Autor: xixonaldia

Ilegales, la banda xixoniega probablemente con más ésitu a lo llargo de los años, asoleyó’l vienres pasáu «Joven y arrogante», un trabayu d’estudiu nuevu onde la esencia del grupu sigue intacta, pero entren soníos nuevos a escena. Pa conocer la intrahestoria d’esti discu, falamos col so alma mater, Jorge Ilegal.

• Echando la vista atrás y tres más de 40 años ¿Qué foi lo que vos motivó a facer un grupu de rock?

Nun nos entusiasmaba lo qu’había y tuvimos que proporcionanos el nuesu propiu entusiasmu.

• ¿Siempre tuvistis un interés pola música o a veces cambió n’interés pol mundu que l’arrodia?

L’interés foi siempre esclusivamente por la música, la música ye lo importante y el mensaxe que va nella, l’envoltoriu ye prescindible ya inclusive atreveríame a dicir qu’intoxicante.

• Con tantos años d’actividá, fixistis munchos conciertos. Mesmamente, esti añu facéis una xira per España onde tocáis en Xixón, una ciudá imprescindible pa la banda, pero onde viviríes noches buenes y otres non tanto. ¿Qué significa Xixón pa vosotros?

Viví en Xixón unos 20 años y enxamás perdí’l contactu cola ciudá. Tanto los grandes momentos, como los díes criminales, que los hai que quieren matate, dieron forma a la mio vida y al de la banda ilegales.

• Falando de conciertos, va poco cantastis na Selmana Grande de Xixón ¿Cómo foi la esperiencia?

Había daqué nel aire que se llevaba bien cola mio voz y la mio guitarra. La banda taba acoplada y la noche foi la nuesa aliada. Producióse esi milagru que siempre tamos buscando.

• Sobre’l nuevu discu «Joven y arrogante» ¿Qué nos podéis cuntar? ¿De qué trata?

Trátase de constantes qu’ arrodien el nuesu tiempu: l’ansiedá, que ye la enfermedá del sieglu XXI, la cuestión social que se toca nun cantar que fala del orfanatu mineru, de la imprescindible arrogancia pa tocar rock, de que ye un crimen el silenciu y qu’hai verdaes incómodes, que nun han callase, de la fugacidá esplosiva de la vida…

¿Qué hai de “joven” y “arrogante» n’Ilegales tres una llarga trayectoria?

La lletra del cantar informa perfectamente de estes cuestiones, diz testualmente:
«Yo era joven y arrogante con escasas cicatrices y la vida por delante, yo era un joven imprudente que corría tras desgracias sin parar en reflexiones ni en consejos de la gente. Si no es tan diferente lo que es de lo que ha sido es que tiempo y experiencia de muy poco me han servido.»

• Unu de los cenciellos d’esti discu nuevu ye “Es ansiedad”, un problema qu’ataca a la sociedá cada vez más. ¿Cómo naz esti cantar?

L’ansiedá ye una perra a la que conozo bien y nun soi quien a evitar.

• Tamién atopamos “El mundo contra ti”. ¿Qué hai detrás d’esta lletra ¿Tien nome y apellíos?

Sí, tien muchos nomes y muchos apellíos. Desgraciadamente, el mundu ta enllenu d’esos peligrosos buenos samaritanos y nos acechen caldía con propuestes nocives.

• Vivir n’Asturies siempre fixo que los cantares s’empaparen de realidaes de la zona, como en “El norte esta lleno de frío”. ¿Hai dalgo d’eso nel trabayu nuevu?

Sí, Orfanato minero ye un cantar que toca’l tema mui directamente. Inspirómela una persona falando de sí mesma, de la so familia, del so orixe. L’ambiente siempre se filtró nos cantares d’Ilegales d’una o otra manera.

• Y llueu del nuevu discu y la xira ¿Qué más planes tien Ilegales?

Tamos nun momentu duce a nivel creativu, amás tenemos al nuesu alcance tolos medios de producción. Muncho se tien que torcer la cosa pa que nun consigamos ufrir dalgo realmente bonu nun futuru próximu.

El PSOE de Xixón va proponer nel próximu Plenu la creación d’un observatoriu de la vivienda nel marcu de EMVISA que dexe monitorizar datos sobre la situación d’accesu a la vivienda y la evolución del mercáu. La iniciativa surde a tenor de la llei pol derechu a la vivienda qu’establez la necesidá de cuntar con datos fiables y actualizaos pa poder identificar zones tensionaes y, como diz la llei, poner sobre la mesa información contrastada que motive la so declaración naquellos ámbitos territoriales nos que seya necesario. “Tenemos que facer tolo que tea na nuesa mano pa implementar polítiques públiques de protección en materia de vivienda. La llei ye clara: les alministraciones competentes van poder declarar zones tensionaes, pero, pa ello, hai que saber con precisión qué zones presenten una elevada presión nel mercáu de la vivienda”, señala’l conceyal Tino Vaquero.

El nuesu conceyu escarez d’un observatoriu d’esti tipu que percancie datos de forma pormenorizada. El conceyal socialista aportuna en que pa facer un analís de la situación anguaño tiense que recurrir a información procedente d’entidaes privaes, como inmobiliaries, promotores, sociedaes de tasación, portales web de venta y arriendu… Esto fai que detrás pueda haber intereses particulares. “Los datos, provenientes d’una entidá pública y fiable son los que tienen que sirvir pa implementar estes zones tensionaes o pa fundamentar l’adopción de cualquier tipu de midida en materia de vivienda”, afirmó Vaquero.

Frente a la propuesta del PSOE xixonés, el gobiernu de Foro y PP presenten conxuntamente una iniciativa plenaria cola que pretenden que’l Plenu refugue la declaración como zones tensionaes de Cimavilla y L’Arena. “Esto evidencia que cuando s’abstuvieron na votación anterior, que proponía la posible declaración de dos zones tensionaes en Xixón, nun sabíen perbién lo que votaben. Esta proposición nun busca dar solución dalguna al problema real del accesu a la vivienda; nun-yos interesen les persones nin los problemes qu’encaren día ente día p’aportar a una vivienda n’arriendu o en propiedá. Y por eso presenten agora una proposición na que falten a la verdá nunes ocasiones, dicen medies verdaes n’otres y callen aquello que nun-yos interesa”, sentencia Vaquero, de la que defende que, el contrariu de lo que defende la derecha, “lliimitar los precios del arriendu ye una solución eficaz pa baxar los precios. Nun ye verdá qu’esta midida fracasara n’otros países y si daqué consiguió en Cataluña, que ye l’únicu llugar onde s’implementó hasta la fecha, ye precisamente evitar la xubida de precios de los arriendos al curtiu plazu”.

Los socialistes recuerden que la esperiencia respuende por una realidá: el mercáu de la vivienda nun se regula solu; dexar la vivienda en manos del mecanismu de la ufierta y la demanda nel mercáu ye un regresu al pasáu, un regresu a la crisis inmobiliaria del añu 2008. “La única propuesta de Foro y PP pa facer frente a la xubida de los precios d’arriendu y venta ye construyir más ensin buscar alternatives a unos arriendos que nun paren de xubir. ¿Qué solución ufierten estos partíos de la derecha? ¿Qué compromisu tienen Foro y PP en Xixón col problema del accesu a la vivienda? ¿El Plan Llave ye la solución? ¿Que los promotores faigan negociu col suelu públicu, que ye lo qu’a la fin pretenden facer y vamos ver en que da a la fin? Nun tienen solución nin compromisu dalgunu col problema d’accesu a la vivienda”, cuestiona’l conceyal.