Xixón al día

Etiqueta: Casa Conceyu

  • Juan Miguel Chaves toma posesión como conceyal de Podemos-Equo

    Juan Miguel Chaves toma posesión como conceyal de Podemos-Equo

    Juan Miguel Chaves yá ye conceyal de Podemos-Equo nel Conceyu de Xixón. El nuevu edil sustitúi nel cargu a Alba González, qu’abandonó’l so puestu nel Plenu p’asumir nueves responsabilidaes nel Ministeriu d’Igualdá. «Ye un honor y espero tar al so altor», defendió’l nuevu conceyal ente un Plenu más vacíu de lo normal. La sesión celebróse de forma semipresencial.

    Al salón de Plenos de la Casa Conceyu namás asistieron los voceros de cada formación. El restu de conceyales siguió la sesión de manera telemática. El conceyal siguió la sesión dende’l Salón de Recepciones hasta’l momentu de tomar de posesión del cargu. Pa respetar la distancia de seguridá, l’alcaldesa, Ana González, convidó-y a recoyer él mesmu la medaya de conceyal. «Coyer usté mesmu», indicó-y la rexidora insistiendo na importancia de cumplir col distanciamientu social.

  • El Conceyu amenorga’l númberu de medayes de la ciudá

    El Conceyu amenorga’l númberu de medayes de la ciudá

    Xixón concederá esti añu trés medayes de plata y una d’oru. Los grupos municipales alcordaron amenorgar el númerbu de medayes de la ciudá. Hasta’l momentu, podíen concedese hasta seis gallardones de plata añalmente. Agora, serán namás trés de plata y una d’oru. Los grupos van poder presentar les sos candidatures na xunta de voceros y les mesmes van ser sometíes a votación.

    Pa que les medayes sían otorgaes, va riquise una mayoría de dos tercios del Plenu, esto ye, 18 conceyales. Esta condición va ser la mesma para la Medaya d’Oru, propuesta pola alcaldía. Poro, la propuesta que va llegar al Plenu d’Honores va ser consensuada na xunta de voceros. Con esta decisión los grupos municipales quieren reforzar el calter non partidista d’estes distinciones.

  • Convocada pa esta tarde una concentración de refugu pol asesinatu de Lorena Dacuña

    Convocada pa esta tarde una concentración de refugu pol asesinatu de Lorena Dacuña

    El Conceyu de Xixón declaró trés díes de llutu oficial na ciudá pol asesinatu por violencia de xéneru de Lorena Dacuña Fernández. Les banderes de la Casa Conceyu ondearán a mediu estil. El consistoriu xixonés, el Gobiernu del Principáu y la Delegación del Gobiernu n’Asturies manifestaron la so «enérxica condena» y la so «fonda consternación» por esti crimen que supunxo la primer víctima mortal de la violencia de xéneru n’Asturies anguaño. Les trés alministraciones convocaron una concentración a les 20 hores d’esta tarde na plaza Mayor de Xixón p’amosar les sos condolencias a familiares y amigos, y manifestar tamién el so refugu a esti asesinatu.

    L’alcaldesa, Ana González, amosó’l máximu dolor énte una muerte «inxusta» porque «a Lorena quitáron-y so vida de manera infame contra tolos derechos». La primer edil llamentó que «ésta ye la dura realidá de les muyeres que tolos díes tenemos qu’enfrentanos a la violencia de xéneru pol simple fechu de qu’haya homes que crean que somos xuna propiedá a la que pueden hasta asesinar».

    González visitó ayeri a familiares y amigos de Lorena Dacuña nel tanatoriu de Cabueñes. Treslladó-yos el so condolencias y les de tola ciudá, y pidió una participación masiva nel actu de denuncia, refugu y condena d’esti asesinatu.

  • Proponen recuperar les piscines de la Llaboral tres 30 años ensin usu

    Proponen recuperar les piscines de la Llaboral tres 30 años ensin usu

    L’oxetivu ye remocicar les piscines de la Llaboral pa que tornen a formar parte de la ufierta deportiva de Xixón. Foru Asturies quier que l’equipu de gobiernu estudie l’apertura de la piscina de la Universidá Llaboral. El voceru de la formación, Jesús Martínez Salvador, va llevar la propuesta al viniente Plenu municipal. «La puesta en funcionamientu de la piscina como’l primer vasu públicu pa la práctica de natación y usu lúdicu sería un impulsu pa la ufierta deportiva de la ciudá», esplica.

