Los documentales asturianos Luna, de Pablo Casanueva, y Retaguardia, de Ramón Lluís Bande, van poder vese esti trimestre nun total de 24 conceyos asturianos, nun apueste de Llaboral Cinemateca pol espardimientu del cine fechu n’Asturies y por profesionales de la comunidá. Dambos filmes van proyectase nel Paraninfu de la Llaboral, nel marcu de l’Amuesa Asturies, y n’otros 23 conceyos que participen esti trimestre nel ciclu de cine itinerante La Cinemateca Ambulante.
En Llna, estrenada mundialmente na sección oficial Retueyos del pasáu Festival Internacional de Cine de Xixón, Pablo Casanueva somórguiase na memoria de la so familia pa sacar a la lluz la hestoria de los hermanos de la so bisgüela, represaliaos pol Franquismu, y tender una ponte ente la so propia hestoria y la de los sos antepasaos. Pela so parte, Ramón Lluís Bande cierra con Retaguardia la so triloxía de la memoria, empecipiada por Cantares para una revolución (2018) y Vaca mugiendo entre ruinas (2020). Tamién estrenada nel FICX, na sección Albar, esta película plantégase como un documental especulativu sobre la (re)construcción d’una colección de películes de propaganda del gobiernu republicanu asturianu nel añu 1937, que magar nunca esistieron —o nun llegaron a los nuesos díes—, podríen rodase.
La cartelera de Llaboral Cinemateca nel Paraninfu de la Llaboral pal primer trimestre de 2025 inclúi comedia, terror y enforma thriller ya intriga. La cineasta catalana Mar Coll va presentar nel Paraninfu de la Llaboral el so últimu llargumetraxe, Salve María, un thriller psicolóxicu qu’esplora los rincones más escuros y complexos de la maternidá. Ente’l terror y la ficción histórica navega la esmolecedora El baño del diablo, de los austriacos Severin Fiala y Veronika Franz, que sigue los pasos de l’atormentada Agnes, que ye forzada a cometer un crime.
Dende Alemaña lleguen La teoría universal, de Timm Kröger, un thriller psicolóxicu sobre un matemáticu obsesionáu con una fórmula que podría esplicar l’universu, y La semilla de la huigera sagrada, dirixida pol cineasta iranín Mohammad Rasoulof, un intrigante drama social qu’amuesa la realidá d’Irán al traviés de la intimidá d’una familia de Teherán. Inspirándose en fechos reales, el británicu Michael Winterbottom presenta Las sombras del poder, un intensu thriller políticu ambientáu na década de los 30 en Tel Aviv que tamién va rodar per Asturies esti trimestre con La Cinemateca Ambulante.
Tamién enmarcada nel xéneru de terror, pero con grandes dosis de comedia, llega a la Llaboral la ópera prima de Ariana Louis-Seize, Vampira humanista busca suicida, un elegante coming of age sobre la congoxa adolescente. Tamién van poder vese les películes Kneecap, de Pich Peppiatt, xuna irreverente comedia sobre una de les bandes más polémiques d’Irlanda; Tiempu compartíu, na qu’Olivier Assayas narra en primer persona los díes del confinamientu mientres la pandemia de coronavirus; y el documental senegalés Dahomey, Osu d’Oru na Berlinale, na que cineasta Mati Diop reflexona sobre los museos, l’espoliu, la memoria y la restitución. Amás d’en Xixón, Dahomey va poder vese tamién en 24 sedes de La Cinemateca Ambulante.
El Paraninfu de la Llaboral va acoyer la proyección de dos óperes primes españoles La estrella azul, un biopic de Javier Macipe al rodiu de la figura del roqueru de cultu Mauricio Aznar, y Por donde pasa el silencio, una semeya íntima y realista de les tensiones familiares nuna redolada rural andaluz que robla Sandra Romero, que va visitar Xixón pa presentar la so llongura y caltener un alcuentru col públicu.
Amás, el públicu infantil y xuvenil va poder esfrutar esti trimestre de trés grandes películes especialmente encamentaes pa la infancia y que se van proyectar na so versión doblada al español. Nel Paraninfu de la Llaboral, cola collaboración de l’asociación VENTEA, van poder vese Elli y el equipo de monstruos y Flow, un mundo que salvar, meyor película d’animación nos Globos d’Oru y nos Premios del Cine Européu. Amás, Katak, la pequeña ballena va poder vese en 10 conceyos con La Cinemateca Ambulante.
El ciclu BS(O) en vivu completa la cartelera en Xixón col regresu al Paraninfu de la Llaboral del clásicu El gabinete del Dr. Caligari, una de les películes más icónicas ya influyentes de la hestoria del cine, proyección que nesta ocasión llega acompañada pola banda sonora orixinal creada pola cantante y compositora madrilana Caliza.
