Xixón al día

Categoría: Sociedá

  • Barbón: “Tamos meyor qu’otres comunidaes”

    Barbón: “Tamos meyor qu’otres comunidaes”

    El presidente del Gobiernu asturianu, Adrián Barbón, defendió esti domingu l’aplicación de midíes «drástiques y contundentes» pa frenar la espansión del coronavirus n’Asturies. Nesti tipu de decisiones entren l’aplazamientu del entamu del cursu escolar como l’alerta naranxa qu’afecta a cinco conceyos del Oriente. «Meyor prevenir que llamentar», afirmó’l xefe del Executivu n’unes declaraciones realizaes en La Pola Llaviana. Per otru llau, l’Executivu autonómicu va solicitar llueu la collaboración de rastreadores militares para reforzar el so equipu de vixilancia contra la Covid-19.

    Barbón refugó les crítiques a les midíes adoptaes pol so gobiernu, n’especial aquelles qu’invoquen la bona situación epidémica d’Asturies. «Nun tomemos midíes drástiques anque temos en meyor situación epidemiolóxica, tamos meyor porque tomamos midíes drástiques», argumentó. Son decisiones que, reconoció’l presidente, pueden resultar cafiantes. Ye’l casu del retrasu, mientres ocho díes lectivos, del arranque del cursu. Barbón aseguró entender, pero esplicó que optóse por esta midida porque la epidemia empioró. Les andaes en xunetu fueron mínimes y anguaño, la media diaria ronda los 40 casos. El Gobiernu asturianu enfótase agora en conocer la evolución mientres la primera quincena de setiembre.

    «A mi tamién me gustaría tener toles certidumes», manifestó Barbón, pero «la realidá ye que sigue habiendo muncho desconocimientu sobre’l virus. Va ser necesariu dir tomando decisiones en función de la evolución epidémica». Al respective de la enseñanza, el Gobiernu asturianu pretende asegurar el derechu a la educación nes meyores condiciones de seguridá posibles. El presidente afirmó que l’amenorgamientu de ratios y la contratación de 860 profesores más va esixir un esfuerzu presupuestariu «ensin comparanza na nuesa hestoria».

  • Asturies va poner en funcionamientu l’app Radar Covid en setiembre

    Asturies va poner en funcionamientu l’app Radar Covid en setiembre

    El Serviciu de Salú del Principáu (Sespa) unificó l’atención telefónica a la ciudadanía pa cualquier cuestión rellacionada col coronavirus nel númberu gratuitu 984 100 400. El nuevu serviciu, denomináu CovidAstur Respuendi, va concentrar toles llamaes y va redirixir, en función de si la consulta ta rellacionada cola enfermedá o con un llamamientu públicu provocáu por un biltu.

    Quien precise información de calter xeneral o sobro síntomes compatibles cola covid-19 pa recibir atención sanitaria ha marcar el 1. Nel casu de que la consulta tea rellacionada con un llamamientu públicu por un biltu, tien de pulsiase’l 2. Pela so parte, el personal alministrativo va solicitar los datos de la persona qu’utiliza’l serviciu pa, si procede, citala darréu en dalgún de los autocovid de la so área sanitaria de referencia. El Sespa va ampliar les llínees d’esti teléfonu gratuitu en función de la situación epidemiolóxica.

    Per otra parte, la Conseyería de Salú va poner en funcionamientu l’aplicación móvil Radar covid. Va ser previsiblemente en setiembre, una vegada se complete la fase de pruebes en distintes autonomíes. La so esperiencia va ser bien pervalible pal desenvolvimientu d’una ferramienta que va completar l’actual sistema de vixilancia pa la detección de contactos y establecer les cadenes d’andada. L’aplicación, diseñada pola Secretaria d’Estáu de Digitalización ya Intelixencia Artificial del Gobiernu d’España, garantiza l’anonimatu y la privacidá del usuariu, al tiempu qu’ayuda a efectuar un rastrexu de manera segura y rápida.

  • Educación retrasa l’entamu del cursu escolar al 22 de setiembre

    Educación retrasa l’entamu del cursu escolar al 22 de setiembre

    L’empiezu del cursu escolar aplázase n’Asturies. Los alumnos d’Infantil y Primaria nun van tornar a les aules hasta’l 22 de setiembre, mientres que los de Secundaria, Bachilleratu y Formación Profesional van tener que esperar a los díes 28, 29 y 30 respectivamente. Educación quier comprobar cómo evoluciona la pandemia mientres les primeres selmanes de setiembre, por si resulta necesariu reforzar entá más les midíes de seguridá de cara a la vuelta a les aules.

