La organización de Muyeres rurales Hermanas de Tierra vuelve, un añu más, a sacar el so manifiestu por mor del 8M, Día Internacional de la Muyer. Nesti testu, les muyeres reivindiquen una tierra y un trabayu onde se reconoza el so papel esencial nel rural. Esti ye’l manifiestu:
Torna marzu, ente xelaes ya incertidumes, pero nós volveremos enllenar les cais, a llevantar les nueses voces, a romper los centros colos nuesos márxenes y periferies. Un marzu más reivindicamos los nuesos drechos, visibilizamos lo que nos traviesa y afecta. Sentimos que nun ye bona noticia qu’anguaño, ente les compañeres, falemos de qu’esti manifiestu seya más necesariu que nunca. La situación y les problemátiques que tamos viviendo nos nuesos territorios apéllennos de forma urxente y directa p’atopar la fuerza y la palabra ente nós: pa crear venceyos, sacar les sielles a la cai, nun callar nunca más, nun volver sentir nos soles.
Queremos güei poner l’alcordanza, el cuerpu y la voz. Ensin mieu, ensin pudor, ensin reparu.
Por toes aquelles que nun pueden dexar güei’l so puestu de trabayu o’l so papel de cuidadores, que viven paralizaes pola violencia, que trabayen día tres día ensin drechos, que nun pueden falar porque precisen el pan y el salariu pa que vivan los de so. Que nun pueden visibilizarse nuna manifestación, que nun pueden permitise salir a la cai, xunise a la protesta. Esto ye tamién poles que nun van poder salir de casa por cuenta de barreres físiques, sufrimientos o maltares, por tar zarraes n’instituciones o hospitales. Fuera de los discursos de los centros, de les instituciones, de l’academia. Queremos ser altavoz, plataforma pa toes aquelles a les que’l sistema espulsa, esplota, maltrata, dexa conscientemente siempres a un llau.
Yá pensamos nel branu que s’avera, con una seca que nos manca y congoxa. Los paisaxes nos que crecimos, vivimos y trabayemos tán sumiendo, la nuesa xeografía física y sentimental tresfórmase n’otra cosa. Entá nun sabemos nin tenemos pallabres, pero tamién esti manifiestu quier falar en voz alta d’esi dolor que munches llevamos yá dientro, que tresforma los nuesos cuerpos y venceyos, los nuesos ciños y comunidaes. Pero nun queremos dar oportunidá a los discursos enllenos de catastrofismu y colapsu. Equí nun pueden enraigonar los sermones que culpabilicen, qu’enfociquen, qu’aprienden, que dexen recayer tol pesu nes persones, ensin saber de les sos circunstancies y vulnerabilidaes. Preferimos medrar y compartir dende l’allegría. Queremos trabayar xuntes por otru porvenir, deprender a volver trescalanos. Pensamos que dende los ciños y el plasmu vamos poder granar xuntes en nuevos espacios y alcuentros. Pa ello tamién precisamos compartir y nomar les nueses fraxilidaes, vulnerabilidaes y sufrimientos. Pue que este seya un bon motivu pa lluchar y siguir alantre nesta emerxencia climática. Nun podemos permitinos el desánimu, el pesimismu, l’esperecimientu.
Hermana de tierra, que dalgunos faigan lo imposible por torgar imaxinar nuevos futuros nun significa que nun podamos suañar, y engarranos por tenelos.
Esmolécennos especialmente los discursos que tornen, romantizando la vida de les nueses madres y güeles, convirtiéndoles n’heroínes, despintando con pallabres y males mañes una dictadura enllena de represión, desigualdá y violencia.
Hermana de tierra, venimos d’aquelles neñes que trabayaron la tierra ensin poder decidir, que cargaron a recostines filoxes pergrandes enllenes d’arrenuncios y silencios. Compartimos territoriu con colectivos primíos. Nun podemos escaecenos de qu’aquelles violencies siguen ente nós: con nós güei especialmente tán les temporeres, les migrantes, les muyeres trans. Ensin elles nun contemplamos la llucha. Nun podemos imaxinar nin pensar los nuevos futuros habitables y sostenibles ensin elles nin les sos reivindicaciones.
Somos descendientes de toes aquelles y tamién vamos ser, dalgún día, antepasaes pa les que vengan. Nunca escaezamos d’ónde venimos, más nestos tiempos nos que tanto preguntamos escontra ónde queremos dir.
Nun cayamos na amnesia, nun caminemos ensin la memoria.
