– La Encuesta de Población Activa estima una cayida del paru de 6.700 persones ente xineru y marzu, hasta les 57.400, y un cómputu global de 381.900 trabayadores
– El Principáu encamienta analizar estos datos con precuru, énte les fuertes oscilaciones trimestrales qu’ufierta esti sondéu
La Encuesta de Población Activa (EPA) confirma l’enclín positivu del mercáu llaboral n’Asturies avanzada por otros indicadores como’l paru rexistráu y les afiliaciones a la Seguridá Social, que constaten un descensu del desempléu y l’aumentu de la ocupación.
Los datos de la EPA, publicaos esta mañana pol Institutu Nacional d’Estadística (INE), envaloren que’l desempléu baxó en 6.700 persones (10,49%) nel primer trimestre d’anguaño, hasta amenorgase a 57.400. Tamién calcula que la ocupación aumentó en 500 persones (0,14%), hasta sumar 381.900 trabayadores.
La encuesta revela un comportamientu del mercáu llaboral más favorable n’Asturies que nel contestu nacional, onde cuantifica un aumentu del desempléu del 3,43% (103.800 persones). La EPA afita la tasa de paru del Principáu nel 13,06%, una cifra llixeramente inferior a la media española (13,26%).
A pesar d’estes resultancies, qu’asitien Asturies como la comunidá con mayor descensu del paru nesti períodu, el Gobiernu del Principáu encamienta analizar les cifres con precuru, énte les fuertes oscilaciones trimestrales qu’ufierta la EPA. La mesma configuración del sondéu y el tamañu de l’amuesa, especialmente en comunidaes uniprovinciales como Asturies, aconseyen comparar períodos homoxéneos y tomar en cuenta la evolución de les series medies pa disponer d’una radiografía más averada a la realidá del mercáu llaboral.
Sía que non, esta entrega de la EPA confirma la bona evolución del mercáu llaboral apuntada por otros indicadores. Por casu, el paru rexistráu atropó en marzu 24 meses de descensos interañales consecutivos y asitióse en 61.696 persones, la cantidá más baxa de los postreros 15 años (pa marzu). Colo que respecta a les afiliaciones a la Seguridá Social asocede lo mesmo: 24 meses de medría interañal consecutiva, hasta alzase a 372.565.