    El Conceyu ye responsable de les instalaciones deportives del edificiu tres la cesión por un periodu de 40 años fecha pol Gobiernu asturianu. Va un añu sacóse a llicitación la reforma de los campos de rugby, fútbol americano, h.oquei y fútbol. N’actualidá tán rematando les obres de reforma. La formación casquista concreta que’l conveniu inclúi la cesión de toles instalaciones deportives del edificiu, tamién de les pistes polideportives y la piscina descubierta.

    El que fuera conceyal de Deportes n’anterior llexislatura reclama siguir colos trabayos de reforma. La segunda fase, de mayor complexidá técnica, supondría la recuperación de la piscina de la Llaboral, ensin usu dende 1990. El ruegu va ser aldericáu’l próximu miércoles mientres el Plenu municipal.

  • El retu de la paridá nes empreses municipales: «Les cifres nun son positives»

    El retu de la paridá nes empreses municipales: «Les cifres nun son positives»

    La paridá nes empreses municipales sigue siendo una cuestión pendiente. L’alcaldesa de Xixón, Ana González, presentó esti llunes na Casa Conceyu informe de paridá de les empreses públiques realizáu pola Dirección Xeneral d’Igualdá. L’informe analiza la composición de los conseyos d’alministración de les nueve empreses municipales. La conclusión nun podía ser peor. Emtusa ye la única empresa que cumple con criterios de paridá nesti órganu. Tamién cumplen con esti criteriu nos sos comités d’empresa IMPULSA, EMVISA y Divertia y estos dos últimes, amás, tán dirixíes por muyeres. Les otres seis empreses de titularidá municipal tán dirixíes por homes.

    Hai siete empreses masculinizaes, esto ye, con mayor presencia masculina nes sos composiciones analizaes: EMA, EMULSA, EMTUSA, IMPULSA, Empresa Mista de Tráficu, CEGISA y el Centru de Tresportes. La Empresa Municipal d’Agües ye la que cunta con menos presencia femenina, un 21 per cientu. EMVISA, sicasí, ye la más feminizada con un 71 per cientu de muyeres.

    L’alcaldesa llamentó unes cifres «nun son positives» y destacó el compromisu del equipu de gobiernu ye algamar la igualdá real y efectivo basada siempres na transversalidad. González va treslladar esti diagnósticu a los distintos grupos políticos por que puedan analizar les asignaciones que fixeron, a los sindicatos y a les empreses. Amás, con toos ellos caltendrán xuntes y van proponese iniciatives, acciones y midíes que garanticen la paridá. Esti informe forma parte de la estratexa de promoción de les polítiques d’igualdá nel Conceyu. Pa ellaboralo tuviéronse en cuenta les composiciones de los conseyos d’alministración, del comité d’empresa y del equipu directivu.

  • Vox plantega rebautizar L’Humedal como plaza d’España

    Vox plantega rebautizar L’Humedal como plaza d’España

    Vox va plantegar esti miércoles nel Plenu municipal el cambéu de denominación de la plaza de L’Humedal. La formación d’ultraderecha quier llograr el sofitu de la Casa Conceyu pa qu’esti céntricu espaciu pase a nomase plaza d’España. «La llei de Memoria Histórica solo sirvió para xenerar crispadura y estremar ente ciudadanos de primera y segunda. Los Conceyos nun tienen por función reescribir la hestoria», señalen. La formación que llidera Eladio de la Concha quier rebautizar L’Humedal como plaza d’España «lo más llueu posible» pa «zarrar firíes».

    Amás, los de Santiago Abascal van solicitar la instalación d’un mástil nesti mesmu espaciu pa que «la bandera d’España ondee na nuesa ciudá». La formación argumenta qu’esti símbolu, «que representa y xune a toos el españoles», va valir pa escaecer erros del pasáu. Xixón sigue d’esta manera los pasos d’Uviéu, onde’l Pleno yá aprobó la instalación d’una bandera d’España na ciudá. La previsión de la Casa Conceyu ye que la enseña nacional ondee na capital asturiana enantes d’acabar l’añu.

  • Dimite la conceyala de Foru Ana Braña

    Dimite la conceyala de Foru Ana Braña

    La conceyala de Foru nel Conceyu de Xixón Ana Braña presentó esti vienres la so renuncia al acta. Nun comunicáu, la formación esplica que se trata d’una decisión por razones «puramente personales». Braña ostentaba esti cargu dende les elecciones del pasáu 26 de mayu. L’arrenunciu va ser incluyíu nel orde del día del plenu de la Corporación previstu pal próximu miércoles, de forma que va ser efectiva n’esi mesmu actu una vegada el plenu tome conocencia de la mesma.

    Pelayo Barcia Castañón, director xeneral d’Empléu nel mandatu anterior, va ser previsiblemente quien ocupe l’asientu de Braña. El so nomamientu podría ser efectivu nel plenu estraordinariu de presupuestos previstu pal 4 d’avientu.

