Xixón al día

Categoría: Última hora

  • La construcción repunta n’Asturies

    La construcción repunta n’Asturies

    El conseyeru d’Empléu, Industria y Turismu, Isaac Pola, destacó güei l’importante crecimientu qu’esperimentó’l sector de la construcción n’Asturies dende 2015, con un aumentu del 12,7% d’empreses y del 16,9% del empléu. Pola realizó estes declaraciones na inauguración de la xornada Construcción 4.0., entamada pola conseyería, l’Institutu de Desenvolvimientu Económicu del Principáu (Idepa) y el Centru Européu d’Empreses ya Innovación ( CEEI), xuntu cola Confederación Asturiana de la Construcción – CAC Asprocon, col fin de convertise nun puntu d’alcuentru ente les compañíes y la comunidá innovadora.

    El titular d’Empléu animó al sector a «siguir exerciendo como ún de les pilares fundamentales de la economía rexonal, procurando incrementar la competitividá tanto de los contratistes y promotores como de la industria auxiliar».

    Mientres la so intervención, venceyó l’ameyoramientu nesti campu cola dixitalización de procesos que, al so xuiciu, «va traer consigo una revolución fonda y cambeos nos modelos de negociu». Nesti sentíu, esplicó que’l Gobiernu d’Asturies diseñó un plan estratéxicu pa favorecer el desenvolvimientu de la comunidá al traviés del texíu granible, col propósitu de facilitar la incorporación de firmes asturianes a la industria 4.0 al traviés de cuatro exes d’actuación: divulgación, asesoramientu, plataforma d’alcuentru y sofitu financieru.

    Pola animó al sector a «siguir exerciendo como ún de les pilares fundamentales de la economía rexonal»

    L’oxetivu de la iniciativa Asturies Industria 4.0, que s’asitia en llinia cola Estratexa Rexonal d’Especialización Intelixente Asturies RIS 3, pasa por incrementar el llideralgu del Principáu como rexón industrial al traviés de la tecnoloxía. «Por eso resulta fundamental qu’un sector tresversal como’l de la construcción s’incorpore a la carrera pola digitalización», sorrayó’l conseyeru.

    Según recordó, el preséu central p’avanzar escontra la digitalización ye l’Asturias Digital Innovation Hub, col que se facilita l’accesu a nuevos mercaos, a cadenes de valor globales y al catálogu d’habilitadores tecnolóxicos, quince en total, que van sofitar la incorporación del texíu empresarial rexonal a la cuarta revolución industrial. Pola convidó a tolos asistentes a la xornada a que consulten con esos habilitadores tecnolóxicos, empreses asturianes capacitaes pa procurar la dixitalización de les empreses, al traviés de la páxina web www.asturiasindustria40.es, y ufiertó el sofitu del Executivu autonómicu y del Grupu Idepa pa llograr que’l sector asturianu de la construcción sía cada vez más competitivu.

    Nel actu d’inauguración participaron tamién los directores xenerales d’Innovación y Emprendimiento, Ana Concejo, y del Idepa, Eva Pando, amás del presidente de la Fundación Llaboral de la Construcción, Joel García.

    Na xornada presentáronse dellos casos d’éxitu, tanto d’empreses de la construcción que yá empecipiaron el so procesu de dixitalización como per parte de la comunidá habilitadora, qu’amosó’l potencial de la so tecnoloxía nesti sector.

  • L’HUCA recibe la máxima certificación internacional de calidá n’asistencia a enfermos de cáncer

    L’HUCA recibe la máxima certificación internacional de calidá n’asistencia a enfermos de cáncer

    El doctor Emilio Esteban, xefe del serviciu d’Oncoloxía del Hospital Universitariu Central d’Asturies (HUCA), y la doctora Pilar Solís, oncóloga del mesmu hospital, recoyeron el sellu de calidá que los acredita como centru d’excelencia n’asistencia a pacientes con cáncer. Ye’l quintu centru sanitariu español en consiguir la máxima certificación internacional pall tratamientu de persones cola enfermedá.

    Nel actu, celebráu en Chicago, l’HUCA recibió la distinción de manes de Vicente Guillem, presidente de la Fundación ECU (Excelencia y Calidá de la Oncoloxía), y de Stephen Grubbs, vicepresidente del departamentu de Clinical Affairs de l’American Society of Clinical Oncology (ASCU). La entrega enmárcase nel Annual Meeting d’ASCU, qu’axuntó a más de 40.000 profesionales de la especialidá.

    La certificación supón un impulsu pal centru asturianu, que diagnostica 2.200 nuevos casos de cáncer cada añu. La mayoría son tumores de mama, de pulmón y dixestivos. Pa llograr el sellu, el serviciu sometióse a una rigorosa auditoría sobre distintos aspectos claves na asistencia. El so cumplimientu acredítalu como centru d’altu rendimientu.

