Categoría: España
-
Barbón pide a Podemos y Cs que «desbloquien» la investidura de Sánchez
El secretariu xeneral de la FSA-PSOE y presidente del Gobiernu asturianu, Adrián Barbón, participó esti domingu na tradicional bonitada socialista de Tapia. Ellí, refirióse a la situación de la contorna del Noroccidente, una zona a la que «los socialistes sentímonos especialmente venceyaos. Sentímonos identificaos col territoriu. Sabemos que ye una de les contornes nes que se sigue más de cerca la necesidá d’unos servicios básicos de calidá, que nós enmarcamos dientro del retu demográficu».
Asina, pidió a los partíos de la oposición que vean más allá del tacticismo, «de xugar a ver quién propón qué». «Sentémonos a analizar les cuestiones que puedan plantegase, ensin prexuicios», dixo. Barbón recordó los pasos empecipiaos pol Gobiernu asturianu pa buscar soluciones al problema demográficu, como la creación d’una comisión específica. Nel casu concretu del Noroccidente, Barbón recordó’l so apueste por que la zona «acueya actividá industrial, non solo amestada al sector ganaderu sinón tamién con otros proyectos como la necesaria ampliación d’ENCE».
El secretariu xeneral de la FSA aluyó tamién a les consecuencies de la falta de Gobiernu n’España. Barbón cuantificó en 200 millones d’euros los fondos qu’Asturies dexa de poder invertir al traviés del nuevu financiamientu autonómicu: «Pido a Xuníes Podemos y Ciudadanos que desbloquien la investidura de Sánchez pa poder encetar la cuestión del despoblamientu y la falta de financiación».
-
En directo: investidura de Pedro Sánchez
El Plenu del Congresu de los Diputaos retoma dende les 13:30 hores la sesión de investidura. Pedro Sánchez enfrentaráse a la segunda votación. Nun parez que vaya cuntar col sofitu de la cámara dempués de la ruptura de les negociaciones ente’l PSOE y Xuníes Podemos.
Nesta tercer xornada los tiempos tán bien tasaos. Nun hai alderique, pero sí un turnos d’intervención nos que’l candidatu, esta vegada con una llende de tiempu de 10 minutos, va poder solicitar el sofitu de la Cámara. Los representantes de los grupos parlamentarios van disponer de cinco minutos p’afitar la so posición. Esto llevaráse a cabu de mayor a menor númberu d’escaños, salvo nel casu del Grupu Parlamentariu Socialista, que lo fadrá n’últimu llugar.
-
PSOE y Podemos apuren la negociación «hasta l’últimu minutu»
Carmen Calvo aseguró esti martes que la ufierta de los socialistes a Xuníes Podemos p’algamar un alcuerdu d’investidura y la puesta en marcha d’un Executivu conxuntu sigue enriba la mesa. La vicepresidenta del Gobierno en funciones y secretaria de Igualdad del PSOE aseguró que’l so partíu va siguir na mesa de negociación «hasta l’últimu minutu».
En declaraciones nel patiu del Congresu, nel intre del alderique de investidura, Calvo defendió que los socialistes tienen la «meyor voluntá» p’algamar un alcuerdu. «Ye necesario dir avanzando de manera prudente y discreta», p’averar postures nos asuntos nos qu’hai sintonía y n’aquellos nos qu’hai «grandes diferencies».
La dirixente socialista manifestó la «sorpresa» del PSOE cola intervención na primer sesión del plenu d’investidura del secretariu xeneral de Podemos, Pablo Iglesias. «Asitió les conversaciones nuna posición daqué más complicada». Calvo afirmó que la propuesta del PSOE a Xuníes Podemos foi siempres «razonable» y «respetuosa». «Nel Gobiernu d’España nun hai elementos decorativos nin menores».
Carmen Calvo destacó que’l sofitu de Xuníes Podemos nun llega pa investir a Pedro Sánchez. «Ye necesario llograr estabilidá nes votaciones de cada selmana a lo llargo de la llexislatura», una y bones España rique de «un tiempu d’estabilidá pa encarar grandes problemes y retos de llargu plazu».
-
Pedro Sánchez da por rotes les negociaciones con Podemos
Pedro Sánchez, aseguró esti llunes que Pablo Iglesias dio por rotes «unilateralmente» les negociaciones col PSOE pa la investidura. El presidente del Gobiernu en funciones criticó la consulta «trucada» de la formación morada a les sos bases. «Quier xustificar una votación contraria a la mio investidura, coincidiendo cola ultraderecha». «Yo toi nel escenariu d’esperar a ver qué fai Iglesias, si quier o nun votar, xuntu cola uiltraderecha, contra un presidente d’esquierdes», añadió, nuna entrevista concedida a la Cadena SER.