Llevamos con nós una xenealoxía de resistencia: duelnos que dende ciertos colectivos urbanos, siempres dende’l centru, borren d’un refundiu los nuesos rellatos y movimientos de llucha, resalven y simplifiquen los nuesos alderiques. Que nun teáis al tantu nun significa qu’en los nuesos pueblos nun tean asocediendo coses, que nun teamos trabayando pol cambéu. Paeznos inxusto con tolos colectivos y grupos rurales qu’incansables lluchen y se mueven per otros medios y territorios posibles. Creer que nun esisten otres lluches nin alderiques nos nuesos pueblos paeznos una visión terriblemente inxusta, paternalista y condescendiente.
Ensin nós nun s’entiende’l territoriu. Y nun podemos quedar callaes énte les midíes y discursos que siempres nacen y ordenen en nome del desenvolvimientu y la sostenibilidá. Yá basta de convertir los nuesos medios rurales en zones de sacrificiu, en simples horros, en vertideros, en simples zones de recréu pa la xente de la ciudá.
Nos nuesos territorios atopen les ferramientes y los saberes que puedan convertise n’aliaos p’apangar los efectos de la emerxencia climática na que vivimos. Pero la realidá ye que cada añu siguimos viendo cómo aumenta’l númberu d’esplotaciones industriales ya intensives nos nuesos pueblos, y cómo s’abren paso macroproyectos enerxéticos n’espacios d’altu valor ambiental ensin tener en cuenta a quien habiten la tierra, espulsándonos de los nuesos pueblos.
Celebramos la visibilidá y los nuevos rellatos qu’acaldía tán más presentes nos medios. Pero la realidá que vivimos nel campu dacuando nun concuerda colo que nos devuelve l’espeyu: siguimos ensin poder tomar decisiones, ensin accesu a una vivienda digna, a la tierra. Ensin ferramientes pa poder poner en marcha proyecto que trabayen pola soberanía alimentaria: ye más fácil desenvolver un proyectu industrial qu’un proyectu agroecolóxicu que produza alimentos que curien la nuesa tierra y nun nos faigan amalar.
Hermanes de tierra, ¿quién son los que deciden por nós? ¿Quién se beneficia del usu de la tierra? ¿Quién tien l’altavoz?
Queremos tierratrabayu.
Que toles persones tengan accesu a una alimentación saludable, llocal y caltenible. Queremos ciudaes y pueblos nos que s’apuerte con facilidá a alimentos que caltengan y curien el paisaxe. Queremos que toles persones que quieran trabayar la tierra tengan la posibilidá de faelo.
Hermana de tierra, les amenaces que nos ponen en peligru güei siguen siendo les mesmes d’ayeri, anque se vistan de términos como «progresu», «sostenibilidá» y «prosperidá». Nós somos como aquellos árboles que yeren un habitante más nos nuesos pueblos: na so solombra y abellu tomaben toles decisiones, falábase y compartíase, celebrar a quien veníen y despidíase per últimu vegada a quien se colaben pa siempres.
El sistema agroalimentariu nel que vivimos afara les pequeñes ganaderíes, los proyectos familiares, les iniciatives agroecolóxiques enllenes de saberes, rellaciones y formes de trabayu respetuoses cola tierra. Fai imposible’l relevu xeneracional, les incorporaciones de moces que quieren vivir nos nuesos pueblos. Sumen asina xeitos únicos d’habitar el territoriu, de caltener y protexer la nuesa biodiversidá y los sos ecosistemes.
Equí tamos xuntes p’alzar la voz, pa recordar que nun vamos dexar de lluchar por garantizar una tierra digna.
Hermanes de tierra, magar que tenten enforma baltanos, sabemos que xuntes nun vamos cayer.
Hermana de tierra, aquelles que cuntamos col privilexu y coles ferramientes necesaries podemos ser les primeres en revisar les nueses lluches y alderiques. Cómo trabayamos, cómo entamamos, cómo nomamos. Tamién nós tamos dando forma a nuevos rellatos, y ye imprescindible falar y pensar dende ónde y cómo los faemos.
Porque precisamos más que nunca nueves ruralidades llenes de feminismos, agroecología, diversidá, pero tamién —como dicíamos— de memoria.
Hermanes, nun táis soles.
Nun tamos soles.
Otru 8 de marzu más, siguimos equí, tamos equí.
Equí nomamos, equí sentímonos más xuníes que nunca. Equí faemos frente, compartimos les nueses medranes, dexamos a un llau’l silenciu. Reivindicamos qu’esisten munches maneres d’habitar el territoriu, munches ruralidades que dialoguen, qu’aprienden, que constrúin, que curien y acueyen. Una d’hermanes de tierra: enllena de feminismos y diversidá, de agroecoloxía, d’alcordanza, d’interdependencia, de sofitu mutuu, esperanza y allegría.
Por un feminismu de toes, por un feminismu d’hermanes de tierra.