    La entrega enmárcase nel Annual Meeting d’ASCU, qu’axuntó a más de 40.000 profesionales de la especialidá

    Los espertos valoraron el nivel de salú de los pacientes, les sos necesidaes y mires, el so bienestar emocional y el siguimientu del so dolor, según la preparación de quimioterapia per parte del equipu de farmacia y la so alministración nel hospital de día, ente otres cuestiones.

    La oncóloga Pilar Solís coordinó esti proyectu pol que, nun añu aprosimao, el serviciu d’Oncoloxía del HUCA pudo autoevaluar les sos práctiques asistenciales en base a criterios d’excelencia. Esti procesu realízase n’España al traviés de la Fundación ECU pa la Excelencia y la Calidá de la Oncoloxía. Esta entidá ensin ánimu d’arriquecimientu trabaya pa llograr los máximos niveles na docencia, l’asistencia y la investigación na especialidá.

    España ye’l segundu país, depués d’Estaos Xuníos, con más centros acreditaos. Anguaño disponen de la certificación QOPI los hospitales Ramón y Cajal de Madrid, Xeneral de Valencia, Institutu Valencianu d’Oncoloxía y Clínicu Universitariu de Santiago de Compostela, a los qu’agora se suma l’HUCA.

  • El PSOE ufierta a Podemos-Equo un diálogu «sele y seriu»

    El PSOE ufierta a Podemos-Equo un diálogu «sele y seriu»

    PSOE y Podemos–Equo tienden pontes. La candidata socialista a l’Alcaldía de Xixón, Ana González, aconceyó esti llunes na Casa del Pueblu con representantes de la formación morada, a quien ufiertó un diálogu «sele y seriu». «Nun se trata de cerrar un númberu de midíes determinaes, sinón de dir trabayando nos retos que la ciudá tien per delantre», destacó González.

    González insistió en que la idea del PSOE ye caltener una actitú «constructiva y de diálogu», una y bones los próximu cuatro años «van ser bien importantes pa Xixón». La candidata socialista estimó’l tonu cordial de la formación morada y Equo. Ana González recordó la intención del PSOE de presentar la so candidatura, como fuerza más votada, nel Plenu del próximu 15 de xunu. La intención de Podemos-Equo ye d’abstenese n’esi plenu, dalgo que facilita l’oxetivu del PSOE.

    D’últimes señaló que la confección de les ordenances fiscales y del presupuestu municipal son los dos grandes temes de caláu pa la ciudá nel curtiu plazu.

  • Treslladada a Cantabria la esbardina recoyida en Proaza

    Treslladada a Cantabria la esbardina recoyida en Proaza

    La esbardina recoyida na mañana del vienres nos alredores de la corralada osera de Proaza ta acabante de ser treslladada a Cantabria. L’animal, rescatáu pola Guardería de Mediu Natural del Principáu d’Asturies alcuéntrase nel Centru de Recuperación de la Fauna Montesa de Villaescusa dependiente del Gobiernu de Cantabria tres esperimentar una meyoría.

    Nun primer momentu la esbarda presentaba síntomes de desnutrición y deshidratación, pero alimentábase y portábase con normalidá. El so estáu de salú viose comprometíu’l sábadu a mediudía. Los servicios veterinarios del Principáu alvirtieron que sufría convulsiones y aconseyaron el so ingresu urxente. Nes últimes hores l’animal esperimentó un leve ameyoramientu, que fixo posible’l so treslláu a un centru especializáu.

    La esbarda quedó ingresada nel centru depués de superar la fase d’estrema gravedá na que s’atopaba les hores pasaes. Les instalaciones nes que s’atopa l’exemplar son les ideales pal siguimientu del so estáu y la valoración de la viabilidá del so posible reintroducción. El centru permite tener un control refechu del estáu del animal, embriviendo’l contactu col ser humanu.

    Los plazos de recuperación nun pueden definise enagora, al depender too de la respuesta del animal mientres la fase qu’agora empecipia. El Gobiernu d’Asturies collabora estrechamente colos de Cantabria y Castiella y Llión nes actuaciones rellacionaes cola xestión d’incidentes con osos.

  • Un parapentista queda atrapáu nunos cables d’alta tensión

    Un parapentista queda atrapáu nunos cables d’alta tensión

    Efectivos de Bomberos del Serviciu d’Emerxencies del Principáu d’Asturies (SEPA) rescataron ilesu a un parapentista a motor que quedó atrapáu nunos cables d’una llínea d’alta tensión, a unos cuatro metros del suelu, en Tamón, Carreño. L’home atopábase en perfectu estáu y nun precisó treslláu sanitariu. Hasta’l llugar el Serviciu d’Atención Médica Urxente (SAMU) unvió l’equipu d’Atención Primaria de Lluanco y l’ambulancia de soporte vital básicu de la zona.