Sánchez esplicó que’l PSOE ufiertó a Podemos hasta 5 propuestes distintes, y «Iglesias dixo que non a too». La postrera, la incorporación de persones de Xuníes Podemos de perfil técnicu al Conseyu de Ministros, la primer vegada que se fai una ufierta d’esta naturaleza en 40 años de democracia. Sicasí, esplicó qu’esa postrera propuesta «nun ta recoyida na consulta», polo que se trata d’una entruga «falsa».
«Nun soi una persona de vetos, pero nun voi aceptar imposiciones», dixo Sánchez, quien añadió que «una de les xeres del presidente ye faer el so equipu. Pueden proponeme nomes pero tengo que tener la capacidá de poder decidir sobre les persones que van incorporase al mio Conseyu de Ministros».
El líder socialista señaló qu’ente Podemos y el PSOE esisten munches coincidencies pero tamién «enormes discrepancies» sobre la cuestión catalana. «Eso esixe de cohesión interna al máximu pa encarar un potencial desafíu al Estáu», apuntó. Unes diferencies que pueden «sortease con Gobiernu de cooperación», apuntó.
Coles mesmes, Sánchez remarcó qu’España «precisa gobiernu un gobiernu progresista que nun dependa de los independentistes» y por eso volvió apellar a PP y a Cs. «Son 2 partíos que dicen ser d’Estáu y querer la estabilidá d’esti país y por eso tienen qu’asumir la so responsabilidá». «El primer Pactu d’Estáu tien de ser qu’haya gobiernu», dixo. Tamién alvirtió de que la so candidatura acaba tres el mes de xunetu. «Nun hai segundes partes». Nesti sentíu, aportunó en que «nun hai alternativa». «Iglesias va tener qu’asumir o non la responsabilidá de votar a un presidente de la izquierda».
-
Sánchez anuncia que va llamar a Iglesias pa retomar les negociaciones
Pedro Sánchez va llamar güei mesmu a Pablo Iglesias pa «poner en marcha dos equipos qu’empiecen a falar de lo qu’importa a los ciudadanos». El secretariu xeneral del PSOE y presidente del Gobiernu en funciones llamó a «aparcar les diferencies», en referencia a si lo que s’alcuerda ye un gobiernu de coalición o un gobiernu de cooperación. Nesti sentíu, sorrayó que lo qu’importa a la ciudadanía nun ye tantu quién va ser el ministru de Trabayu, sinón «reconocer la salú bucodental dientro del sistema nacional de salú» o «si va crease empléu de calidá”.
Nuna entrevista en ‘Los desayunos’ de TVE, Sánchez sorrayó qu’España precisa un gobiernu. «El que nós tamos proponiendo ye un gobiernu progresista, y para eso tamos marcando como sociu preferente a Xuníes Podemos». Señaló que quieren un executivu «que nun dependa de los independentistes». Por eso, dixo «tamién tamos mirando a Ciudadanos y al PP, pa que con la so astención faciliten la constitución d’un gobiernu».
El presidente en funciones defendió la fórmula d’un gobiernu de cooperación. Sánchez recordó les «discrepancies de fondu» que’l PSOE caltien con XP en temes fundamentales como Cataluña. D’esta manera, preguntóse si la formación morada sofitaría l’aplicación del 155 en casu d’una declaración unilateral d’independencia per parte de la Generalitat.
Coles mesmes, anunció que nel so discursu de investidura va ufiertar a PP, Ciudadanos y Podemos la reforma del artículu 99 de la Constitución pa que gobierne la llista más votada.
-
Funde un tramu de la carretera que xune Santander con Torrelavega
Mañana complicada na circulación del tráficu dende Santander en sentíu Asturies y Madrid. Les lluvies cayíes nes últimes hores provocaron na madrugada del llunes al martes el fundimientu de parte de la calzada n’Autovía de la Meseta. La vía permanez cortada pol carcavón que se produció nesi sentíu del tráficu.
El sucesu ta provocando grandes retenciones na principal vía de salida de Santander. Nun se descarta que’l fundimientu de la calzada pueda «dir a más». El tráficu ta siendo esviáu tanto pola nacional 611 como pola autonómica 330.
⚠️¡Atención!⚠️
Corte total⛔️ de la A-67 en el pk 183, sentido #Palencia, por el hundimiento de un tramo de la calzada que se han encontraba en obras 🚧. Hay habilitados desvíos desde el pk 187, dirección #Torrelavega, por la N-611.
