Les instalaciones con paneles solares multiplicáronse por 120 n’Asturies en cinco años, según los datos del rexistru de la Conseyería de Transición Ecolóxica, Industria y Desenvolvimientu Económicu. Magar que’l Principáu nun algamara les 2.000 hores de sol añales, frente a les 2.500 de media nacional, la xeneración d’enerxía solar fotovoltaica disparóse na comunidá.
Asina, si en 2019 había 23 instalaciones con una potencia de 424,7 quilovatios (kW), anguaño hai 2.774 equipos de xeneración d’enerxía con paneles solares con una capacidá de producción de 27.221 kW. Tocantes a los datos d’anguaño, de xineru a setiembre punxéronse en marcha 1.342 instaciones fotovoltaiques con 9.995 kW de nueva potencia instalada.
La conseyera de Transición Ecolóxica, Industria y Desenvolvimientu Económicu, Nieves Roqueñí, ufiertó güei estos datos mientres la so visita al Salón Norte Anovable, n’Avilés, el principal eventu rellacionáu coles enerxíes anovables que se celebra nel Principáu.
Roqueñí destacó l’esplegue de les enerxíes anovables n’Asturies sobre manera, de la solar fotovoltaica, gracies a la continua implantación de nueves intalaciones y a dellos proyectos en marcha ente los que destaca’l gran parque de xeneración previstu por DuPont nel so complexu industrial.
A esta crecedera, según esplicó, contribuyeron dellos factores como la medría de los precios de la enerxía y la necesidá d’empreses y particulares de rebaxar el recibu eléctricu, la disponibilidad d’ayudes públiques venceyaes al Plan de Recuperación, Tresformamientu y Resiliencia, xuna mayor concencia frente al cambéu climáticu y la esistencia d’empreses instaladores bien competitives.
La titular de Transición Ecolóxica señaló que les instalaciones fotovoltáiques nun son una opción esclusiva de les empreses nin sobre manera, de les compañíes industriales. Ello ye que ente los beneficiarios de los seis millones en sovenciones concedíos hasta agora pol so departamentu figuren particulares, centros sanitarios, establecimientos hosteleros, ganaderíes, cadenes de supermercaos, empreses de tresporte, profesionales autónomos, colexos, comunidaes de vecinos y centros deportivos.
“La enerxía solar ta llegando a tolos sectores y actividaes económiques d’Asturies”, precisó la conseyera, quien remarcó que’l Principáu va cuntar en curtiu cola primer fábrica de paneles solares d’España al traviés d’un proyectu de Exiom ya Iberdrola en Llangréu.
La conseyera tamién anunció que nos próximos díes va publicar nel Boletín Oficial del Principáu (BOPA) xuna nuevu resolvimientu d’ayudes pa empreses del sector servicios pola que s’aprueben 37 solicitúes por un valor de 319.568 euros pa instalaciones de autoconsumo, con o ensin almacenamientu, financiaes pola Unión Europea nel marcu del Plan de Recuperación, Tresformamientu y Resiliencia.
