Xixón al día

Categoría: Mundu

  • Asturies sofita a les families iraquines abellugaes en Xordania

    Asturies sofita a les families iraquines abellugaes en Xordania

    El Gobiernu d’Asturies va destinar 29.309 euros a collaborar cola ONG Edá Dorada Mensaxeros de la Paz na distribución de vales d’alimentación pa un cientu de families d’orixe iraquín abellugaes n’Amán (Xordania).

    Estes ayudes inclúin tamién  la dotación de melecines pa faer frente a les enfermedaes cróniques que se traten nel dispensariu de salú, asina como la merca de material pa facer posible l’atención médica d’estes persones, nun contestu agraváu pola covid-19. Van tener prioridad families monomarentales, aquelles con mayor númberu de fíos menores de 5 años y les que tengan reciella escolarizao.

    Na actualidá, Xordania ye’l país qu’alluga más abellugaos y movíos, una población que nun pue aportar a la sanidá pública, nin a la educación nin al mercáu de trabayu, polo qu’encara una situación daveres complexa. Asina, les persones abellugaes que precisen curiaos de salú tienen de pagar el 80% de la tasa pa estranxeros de la sanidá pública xordana, lo que quintuplica’l costu de l’atención. Arriendes d’ello, más del 30,2% d’esti colectivu nun allega a estos servicios sanitarios porque nun pue pagalos.

    Según Naciones Xuníes, en Xordania hai rexistraos alredor de 650.000 refuxaos: el 80% vive en comunidaes d’acoyida y el 20% en campos. La mayoría concéntrase nos suburbios urbanos, polo que la suspensión de los centros de salú primaria nestes árees tuvo un impactu significativu nel accesu a vacunes, salú sexual y reproductiva, medicación pa enfermedaes cróniques y servicios de salú mental.

  • Por qué entá nun tenemos ganador nos Estaos Xunios

    Por qué entá nun tenemos ganador nos Estaos Xunios

    Donald Trump y Joe Biden tán xugandose’l poder ejecutivo nos Estaos Xunios, como venimos informándote nes últimes hores.

    Tovía nun hai un claru ganador, y too paez indicar que puede tardar dellos díes.

    El sistema electora de los Estaos Xuníos furrula mui diferente al d’equí. Nun ye’l númberu de votos de cada candidatu lo que cuenta, si non el númberu d’estaos nel que gana. Por eso, en 2016 Hillary Clinton tuvo más votos (más de 3 millones de votos más que Trump), pero fue Donald Trump quien ganó (el so partíu ganó en más estaos que’l demócrata).

    Estaos «péndulu», la clave

    Dalgunos estaos son tradicionalmente fieles a ún de los dos partios y tien asegurada la victoria dafechu (P. ex: Texas col partíu republicanu, o California col demócrata). Los estados péndulu son lo que llamaríemos estaos «indecisos», pol que los candidatos tienen que lluchar el so votu.

    ¿Por qué nun se sabe entá?

    El votu por corréu ye una parte mui esencial nes elecciones, especialmente esti añu por mor del COVID19, que foi más promocionáu qu’otros años. Esti tipu de votu suel ser de mayoría demócrata, lo qu’esplicaría’l interés de Donald Trump en cerrar les urnes bien llueu.

    Dempués de dase’l ganador oficial, el 20 de Xineru de 2021 el ganador xurará’l cargu como presidente de los Estaos Xuníos.

  • El Principáu Asturies destina cien mil euros a ameyorar la nutrición infantil nos campos de movíos de Siria

    El Principáu Asturies destina cien mil euros a ameyorar la nutrición infantil nos campos de movíos de Siria

    El Gobiernu asturianu va destinar una ayuda d’emerxencia de cien mil euros a Unicef p’ameyorar l’estáu nutricional de la infancia nos campos de refuxaos del nordés de Siria. El sofitu va permitir favorecer la lactancia materna esclusiva, prevenir la desnutrición crónica y tratar l’aguda por aciu’l suplementu con micronutrientes en menores de cinco años y les sos madres, residentes nos campos de refuxaos. La población d’estos campamentos del nordeste de Siria algama les 109.000 persones, que dependen totalmente de l’ayuda humanitaria. Les muyeres y los neños constitúin el 90% de los movíos internos.

    Ente los suministros que se van distribuyir figuren vitamines y minerales, alimentos terapéuticos, galletes enerxétiques, suplementos nutricionales, vacunes y otres melecines esenciales. Coles mesmes, pa la identificación del estáu de desnutrición distribuyirá’l mididor de la circunferencia del antebrazu (Muac), que ye una cinta de midida de fácil y rápidu usu estremáu por colores: verde (situación de nutrición normal), mariellu (riesgu), naranxa (desnutrición aguda moderada) y colloráu (desnutrición aguda severa).

    Situación de los menores

    Nueve años depués del entamu del conflictu, la situación de Siria ta convirtiéndose n’una de les peores crisis humanitaries nel mundu. Los menores tán sometíos a situaciones d’estrema violencia qu’impacten directamente na so supervivencia, desenvolvimientu y bienestar.