    Ye una de les midides que va desendolcar el Gobiernu asturianu pa garantizar la seguranza nel sistema educativu. D’esta manera, van baxar les ratios a un máximu de 20 alumnos por grupu en tol ciclu d’Educación Primaria y nos dos primeros cursos de Secundaria. Pa los niveles cimeros de Secundaria (3º y 4º) y Bachilleratu va promovese un modelu semipresencial. L’alumnáu de les aules que superen eses ratios allegaránse a los centros en díes alternos.

    El compromisu d’Educación ye faer de los centros educativos espacios seguros. Pa ello, va realizase una inversión estraordinaria de más de 30 millones en personal docente nes redes pública y alcordada. Esto ye: van contratase unos 850 profesores más, el 65,5% pa la escuela pública.

    La conseyera d’Educación, Carmen Suárez, esplicó esti vienres l’escenariu d’entamu de cursu en participando ayeri nuna xunta con con responsables de toles autonomíes. Nella, alcordaronse de forma casi unánime 23 midíes educatives y 5 encamientos referíos a los centros educativos pa esti cursu 2020-2021. Les riegles xenerales pal próximu cursu van ser el caltenimientu d’una distancia interpersonal de seguridá de 1,5 metros, l’usu xeneralizáu de mázcaru percima de los 6 años, la hixene de manos y la ventilación de los espacios.

    Pruebes al profesoráu

    El personal docente y non docente que tenga contactu col alumnáu superaría primeramente una prueba PCR. El Serviciu de Salú (Sespa) va empezar a citar nos próximos díes a los docentes d’Infantil y Primaria, primeros en retomar l’actividá col alumnáu. El criteriu de los técnicos de Salú Pública podría aconseyar repitir estes pruebes a lo llargo del cursu en casu de necesidá.

    Esti cursu tamién van funcionar servicios esenciales como’l comedor y el tresporte escolar, nos que se van estremar les midíes de prevención ya hixene. Tamién va haber actividaes extraescolares, siempres que cumplan un protocolu específicu ellaboráu por Salú. A la inversión estraordinaria de más de 30 millones en personal docente súmense esti cursu les partíes necesaries p’atender otres necesidaes organizativas derivaes del covid-19, como la llimpieza, la señalización y adecuación d’espacios y la compra de mázcaros y otros equipos de protección individual pa los centros. Una parte importante de les inversiones, más de 3 millones, van emplegase en siguir reforzando la dixitalización del sistema. D’esta manera, van alquirise nuevos dispositivos portátiles que van tar a disposición del alumnáu que lo precise.

  • Salú suma 36 nuevos casos positivos de coronavirus

    Salú suma 36 nuevos casos positivos de coronavirus

    La Conseyería de Salú comunicó esti vienres al Ministeriu de Sanidá 36 nuevos positivos pola covid-19 correspondientes al día d’ayeri. Tolos afectaos presenten sintomatoloxía leve y permanecen aisllaos nes sos cases, sacante dos persones que precisaron ingresu hospitalariu. De los nuevos positivos, unu ta rellacionáu con unu de los biltos del oriente y dellos son contactos estrechos de casos conocíos.

    La Dirección Xeneral de Salú Pública encamienta a les persones qu’esperen la resultancia d’una prueba PCR y los contactos estrechos a guardar cuarentena y a acutar la so vida social pa evitar la trasmisión del virus. Amás, pide a la ciudadanía que cumpla les midíes de seguridá pa protexer a los mayores de la enfermedá.

  • La Universidá d’Uviéu, ente les 500 meyores nel ranking de Shanghái

    La Universidá d’Uviéu, ente les 500 meyores nel ranking de Shanghái

    La Universidá d’Uviéu asítiase per segundu añu consecutivu ente les 500 meyores universidaes del mundu. Asina lo pon de manifiestu’l ranking ARWU (Academic Ranking World Universities) espublizáu esti sábadu pola axencia independiente ShanghaiRanking Consultancy. La institución académica asturiana apaeció per primer vegada nesta clasificación nel 2003, añu en qu’entamó a espublizase esti ranking.