    Mientres los técnicos de la compañía eléctrica verificaben que se cortara’l suministru los bomberos asitiaron la autobomba urbana llixera debaxo del afectáu pa protexer una posible cayida enriba mientres-yos confirmaben que se cortara’l suministru. Enriba del vehículu asitiaron unes colchonetes para amortiguar l’impactu si se produxera. Una vegada que los técnicos de la empresa eléctrica confirmáron-yos que podíen proceder, cola autoescalera, rescataron al afectáu.

    El Centru de Coordinación d’Emerxencies del 112 Asturies recibió l’avisu a les 12.32 hores. La llamada realizola una persona que vio al parapentista y taba onde él. Indicó que s’atopaba bien pero taba engabitáu a unos cuatro metros. Al llugar solo había accesu para camiones pequenos.

    La Sala 112 del SEPA pasó l’avisu al SAMU y activó una dotación de bombera del parque avilesín. Amás comunicó lo asocedío a la Guardia Civil y a los responsables del suministru eléctricu qu’unvió a los sos técnicos a la zona. Rematada la intervención retiraron del llugar para tornar a la so base onde llegaron a les 14.42 hores.

  • Detenida una muyer por rompe-y el llabiu al so home

    Detenida una muyer por rompe-y el llabiu al so home

    La Policía Local de Xixón detuvo na madrugada del vienres a una muyer como autora d’un delitu de mancadures nel ámbitu familiar. Los fechos tuvieron llugar n’avenida Hermanos Felgueroso. La llamada provenía de la so propia pareya, quien a la llegada de los axentes presentaba’l llabiu rotu y sangraba pela boca. Delantre de los axentes, y mientres tenía llugar la intervención, la muyer, M.M.D.A. de 44 años d’edá y vecina de Xixón, llanzó de nuevu dos puñetazos al so home, teniendo que ser amenorgada polos policías.

    Nun foi la única intervención por violencia nel ámbitu domésticu d’esti fin de selmana. Un home foi deteníu’l domingu, a les 22.25 hores n’avenida de la Constitución. Dellos testigos sollertaren que J.L.F.S., de 28 años d’edá y vecín de Siero, taba aldericando y garrando pol pescuezu a una muyer.

    Amás d’estes intervenciones, la Policía Local realizó mientres el fin de selmana casi 300 pruebes d’alcohol y drogues dientro de los programes de controles preventivos. D’elles, namás un conductor dio positivu en drogues, motivu pol que foi denunciáu. La Policía Local de Xixón, empezó güei llunes una campaña de controles preventivos d’alcohol y drogues na conducción. La campaña va durar una selmana y va desenvolvese paralelamente nel restu del país. Na mesma campaña realizada l’añu pasáu nestes feches, la Policía Local de Xixón, realizó concretamente 978 pruebes, de les que siete tuvieron resultancies positives, cuatro n’alcohol y trés en drogues.

  • Evacuáu un montañeru que se mancó en Peña Ubiña

    Evacuáu un montañeru que se mancó en Peña Ubiña

    El Grupu de Rescate de Bomberos del Serviciu d’Emerxencies del Principáu d’Asturies (SEPA), a bordu del helicópteru medicalizáu, evacuó a un varón de 47 años que se mancó nuna pierna mientres s’atopaba faciendo una ruta na Vega de Retuerto, na zona de Peña Ubiña la Pequeña, en Ḷḷena. L’afectáu, que presentaba una posible quebra de tibia y peroné, foi treslladáu al Hospital Universitariu Central d’Asturies (HUCA).

    El Centru de Coordinación d’emerxencies recibió l’avisu a les 11:51 hores. Na llamada indicóse que yeren un grupu d’ocho persones y un mozu paecía tener un esguince. De momentu movilizóse al equipu de rescate de Bomberos del SEPA, a bordu de l’aeronave medicalizada. El grupu de rescate pudo aterrizar col helicópteru na vega na que s’atopaba’l senderista accidentáu. Al paecer ésti sufrió una cayida. La médica-rescatadora inmovilizó la estremidá mancada del varón, asitiándo-y una férula. En xubiendo a l’aeronave, treslladáronlu al HUCA.

    L’equipu de rescate dio per rematada la intervención a la so llegada a base, a les 12:51 hores. La sala del 112 del SEPA informó del sucesu a la Guardia Civil y al Serviciu d’Atención Médica Urxente (SAMU).

