Les comunicadores Nerea Pérez de las Heras ya Inés Hernand lleguen esti sábadu al Teatru de La Llaboral de Xixón col so show Saldremos Mejores, basáu nel podcast homónimu col que s’alcuentren ente los más escuchaos del país. Charramos con elles sobre humor, feminismu y comunicación.

Dambes tenéis una trayectoria bastante dilatada yá y, sobremanera, abondos proyectos sobre la mesa. Nerea enllenando teatros con Feminismo para torpes y con ¿Cómo hemos llegado hasta aquí? ya Inés al mandu de Gen PlayZ, presentando’l Benidorm Fest o collaborando con La Resistencia , ¿cómo surde la idea de faer un podcast xuntes? ¿Cómo naz Saldremos Mejores?
Conocímonos profesionalmente primero y fixímonos amigues bien rápido. Llegó una propuesta y resulta qu’ella taba pensando en faelo conmigo y yo taba pensando en faelo con ella. Hebo poca negociación y poco pensamientu. Foi una cosa d’instintu, como que queríamos trabayar xuntes y llegó la propuesta xusto nesi momentu.

Nuna dómina con un accesu inmediatu y casi infinitu a la información, ¿por qué faer un podcast sobre actualidá y sociopolítica?
Precisamente por eso. Porque too ye inmediato, la xente nun tien tiempu de lleese más allá del titular. Los titulares cada vez tán más fechos pa que pinches ensin pensar y ensin afondar y eso esmolecíanos muncho, porque una sociedá desinformada ye una sociedá supermanipulable. Y esmolecíanos como ciudadanes porque tábemos dándonos cuenta de que la xente nun tien tiempu d’enterase de les coses pero quier.

Nun hai qu’infantilizar a la xente y dicir “bono, a naide-y interesa la política”. Claro qu’a la xente interesa-y la política y la xente sabe lo que-y convien y la xente odia que la traten como si fuera fato y quier una sociedá meyor pa ellos mesmos y el próximu. Entós queríemos atender a una falta que tábemos viendo, que yera que nun se reposaben los temes, que nun había tiempu nin espaciu pa parase a duldar, matizar, analizar, consultar con dalgún espertu, falar ensin vehemencia, falar tamién con humildá, coles nueses propies duldes… Too eso nun se taba dando y, sobremanera, nun se taba dando en conteníos empobinaos a xente mozo. Y poro fiximos Saldremos Mejores y la xente recibiólo con munches ganes.

Lleváis aprosimao un añu faciendo’l show en directu, ¿cómo ta siendo la esperiencia? ¿Cómo lu recibe el públicu ?¿Cuál ta siendo la diferencia al respective de grabar el podcast nel estudiu?
Increíble. El públicu ye increíble. Entramos y ye que dacuando ye’l so mediu minutu nel escenariu cola xente aplaudiendo y nós ehí plantaes. Ye increíble. Ye verdaderamente emocionante, precioso, les coses que nos diz la xente, les coses que nos cunten de como esfruten, de como se rin, de moces que, de sópitu, vienen col so padre de 60, de families que vienen enteres… El contactu col públicu ye lo meyor del mundu. Lo meyor.

Nun ye Saldremos Mejores. El show de comedia ye un show solo de comedia. Nun ye’l Saldremos Mejores que ye dalgo intenso y d’actualidá. Ye un show de chistes pero, claro, son los chistes fechos por nós, col nuesu discursu, nel que rimos tamién un poco de nós mesmes y como que, a la fin, ye’l públicu del podcast. Que sabes que tien cierta conciencia social, que ta esmolecíu polos mesmes temes que tu y ehí tien un espaciu d’aliviu y de compañía y de desafuegu y de gamberreu brutal. Entós ye lo meyor del mundu. Que te xunan unes ganes de camudar les coses y de que la sociedá sía meyor. El show sedría como “bono , tamos toes xuntes nel podcast y toos xuntos nel podcast charrando de ciertes temes y güei vamos de folixa”, ¿non?. Esi día nel que dices “güei nos desmelenamos”. Pos eso sedría’l show.

Les dos utilizáis l’humor, tanto nel show, como nel programa, como fora d’él, ¿consideráis que ye una ferramienta útil pal activismu ?
Sí, yo llevo utilizándolu tola vida. Ye una ferramienta de poder, ye una ferramienta d’aliviu, ye una ferramienta d’allegría. Tamién pue haber muncha violencia nel humor. Hai que tener muncho cuidu. Pero ye un contraataque. De les que siempres se rieron, de les que siempres fixeron burlla pos agora tán tomando el poder a la so mano. El que se ri, dende’l patiu del colexu hasta’l Congresu de los Diputaos, ye’l fuerte. Entós rise ye dalgo bien poderoso. Y, a la fin, l’humor abre una fienda de relaxación na persona que tienes enfrente pela que depués entren les coses muncho meyor, yo llevo utilizándolo munchos años. Dende Feminismo para Torpes hasta agora. Y utilízolu siempres con unos oxetivos bien claros. Non solamente pa esfrutar, sinón pa pensar. L’humor ye siempres señal d’intelixencia cuando ye humor que nun fai dañu a naide.

