La Conseyería de Cultura, en collaboración con Igualdá y Derechos Sociales, ellabora una estratexa común pa frenar la violencia nos entornos deportivos
El Gobiernu d’Asturies presentó güei dos protocolos, con versión n’asturianu y eonaviegu, pa combatir la violencia sexual pa coles muyeres y la violencia exercida contra menores d’edá nel ámbitu deportivu. La conseyera de Cultura, Política Llingüística y Deporte, Vanessa Gutiérrez, presidió esta mañana’l Conseyu Asesor de l’Actividá Física y el Deporte del Principáu, que celebró la so reunión nel Centru de Deportes de La Morgal, en Llanera. Nel alcuentru ofreció tolos detalles sobre dambos documentos acompañada pola conseyera de Derechos Sociales y Bienestar, Marta del Arco, y les directores xenerales d’Igualdá, María Jesús Álvarez; d’Actividá Física y Deporte, Manuela Fernández y d’Infancia y Families, María Belén Barrero Peña.
Gutiérrez destacó la importancia de contar con estos protocolos pal ámbitu deportivu: «L’actividá física y el deporte son fundamentales na vida de les persones, pilares del bienestar, de la salú física y mental, y del nuestru desarollu como persones. Son espacios nos que dedicamos buena parte del nuestru tiempu y establecemos les nuestres relaciones sociales. Llamentablemente siguen produciéndose nestos ámbitos diferentes tipos de violencia que debemos erradicar». Nesi sentíu, valoró la publicación de dambos documentos: «Disponer d’ellos supón un pasu fundamental na llucha contra toles violencies porque non solo ofrecen un procedimientu d’adopción de midíes en casos de violencia nun ámbitu tan importante de la vida de les persones como ye’l deportivu, sinón permiten identificar conductes que, siendo intolerables y graves, desgraciadamente siguen produciéndose porque munches veces nun son nin siquiera entendíes como agresiones».
«Con estos protocolos ponemos a disposición de les víctimes mecanismos de protección y tamién ponemos nome a aquellos comportamientos que suponen exercer la violencia sobre otra persona pa poder erradicalos», indicó.
“N’ocasiones la persona qu’agrede nin siquiera ye consciente de que lo fai pol arraigu que tovía tienen na nuestra sociedá dellos comportamientos d’abusu que nun podemos siguir almitiendo. Por eso, queremos qu’estos protocolos sirvan pa protexer a muyeres y menores víctimes de violencia, pero tamién pa que, de forma pedagóxica, tomemos conciencia de qué comportamientos son violentos y inaceptables», alvirtió.
Dambos protocolos van ser d’adhesión voluntaria pa centros, federaciones y entidaes deportives, cola intención de que, trescurríu un tiempu, pasen a ser obligatorios en toes elles.
La titular de Cultura anunció que dende’l Principáu van ufiertase nel últimu cuatrimestre d’esti añu cursos de formación gratuita basaos nestos dos documentos «pa contribuyir a la concienciación de toles persones que formen parte de la comunidá deportiva asturiana». Van realizase al traviés del Institutu Asturianu de la Muyer (IAM) y la Conseyería de Derechos Sociales y Bienestar, en coordinación cola Dirección Xeneral d’Actividá Física y Deporte. Un pilar básicu pa la so aplicación va ser el Centru de Crisis pa Víctimes d’Agresiones Sexuales, que va tar a total disposición frente a duldes que puedan surdir na so aplicación y p’atender cualquier casu que se detecte.
Gutiérrez agradeció la collaboración y coordinación ente les diferentes árees del Gobiernu d’Asturies pa impulsar los protocolos y, en concreto, de les conseyeríes de Derechos Sociales y de Presidencia. Al mesmu tiempu quixo destacar el llabor «del equipu d’investigación de la Universidá d’Uviéu Protección de los Menores en el Deporte, dirixíu por Ignacio Fernández Sarasola, que trabayó na ellaboración del protocolu pa los y les menores d’edá».
«Tamos dando ferramientes pa facer d’esta sociedá un llugar más xustu y igualitariu capaz echar el frenu a la violencia, y pa ello precisamos de collaborar estrechamente instituciones, entidaes y el conxuntu de la sociedá», espunxo la conseyera, quien tamién tuvo pallabres de reconocimientu pal Conseyu Asesor de l’Actividá Física y Deporte como «órganu consultivu y d’asesoramientu de la conseyería en materia deportiva, que sirve de cauce pa la participación ciudadana, fundamental pa llevar a cabu polítiques tan importantes como la detección y actuación frente a la violencia».
Protoculu completu.
