Ayeri, mientres l’alderique de candidatos en TPA, la FSA-PSOE fixo públicu’l programa electoral, nel qu’apaecen delles novedaes alredor del asturianu y l’eonaviegu. De nuevo apaez la referencia esplícita a la oficialidá, «impulsaremos la reconocencia oficial de la llingua asturiana y del eonaviegu (esta nel so ámbitu) nel marcu de la reforma y actualizacíón del Estatutu d’Automía d’Asturies».
El programa fala d’un modelu basáu «nel alcuerdu y el consensu, que garantice la protección de la llingua, xenerador de drechos y non d’imposiciones, d’aplicación progresiva y acordies a les circunstancies sociollingüístiques y les necesidaes culturales d’Asturies».
Esta nun ye la única referencia a la cuestión llingüística nel programa de los socialistes asturianos, que nel ámbitu educativu sumen una novedá, convertir l’asignatura de la Llingua Asturiana y Lliteratura en secundaria en voluntaria y non optativa, lo que significaría que dexaría de competir con otres asignatures como francés. Con ello recuperaríase l’espíritu de la Llei d’Usu de 1998, que fala de l’asignatura como voluntaria y non como optativa, daqué que nun vien cumpliéndose nes últimes décades.
Pa los socialistes asturianos «La cultura y el patrimoniu d’Asturies constitúin un elementu vertebrador del nuesu presente con un enorme potencial de futuru na próxima década, de la mano del sofitu y crecedera de les industries culturales y los sos ceadores», polo que se comprometen a trabayar p’aprovechar el potencial «pa xenerar bientar, identidá y desenvolvimientu económicu sostenible venceyáu a les nueses creaciones y a les nueses llingües, al nuesu magníficu patrimoniu y el nuesu escepcional territoriu».
El programa incorpora de nuevo la busca d’un alcuerdu col Ministeriu d’Educación pa la reconocencia de la especialidá docente pa profesores y maestros d’asturianu, la continuidá del programa formativu con cursos d’asturianu y eonaviegu p’adultos «Falamos» o la formación «voluntaria» del funcionariáu.
Sobre normalización, el programa socialista fala de siguir avanzando «na promoción d’actitúes positives ya integradores escontra l’usu social, potenciando la información alredor del asturianu y l’eonaviegu ya impulsando el so usu en tolos ámbitos nos que seya posible». El programa dedica especial atención a la so presencia nos medios «reconociendo’l drechu de recibir tou tipu de conteníos ya información nes llingües asturianes nos medios de comunicación de titularidá pública del Principáu», lo que podría cristalizar nun mayor númberu d’hores d’emisión n’asturianu y eonaviegu.
Nel programa apaecen tamién otres midíes, tales como’l sofitu al llabor de l’Academia de la Llingua Asturiana o l’usu tresversal del asturianu y l’eonaviegu nes campañes institucionales.
