El presidente del Principáu d’Asturies, Adrián Barbón, formó un gobiernu paritariu con diez conseyeríes qu’inclúi un departamentu de Ciencia, Innovación y Universidá y otru de Cultura. Juan Cofiño González va ser vicepresidente y conseyeru d’Infraestructures, Mediu Ambiente y Cambéu Climáticu y va asumir tamién la coordinación del Executivu.
El nuevu gabinete va tar integráu poles siguiente persones:
Juan Cofiño González (Parres, 1957). Vicepresidente y conseyeru d’Infraestructures, Mediu Ambiente y Cambéu Climáticu. Llicenciáu en Derechu y especialista en telecomunicaciones, derechu de familia, responsabilidá civil y protección de datos. Foi secretariu xeneral de la Unión de Llabradores Asturianos (UCA), director d’asesoría xurídica y regulación de Telecable y director xurídicu del Grupu Euskaltel, amás de miembru de la dirección de l’Asociación Nacional d’Operadores de Telecomunicaciones Dixitales y de la subcomisión xurídica de l’Asociación d’Operadores de Telecomunicaciones d’España.
Diputáu na Xunta Xeneral de 1983 a 2000, tamién ocupó diversos cargos na Alministración autonómica: conseyeru d’Obres Públiques, Vivienda, Tresportes y Telecomunicaciones (1993-1995), secretariu xeneral de la Presidencia del Principáu y presidente de Vipasa y Sedes.
Rita Camblor Rodríguez (Llangréu, 1970). Conseyera de Presidencia. Diplomada en Graduáu Social pola Universidá d’Uviéu y en Xerencia de Vientes pola Universidá EAFIT de Medellín (Colombia). Foi conceyala d’Economía, Facienda y Patrimoniu, Compres y Contratación de Llangréu, responsable del departamentu de Mocedá (2002-2006) y del departamentu d’Igualdá y Asuntos Sociales d’UXT na contorna del Nalón. Realizó distintos estudios sobre la inmigración, les persones mayores de 65 años y l’empléu femenín na mesma contorna.
Ana Cárcaba García (Soto Ribera, 1972). Conseyera de Facienda. Llicenciada en Ciencies Económiques y Empresariales y doctora en Dirección y Alministración d’Empreses pola Universidá d’Uviéu, dende 1995 ye profesora titular del departamentu de Contabilidá de la institución académica. Dientro de la Universidá d’Uviéu, foi vicedecana de Calidá de la Facultá d’Economía y Empresa, coordinadora del programa de doctoráu en Sistemes d’Información Contable, coordinadora del Máster Universitariu en Sistemes d’Información y Analís Contable y secretaria del Institutu Universitariu de la Empresa.
Tamién dirixió dos tesis y participó en distintos proyectos d’investigación sobre la calidá de vida nel ámbitu municipal. El so trabayu recoyóse en 34 ponencies en congresos nacionales ya internacionales y en 37 publicaciones.
Enrique Fernández Rodríguez (Samartín del Rei Aurelio, 1974). Conseyeru d’Industria, Empléu y Promoción Económica. Llicenciáu n’Alministración y Dirección d’Empreses pola Universidá d’Uviéu, onde tamién se doctoró con un premiu estraordinariu. La so trayectoria profesional tuvo venceyada a esta institución académica, onde exerció como profesor d’Economía Financiera nel Departamentu d’Alministración d’Empreses ente 1997 y 2011 (anguaño n’excedencia).
Nel ámbitu políticu, foi alcalde de Samartín del Rei Aurelio ente 2011 y 2019. Dende 2015 trabayó como miembru del Conseyu Territorial de la Federación Española de Conceyos y Provincies (FEMP), foi voceru socialista na Comisión de Desenvolvimientu Económicu y Empléu de la FEMP, y miembru del conseyu de gobiernu de la rede de conceyos pola tresparencia de la federación. Dende 2017, pertenez al comité federal del PSOE y a la executiva rexonal de la FSA como secretariu de la área de Política Económica, Industria, Empléu ya Innovación.
Carmen Suárez Suárez (Xixón, 1953). Conseyera d’Educación. Llicenciada en Xeografía y Hestoria y doctora n’Hestoria pola Universidá d’Uviéu, onde realizó’l doctoráu interdisciplinar n’Estudios de la Muyer. Tamién ye llicenciada en Filosofía y Ciencies de la Educación pola Universidá d’Educación a Distancia (UNED), master n’Estudios de la Diferencia Sexual pola Universidá de Barcelona y Especialista en Polítiques pa la Igualdá na Alministración Pública.
Exerció como profesora de Secundaria n’Asturies (1978-1986) y como Inspectora d’Educación en Navarra. Dende 1990 y hasta marzu de 2019 foi inspectora d’Educación nel Principáu, a esceición del períodu 2000-2001, nel que foi xefa d’Igualdá d’Oportunidaes pa Muyeres y Homes del Institutu Asturianu de la Muyer. Forma parte de l’Asociación Feminista Clara Campoamor, de l’Asociación Española d’Investigación d’Hestoria de les Muyeres, de la Lliga Internacional de Muyeres pola Paz y la Llibertá y ye patrona de la Fundación José Barreiro.
