Autor: xixonaldia

Les máquines, na so interacción con humanos y naturaleza, revolucionen el mundu. Dende’l telar mecánicu y la máquina de vapor, pasando pol xenerador llétricu y los microchips, hasta llegar a internet colos sos centros de datos y sistemes de computación a escala planetaria que caractericen la dómina actual.

Esta esposición convida a esplorar, de forma sorprendente, les máquines dixitales que moldien la industria y la sociedá de güei. Al traviés de narratives visuales detallaes vamos afayar, por casu, como funciona l’algoritmu de la mayor rede social del mundu; qué esplotación de recursos naturales y trabayu humanu sofiten un dispositivu d’intelixencia artificial; o cómo evolucionaron los sistemes de cálculu, comunicación, clasificación y control dende l’añu 1500 hasta’l nuesu presente.

Pero l’amuesa convida tamién a afayar máquines dixitales alternatives qu’imaxinen otres relaciones posibles ente tecnoloxía, industria y sociedá. De “códigos de la conciencia” que torguen a la maquinaria pesada deforestar montes protexíos, a sistemes de visión artificial que contabilicen xestos de ciñu nel espaciu públicu. De máquines de cartografía especulativa activaes pola ciudadanía, a artefactos que recuperen la nuesa atención dixital frente a la desinformación.

Nun sieglu 21 nel que democracia, industria y ámbitu dixital tán cada vez más interconectaos, les trece obres equí espuestes cuestionen l’arquitectura actual de los procesos d’innovación, defendiendo que’l diseñu de les máquines dixitales del futuru tien de tener en cuenta les repercusiones ambiental y social al llargu plazu y apostar por tecnoloxíes xustes, étiques y sostenibles.

Iniciativa pol Asturianu ve na intención del Conceyu de Xixón d’anovar la so identidá corporativa una oportunidá pa incorporar la llingua asturiana y la toponimia oficial a la imaxe del consistoriu. Ye la primer midida del Plan de Normalización aprobáu nel Plenu d’agostu, que recueye que «si se diera’l casu de camudar la identidá gráfica del Conceyu la imaxe corporativa y los llogotipos y toles sos adaptaciones han de ser billingües». Esta redacción foi precisamente una de les propuestes de la entidá nel Conseyu Asesor de la Llingua Asturiana.

L’asociación cree que con una mayoría favoratible nel Plenu ye’l momentu de cuntar con un llogotipu billingüe. Nesi sen, la llexislación vixente contempla esta posibilidá. La Llei d’Usu y Promoción del Asturianu, respeuto a la toponimia, recueye que los topónimos d’Asturies van tener la denominación oficial na so forma tradicional. La entidá recuerda que’l topónimu oficial Xixón ye Gijón/Xixón.

El Plan de Normalización Llingüística de Xixón, vixente pal periodu 2024-2027, dispón tamién “la utilización del llogotipu del Conceyu n’asturianu o billingüe nes dependencies municipales nos vehículos, paneles y lletreros de víes públiques y edificios municipales, de manera que l’asturianu tea presente siempres que se camudé la identidá gráfica corporativa”.

Iniciativa pol Asturianu invita al Conceyu de Xixón a incorporar la llingua asturiana a la imaxe corporativa, recoyendo la forma oficial ‘Conceyu de Xixón’ y l’usu xenéricu del topónimu tradicional de ‘Xixón’; calteniendo la denominación oficial na versión en castellán ‘Ayuntamiento de Gijón/Xixón’. El colectivu de reivindicación llingüística considera qu’esti usu del idioma y de la toponimia tendría un papel visibilizador y normalizador fundamental na sociedá.

El conceyal socialista Tinu Vaqueru recordó que güei se cumple un añu del Plenu estraordinariu nel que s’alcordó la suspensión de les solicitúes de comunicación ambiental pa Viviendes d’Usu Turísticu en Xixón. “La suspensión tenía un plazu d’un añu y entramos yá en períodu de “gracia”, hasta’l día 1 de febreru, en que se publicará l’alcuerdu del Plenu nel BOPA”, esplicó.

