San Miguel On Air sigue’l so circuitu poles sales de toa España cola xira de Travis Birds, que va actuar el próximu 16 d’avientu na Sala Gong d’Uviéu onde va presentar el so últimu discu “Perro Deseo”, dempués de pasar per Bilbo, Gasteiz, Burgos y Pamplona, mientres los meses d’ochobre, payares y avientu. Xixón al Día fala cola artista enantes del so conciertu na sala uvieína.
Llegues a Uviéu de la mano de San Miguel on Air a presentar el to tercer trabayu d’estudiu, Perro Deseo. ¿Cómo surde esta obra?
La composición de Perro Deseo ta mui amestada al momentu vital que tuvi travesando. Correspuende con un momentu nel que decidí dar bastante cabida al deséu ensin xulgalu, esperimentándolo dende la parte más conectada cola naturaleza real de lo que somos y non tantu de tol sistema que montemos, de lo que tenemos que ser. Vivir eses esperiencies y conoceme d’esa manera foi mui inspirador y diome les ferramientes pa componer estes hestories del discu.
¿Por qué centrase nel deséu?
El deséu xenera un movimientu que me resulta mui inspirador. Pa mi ye un motor; la ilusión poles coses, el deséu de consiguiles… Soi bastante ambiciosa y foi un motor nesti casu.
Nesti discu puede apreciase ciertu cambéu a la d’espresate, digamos que con más incisión y más abierta. ¿Cómo se produz ese cambéu?
Ye un discu distintu, sí, y podría dicise que más abiertu, más directu. Per un sitiu, correspuéndese col procesu que viví xirando con La costa de los mosquitos y la busca, precisamente, d’enfocar el siguiente proyectu a un directu que tuviera otres característiques. Pruyíame enforma que fuera más movíu, que tuviera un espíritu concretu que me resultaba mui divertíu y busquélo abondo a la de componer. De la mesma, a nivel personal siéntome abondo distinta y tengo menos reparu pa falar más en plata de delles coses. Tuvo bien amestáu al momentu vital.
¿Ye un puntu d’inflexón na to trayectoria collaborar nel Tributu a Sabina con Benjamín Prado?
Formar parte del Tributu a Sabina Ni tan joven ni tan viejo foi un escaparate terrible. Tuvi la suerte de poder defender esi testu de Benjamín y esi cantar que, probablemente, seya una de les más conocíes de Sabina. Foi bien enriquecedor defendela y, amás, tolo que traxo a nivel d’escaparate del mio proyectu y de la mio interpretación.
¿Cómo foi ese pequeñu proyectu?
19 días y 500 noches después foi un proyectu que coyí con muncha ilusión y, de primeres, con incredulidá de tener la responsabilidá d’entrar nun discu con tantos titanes. Nel momentu que se confirmó que lo tenía que facer, la verdá que lo viví dende l’esfrute y tomándolo como prepararía un papel pa una película o obra de teatru, intentando faeme col personaxe realmente, metiéndome tanto nel cantar que-y fixo él como na visión que yo tendría d’imaxinamela a ella ya interpretala dende ende.
Hai dos interesantes collaboraciones nesti últimu trabayu, con DePedro y Leiva. ¿Cómo ye trabayar con dos artistes tan reconocíos?
Trabayar con DePedro y Leiva foi mui enriquecedor, cada unu d’una forma distinta, especialmente nel casu de Leiva. Con él pudi ver cómo trabaya’l procesu de la producción dende’l principiu, col respetu col qu’escucha los cantares y búsca-yos el traxe afayadizu. Foi mui enriquecedor. A parte de la repercusión que depués tuvo la suerte de que cante tamién finalmente, que de primeres solo diba ser la producción. Foi una cosa que, a nivel artísticu, resultóme super enriquecedora y, entá a día de güei noto que m’apurrió coses que voi afayando.
Trabayar con DePedro igual, tener la suerte de que tamién quixera meter un cachu de testu y poder faer el cantar más especial, teniendo composición de dambos, ye daqué indescribible, bien emocionante.
Dende 2013 hasta agora, tres 10 años, viviríes altos y baxos na to trayectoria. ¿Qué ye lo que te fixo siguir nos escenarios?
A la fin, tomo la mio trayectoria profesional como un camín onde dacuando hai dificultaes y non siempres ye tou un camín de roses, pero ye precisamente de los momentos más baxos de los que más aprendes de ti mesma.
Ye un camín, una perspectiva global. Non sólo se vive de momentos guapos y, amás, creo que na música los meyores momentos son los que menos esperes. Munches vegaes les mires xuéguentela cuando llega un conciertu mui grande o cuando hai un pasu que te paez enorme les mires xueguen na to contra. A la fin, visualizar como un camín que me sigue xenerando ilusión y creo que sigo teniendo coses qu’apurrir. Pel momentu ye a lo que me dirixo dedicándome a esto.
A daquién que nun conoza a Travis Birds y s’avere per primer vegada a les tos temes, ¿qué-y diríes?
Que munches gracies pola oportunidá de la so escucha. A mi nun me gusta forzar nin convencer y paezme que son los cantares los que meyor falen por una mesma.
Ye entá pronto, pero ¿hai yá daqué pensao tres Perru Deséu?
Sigo componiendo, préstame calteneme entrenada neso. Agora toi nun momentu de busca, un procesu que paso siempres al acabar un discu. Toi neso, ensin presión, buscando escontra qué agües quiero dir y enfocar el barcu.