    El ranking ARWU remana seis indicadores oxetivos pa clasificar les universidaes del mundu, incluyida la cantidá de persones egresaes y personal docente ya investigador que ganara un premiu Nobel o una medaya Fields; la cantidá d’investigadores ya investigadores internacionales altamente citaos escoyíos por Clarivate Analytics; la cantidá d’artículos espublizaos en revistes como Nature o Science; la cantidá d’artículos indexados o’l rendimientu per cápita d’una universidá. ARWU clasifica más de 1.800 universidaes cada añu, espubliza les 1.000 meyores y destáquense les asitiaes ente les 500 meyores.

    Ente les diez meyores d’España

    La Universidá d’Uviéu asítiase ente les diez meyores d’España, acordies con esti indicador. Termina’l cursu avanzando posiciones nos rankings académicos nacionales ya internacionales de referencia. La universidá asturiana meyora significativamente nel impactu de los sos investigadores, calteniendo un bon nivel nes contribuciones a Nature y Science y en númberu d’espublizaciones totales y creciendo nel númberu d’espublizaciones por profesor o profesora, lo qu’indica una meyora nel rendimientu investigador de la institución.

    Esta meyora produzse nun contestu de retayos nel financiamientu de la investigación a nivel nacional y autonómicu, y con dificultaes pa la captación y retención del talentu. Sicasí, tanto la promoción y estabilización del profesoráu, como l’importante relevu xeneracional que se ta favoreciendo, tán dexando caltener ya inclusive ameyorar el númberu y l’impactu de les espublizaciones científiques en toles cañes de conocencia.

    Les midíes d’incentivación de l’actividá investigadora y la recuperación del Plan de Promoción de la Investigación tán produciendo un efectu positivu na producción científica de la Universidá d’Uviéu, tanto nos Grupos Consolidaos como de los Grupos Emerxentes. L’aumentu de la contribución de los investigadores ya investigadores senior, d’altu impactu, indica l’afitamientu del lideralgu de los nuesos equipos d’investigación que cunten cada vegada con mas investigadores de referencia. De la mesma, pue destacase’l llabor de los investigadores nuevos nes sos tesis doctorales, que nun se vieron suspendíes mientres la pandemia.

  • Salú confirma 15 nuevos positivos por coronavirus

    Salú confirma 15 nuevos positivos por coronavirus

    La Conseyería de Salú confirmó 15 nuevos casos de coronavirus n’Asturies, de los que trés son contactos estrechos de positivos yá conocíos. Amás, otros trés son casos importaos y el restu de les nueves andaes tán siendo investigaos para establecer el so venceyu epidemiolóxicu. Los nuevos positivos en coronavirus presenten sintomatoloxía leve y permanecen nes sos cases. En relación col estudiu ampliáu del biltu de Ribeseya, rellacionáu con La Tabierna del Escribanu y el camping de Sebreñu, el Serviciu de Vixilancia Epidemiolóxica, hasta’l momentu, detectó 7 casos venceyaos a esti focu.

    Nesti sentíu, Salú recuerda a les persones que visitaren estos establecimientos riosellanos ente los díes 1 y 15 d’agostu a que rellenen el formulariu que pueden descargase na web Astursalud. Una vegada cursada la solicitú, tienen d’esperar a que’l Serviciu de Salú déa-yos cita. Tamién pueden llamar al teléfonu 984 100 051.

    La Conseyería de Salú instaló esti domingu un puntu d’autocovid nel polideportivu de Ribeseya. Yá hai un centenar de persones citaes. Les autoridaes sanitaries repiten a la vecería d’estos locales que llinde l’actividá social, xixile los sos síntomes y respete de forma estricta les midíes de protección: llaváu de manos, usu de mázcaru y distancia de seguridá. Amás, encamienten a que s’estremen les midíes de prevención y protección de les persones mayores y persones con patoloxíes naquellos llugares onde se declararon biltos. Aconséyase evitar les aglomeraciones y les actividaes sociales innecesaries.

    Midíes de seguridá

    Coles mesmes, la conseyería pide a la ciudadanía que nun se relaxe nel cumplimientu de les midíes de seguridá. Nesti sentíu recuerda la obligatoriedá del usu del mázcaru pa mayores de seis años nes víes públiques y espacios al aire llibre; en cualquier espaciu zarráu d’usu públicu o que s’atope abiertu al públicu y nel tresporte públicu. Tamién encamienta la llavadura frecuente de manos y guardar una distancia interpersonal de metro y mediu.

