Categoría: Ociu

En 2009, delles feministes asturianes ellaboraron la base de datos Muyeres asturianes
destacaes. Nesi trabayu identificaron a más de 500 muyeres que tuvieron un papel social relevante nel últimu mileniu, dende’l sieglu X hasta’l sieglu XX, munches d’elles poco conocíes o directamente escaecíes.

Cuando en 2016 el grupu de radiu Sangre Fucsia realizó y sopelexó el xuegu Feminismos reunidos. La revolución empieza en tu salón, pensaron que podíen collaborar dende Asturies con dicha iniciativa dando a conocer la realidá y les idees feministes de les muyeres que les precedieron. Pa ello, ellaboraron 300 entrugues, delles inspiraes na base de datos mentada, que son les que contien el xuegu Feminismos reunidos Asturies.

Esti xuegu, según la base de datos Muyeres asturianes destacaes, son la resultancia del trabayu desinteresáu d’un grupu de filólogues, historiadores, sociólogues, musicólogues, escritores y documentalistes. Toes elles integrantes y/o simpatizantes de l’Asociación Feminista d’Asturies (AFA), dellos profesores d’enseñanza secundaria y d’universidá, estes postreres pertenecientes al Grupu d’investigación de la Universidá d’Uviéu GENESYS (Xéneru, Economía, Salú y Sociedá).

Na redacción de les entrugues de Feminismos Feminismos Asturies participaron: Pilar Cartón Álvarez, Sandra Dema Moreno, qu’amás coordinó’l grupu, María García López, Begoña Sánchez González, presidenta d’AFA, que lamentablemente nun pudo ver el xuegu termináu, Carmen Suárez Suárez, Cristina Suárez Suárez, y María Jesús Villaverde Amieva. Esther Prieto y Beatriz Redondo Viado traducieron les entrugues al asturianu y Ediciones Trabe realizó los trabayos de xestión, maquetación y revisión.

Editaron Feminismos Reunidos Asturies en dos versiones, tanto en castellán como n’asturianu, cola idea de que pueda xugase en dambes llingües. El xuegu consta de los mesmos seis campos que l’orixinal de Sangre Fucsia: Academia, Cai, Cuerpos, Cultura, Derechos y Hestoria. De manera que puede xugase coles 300 entrugues sobre muyeres asturianes de forma independiente o xuntándoles a les 1.200 ellaboraes poles colegues madrilanes. Conciben estes 300 entrugues como una primer contribución al xuegu basada na realidá y nes aportaciones de les muyeres asturianes, pero tamién son conscientes de les sos llimitaciones, polo qu’habilitaron el corréu feminismosreunidosafa@gmail.com pa que quien quiera pueda suxurir nueves entrugues o informar de dalgún erru/errata.

Febreru va ser el mes nel qu’entamen les presentaciones d’esti xuegu, que van consistir, como nun podía ser d’otra manera, en xugar sopelexando les idees de les muyeres y los grupos feministes asturianos. Estes son les feches:

• 2 de febreru, vienres, Centru social L ́Apiaderu, El Remediu (Nava), a les 19 hores.
• 3 de febreru, sábadu, Llibrería La Habitación Propia, Xixón, a les 19 hores.
• 9 de febreru, vienres, Lliberia Matadero Uno, Uviéu, 19 hores.
• 16 de febreru, vienres, Ediciones Llibrería Trabe, Uviéu, 19:30 hores.
• 24 de febreru, sábadu, Llibrería La Revoltosa, Xixón, 19:30 hores.

Esti domingu, 17 d’avientu a les 18:00h na plaza del Conceyu de Mieres, L’Anguleru, el que se considera’l Papa Noel asturianu va aportar a Mieres pa encender el fueu máxicu de la Navidá, el que s’esprende de quemar el Nataliegu. Trátase del fueu que-y apurre la maxa y conviértelo nun personaxe capaz de repartir per toa Asturies los presentes que los más pequenos y non tan pequenos pidieron.

Y L’Anguleru nun escoyó Mieres por casualidá. Dende fai más d’una década, Mieres foi un llugar de referencia pa L’Anguleru. Foi acoyíu colos brazos abiertos pola comunidá educativa mierense, y polos más pequenos del conceyu nestos últimos años. En casi tolos colexos del colexu de Mieres trabayen o se trabayó la figura de L’Anguleru y na Escuela de Música Municipal siempres se canta’l so villancicu per Navidá. Ello ye qu’una de les sos profesores Reyes Duarte, foi la compositora del Villancicu de L’Anguleru fai yá más d’una década.

En reconocencia a esi interés pola figura de L’Anguleru, el máxicu personaxe de la Navidá asturiana quixo que seya la villa mierense la que cobre tol so protagonismu col encendíu del fueu máxico de la Navidá. Por eso y porque en Mieres da otra condición imprescindible por que L’Anguleru adquiera esa cualidá de máxicu. En Mieres guarda la madera del Nataliegu que’l so fueu na nueche de Nuechebona da-y esos atributos máxicos que lu estremen del restu de mortales. Esa madera, nun ye una madera más. Trátase d’unos tueros de carbayu rescataos, salvaos, indultaos… del fueu de la foguera de San Xuan que cada nueche del 24 de xunu prenden na plaza del Conceyu. Un o una mierense, nun se sabe quién, encárgase de salvalos de la quema, una vegada que’l fueu los tiñe de negro.

Y ye qu’esi tonu escuru provocáu poles llapada de la foguera de San Xuan ye lo que-yos confier la distinción de ser la madera qu’en Navidá pueda xenerar el fueu máxicu que va ser el que prinda’l día 24 d’avientu al Gran Nataliegu, el tueru máxicu del que s’esprende la lluz purificador y vital que-y da a L’Anguleru y a tolos personaxes de la Navidá Asturiana’l so calter máxicu.

Y va ser esti domingu, 17 d’avientu a les 18:00 h, cuando esos tueros que fai casi 6 meses fueron rescataos del fueu y curiaos mientres tou esti tiempu polos distintos colexos de Mieres que trabayen la figura de L’Anguleru en clase vuelvan de nuevu al mesmu llugar nel que’l fueu de San Xuan convertir n’especiales. Y con un ritual de fueu, nel que se van volver a prender por que esta vegada amburen hasta convertise en cenices, L’Anguleru va zarrar esi fueu y llevarálo con él hasta L’Arena pa prender na tarde de Nuechebona al Gran Nataliegu.