El Gobiernu d’Asturies va empezar mañana la campaña de repoblaciones de salmón correspondiente a 2021 nos ríos del Parque Natural de Ponga, col allugamientu d’unes 10.000 güeves embrionaes. En total, nos próximos díes van introducise 20.000 güeves per aciu d’un sistema novedosu que rexistra una ratio mayor de supervivencia de los exemplares.
Esta técnica consiste nel empléu de caxes Vibert y Jordan-Scott, nes que s’introducen les güeves a pocos díes de la so eclosión. Darréu, estos recipientes asítiense na zona onde se lleva a cabu la repoblación y, asina, los esquiles nacen nel ríu y afáense a la redolada dende’l primer momentu. Otra de les ventayes d’esti procedimientu ye que con ella pue amenorgase’l tiempu en que les güeves permanecen nes piscifactoríes.
La iniciativa contribúi a diversificar los métodos de repoblación y enmárcase nos oxetivos de la Dirección Xeneral del Mediu Natural y Planificación Rural p’ameyorar la so efectividá y acurtiar les estancies nes piscifactoríes. Cuando la campaña de repoblaciones de 2020 yá se realizaron dellos ensayos con esta técnica y los resultaos fueron bonos.
El material xenético utilizao vien de les instalaciones que’l Gobiernu d’Asturies tien nel centru ictioxénicu d’Avalle (Parres), dedicaes a l’acuicultura y el caltenimientu del salmón atlánticu n’agües continentales dende hai décades.
El Parque Natural de Ponga atesora una rede fluvial con condiciones inmeyorables pal salmón. Ello ye que ye l’únicu espaciu protexíu asturianu con presencia permanente de la especie en toles sos fases. Por esta razón, la contorna recibe cada iviernu a cientos de persones pa ver los sos espectaculares saltos y el momentu del esgüeve.