    La infancia, incluyíos menores ensin acompañar, separaos o que tán viviendo con cuidadores mayores y en dellos casos discapacitaos, siguen siendo particularmente vulnerables. Envalórase que cinco millones d’ellos riquen asistencia humanitaria y 490.000 viven n’árees sitiaes o de mal accesu. Más de trés millones menores de 5 años riquen sofitu nutricional, incluyíos casi 20.000 que sufren desnutrición severa aguda.

  • El Principáu destina cien mil euros a rehabilitar centros de salú en Gaza

    El Principáu destina cien mil euros a rehabilitar centros de salú en Gaza

    El Gobiernu asturianu va destinar una ayuda de cien mil euros al Comité Español de l’Axencia de Naciones Xuníes pa los Refuxaos de Palestina n’Oriente Próximu (Unrwa). Esta partida va valir p’ameyorar los servicios sanitarios a la población abellugada de Palestina. Van rehabilitase les instalaciones del centru de salú de Tal Sultan y dotar d’equipamientu’l consultoriu de Sheikh Radwan, nes gobernaciones de Rafah y de Gaza respectivamente, al sur y centru de la Franxa de Gaza.

    Esta ayuda va sirvir para adquirir un xenerador eléctricu para’l centru de salú de Sheikh Radwan. Nesta zona, de resultes del zarru de la única central eléctrica de Gaza y la grave crisis enerxética provocada, la mayoría de llares y servicios públicos, incluyíos centros de salú y hospitales, reciben eletricidá de la rede un máximu de cuatro hores diaries, siguíu d’un corte d’eletricidá de doce hores. Esta situación obliga a la instalación de xeneradores pa poder caltener los equipos eléctricos en funcionamientu y nun atayar operaciones o tratamientos nel casu de fallos nel suministru.

    Nel centru de salú de Tal Sultan van llevase a cabu llabores de rehabilitación de la farmacia y arreglos nes consultes y sales del centru. Dambos proyectos van tener efectos bien positivos sobre’l cuidu de la salú de la población abellugada palestina, algamando a 90.000 persones beneficiaes, de les qu’el 49% son muyeres y el 40%, menores d’edá.

    Más de 700.000 movíos adquirieron la condición de persones abellugaes que caltienen hasta’l momentu presente, más de 70 años depués

    L’ayuda aprobada pol Principáu obedez a una crisis humanitaria derivada del conflictu árabe israelín de 1948. Más de 700.000 movíos adquirieron la condición de persones abellugaes que caltienen hasta’l momentu presente, más de 70 años depués. Les condiciones son tan precaries que la ONU informó en 2012 que de siguir nesta situación la Franxa de Gaza va ser inhabitable en 2020.

    La Unrwa foi’l principal provisor integral d’atención primaria de salú pa esta comunidá en más de 69 años. Solamente en Gaza, xestiona ocho campamentos de población abellugada y 274 escueles primaries y d’educación superior básica. Nel ámbitu educativu emplega a más de 8.600 persones nos sos dos centros de formación profesional. Tamién dispón de 22 centros de salú primaria nos qu’empleguen a 936 persones y que reciben añalmente alredor de 4 millones de visites. En total, emplega a más de 13.000 persones en Gaza, de les qu’el 99.83% son personal local y con estatus de refuxáu de Palestina.

  • Los socialistes ganen en Portugal ensin mayoría absoluta

    Los socialistes ganen en Portugal ensin mayoría absoluta

    Nun hebo sorpreses. El Partíu Socialista (PS) venció esti domingu por una clara mayoría nes elecciones llexislatives d’esti domingu en Portugal. La candidatura lliderada por António Costa llogró’l 36,65% de los votos y 106 diputaos electos, cuando falten atribuyir los cuatro representantes de la emigración.

    Los socialistes van necesitar de pactos p’algamar la mayoría na camara, cosa que nun parez improbable. El candidatu socialista a la reelección defendó’l trabayu fechu nestos cuatro años pola Gerigonça, como se noma a la coalición formada pol PS y la izquierda de Bloco da Esquerda y los comunistes del PCP-PEV.

    D’acordies con datos de la Secretaría Xeneral del Ministeriu d’Alministración Interna – Alministración Electoral, el PSD foi’l segundu partíu más votáu, coL 27,90% de los votos y 77 diputaos. El Bloco da Esquerda consolídase como tercer fuercia del país (9,67% de los votos y 19 diputaos); seguíu de los comunistes del PCP (6,46% y 12 diputaos) y el CDs-PP (4,25% y 5 diputaos). El partíu animalista PAN meyora’l so resultáu, al pasar de un a cuatro diputados y el 3,28% de los votos. Entren nel parllamentu tres nueves fuerces con un diputáu caún: Llega (1,30%); Iniciativa Lliberal (1,29%) y Llibre (1,09%). Tán entá por atribuyir cuatro diputaos, dos pel círculu electoral d’Europa y dos pel círculu fora d’Europa.

