La Policía Local de Xixón va cunta esti branu con 10 auxiliares. Los nuevos axentes, que fueron presentaos esti xueves na Casa Conceyu, van ser contrataos mientres trés meses, del 15 de xunetu al 15 d’ochobre, como refuerzu para’l branu. Na firma tuvieron presentes el conceyal de Policía Local, José Luis Fernández Fernández, el xefe de la Policía Local, Alejandro Martínez Gallo, y l’inspector de la Policía Local Juan Jesús de la Vega.
Etiqueta: Casa Conceyu
-
La Casa Conceyu va allumase colos colores de la bandera LGTBI
La fachada de la Casa Conceyu allumará esta nueche, y mientres tola fin de selmana, colos colores de la bandera LGTBI. El Conceyu de Xixón súmase d’esta forma a la celebración del Día del Arguyu que va tener llugar el domingu 28 de xunu. Al traviés d’esta iniciativa, la ciudá va participar del conxuntu d’acciones y actividaes reivindicatives que se van desenvolver n’Asturies a lo llargo d’esta fin de selmana.
L’equipu de Gobiernu municipal tomó esta decisión, como alternativa a la bandera que cada añu asitia nel balcón del Consistoriu. El Tribunal Supremu vetó l’allugamientu de banderes ‘non oficiales’ n’edificios públicos.
El llume de la fachada del edificiu consistorial súmase a los diez bancos colos colores del arcu la vieya distribuyíos por parques y places de la ciudá. Son diez en total repartíos en La Serena, Nuevo Roces, Cimavilla, El Coto y El Polígono. Con too ello, el Conceyu de Xixón quixo manifestar la so defensa de la diversidá y de les llibertaes de cada persona, nun momentu en que los discursos d’esclusión tán tan vixentes.
-
La Biblioteca Xovellanos reabre al públicu
La Biblioteca Xovellanos de Xixón reabrió esta mañana al públicu. Les puertes del edificiu van tar, dende les 10:30 hores de mañana, en disposición d’ufiertar a los usuarios los servicios de préstamu previu pidimientu, consulta, información bibliográfica y préstamu interbibliotecariu. Toos ellos emprestaránse na planta baxa de la biblioteca. Pel momentu va caltenese cerraes al públicu les plantes primera y segunda y la sala de prensa y revistes.
La Biblioteca Xovellanos va tar abierta nos siguientes horarios: de llunes a vienres de 10:30 a 13:00 hores y de 17:30 a 20:45 hores, sábados de 10:30 a 14:00 hores y de 17 a 19:45 hores, y domingos y festivos de 10:30 a 13:45 hores. La Dirección Xeneral de Cultura tien previsto abrir tamién la Biblioteca d’Asturies Ramón Pérez de Ayala, n’Uviéu, nos vinientes díes.
-
Xixón recuperó esta selmana un 76% del tráficu
Xixon va siguir adaptándose a la nueva normalidá apostando por dar más espaciu a pasiantes y bicicletes. Asina lo defendió esta mañana el conceyal de Movilidá y Mediu Ambiente, Aurelio Martín, nuna entrevista n’Onda Cero. L’edil aseguró que la ciudá recuperó esta selmana’l 76% del tráficu y adelantó que l’equipu de Gobiernu va presentar nos vinientes díes un plan de peatonalización que va llegar «a tolos barrios».
El conceyal valoró los resultaos de la peatonalización provisional d’un carril n’El Muro. Martín reonoció qu’esta ye una zona «mui simbólica» de la ciudá, pero mostróse satisfechu porque «ta viéndose’l resultáu». Nesti sentíu, l’edil adelantó que’l pieslle al tráficu rodáu d’un carril ente la rotonda del Piles y El Naútico va ampliase «polo menos hasta setiembre». Tamién se van caltener los ciclo-carriles como’l qu’entró en funcionamientu nel carril izquierdu de l’avenida de la Costa. «Queremos que la bicicleta nun seya namás un elementu d’ociu, sinón tamién de tresporte». Martín insistió na necesidá de «dar seguridá» a los ciclistes y destacó qu’hai proyectaos 29 d’estes víes compartíes por coches y bicicletes proyectaos en tola ciudá. «Entamemos pol más conflictivu pa ver cómo evoluciona la situación pa ver cuál ye’l comportamientu del ciclocarril y del tráficu».