  • Podemos-Equo estima en 2 millones los ingresos pol IBI diferenciáu

    Podemos-Equo estima en 2 millones los ingresos pol IBI diferenciáu

    «La nuesa enmienda al IBI diferenciáu, con un tipu del 0,9 per cientu, podría aumentar los ingresos hasta los dos millones d’euros». La vocera de Podemos-Equo Xixón, Yolanda Huergo, condicionó’l sofitu d’esta formación a les ordenances fiscales a esti aspectu. «Esti impuestu aumenta’l presupuestu ensin cargar la presión fiscal sobro los que siempres la acaben sufriendo».

    La formación destaca que’l Conceyu veríase beneficiáu n’otru aspeutu más técnicu: la riegla de gastu. «Esta riegla fai que’l gastu solo pueda aumentar nun tantu per cientu al respective de los ingresos más estables de la entidá. Si agora les arques municipales ingresen dos millones d’euros porque nos toque la llotería, nun afectaríen a esti tope, pero un ingresu habitual como ye’l IBI, sí se contabilizaría por que’l Conceyu disponga de más dineru pa poder faer inversiones», señaló Huergo.

    Madrid, Barcelona, Valencia, Málaga, Santander y Bilbao yá cunten con esti impuestu, que grava’l valor catastral de les grandes empreses. Namás cuatro ciudaes ente les que más población tienen, amás de Xixón, nun enllantaron inda’l IBI diferenciáu.

  • L’alcaldesa desmiente que Xixón vaya celebrar ‘bautizos civiles’

    L’alcaldesa desmiente que Xixón vaya celebrar ‘bautizos civiles’

    L’alcaldesa de Xixón refugó esti martes la posibilidá de que la Casa Conceyu celebre los nomaos bautismos civiles. En declaraciones a los medios de comunicación, Ana González aseguró nun tener intención d’incluyir la celebración de ceremonies d’otorgamientu de carta de la ciudadanía nel Reglamentu de Llaicidá. «Esta propuesta nun sal en nengún documentu del PSOE nin d’IX nin hai nenguna propuesta conxunta», aseguró.

    Ana González refirióse d’esta manera a les informaciones publicaes pol diariu El Comercio sobre la ellaboración d’un Reglamentu de Llaicidá. Esta normativa, incluyía nel pactu de gobiernu ente PSOE ya Izquierda Xunida, inspiraríase na regulación de Rivas Vaciamadrid, que contempla la celebración de bautismos civiles.

    «El desendolcu de la llaicidá na ciudá nun significa tomar ritos relixosos de modo civil. Nun falamos d’eso», esplicó l’alcaldesa. La primera edil espresó’l «másimu respetu» a caúna de les confesiones relixoses, pero aseguró qu’esta regulación quier «separtar les creencies personales de la sociedá civil».

  • Foru plantega una tasa añal de 10 euros por perru

    Foru plantega una tasa añal de 10 euros por perru

    Foru plantegó esti xueves que les próximes ordenances fiscales incluyan una tasa de censu de mascotes d’un máximu de 10 euros. El voceru de la formación nel Conceyu de Xixón, Jesús Martínez Salvador presentó esta mañana en rueda de prensa un paquete de midíes pa la nueva Conceyalía de Salú Animal. El documentu recueye la ellaboración d’una nueva ordenanza, l’actualización del censu d’animales de compañía, la construcción d’un parque para perros en Poniente y un plan de control de gaviotes. «La nueva estructura municipal va tener que trabayar enforma y llograr resultancies que xustifiquen la so creación», defendió’l conceyal.

    Foru quier que la nueva ordenanza prevea les obligaciones de los propietarios de los animales no que se refier a la llimpieza de los escrementos, «sían sólidos o líquidos». Esto ye: habrán de dir provistos d’un líquidu que dexe llimpiar l’orín que puede estropiar tantu parés públiques o privaes como faroles y otros elementos.

    La proposición de Foru tamién propón la creación de más parques con espacios específicamente dedicaos a los animales, como’l de Nuevo Roces. «La instalación d’un parque de mascotes na zona de Poniente, que ye una antigua reivindicación, dexaría camudar un espaciu de formigón per otru verde», dixo. Esta iniciativa requeriría de l’autorización de l’Autoridá Portuaria pa llograr los permisos correspondientes. Martínez Salvador reclamó l’actualización del censu municipal y un plan pa controlar el problema de les aves marines, como les gaviotes, «qu’invaden con frecuencia patios de colexos, terraces y otros espacios pa robar comida, n’ocasiones de forma agresiva».