El Altar del Holocausto ye una banda instrumental de cultu formada por Reaper Model, Weasel Joe, Reverb Myles y Skybite que se mueve ente’l Postrock y el Doom instrumental. Caún de los miembros tien influencies musicales bien variopintas y distintes, esto fai-yos componer soníos, atmósferes y estridencies dignes d’escucha. Cantares con desenvolvimientos y atmósferes bien denses, melódiques y fondes que tresmiten al oyente a distintos estaos. Ye necesariu parase a escuchar los sos cantares yá que son denses, con munches transiciones y compendios musicales que te somorguien n’estaos de señardá, allegría, murnia… Los sos conciertos xeneren un aura d’inseguridá, misteriu y pensamientos. Nun dexen a naide indiferente. Güei, falamos con Reaper Model, batería de la banda, enantes del conciertu del 27 d’ochobre en Xixón.
- Llegáis a Xixón con más de 350 conciertos y 6 trabayos d’estudiu. Sicasí, la banda nació como un dúu. ¿Cómo foi esi procesu y como foi creciendo la banda?
Ye complicao echar la vista atrás dempués de 11 años… Asocedieron munchos acontecimientos, la gran parte positivos y sirviéronnos pa dir evolucionando como conxuntu, creer en nós mesmos, tener paciencia y poder avanzar adulces… a la fin la música nun ye más qu’una canal pa poder tresmitir emociones, sentimientos, vivencies… y ye polo qu’empezamos nesto y polo que dempués de tantu tiempu siguimos equí. Como dicíen los nuesos amigos de Hamlet, entá “Queda enforma por faer”.
- Na xira actual escúchense temes de tol repertoriu, pero en 2022 salió “De Euforia y Nostalgia” un EP de dos cantares. ¿Cuál ye’l sentíu d’estos dos temes y qué queréis tresmitir?
L’oxetivu d’esti EP ye facer una pequeña ufrienda a tolos fieles que nos siguieron mientres los 10 años que cumplimos como banda, una especie de “regalu” pa ellos.
Son dos temes muncho más “frescos” tanto en soníu como en producción, ye daqué buscáu y creemos que se consiguió. Pa nós tocar en directu “De Euforia” ye un desafuegu y la parte más “festiva” de la homilía.
- Nun mundu de la inmediatez y de la rapidez por bandera, la vuesa música caracterízase por unos ritmos densos que merecen un reposu a la de ser escuchaos. ¿Por qué apostáis por ello?
Ye una entruga complicada, porque vivimos tiempos difíciles pal consumu de cualquier tipu de cultura, tou tien de ser inmediatu, ensin tastiar, ensin buscar detalles, ensin perdese y somorguiase na fondura de les obres independientemente del estilu. Nuesa música, como tanto d’otres, pa ser esfrutada esixe un mínimu de “concentración” o de “atención” al escuchu.
Güeyu, con esto nun queremos dicir qu’otros estilos más “algamadizos” nun merezan esa escucha activa”, pero nel nuesu casu al nun tener voz como elementu principal precisa que l’oyente dedíquelu más tiempu pa esfrutala… y eso, el tiempu, anguaño por desgracia ye daqué bien complicáu de consiguir.
- Los títulos de les composiciones xiren siempres o casi siempres al rodiu de pasaxes de la Biblia. ¿Ye una cuestión estética o fonte d’inspiración?
Sí, de fechu el mesmu nome de la banda provien d’una d’elles, concretamente Éxodu 27: 1-8. Al respective de si ye una cuestión estética preferimos que seya l’oyente quién xulgue cuando nos ve en directu, que nun se dexe influyir por prexuicios, qu’alleguen a la homilía y lo comprueben por ellxs mesmxs.
- Nesi sentíu, la vuesa puesta n’escena coles homilíes xuega un papel bien importante. ¿Cuánto curiáis esa escena y cómo surde esa idea?
Como te comentaba antes, dempués de tantos años ye daqué a lo que-y dedicamos especial curiáu y que nos lleva abondo tiempu de preparación… gústanos curiar los detalles y que too tea perfectu antes de la homilía. Too esto depende de munchos factores, dalgunos tán nes nueses manos y otros non… la mayor parte de les vegaes llógrase, pero dacuando hai detalles qu’escapen al nuesu algame.
- La prensa especializada caracterizóvos inclusive como banda de cultu. En dambos sentíos (relixosu y musical), ¿non? Dexando a un llau la chancia, ¿qué supon esto pa vós?
Puede ser, la espresión “banda de cultu” ye bien amplia y puede entendese de distintes formes… daqué minoritariu, veneráu, que s’alloña de la corriente principal. Tamién podemos interpretalo como una obra que se caltien a lo llargo del tiempu, tolo contrario al ésitu inmediatu”… interpretar de la manera que s’interprete pa nós siempres va ser un honor que nos tengan en cuenta y que la nuesa música seya escuchada.
- ¿Hai en marcha dalgún trabayu d’estudiu de llarga duración de cara a 2024 o, otra manera, queréis siguir esfrutando de los temes yá compuestes?
Nunca dexemos de componer, nun somos una banda que trabaye con un «calendariu” o que nun salgamos del estudiu rollu King Wizard and the Lizard Gizzard… Gústanos la carretera, el tiempu que tenemos xuntos emplegar n’ensayar y xirar, preparar homilíes y volver xirar… siempres foi asina. Qu’ente tantos conciertos y xires surden nueves composiciones, de xuru que vamos entrar al estudiu… pero eso namás lo sabremos según vaya pasando l’añu.
- En Xixón tuvistis grandes homilíes, sobre manera nel Tsunami Xixón. ¿Qué esperáis d’esta nueva visita a la ciudá?
Echando la vista atrás y revisando semeyes, la primer vegada que tuvimos en Xixón foi n’ochobre del 2013, fai xusto GÜEI 10 años… nel yá extinto Café Dam, alcordanza que tocamos xunto con un dúu compuestu por Antonio Tamargo, actual guitarrista d’Illegales.
Mientres estos años volvimos en numberoses ocasiones, creo qu’en toles xires de la banda y teníamos la necesidá de volver presentar “De Euforia y Nostalgia”, ye una ciudá que nos apurrió muncho y a la que-y debemos muncho.
¡¡Esperámosvos el vienres 27 na Acapulco!!
