Un desenvolvimientu de soportes pa la crecedera de texíos humanos (Scatien), una rede social na que los usuarios publiquen o proponen planes pudiendo acomuñar a empreses (Plannet) y un sistema pa optimizar el consumu de radiadores lléctricos según la evolución del preciu de la lluz (Heat Track) son los trés proyectos ganadores del Ecosystem Integration TalentUO Lab, el llaboratoriu d’esperimentación, innovación y producción colaborativa que naz gracies al conveniu suscritu ente la Universidá d’Uviéu y Banco Santander al traviés de Santander Universidaes. El principal oxetivu d’esti llaboratoriu ye contribuyir a la creación o aceleración de startups pa fomentar l’emprendimientu.
Los trés proyectos escoyíos van disponer agora d’un capital de 10.000 euros, caún d’ellos, apurríu pol Banco Santander, pa pasar de la fase de prototipado a la d’incubación, col fin d’avanzar nel procesu pa constituyise en nueves empreses innovadores. Los trés equipos escoyíos, d’ente les diez idees escoyíes primeramente, van caltener agora distintos alcuentros y mentoríes hasta’l 30 de payares p’ayudar a avanzar na construcción de nueves startups.
Begoña Cueto, vicerrectora de Tresferencia y Relaciones cola Empresa, destacó l’alta calidá de les idees participantes y, más específicamente, de los trés proyectos ganadores. Cueto confió en que, col sofitu económicu que van recibir, puedan llograr l’oxetivu pal que nació’l Ecosystem Integration TalentUO Lab, que nun ye otru que “dar forma a idees nun procesu d’esperimentación y aprendizaxe colaborativo col fin de contribuyir a la creación o aceleración de startups pa fomentar l’emprendimientu naciente na mesma universidá y sofitar l’emprendimientu activu”, sorrayó.
