El Teatru La Llaboral tardó en dir garrando forma de conciertu de rock. A l’apertura de puertes, yeren pocos los fieles que taben esperando y nagüando por ver el conciertu de la nueche: Coque Malla na xira “Aunque estemos muertos”. Sonaba música clásica y el respetable esperó hasta al menos un cuartu d’hora enantes del show a ocupar la so llocalidá, que cantaba Joaquín Sabina. Puntuales y sobre un fondu prietu, apecieron
unes lluces que teníen un reblagu navidiegu, tenúes y con cierta murnia. Bien llueu, apaecieron progresivamente los componentes de la banda ente aplausos, guardando los más sentíos pal protagonista de la nueche, Coque Malla, qu’apaeció sele sofitándose en dos muletes.
Ente que’l cantante garrara posición y colocara ente manes la guitarra, diben sonando notes evocadores y de ciertu escalofríu, como d’una película de mieu, qu’anticipaben el primer cantar: “Bailo con muertos”. La composición tien un títulu que bien puede recordar o aludir al teatro románticu español. Pues Malla tiene un aire teatral al interpretar dellos de
los temes de probable influxu de la so ma la yá finada y gran actriz Amparo Valle. De la muerte, la murnia y el pesu del tiempu da fe la lletra del cantar: «Desde mi ventana veo cómo acaba el mundo/ Pierdo la alegría de sentirme indestructible/Llego hasta el mar y comprendo que todo termina hoy/ Me dejo caer en un mundo donde nada existe». Nun paeciera una forma alentadora d’entamar, pero sí d’entrar de llenu na dinámica y atmósfera del últimu álbum de Coque Malla: Aunque estemos muertos.
El conciertu siguió con “Místico”, un cantu a l’autenticidá y a l’autoestima en tonu rock, que nun escapa de la ironía: «Yo ya no hablo de comerme el mundo…yo solo quiero descansar un rato, yo no soy un místico […]/ yo ya no tengo prisa por lograrlo/ yo ya no intento verlo todo claro, ¿pa qué?». Ehí Malla avisó de que diben tocar el discu caberu del tirón y yá después tocaríen “les de Los Ronaldos, les bodes…”, ganándose al públicu, sentáu y sabedor de que la xente taba ellí pa disfrutar.
Consecuente colo dicho, foi tocando cantar por cantar del discu, un álbum que ya tien nuevos clásicos de so como ye “¿Volverá?”, una lletra que respiga: «¿Y volverán las historias con final feliz?/¿Volverán los dioses a fijarse en ti?/¿Volverá el perfume del amanecer/ Cuando hay agua en el asfalto/ Y flores que no puedes ver?». Otres como “Baila en la oscuridad”, recordaben por momentos a al Radiohead de In rainbows, pero si hebo un
cantar que llevantó l’ánimu de La Llaboral, esti foi “Como los gastos salvajes”. A mou de coru gospel, Malla interpretó esta banda cola banda faciendo los coros y pidiendo al públicu que llevantara les manes como un predicador y poniéndonos na piel d’un gatu xabaz. Por un momentu, sentímonos dientro d’una escena de Los Aristogatos.
El segundu pase del conciertu tuvo enllenu de clásicos del cantautor madrilanu. Arrincó con “La señal”, muy na tónica d’esti discu últimu. Entamó a cambiar el rexistru y tocó la ranchera “Hace tiempo” casi a capela. Pa siguir con “El último hombre en la tierra”, “Solo queda música” o “Un lazo rojo, un agujero”. De Los Ronaldos, pensando nos más
señaldosos, sonó “No puedo vivir sin ti”, “Adiós, papá” o “Guárdalo” o “Por las noches”, dexando la parte más rockera pa la parte final del show. Cuando entamó a sentise “No puedo vivir sin ti” los móviles allumaron la escuridá del teatru; respetando asina la petición del artista de nun romper el clima de “Aunque estemos muertos” y esperar a los cantares de “las bodas”. Dende esi momentu, nun quedó naide sentáu hasta’l remate del show, yá nun quedaba naide “ocupando la so llocalidá”. El pieslle del conciertu quedó a disposición d’esi himnu intensu, suave que ye “Te dejé marchar”. Tres dos hores de reló de música en directu, la banda se despidió a ritmu de ”At Last” d’Etta James y pruyía por tola Llaboral, el
sentir de que Malla foi a llevanos al so ritual y nós fuimos gatos xabaces que salieron a miagar a la lluna llena.
