La conseyera de Transición Ecolóxica, Industria y Desenvolvimientu Económicu, Nieves Roqueñí, señaló nel plenu de la Xunta Xeneral que los resultaos d’un estudiu realizáu en 2022 sobre les agües de la ría de Villaviciosa indiquen que l’estáu fisioquímico ye bonu y la situación biolóxica y ecolóxica moderada.
«Tamos nun cumplimientu satisfactoriu de los parámetros de la directiva marcu en materia calidá de l’agua», esplicó la conseyera.
Les analítiques realizaes incluyeron l’estudiu de distintos variables como parámetros fisicoquímicos, concentración de nutrientes, metales pesaos, compuestos organo-estánnicos, hidrocarburos arumosos policíclicos y sólidos en suspensión.
Pa valorar l’estáu ecolóxicu de les agües de la ría utilizaron elementos de calidá biolóxica (comunidá de macroinvertebrados bentónicos, comunidá fitoplanctónica y concentración de clorofila ‘a’), según parámetros hidromorfológicos y fisicoquímicos (concentración de nutrientes: nitratu, amonio y fosfatu; oxixenación, medida como porcentaxe de saturación d’osíxenu; tresparencia de l’agua, valorada polos niveles de turbidez rexistraos y la concentración de sólidos en suspensión).
En cuanto al estáu químicu de les agües, la situación considérase bona en función de los parámetros de concentración de contaminantes determinaos pola Directiva Marcu de l’Agua de la Unión Europea.
A pesar d’estos resultaos, la conseyera esplicó qu’unu de los elementos críticos rellacionaos cola ría ye’l problema de la contaminación bacteriana, qu’atribuyó a una combinación de factores como la menor tasa de renovación de les sos agües, fenómenos naturales como les riaes y l’estáu de los murios y diques que conformaben los porreos que reducen de manera considerable’l nivel de la salinidad de les agües y por tantu la capacidá desinfestante natural que xeneren les agües salines. Tamién la posible esistencia de vertios puntuales de foses de purín o foses sépticas influyen nas condiciones de la ría.
Roqueñí recordó que dende l’añu 2015 destináronse a obres hidráuliques en Villaviciosa un total de 6,3 millones, con actuaciones como los tanques de nube del Carbayo y el Salín, ya en funcionamientu. Tamién se prevé la renovación del colector que va del campu de futbol hasta El Salín, o la execución de ramales secundarios pa estender el saneamientu en dambes marxes de la ría. A esto hai que sumar l’actuación prevista dende l’Estáu del saneamientu ente San Martín del Mar y Bedriñana, o el descabezado de los regueros pa lliberar capacidá nos colectores.
«Somos conscientes de qu’hai que siguir avanzando, y asina lo tamos faciendo, por que les condiciones medioambientales de la ría de Villaviciosa meyoren, y confiamos en que toles medies puestes en marcha dexen volver practicar el marisquéu nel estuariu», concluyó la conseyera.