  • Confirmaos 4 positivos de coronavirus en Llanes venceyaos a un chigre y a una escuela de surf

    Confirmaos 4 positivos de coronavirus en Llanes venceyaos a un chigre y a una escuela de surf

    La Conseyería de Salú declaró un biltu de coronavirus nel conceyu de Llanes. Los nuevos casos tan venceyaos al chigre La Terraza de Laura de Villaḥormes y na escuela de surf Skull de Naves. El primer casu comunicóse el llunes al Ministeriu de Sanidá. Esti martes confirmáronse otros trés positivos venceyaos al primera arimáu. Les autoridaes sanitaries faen un llamamientu a los veceros que tuvieren ente’l 19 de xunetu y el 1 agostu en dalgún d’estos establecimientos pa que rellenen el formulariu disponible na web Astursalud. Tamién s’habilitó’l númberu de teléfonu 984 100 051 pa cualquier consulta rellacionada con esti biltu

    El Serviciu de Salú del Principáu (Sespa) va contactar colos afectaos pa la realización d’una prueba PCR. Mentanto, tendrán de llindar la so vida social, xixilar los sos síntomes y respetar de forma estricta les midíes de seguranza. Del restu de los nueve afectaos comunicaos esti martes, trés tán rellacionaos col biltu de La Buena Vida, colo que s’alcen a 15 les persones infectaes nesti chigre xixonés. El Serviciu de Vixilancia Epidemiolóxica ta investigando otres trés andaes, unu de la área sanitaria I y otros dos de la área sanitaria IV. Los arimaos, que presenten síntomes leves, permanecen aisllaos nes sos cases.

    Encamientos

    La Conseyería de Salú pide a la ciudadanía que nun se relaxe nel cumplimientu de les midíes de seguridá pa evitar la trasmisión del virus. Recuerda la obligatoriedá del usu del mázcaru pa mayores de seis años nes víes públiques y espacios al aire llibre; en cualquier espaciu zarráu d’usu públicu o que s’atope abiertu al públicu, según nos medios de tresporte públicos y privaos; nesti últimu casu, cuando los ocupantes nun convivan.

    Coles mesmes, encamienta la llavadura frecuente de manos y aportuna en que ye imprescindible guardar una distancia interpersonal de, siquier, un metro y medio con persones coles que nun se convive. Amás aconséyase evitar les aglomeraciones y les actividaes sociales innecesaries.

  • 5.000 beneficiarios del salariu social autoricen el pasu al ingresu mínimu vital

    5.000 beneficiarios del salariu social autoricen el pasu al ingresu mínimu vital

    Los conceyos pescanciaron yá, en namás mes y mediu, l’autorización de 5.000 persones beneficiaries del salariu social pa pasar a percibir l’ingresu mínimu vital. Recibíu’l consentimientu, la Conseyería de Derechos Sociales y Bienestar encárgase d’unviar los datos pertinentes al Institutu Nacional de la Seguridá Social (INSS). Amás, ocho conceyos –Cabranes, Casu, Cuaña, Pezós, Proaza, Sobrescobiu, Vilanova d’Ozcos y Villayón– tramitaron tolos espedientes de los sos conceyos.

    El 15 de xunu empezó’l procesu pol que les alministraciones local y autonómica percancien permisu de los beneficiarios del salariu social por que la Alministración del Estáu pueda empezar a despachar la so prestación del ingresu mínimu vital. D’esta forma, los usuarios eviten la tramitación alministrativa. Si nun dan el so permisu antes del 17 d’agostu, tendrán de realizar la tramitación a títulu particular y poles canales habilitaes pol INSS.

    En zarrándose’l plazu, la Conseyería de Derechos Sociales y Bienestar va unviar al INSS, antes del 15 de setiembre, los datos de les persones que dieren el so consentimientu. L’Alministración estatal va disponer entós de trés meses pa resolver los espedientes.

    «Naide ensin prestación»

    Toles persones que cobren el salariu social van siguir percibiéndolu hasta que se resuelvan les sos solicitúes. Amás, si la cuantía que se-yos reconociera na prestación nacional fora inferior a l’autonómica, siempre se-yos va garantizar que van algamar l’importe del salariu social. «Naide va dexar de percibir la prestación que-y correspuende y nun vamos dexar a naide atrás», aseguró la conseyera de Derechos Sociales y Bienestar, Melania Álvarez.

