva’l pasáu mes d’avientu en Paraguay. Una fecha histórica que convida a mirar con arguyu pal pasáu, celebrar el presente y proyectar el futuru d’una cultura que ye símbolu, patrimoniu y forma de vida del pueblu asturianu.
