Barbón pide a los conseyeros «trabayu, cercanía, diálogu y atrevimientu»

El nuevu equipu de Gobiernu tomó ayeri posesión del cargu nun actu celebráu na Xunta Xeneral

0
712
Barbón pide a los conseyeros
Adrián Barbón, nel centru, colos nuevos conseyeros.

Adrián Barbón presidió esti xueves na Xunta Xeneral l’actu de toma de posesión del Conseyu de Gobiernu. El presidente del Gobiernu asturianu demandó de los nuevos conseyeros «trabayu, cercanía, diálogu y atrevimientu». El xefe del Executivu pidió-yos tar cerca «de lo qu’asocede fora de los despachos. Salíi a la cai, qu’Asturies ta siempres por afayar». Nun escaeció tampoco en recordar que l’empléu de calidá, l’impulsu de la industria, la llucha pola igualdá, el despoblamientu y los servicios públicos son cinco exes que «son el vuesu norte».

Barbón quiso tamién valorar el trabayu de los conseyeros salientes del gobiernu de Javier Fernández. «Asturies débevos enforma trabayu», aseguró. El xefe del Executivu esplicó na so intervención que propunxo la celebración del actu na Xunta Xeneral «con una evidente voluntá simbólica». D’esta manera recordó qu’en xunu de 1977, fai yá 42 años, los diez diputaos y cuatro senadores d’Asturies nes primeres Cortes Xenerales de la democracia constituyéronse n’Asamblea de Parllamentarios para empecipiar el camín hacia l’autonomía.

Barbón valoró’l trabayu de los conseyeros salientes: «Asturies débevos enforma trabayu»

L’actu de toma de posesión, nel salón Europa de la Xunta Xeneral del Principáu, empezó cola llectura de los Decretos de nomamientu del nuevu Conseyu de Gobiernu y el cese del anterior. De siguío, los conseyeros, asitiando la so mano sobre la Constitución y Estatutu d’Autonomía , prometieron formalmente’l cargu.

Prometieron el cargu’l Vicepresidente y Conseyeru d’Infraestructures, Medio Ambiente y Cambéu Climáticu, Juan Cofiño González; la Conseyera de Presidencia, Rita Camblor Rodríguez; la Conseyera de Facienda, Ana Cárcaba García; el Conseyeru d’Industria, Empléu y Promoción Económica, Enrique Fernández Rodríguez; la Conseyera d’Educación, Carmen Suárez Suárez; el Conseyeru de Salú, Pablo Ignacio Fernández Muñiz; la Conseyera de Derechos Sociales y Bienestar, Melania Álvarez García, el Conseyeru de Desenvolvimientu Rural, Agroganadería y Pesca, Alejandro Calvo Rodríguez; la Conseyera de Cultura, Política Llingüística y Turismu, Berta Piñán Suárez, y el Conseyeru de Ciencia, Innovación y Universidá, Borja Sánchez García.