  • Apaez en bon estáu’l xixonés desapaecíu dende’l xueves

    José Luis Sánchez ya ta en casa. La Guardia Civil y la Policía Nacional punxeron esti martes fin a la busca del xixonés, del que nun se teníen noticies dende’l xueves. La familia de José Luis Sánchez denunciara la so desapaición va cinco díes. José Luis tien 49 años, ye vecín de Xixón, roxu con grandes entraes, güeyos azules y tiez blanca. Mide 1,69 metros y pesa unos 65 kilos. La so familia pidió la selmana pasada la collaboración vecinal p’ayudar a encontralu. Finalmente apaeció esta mañana sanu y salvu, polo que Policía Nacional y Guardia Civil desactivaron la so busca.

  • Muerre un mozu de 25 años nun accidente con un tractor

    Muerre un mozu de 25 años nun accidente con un tractor

    Un varón de 25 años morrió, por causes que se desconocen, en sufriendo un accidente col tractor nel que circulaba en Yernes y Tameza. Hasta la zona allegó’l Grupu de Rescate de Bomberos del Serviciu d’Emerxencies del Principáu d’Asturies (SEPA), a bordu del helicópteru medicalizáu. El médicu-rescatador, al pie de un bomberu-rescatador y personal sanitario movíu pol SAMU tuvieron realizando maniobres de reanimación cardiopulmonar a la víctima. L’accidentáu finó nel llugar del entorno del tractor.

    El Centru de Coordinación d’Emerxencies recibió l’avisu a les 14:24 hores. Na llamada indicóse qu’un tractor entornara na carretera, a un kilómetru de Yernes. L’accidentáu taba na carretera y nun taba atrapáu.

    Darréu movilizóse al equipu de rescate, a bordu del helicópteru medicalizéu, que nesos momentos taba rescatando a una muyer que sufriera una cayida baxando a la sablera d’Aguilera, en Gozón, Nesti casu, el médicu-rescatador y un bomberu-rescatador, yá taben cola afectada, que presentaba una luxación de costazu. N’amenorgándo-y la luxación ya inmoviliza-y la estremidá, con una férula, treslladáronla al Hospital San Agustín. Dende ehí partieron hacia Yernes y Tameza.

    Una vegada nel llugar del accidente del tractor, l’equipu de rescate empezó coles maniobres de RCP, qu’unos vecinos de la zona yá-y taben practicando al accidentáu, y nes que tamién tomaron parte l’equipu médicu activáu pol Serviciu d’Atención Médica Urxente (SAMU)..

    Finalmente nada pudo faese pa salvar la vida al varón. El grupu de rescate dio per rematada la intervención a la so llegada a base, a les 15:43 hores. La sala del 112 del SEPA informó del sucesu al SAMU, qu’activó al equipu médicu d’Atención Primaria de Grau y l’ambulancia de soporte vital básicu. La Guardia Civil fíxose cargu de los trámites para’l llevantamientu del cadabre.

  • Un repartidor, firíu nun accidente de tráficu en Villaviciosa

    Un repartidor, firíu nun accidente de tráficu en Villaviciosa

    Una persona resultó firida en saliéndose de la vía col vehículu que conducía, una furgoneta que tresporta naranxes, cuando circulaba pola A-8, al altor del puntu kilométricu 361,70, en sentíu Xixón, nel conceyu de Villaviciosa. Según los datos facilitaos pol Serviciu d’Atención Médica Urxente (SAMU) el mancáu, un varón de 60 años d’edá, presentaba, por cuenta de más pruebes y hasta nueva valoración médica, policontusiones de pronósticu reserváu. Foi atendíu pol equipu médicu de la UVI-móvil de Xixón y treslladáu al Hospital de Cabueñes.

    L’afectáu tuvo que ser escarceláu del interior del turismu por efectivos de Bomberos del Serviciu d’Emerxencies del Principáu d’Asturies (SEPA) con base nel parque maliayo. El mancáu quedara atrapáu per una pierna pol salpicadero del furgón.

    El Centru de Coordinación d’Emerxencies del 112 Asturies recibió l’avisu a les 11.52 hores. Na llamada señalaba qu’unu de los sos emplegaos tuviera un accidente, saltando los aribags de la furgoneta, que tresportaba naranxes. Desconocía más detalles pero facilitó’l teléfonu del afectáu.

    Amás pasar l’avisu al SAMU activóse una dotación de bomberos y contactóse col centru de control de la vía de comunicación que minutos dempués comunicaben l’allugamientu de la furgoneta ya informaben que’l so conductor taba atrapáu. N’escarcelando al afectáu y realizar les oportunes xeres de seguridá los bomberos retiraron del llugar a les 13.38 hores para tornar al so parque. L’incidente poner en conocencia de la Guardia Civil de Tráficu.