Siguiendo col tema del humor, falóse muncho sobre l’humor y les muyeres: que si ye de nichu , que si nun son tan gracioses, etc. ¿Por qué , a pesar de tar enllenando teatros o teniendo podcast fechos por muyeres ente los más escuchaos, sigue teniéndose esta concepción?¿Creeis qu’esi enclín o esi ideariu ta desmontándose?
Yo creo que claro que nun somos tan gracioses. Nun somos tan gracioses depende pa quién. Yo al públicu de Broncano paézo-y aburridísima, pero ye qu’a mi el públicu de Broncano nun m’interesa. Hai que dexar de pensar en que l’humor que faemos les muyeres ye pa muyeres, o la comunicación, qu’a la fin nós lo que faemos ye comunicación -non solamente humor- ye pa muyeres y el que faen los homes ye xeneralista. Pa nada.

Hasta agora lo qu’había yera una comedia bien pequeñina, qu’atendía solo a una parte de la población, que tán nos chistes de suegres y de la mio novia ye la policía. Y ye qu’eso nun yera xeneralista y agora vinimos nós a faer lo nueso, non. Ye que verdaderamente había un públicu güérfanu, grande, non solamente de muyeres. Había un gran públicu güérfanu de referentes qu’agora los tien. El panorama que tenemos agora ye un panorama muncho más completu. Y l’humor fechu por muyeres y la comunicación fecha por muyeres nin ye solo pa muyeres nin ye solo feminista nin ye minoritaria.

Somos la metá de la población y tenemos que ser la metá de too. Somos la metá de la imaxinación tamién, tenemos que ser la metá de too mínimo.

El pasáu 8M nun tuvo exentu de polémica. Magar lo que se diz, ¿cómo veis vós el movimientu feminista anguaño ?

El movimientu feminista sí que m’esmolez porque lo veo bien estazáu y véolu bien sumíu n’alderiques que verdaderamente creo que nun son los más importantes. A min encantaríame que’l movimientu feminista tuviera falando de la renta básica universal y del sosten económicu de les más probes, que tuviera falando de les muyeres que s’afueguen nel Mediterráneu intentando llegar a un futuru meyor. Encantaríame que tuviera neso el movimientu feminista. Tamos n’otru alderique, n’otros alderiques.

Lo que nun m’esmolez ye qu’alderiquemos. Porque el movimientu feminista camudó la vida de les muyeres y de los homes, de tola sociedá, de manera fonda desque esistió. Y claro qu’hai qu’aldericar, esto ye, ye un movimientu políticu y social vivu que camuda la vida de les persones dende les coses públiques y colectives, dende la política hasta la casa y lo que pasa na to cama, lo que pasa nos tos cuidos. Ye bien importante. Yo diría que lo más importante qu’hai. Porque tamién ta travesáu de antirracismu, ecoloxismu… Pa mi ye’l movimientu social y políticu que ye la palanca pa camudalo too. Entós hai qu’aldericar constantemente. Nun hai que confundir la guerra cola falta de consensu. Tenemos que tar negociando constantemente, la política va d’eso, de tar negociando constantemente y falando constantemente.

Esmolezme que la conversación tea dándose nunos foros, que son Twitter, que lo que premien ye, precisamente, que nun falemos, que lo que premien ye’l zasca, la falta d’argumentos, l’insultu, la cancelación…Eso ye lo contrario a la conversación. Entós eso sí que m’esmolez. Esmolécenme los términos nos que se ta dando la conversación, non la conversación en sí. La conversación ye necesaria. Oxalá s’aselara por que pudiéramos tener otres conversaciones.

Y, pa rematar, ante el panorama social y políticu que tenemos delantre con un individualismu cada vez más voraz, ¿creéis que podemos salir meyores?¿Hai esperanza?
Siempres. Yo de verdá créolo totalmente. Nun tengo nengún ápice de cinismu nel mio cuerpu. Nun me gusta nada el cinismu, nun sirve pa nada. Soi bien idealista. Paezme mui neolliberal y mui cutre la idea de: quedo de brazos cayíos y yá ta porque non puede faese nada y porque el mundu acábase y porque yá el cambéu climáticu nun pue parase y la violencia machista nun pue parase y les fronteres nun puen abrise y entós nun hai que faer absolutamente nada. Eso ye mentira. Camudemos como sociedá mil vegaes y podemos volver camudar munches vegaes más. Ello ye que ye una cuestión de vida o muerte que camudemos.

El retu ye grande. Pero el retu ye, cenciellamente, camudar la mentalidá de la xente y eso faise contactando, falando, comunicando, colectivizándonos y ye lo que tamos intentando; animar a la xente a que faiga eso. Y créolo enforma. Facémoslo con muncha ilusión, con munchu compromisu y con muncha verdá.