Adrián Barbón esixó güei al Ministeriu de Tresportes qu’ufierte “soluciones a curtiu plazu” para resolver los problemes de tráficu pesáu que sufre la zona de Xove. Nel plenu de la Xunta Xeneral, el presidente esplicó por qué “yera imposible” que conociera con antelación que’l ministeriu refugaría construyir el vial previstu. Xunto cola reclamación, la reconocencia: el xefe del gobiernu tamién destacó dellos llogros de la xestión de Tresportes, como la puesta a la venta, mañana mesmu, de los billetes pa los trenes Avril, los más rápidos que van circular pola variante de Payares.
Na vez d’entrugues al presidente, los voceros del Partíu Popular, VOX y Foru coincidieron na mesma apreciación: dar por fechu que Barbón conocía de mano el carpetazo al proyectu del vial, una obra reclamada dende va décades polos vecinos de la zona Oeste de Xixón. El presidente utilizó dos argumentos pa retrucar. Per un sitiu, la versión oficial qu’espublizó’l ministeriu, que niega tal afirmación. Por otru, una cronoloxía: tolos alcuentros col ministru Óscar Ponte fueron anteriores al 12 de marzu, fecha na que s’emitió l’informe técnicu que remana’l departamentu p’arrenunciar de la infraestructura. “Non, nun la conocía [la decisión], non podía conocer y, amás, yera imposible que la conociera”, afirmó con rotundidá.
Barbón animó a Adrián Pumares, voceru de Foru, a pensar nel futuru. Nesti puntu, repitió’l refugu del Gobiernu d’Asturies a l’alternativa propuesta pol ministeriu –un vial en superficie, a diferencia del refugáu, qu’incluyía un túnel de más de dos kilómetros- emplazó al ministeriu a ufiertar otres opciones “a curtiu plazu” que dexen solliviar la circulación y la polución de la zona. “La posición ta clara. Esi vial en superficie nun nos val”, afirmó.