El conceyal refirióse a los trabayos de peatonalización de Claudio Alvargonzález. «Ye un ensanchamientu de lo más natural y urxente que vamos completar esti mes». La peatonalización d’esta cai, que se va caltener tol branu, pretende ampliar l’espaciu de paséu y permitir la instalación de terraces na zona d’aparcamientos. Esi fechu provocó la protesta de los vecinos, que refuguen que s’esanicien 69 places. Martín aseguró que tan sintiendo les sos reivindicaciones. «Ficimos yá una modificación de la nuestra propuesta y agora tamos trabayando n’otra».
Les peatonalizaciones van siguir. Aurelio Martín adelantó que la so conceyalía ta trabayando nun plan que va ser presentáu nos vinientes díes. «Tenemos d’algamar una ciudá más amigable y vamos facelo en sintonía colos vecinos».
-
Conceyu, patronal y sindicatos alcuerden destinar 53 millones a «reiniciar» Xixón
El Conceyu de Xixón va destinar 26,8 millones d’euros en 2020 pa desenvolver midíes de promoción económica, empléu y turismu. Esta inversión forma parte del alcuerdu ‘Xixon Reinicia‘. L’alcaldesa de Xixón, Ana González, robló esti xueves l’alcuerdu de concertación social colos axentes sociales y económicos de la ciudá. L’actu, que se celebró nel Salón de Recepciones de la Casa Conceyu, cuntó cola presencia del presidente de la Federación Asturiana d’Empresarios (FADE), Belarmino Feito; y los secretarios de les uniones comarcales d’UXT y Comisiones Obreres, Fernando Díaz y Víctor Manuel Roza, respectivamente, amás con representantes de la Corporación municipal.
Con esti alcuerdu, el Conceyu de Xixón comprométese a destinar 26,8 millones d’euros esti añu y otros 26,2 millones en 2021 a acciones de promoción económica, empléu y turismu. Na primer fase va poner en marcha un plan de choque destináu a apangar les consecuencies de les midíes de contención del COVID 19. Ente les midíes destaca una convocatoria d’ayudes empobinaes a persones autónomes y micropymes nos sectores más afectaos pol cese d’actividá. Esta convocatoria, dotada con 5 millones d’euros, va ponese en marcha en xunu.
Esti programa va cuntar con una primer llinia, con un presupuestu de 3,5 millones d’euros. Podrán beneficiase les empreses que quieran reincorporar trabayadores n’ERTE. Concederánse 1.500 euros por cada trabayador a xornada completa que se reincorpore al trabayu. D’acordies colos cálculos del equipu de gobiernu, esta llinia va beneficiar a más de 2.300 trabayadores per cuenta ayena.
Dientro d’esti primer paquete d’ayudes va incluyise una llínia de subvenciones a los gastos causaos pola reapertura d’establecimientos asina como gastos d’adecuación y alquisición d’elementos de protección de trabayadores y veceros. La dotación d’esta llínea va ser de 1,5 millones d’euros y va poder beneficiar a 3.000 establecimientos. Van poder acoyese a esta convocatoria autónomos y empreses afectaos pola suspensión d’actividá y que tuvieren concedíu un ERTE, que vieren menguar la so facturación un 75% o que, daes les circunstancies, zarraren el so negociu.
Nesta primer fase tamién se va destinar un millón d’euros al financiamientu de pequenes empreses y autónomos al traviés de Asturgar. Tamién se van poner en marcha un plan de sofitu a la dixitalización del comerciu urbanu dotáu con 300.000 euros, o la realización de campañes de promoción del comerciu y l’hostelería locales.
Plan d’empleu
Nel ámbitu del empléu alcordóse, ente otres midíes, la puesta en marcha d’un plan d’empléu estraordinariu. Tendrá un costu de casi 3 millones d’euros, financiáu íntegramente con presupuestu municipal y que va llegar a 100 persones. Prevese la contratación, nuna primer fase, de 30 persones de les bolses yá creaes pa la selección de beneficiarios de los actuales planes d’empléu. Nel mes de payares incorporaríense los 70 restantes tres un procesu selectivu nel que van primar criterios de calter social. Nesta riola incorporaríense les 20 persones previstes nel plan de choque de cultura pal desenvolvimientu de proyectos.
En cuanto al turismu, reorientáronse tolos programes escontra’l turismu nacional. L’oxetivu ye destacar los valores que faen de Xixón un destín estremáu: espacios abiertos, mar, naturaleza, paseos, gastronomía, compres y cultura. Destaca nesti ámbitu’l diseñu d’una campaña, en collaboración con hoteles y hosteleros, con programes específicos pa xixoneses, convirtiendo la ciudá nel destín turísticu de la mesma ciudadanía.