Se recomienda utilizar vías alternativas 🚗🚙🚗 pic.twitter.com/VOUTn5kb36— Delegación del Gobierno en Cantabria (@DelGobCantabria) 9 de julio de 2019
-
Josep Borrell renuncia al acta d’eurodiputáu
Josep Borrell renuncia al escañu d’eurodiputáu. El cabezaleru del PSOE nes caberes elecciones europees del 26-M anunció esti miércoles la so decisión. La intención del ministru d’Esteriores en funciones ye caltener la so actividá nel Conseyu de Ministros hasta la investidura. «Comuniqué-y a Antonio Tajani que renuncio a ser diputáu nel próximu Parlamentu Européu. Ye una decisión tomada en comuña con Pedro Sánchez. Dambos pensamos que nes actuales circunstancies soi más necesariu como ministru d’Esteriores».
Nun primer momentu, Josep Borrell contaba dexar el Gobiernu nel Conseyu de Ministros d’esti vienres. Sicasí, nun va participar como eurodiputáu na sesión constitutiva del Parllamentu Européu esti martes. Pel momentu, Borrell va siguir formando parte del Executivu en funciones.
-
Pedro Sánchez ofréce-y a Iglesias un «Gobiernu de cooperación»
Entendimientu. Pedro Sánchez y Pablo Iglesias acercaron postures esti martes en La Moncloa. El presidente en funciones acercó postures col candidatu de Xuníes Podemos depués de recibir l’encargu del rei pa formar Gobiernu. El candidatu socialista a la reelección nun compareció ente los medios depués del conceyu. Quien sí lo fizo foi Adriana Lastra, vicesecretaria xeneral del PSOE y vocera socialista nel Congresu de los Diputaos. La diputada asturiana sorrayó qu’esiste «voluntá d’alcuerdu» ente’l PSOE y Xuníes Podemos pa que la llexislatura entame «cuanto antes» con un «Gobiernu progresista» y «de cooperación”.
Nuna rueda de prensa posterior a la xunta caltenida por Sánchez y Iglesias, Lastra dixo que pa los socialistes esti primer alcuentru foi bien satisfactoriu. «Constatóse la voluntá d’alcuerdu ente la izquierda» y que’l PSOE ta determináu a trabayar en «buscar fórmules pa gobernar la complexidá».
La vocera del PSOE recordó, amás, que «nos postreros 12 meses» demostróse que «ye posible l’entendimientu de la izquierda». Destacó l’alcuerdu presupuestariu algamáu y la collaboración de socialistes y XP pa poner en marcha midíes como la recuperación de la sanidá universal, la revalorización de les pensiones y la derogación del impuestu al sol. «Estes midíes ameyoraron la vida de los españoles y demostraron que la izquierda sabe entendese», recordó.
Por too ello, resumió, hai «grandes coincidencies programátiques» y esisten «les meyores blimes para siguir desenvolviendo una axenda progresista». Lastra amestó que se van buscar fórmules para un Gobiernu de «cooperación plural, abiertu, integrador, incluyente» y onde tengan cabida personalidaes que sían «referentes» nos sos respectivos ámbitos.
-
Vox vese arrodiáu de «etarres, golpistes y más golpistes» nel Congresu
Los diputaos de Vox ocuparán los escaños asitiaos na última fila del Congresu de los Diputaos. Los venticuatro representantes de la formación d’ultraderecha van quedar d’esta manera arrequexaos ente los grupos parllamentarios de Xuníes Podemos, Esquerra y el grupu mistu. La decisión de la mesa de la Cámara Baxa nun convence a los de Santiago Abascal, que nes redes sociales llamentaron «el vecindariu que nos imponen».
Ye’l casu del diputáu de Vox por Badajoz, Víctor Sánchez del Real, que na so cuenta de Twitter llamentó l’allugamientu del so grupu parllamentariu nel hemiciclu. «Piensen que nos tienen arrodiaos, pero non, tiénennos enriba», aseguró nuna publicación qu’acompaña d’una imaxe cola distribución del salón de Plenos. N’ella, señala al PNV como «recueye nueces», a Esquerra y JxCat como «golpistes», y a Bildu como «etarres». Tampoco nun s’escaez de los diputaos de Xuníes Podemos, a los que señala como «amigos» de toos ellos.
Este es el vecindario que nos imponen en @Congreso_Es
Piensan que nos tienen rodeados. Pero no, nos tienen encima. pic.twitter.com/RUCVEUzXGX— VíctorSánchezdelReal (@sanchezdelreal) 11 de junio de 2019
La mesa del Congresu alcordó esti martes la distribución de los grupos parlamentarios nel hemiciclu. Los representantes del PP van siguir sentaos a la derecha del hemeciclu y, xunto a ellos, el grupu parllamentariu de Ciudadanos. El PSOE va ocupar los escaños a la izquierda de la cámara, como yá facía hasta agora. Nel centru, van situase los representantes d’Esquerra, PNV y el grupu mistu. Van compartir esti espaciu con Xuníes Podemos, cola escepción de Pablo Echenique. El diputáu por Zaragoza va ocupar un asientu nel gallineru, la única parte del salón accesible pa la so siella de ruedes.