Pablo Ignacio Fernández Muñiz (Avilés, 1966). Conseyeru de Sanidá. Llicenciáu en Medicina y Ciruxía pola Universidá d’Uviéu, empecipió la so trayectoria profesional como médicu d’accidentes na mina de Tormaleo y darréu nel serviciu d’Urxencies d’Atención Primaria d’Avilés. En cursando’l MIR na especialidá de Ciruxía Xeneral y del Aparatu Dixestivu, incorporóseó al Hospital Xeneral d’Asturies, onde trabayó dende 1992 hasta 1996 y onde llogró xuna beca de l’Asociación Española de Ciruxanos pa formación específica en Ciruxía Hepato-Bilio-Pancreática. Tamién exerció como ciruxanu nel Hospital Valle del Nalón (1997-2010) y nel Hospital San Agustín hasta 2016. Anguaño ocupaba’l cargu de director de la área IV del Serviciu de Salú del Principáu (Sespa), qu’inclúi la xestión del Hospital Monte Naranco y l’Hospital Universitariu Central d’Asturies (HUCA).
Ye miembru del Comité de Bioética d’España y del Comité Científicu de la Sociedá Internacional de Bioética (SIBI). Como docente, dende 2016 exerció como director del Máster d’Especialización en Patoloxía Mamaria de la Universidá Autónoma de Madrid. Ye espertu en ciruxía oncoplástica y reconstructiva de la mama, especialista n’ecografía mamaria, máster en Bioética poles Universidaes del País Vascu, Zaragoza, La Llaguna, Les Palmes de Gran Canaria y Rovira i Virgili, máster en Dirección y Alministración d’Empreses pola Universidá Camilo José Cela, y máster en Dirección y Alministración d’Empreses (MBA) y especialidá en Xestión Sanitaria por IMF Business School.
Melania Álvarez García (Carreño, 1979). Conseyera de Derechos Sociales y Bienestar. Llicenciada en Ciencies Polítiques y de l’Alministración na especialidá de Relaciones Internacionales pola Universidá de Santiago de Compostela y máster en Marketing Políticu, Estratexes y Comunicación Política pol Institutu de Ciencies Polítiques y Sociales, adscritu a la Universidá Autónoma de Barcelona.
Foi directora xeneral de Participación Ciudadana na Conseyería de Presidencia y Participación Ciudadana na última llexislatura (2015-2018) y dende 2007 hasta 2011 foi concejala d’Ordenación del Territoriu, Infraestructures, Vivienda y Mediu Ambiente del Conceyu de Carreño. Tamién collaboró con distintos medios de comunicación.
Alejandro Jesús Calvo Rodríguez (Cangas, 1974). Conseyeru de Desenvolvimientu Rural, Agroganadería y Pesca. Inxenieru técnicu agrícola ya inxenieru agrónomu, con másteres en Ganadería y Desenvolvimientu Rural y en Viticultura, Enoloxía y Marketing. Trabayó como técnicu de viticultura y director de l’Agrupación de Tratamientos Integraos n’Agricultura pal cultivu de la vide de l’Asociación de Productores y Ellaboradores de Vinu de Cangas. Tamién exerció como inxenieru consultor para Ardaliz Oficina Técnica y como director técnicu de Bodega del Narcea S.L.
Na Alministración autonómica desempeñó les xeres de director xeneral de Política Forestal del Gobiernu en 2008; director-xerente de la Sociedá Xestión d’Infraestructures Culturales, Turístiques y Deportives de 2009 a 2012; viceconseyeru de Cultura y Deporte de 2012 a 2015, y director-xerente de la Sociedá Pública de Xestión y Promoción Turística y Cultural de 2015 a 2019.
Berta Piñán Suárez (Cangues d’Onís, 1963). Conseyera de Cultura, Política Llingüística y Turismu. Llicenciada en Filoloxía Española pola Universidá d’Uviéu, desenvolvió’l so llabor profesional como docente en centros educativos públicos d’Asturies y Madrid. Mientres décades tuvo venceyada al movimientu de recuperación de la llingua asturiana y al mundu artísticu de la comunidá. Dende 2008 ye miembru de l’Academia de la Llingua Asturiana ya impulsó diversos proyectos culturales.
La so obra lliteraria abarca dende la poesía y la narrativa hasta l’ensayu o la lliteratura infantil. Anguaño forma parte de la xunta directiva de Genialogías, asociación de poetes feministes que trabaya pola igualdá y la visibilidá de les muyeres.
Borja Sánchez García (Mieres, 1979). Conseyeru de Ciencia, Innovación y Universidá. Llicenciáu en Bioloxía y doctor pola Universidá d’Uviéu, dende febreru de 2017 ye científicu titular del Conseyu Cimeru d’Investigaciones Científiques (CSIC) adscritu al Institutu de Productos Lácteos d’Asturies (IPLA). Realizó la so tesis doctoral nel IPLA y llogró el premiu estraordinariu de doctoráu y mención de doctoráu européu pol trabayu que defendió en 2007.
Realizó distintes estancies d’investigación que sumen cuatro años nel Institutu Nacional pa la Investigación Agronómica de Francia, la Escuela Nacional d’Inxenieros Agrónomos de Burdeos, la Universidá de Parma y el Centru de Cooperación Internacional n’Investigación Agronómica pal Desenvolvimientu d’Isla Reunión. Ye secretariu xeneral de l’Asociación Española pa la Meyora de la Ciencia y sociu fundador de la empresa derivada (spin-off) biotecnológica Microviable Therapeutics S.L. Publicó 128 artículos en revistes internacionales, 15 capítulos de llibros y más de 30 artículos de divulgación. Foi l’investigador principal de 11 proyectos ya inventó xuna patente nacional y dos internacionales llicenciaes.