L’equipu de Gobiernu y los axentes económicos y sociales comprometiéronse a faer d’ésti un alcuerdu «abiertu y flexible» que s’afaiga a les necesidaes. Pa ello, va crease una comisión de siguimientu y evaluación, que se va axuntar mensualmente.
-
L’alcaldesa defende devolver la estación intermodal a Moreda
L’alderique sobre’l futuru allugamientu de la estación intermodal de Xixón torna a tar enriba la mesa. L’alcaldesa de la ciudá defendió esti martes un nuevu cambéu nel proyectu del Plan de Víes. Ana González abogó por llevar el futuru equipamientu a Moreda, l’espaciu que permite «acelerar la construcción al tiempu que garantiza que’l preciu de la obra nun se dispare”. La rexidora xixonesa presentó, nuna rueda de prensa telemática, les concusiones del estudiu informativu sobre la estación intermodal, ellaboráu pol Ministeriu de Tresportes. González valoró les «certidumbres» qu’ufierta l’allugamientu de la estación intermodal en Moreda: «L’estudiu d’impactu ambiental yá ta fechu, conocemos l’estáu del sosuelu y nun sería necesariu’l bombéu d’agua». Por contra, l’alcaldesa destacó les «incertidumes xeolóxiques, xeotécniques ya hidrográfiques de la redolada del Muséu del Ferrocarril», qu’amás, rique un nuevu informe d’impactu ambiental.
Les cifres del estudiu son «contundentes» y «bien definitories», señaló. Nesti sentíu, remarcó qu’optar por Moreda va suponer un aforru de 67 millones d’euros. D’ellos, 15’5 millones seríen aforru directu pal Conceyu de Xixón. Coles mesmes, reconoció que’l proyectu de Moreda, que yá ta redactáu, namás tendría de sometese a una «rápida revisión». «A la fin del mandatu podríemos asistir al entamu de les obres tres munchos años de retrasos”.
González apeló a la necesidá de que la decisión que s’adopte con un «consensu mayoritariu» y reconoció qu’esisten dos opciones “engarranos o tomar una decisión partiendo de lo que Xixón necesita, entá más, teniendo en cuenta la etapa post COVID-19 que tenemos per delantre”.
-
Los partíos ceden 54.666 euros de les sos asignaciones a programes sociales
Pocos son los asuntos que davezu algamen l’alcuerdu unánime de tolos grupos políticos con representación na Casa Conceyu. Sicasí, les siete formaciones presentes n’actual corporación pactaron ceder dos mensualidaes de les sos asignaciones a programas sociales. Esto ye, 54.666 euros. Trátase d’una partida que los grupos reciben pa desendolcar la so actividá como representantes de los ciudadanos. L’alcuerdu algamóse por unanimidá de los voceros municipales na comisión permanente celebrada’l vienres pela mañana.
Nel conceyu, tamién se punxo fecha al viniente Plenu ordinariu. Va tener llugar el miércoles 27 de mayu. N’él, presentaránse les primeres modificaciones presupuestaries destinaes a programes venceyaos a la xestión de la crisis de la COVID-19. Otramanera, alcordose convocar el Conseyu Social de la ciudá pal viniente día 25. Nesti conceyu, informaráse de les midíes previstes pa recuperar l’actividá económica y l’empléu. Los voceros municipales tamién pactaron la torna de les comisiones municipales, que van celebrase de manera presencial nel Salón de Plenos.
-
L’Estáu d’Alarma retrasa dos meses el fin de les obres de Tabacalera
La Xunta de Gobiernu, axuntada esta mañana de forma telemática, dio lluz verde a l’ampliación del plazu d’execución de les obres de l’Antigua Fábrica de Tabacos de Cimavilla. Foi la empresa axudicataria, UTE Tabacalera, la que lo solicitó’l pasáu 15 d’abril. La finalización d’estos trabayos taba prevista pa esta fecha, magar que nun foi posible por mor de l’actual crisis sanitaria. Esta situación alterió’l ritmu de los trabayos por cuenta de la adopción de nueves midíes de seguridá y dificultó l’abastecimientu de suministros de materiales y maquinaria.
Les obres tamién se vieron afectaes pol cese de les actividaes non esenciales dende’l 30 de marzu al 9 d’abril y la esistencia de ciertos trabayos n’antigua Vicaría pendientes d’aprobación pola Conseyería de Cultura. La Xunta de Gobiernu entiende que l’ampliación del plazu d’execución «ta xustificada». D’esta manera, el plazu va ampliase por 2 meses y 15 díes, afitando la fecha de finalización de la obra’l 13 de xunetu de 2020.