Vaqueru añedió que dicha suspensión tenía como únicu fundamentu xurídicu y razón de ser el cambéu del Plan Xeneral d’Ordenación pa poder establecer les llimitaciones pertinentes. “Nun lo fixeron y obviamente nun lo van facer”, llamentó’l socialista. El conceyal tamién quixo facer fincapié en que’l Gobiernu tampoco fixo esi estudiu que se recoyía nel alcuerdu, col que pretendía conocese les causes de la proliferación de les VUTs y adoptar nel so casu les midíes necesaries.

“Va unos meses dexaron cayer tamién el globu sonda d’un protocolu d’actuación en relación con estes viviendes; duldábamos qu’un protocolu pudiera obligar en daqué, pero lo cierto ye que tamién se quedó en nada. Y la postrer ocurrencia, fai aprosimao un mes, foi l’intentu de declarar como “zones turístiques protexíes,” dellos barrios de la ciudá, midida que yá taba contemplada na Llei de Turismu dende 2001, so la denominación de zones turístiques saturaes”.

Vaqueru esplicó que, tres la xunta que tuvieron cola Viceconseyera de Turismu, fai apenes unos díes, “paez que se dieron de focicu cola realidá y que tampoco van tener zones turístiques saturaes, a lo menos pal 1 de febreru”. El conceyal recordó qu’estes declaraciones necesiten una tramitación complexa y que precisa entá de desenvolvimientu reglamentariu a la vista de los cambeos que trai consigo la nueva redacción de la Llei. Amás, esta midida nun ta pensada directamente pa combatir les VUTs, sinón que ye una midida de calter xeneral pensada pal ámbitu puramente turísticu y de naturaleza temporal, como lo prueba’l fechu de qu’eses zones tienen de llevar consigo unes midíes correctores que casen mal cola escasez de vivienda, que ye más un problema estructural con soluciones al llargu plazu.

El conceyal recordó tamién que, va un mes, el Grupu Municipal Socialista yá alvertía que l’equipu de Gobiernu taba dando una en clavu y otra na ferradura, ensin saber qué facer y qué midíes adoptar pa combatir la proliferación desafranada de les VUTs, polo que podríen acabar adoptando cualquier midida d’última hora, coles consecuencies qu’ello tendría pa la ciudá. “Realmente, los sobrevaloré, porque nun van facer absolutamente nada, nin bonu, nin malu y les declaraciones de los últimos díes del Señor Martínez Salvador y de la señora Pumariega llévennos a pensar asina”, concretó.

Vaqueru criticó que la mayor parte del equipu de Gobiernu ta na Feria Internacional de Turismu que se celebra estos díes en Madrid “gastando’l dineru de tolos vecinos, nun sabemos perbién pa qué, porque’l so trabayu, el que tien que ver con buscar midíes contra les VUTs, nun lo faen”. Ello ye que’l conceyal fixo referencia a unes declaraciones de la vicealcaldesa en FITUR, nes que falaba de “controlar ensin prohibir”: “viendo lo que fixeron mientres anguaño, unu tien que pensar necesariamente que son unos absolutos incompetentes y, conociendo’l mantra de la llibertá del Partíu Popular, ponémonos no peor”.

El socialista criticó que’l Gobiernu venda como un ésitu que namás hubiera quince pidimientos de llicencies más nos últimos meses y que “solo” tengamos 2.630 viviendes turístiques en Xixón, que son 1.205 más que n’agostu de 2023 (había 1.445). Casi’l doble. “Dicen que l’ésitu na contención de nueves llicencies ta nes midíes qu’apurre la Llei de Turismu del Principáu, con requisitos como la esixencia de que cunten con contadores independientes pa los suministros; y efectivamente, quien ta lluchando contra esti aumentu desafranáu ye’l Principáu d’Asturies, pero ignoren qu’el PGO de Xixón yá contenía ciertes llimitaciones que nun aplicaben y que la mesma Llei de Turismu unvia a la competencia de los entes locales, al traviés de les sos normes urbanístiques, pa completar aquelles midíes adoptaes dende l’ámbitu autonómicu”.

“Quiciabes, como-yos diximos, solo había que redefinir bien l’actividá del agospiu y les sos llimitaciones, ya introducir los cambeos necesarios nel PGO, estudiando la implantación d’un sistema dinámicu de llicencies. Pero nun van facer nada. Queda una selmana pa salir de duldes”, remató’l conceyal.