  • La oposición impónse nes elecciones a l’alcaldía d’Estambul

    La oposición impónse nes elecciones a l’alcaldía d’Estambul

    Ekrem Imamoglu va ser el nuevu alcalde d’Estambul. El candidatu Partíu Republicanu del Pueblu (CHP) impúsose esti domingu na repetición de les elecciones municipales con un 54% de los votos. Yildirim, l’aspirante del partíu islamista Xusticia y Desenvolvimientu (AKP) y mano derecha d’Erdogan, que quedó col 45,1% de les papeletes, reconoció la so derrota y felicitó al so rival.

    Una vegada conocíos los resultaos nel elecciones n’Estambul, l’alcalde electu pidió «abrir una nueva páxina n’Estambul, con xusticia, tolerancia ya igualdá». Y pidió «escaecer los ataques sistemáticos y el llinguaxe agresivu que s’utilizó contra mi y la mio familia». Imamoglu fizo un llamáu a Erdogan pa entamar a trabayar «en sintonía». «Tenemos de preparar para un terremotu, construyir el metro, tratar con refuxaos… son asuntos nos qu’hai que trabayar».

    La repetición de les elecciones esti domingo llega depués de l’anulación de la xornada electoral del 31 de marzo. El candidatu del AKP denunció’l resultáu de los comicios por supuestes irregularidaes nel procesu. La victoria de la oposición aquella nueche foi probe, con menos de 14.000 votos de ventaya ente 8,5 millones de papeletes. Ayeri, el candidatu del CHP sumó 777.000 sofitos más que’l candidatu d’Erdogán.

    El trunfu de la oposición pon fin a 25 años de gobiernos isllamistes na ciudá más poblada de Turquía y abre un futuru enllenu de posibilidaes pal CHP. Dalgunes voces na formación socialdemócrata nun descarten que Ekrem Imamoglu pueda postulase pa la presidencia del país en 2023.

  • La preocupante imaxe del dexelu en Groenlandia

    La preocupante imaxe del dexelu en Groenlandia

    El desxelu avanza imparable en Groenlandia. Ye la principal conclusión de la imaxe que ta acabante de distribuyir l’Institutu Meteorolóxicu de Dinamarca. N’ella, puede vese como l’investigador Steffen Olsen traviesa un enorme charcu sobro un trinéu tiráu por perros pa recuperar el so equipu d’observación meteorolóxica. Como si d’una pisicina se tratara.

    Olsen alcontrábase descargando mididores de clima y mar, pero «terminó documentando condiciones estremes nun día inusualmente calorosu, onde l’agua lliteralmente flotaba nel xelu». Na so cuenta de Twitter, l’investigador esplicó que «les comunidaes de Groenlandia dependen del xelu marín para xeres de tresporte, caza y pesca. Fenómenos estremos, como esta inundación del xelu por cuenta de que la superficie derritióse, esixen una capacidá inda mayor de predicción».

    Debaxo d’esta capa d’agua asitiada na zona de Inglefield Bredning inda hai una capa de xelu de 1,2 metros. Olsen nun ta seguro de cuánto tiempu va aguantar asina. Y les temperatures nun ayuden a evitar el desxelu en Groenlandia. Una fola de calor na rexón tan provocando una situación alarmante fundiendo parte del xelu del mar y de la islla. La situación va caltense tola selmana. El cambéu climáticu avanza más rápidu de los esperao y les consecuencies yá se tan faciendo notar.

     

  • May avisa: la cuarta votación del Brexit va ser la última

    May avisa: la cuarta votación del Brexit va ser la última

    Nun va haber más oportunidaes. El Parllamentu británicu tornará a pronunciase na primer selmana de xunu sobre’l ‘brexit’. Va ser la cuarta ocasión na que l’alcuerdu algamáu ente’l Gobiernu de Theresa May y la Xunión Europea (XE) pa una salida negociada del Reinu Xuníu de la zona comunitaria llegue a la Cámara de los Comunes. «Ye imperativu que lo faigamos si’l país va abandonar la XE enantes del recesu parllamentariu de branu», esplicó la primer ministra en declaraciones recoyíes por Europa Press.

    La primer ministra del país nun ta dispuesta a siguir aldericando sobre esti alcuerdu que la XE nun ta dispuesta a modificar. La salida del Reinu Xuníu de la Xunión Europea foi aprobada polos ciudadanos británicos en referéndum en xunu de 2016. Fontes del Gobiernu británicu citaes pola BBC apunten a qu’un nuevu ‘non’ al alcuerdu podría suponer un divorciu de sopitu o la paralización del procesu.

    Los británicos tan llamaos a les urnes el prósimu xueves 23 de mayu. Los ciudadanos del país deberán escoyer a los sos representantes nes instituciones europees, anque’l Gobiernu de May confía en que los eurodiputaos británicos nun lleguen a tomar posesión de los sos escaños.