La Xunta de Gobiernu aprobó, amás, una partida de 80.565,67 euros pa la supresión de barreres arquitectóniques en cuatro comunidaes de vecinos. En dos de los edificios va sovencionase la instalación d’un ascensor. Nos otros dos casos el presupuestu va destinase a baxar l’ascensor a cota de cai. Amás, aceptóse’l desistimiento de la subvención nominativa de Expoacción Organización Solidaria pal proyectu Vacaciones en paz 2020. La entidá presentó un escritu onde esplicaba qu’esti proyectu nun va poder llevase a cabu na so totalidá debíu les midíes del estáu d’alarma.
-
El pozu de tormentes d’Hermanos Castro llevará un añu y 2,5 millones más
La obra del pozu de tormentes del parque de los Hermanos Castro retrásase. Asina lo anunció esti xueves el conceyal de Caltenimientu y Obres Públiques, Olmo Ron. L’edil, que tamién preside la EMA, esplicó que’l proyectu constructivu encargáu pol anterior equipu de gobiernu «nun cuntaba colos estudios xeolóxicos necesarios». D’esta manera, el proyectu va ser modificáu pola posibilidá de que se produzan deslizamientos de tierra que podríen afectar a les viviendes de la zona.
El conceyal esplicó que «la obra taba mal proxectada dende’l principiu, y agora tócanos a nós encarar la solución”. Asina, reconoció que se trata d’una decisión difícil», magar nun duldaron «nin un segundu» n’encarala y «siguir alantre». Detalló que’l gobiernu municipal nun tuvo conocencia d’esta situación hasta’l cambéu de xerencia en EMA y cuando Acciona, axudicataria de la obra, empezó a plantegar duldes.
Ente esta situación, la EMA encargó un informe a la Fundación Universidá d’Uviéu que concluyó que nun ye posible siguir les obres col actual proyectu constructivu. Esti cambéu va suponer una medría nel presupuestu de la obra d’unos 2’5 millones d’euros. Tamién va retrasar la finalización de les obres. El plazu va tener qu’estendese un añu más. Los cambeos nel proyectu van treslladase al conseyu d’alministración de la EMA.
-
Podemos-Equo plantega instalar paneles solares nos edificios municipales
Una propuesta de futuru y social que dinamice’l texíu empresarial y el comerciu local. Podemos-Equo Xixón ta acabante de presentar un plan de choque enerxéticu dientro de les propuestes pa la recuperación de la ciudá tres la crisis sanitaria del coronavirus. El plan inclúi una serie de midíes a curtiu, mediu y llargu plazu pa tolos colectivos afectaos por esta crisis. El so fin ye la instalación plaques fotovoltaicas en toles cubiertes de los edificios municipales, nuna primer fase, y comunidaes de vecinos y empreses, na segunda, por aciu un plan de rehabilitación.
“Ye necesario buscar midíes con un valor añedíu y esta tienles: crea empléu, llucha contra’l oligopolio enerxéticu y camina hacia la economía verde», valoró la vocera del grupu municipal, Yolanda Huergo. «Nun podemos quedar na vieya receta d’invertir n’obres que namás xeneren valor mientres s’executen”, sentenció.
Reconversión
La coalición destaca qu’esta propuesta ta alliniada col gran plan d’inversión européu venceyáu a la transición enerxética y el Plan Nacional Integráu d’Enerxía y Clima sofitáu por constructores y sindicatos. «Daría-y un impulsu a la creación d’empléu sosteníu nel tiempu al sector de la construcción”, destaca la vocera. «Ye tamién un plan senciellu d’executar. La reconversión de trabayadores de la construcción sería rápida al ser una tecnoloxía senciella d’instalar y con baxos precios de compra».
El plan de choque enerxéticu forma parte del documentu que Podemos-Equo Xixón va treslladar a la Xunta de Voceres d’esti vienres. Contempla otres midíes como l’aplazamientu o la bonificación progresiva de distintos tributos municipales como’l IBI, IVTM y el IAE. “De les propuestes d’otros grupos municipales esprendemos que toos defendemos les mesmes midíes básiques pol fechu de ser necesaries. Non toes, pero sigo munches. Ye una bona base pa trabayar. Mientres tean empobinaes a buscar una salida a la crisis xusta, social y sostenible naide va tar en desalcuerdu. D’ésta, hai que salir toos xuntos”, sostien la vocera.