Les bombes son toes males, pero hailes inda peores, como les atómiques o les de recimu. Estes caberes son les usaes pelos rusos, ucraínos y norteamericanos na guerra d’Ucraína.
Tán prohibíes por 111 estaos. Son un arma contenedor qu’esparde munches somuniciones n’árees amplies. Amás cunten con un marxe d’erru mui altu. Puen españar sero, como mines terrestres y causar d’esti mou baxes de civiles indiscriminadamente. Unos 85 estaos nun roblaren el Conveniu sobre municiones de recimu. Asina, na XE, atópense dellos estaos na llende con Rusia, como, Letonia, Polonia, Rumanía, amás de Grecia. Usar estes bombes habría considerase crime de guerra, según l’Institutu d’Investigación pa la Paz d’Oslo (Noruega).
Na OTAN hai mayoría de miembros contrarios al so emplegu pero nun hai unanimidá. Poro, l’añu pasáu permitióse la entrega d’esta triba de bombes a Ucraína dende los EE.XX. Un pasu atrás pal alcuerdu de paz que tiene d’aportar. Y pa la seguridá de la población de la fastera, que lleva xusto dos años en guerra.
La XE ha condergar de mou conxuntu esti armamentu y ponéi-y d’esta miente llendes al espardimientu de la industria militar y a les sos consecuencies. Los EE.XX. nun puen siguir apurriendo armes tan destructives cola sida de guerriar hasta la derrota rusa. Anque seya Rusia la causante de la invasión d’Ucraína y tamién les emplegue en mayor cantidá.
Inclusive la guerra tiene unes normes internacionales que son violaes, mesmo que los Drechos Humanos, peles partes en conflictu, afeutando a la seguridá de la población civil indefensa, como asocede na guerra d’Israel y Palestina.
Nel sieglu XXI, el respetu a ciertes garantíes magar seya nos conflictos bélicos ha d’axustase al usu normalizáu del comportamientu de los exércitos de cualesquier bandu.
La ONX afítalo asina, con poco ésitu entá, sofitada poles ONGs y munchos políticos europeos. La paz entá ye entá un deseyu, non una realidá, en munchos llugares.
Nun hai que lo escaecer.