    N’Asturies hai rexistraes 22.327 families que perciben el salariu social básicu. Calcúlase que la mayoría van pasar agora a cobrar l’ingresu mínimu vital, magar el Principáu va caltener l’ayuda autonómica p’aquellos colectivos que queden escluyíos de la renta estatal, como ye’l casu de les persones con pensiones non contributives, les mayores de 65 años que vivan soles o les unidaes familiares que lleven conviviendo menos d’un añu.

  • Rescaten a una muyer que quedó enriscada nun pedreru na sablera d’Aguilar

    Rescaten a una muyer que quedó enriscada nun pedreru na sablera d’Aguilar

    Efectivos d’emerxencies rescataron esti martes a una muyer que quedó enriscada nun pedreru, en siendo arrastrada pela corriente na sablera d’Aguilar, en Muros. Na operación intervino l’helicópteru medicalizáu de Bomberos d’Asturies. La muyer, d’aprosimao 35 años, foi evacuada del llugar, acompañada d’un bomberu-rescatador, por aciu una operación de grúa na que s’esplegaron 25 metros de cable. Atopábase acompañada por un bañista que tornó a la sablera pelos sos propios medios. L’afectada atopábase bien nerviosa en siendo arrastrada pela corriente nun pequena llancha neumática. Foi atendida nel sable, onde aterrizó l’helicópteru. Por prevención foi treslladada al Hospital San Agustín d’Avilés n’una ambulancia de soporte vital básicu movilizada pol SAMU (Serviciu d’Atención Médica Urxente).

    El Centru de Coordinación d’Emerxencies del 112 Asturies recibió l’avisu a les 19.37 hores. Na llamada indicaben qu’había trés bañistes nun flotador con problemes pa salir. La corriente arrastráralos y xubiéronse a unes roques. Tratábase d’una muyer y dos neños. A eses hores el serviciu de salvamentu yá rematara.

    La Sala 112 del SEPA movilizó al Grupu de Rescate col helicópteru medicalizáu, pasó la llamada al SAMU ya informó a la Guardia Civil. A les 19.41 hores, dende la sablera, informen que los neños yá fueron rescataos y un surfista atópase falando cola muyer que ta bien nerviosa y nun quier soltase de les roques. A les 20.17 hores el Grupu de Rescate comunica que yá rescató a la muyer para la que la Guardia Civil, al traviés del SAMU, va solicitar una ambulancia. Ellos tornen a la so base en Llamorgal onde aterricen a les 20.30 hores.

  • Asturies suma 14 nuevos positivos por coronavirus

    Asturies suma 14 nuevos positivos por coronavirus

    Asturies suma catorce nuevos casos positivos de coronavirus. D’ellos, cuatro tán rellacionaos col biltu d’un grupu d’estudiantes que viaxaron a Málaga, ente los qu’hai hasta agora ocho contaxaos. Salú sigui estudiando la situación de los sos contactos estrechos n’Andalucía y Baleares. Per otru llau, el biltu detectáu na cervecería Urban’s del barriu uvieín de La Corredoria suma un nuevu positivu, colo que ya son siete les persones afectaes, en realizando cerca de 1.300 pruebes ente familiares y veceros. Nesti casu, trátase d’un varón, contactu estrechu d’unu de los primeros contaxaos, que permanez, como’l restu, aislláu na so casa.

    Al marxe d’estos dos biltos, esti miércoles tamién se confirmaron los positivos de trés miembros d’una familia de Xixón dempués d’una estancia n’Huelva. A estos hai que sumar el casu d’un varón procedente de Barcelona y los de dos homes, contactos estrechos de casos en Zaragoza y en Bizkaia, respectivamente. El Serviciu de Vixilancia Epidemiolóxica ta clarificando otres trés andaes confirmaos que correspuenden a la área IV. Trátase d’un varón y dos muyeres, madre y fía, ensin vinculación epidemiolóxica. Los afectaos presenten sintomatoloxía leve y permanecen aisllaos nes sos cases.

    Evitar la tresmisión

    La Conseyería de Salú pide a la ciudadanía que nun se relaxe nel cumplimientu de les midíes de seguridá pa evitar la tresmisión del virus. Recuerda la obligatoriedá del usu del mázcaru pa mayores de seis años nes víes públiques y espacios al aire llibre, en cualquier espaciu zarráu d’usu públicu o abiertu al públicu, nel tresporte públicu y nel priváu cuando los ocupantes nun convivan. Coles mesmes, encamienta la llavadura frecuente de manos y recuerda que ye imprescindible guardar una distancia interpersonal.