La Conseyería d’Educación axudicó casi nueve de cada diez places de turnu llibre convocaes nes oposiciones de Secundaria y Formación Profesional (FP) qu’empezaron el 19 de xunu y concluyeron güei. Los tribunales completaron tol procesu burocráticu y los llistaos d’aprobaos yá tán disponibles n’Educastur.
La oposición dexó cubrir 519 places de les 592 ufiertaes nel turnu llibre, esto ye, ensin cuntar les de promoción interna. Porcentualmente, esto supón un 88%. Del total de 592 puestos, 44 taben acutaos pa candidatos con discapacidá reconocida. D’esos 44, axudicáronse 9. El restu, tal que marcaben les bases, incorporóse a la bolsa xeneral.
Amás, pa un total de 20 disciplines cubriéronse’l total de les places ufiertaes. Otra manera, les árees con menor tasa d’aprobaos fueron Procesos de diagnósticu clínicu y productos ortoprotésicos (38%), Alministración d’empreses (40%) y Matemátiques (58%).
El director xeneral de Personal Docente, José Manuel López, valoró’l desenvolvimientu del procedimientu, aplazáu l’añu pasáu pola mor de la pandemia sanitaria, y que s’enmarcaba na ufierta d’empléu públicu de 2019. Guerrero esplicó que la tramitación resolvióse n’apenes cinco selmanes y estimó la implicación de les presidencies de los tribunales y de los sos integrantes “que, xunto col equipu de la conseyería, trabayaron de manera coordinada nun procesu de gran complexidá”.
“Entamemos hai meses estes oposiciones col enfotu de garantizar la seguridá en tolos aspectos, tamién nel sanitariu. Finalmente, consiguimos encauzar los imprevistos, comprensibles nun procedimientu que movilizó a más de 5.000 persones”, añedió.
Los resultaos de les oposiciones queden recoyíos na siguiente tabla:
Especialidá | A1+A2 | cubiertes | % |
Filosofía | 12 | 12 | 100% |
Llingua castellana y lliteratura | 22 | 22 | 100% |
Xeografía ya historia | 55 | 55 | 100% |
Matemátiques | 100 | 58 | 58% |
Física y química | 50 | 50 | 100% |
Bioloxía y xeología | 35 | 35 | 100% |
Dibuxu | 30 | 30 | 100% |
Francés | 14 | 14 | 100% |
Inglés | 20 | 20 | 100% |
Educación física | 25 | 25 | 100% |
Orientación educativa | 15 | 15 | 100% |
Tecnoloxía | 21 | 21 | 100% |
Economía | 25 | 23 | 92% |
Alministración d’empresas | 15 | 6 | 40% |
Formación y orientación llaboral | 20 | 20 | 100% |
Informática | 10 | 10 | 100% |
Navegación ya instalaciones marines | 2 | 2 | 100% |
Organización y proyectos de fabricación mecánica | 10 | 10 | 100% |
Procesos diagnósticu clínicu y productos ortoprotésicos | 8 | 3 | 38% |
Procesos sanitarios | 8 | 5 | 63% |
Cocina y pastelería | 7 | 4 | 57% |
Equipos electrónicos | 6 | 6 | 100% |
Instalaciones electrotécnicas | 7 | 7 | 100% |
Mantenimiento de vehículos | 14 | 11 | 79% |
Mecanizáu caltenimientu de máquinas | 10 | 10 | 100% |
Procesos de xestión administrativa | 25 | 21 | 84% |
Servicios a la comunidá | 16 | 16 | 100% |
Soldadura | 5 | 5 | 100% |
Alemán | 5 | 3 | 60% |
TOTAL | 592 | 519 | 88% |
A1: Turnu llibre de nueva incorporación
A2: 7% reserváu pa discapacidad