Xixón al día

Etiqueta: Conceyu de Xixón

  • El Principáu destina 103.500 euros a campañes pa la prevención de les drogues

    El Principáu destina 103.500 euros a campañes pa la prevención de les drogues

    La Conseyería de Salú concedió 770.860 euros pal desenvolvimientu de planes y programes municipales sobre prevención del consumu de drogues. El Boletín Oficial del Principáu d’Asturies (BOPA) publicó’l vienres la resolución de la concesión d’estes subvenciones. Anguaño benefíciense d’esta llinia 39 conceyos y cuatro mancomunidaes que presentaron la so solicitú a la convocatoria rexonal. Xixón va recibir un total de 103.500 euros destinaos a distintos programes.

    La mayoría d’estes iniciatives destaquen por acciones comuñales de tresformación del territoriu en prevención y promoción de la salú dende distintos ámbitos -escolar, familiar y sanitariu- nes que s’implica al texíu social. Estes actividaes contribúin tamién a xenerar empleos directos. Trátase principalmente d’organizaciones non gubernamentales y empreses del tercer sector que trabayen nel campu de les adicciones.

  • La zona de Les Mestes a San Llorienzo, con mayor presencia d’agües fecales

    La zona de Les Mestes a San Llorienzo, con mayor presencia d’agües fecales

    El conceyal de Mediu Ambiente, Aurelio Martín, señaló que les agües del Piles, dende Les Mestes hasta la sablera de San Llorienzo, son de peor calidá que la zona entendida dende’l complexu deportivu municipal escontra riba. Asina lo manifestó esti miércoles nuna rueda de prensa xunto col director xeneral de Mediu Ambiente, Cosme García. N’ella, presentaron la resultancia de los últimos analises realizaos por Empresa Municipal d’Agües (EMA) n’ocho puntos del ríu Piles, ente’l 24 de setiembre y el 3 d’ochobre.

    El conceyal reconoció que, magar les resultancies llograes nestes analítiques son meyores, «la presencia de bacteries fecales sigue percima de los valores tomaos como referencia”. El mayor problema, indicó, ta concentráu nes agües de transición, esto ye, aquelles que van dende’l complexu de Les Mestes hacia la sablera. Nes agües continentales, que son les que tán más alloñaes de la desaguada, la presencia de fecales amenórgase.

    Los problemes identificaos nel Piles y sobro los que se trabaya son, per una parte, la presencia de bacteries fecales na agua, derivada d’alivios de la rede de saneamientu y posibles arramaos, y por otru, la proliferación d’un determináu tipu d’alga. Nesti sentíu, la EMA trabaya sobro’l so propiu plan d’actuación pa determinar si ta habiendo arramaos y cuál ye la so procedencia. El Conceyu va axudicar a finales de la próxima selmana l’estudiu hidrobiolóxico sobro les algues que se concentren nel ríu.

  • Ana Braña: “L’IBI diferenciau va tener repercusión nel empléu”

    Ana Braña: “L’IBI diferenciau va tener repercusión nel empléu”

    La conceyala de Foru Ana Braña presentó esti xueves les enmiendes al proyectu d’Ordenances Fiscales de 2020. «El proyectu del PSOE ye prácticamente idénticu al que presentamos para l’exerciciu 2018, a diferencia del IBI estremáu, al que Foru siempres s’opunxo». La concejala afirmó que «nun entendemos como’l PSOE votó entós en contra del nuesu proyectu, dempués de retirar –como lo fixo– la so propia enmienda pa gravar con un 0,59% los bienes inmuebles d’usu comercial, ociu, oficines y almacén». Y añadió que «l’IBI diferenciáu saliera alantre si la izquierda se punxere d’alcuerdu».

    «Los impuestos y tases locales tienen d’ayudar a les families y facilitar a les empreses la xeneración d’empléu”

    Sobro esti nuevu tipu impositivu, Braña aportunó en que «tamos falando d’una xubida del 46% a propiedaes dedicaes a diversos usos empresariales con numberosos emplegaos». A esi respectu, incidió, «basta ver l’exemplu de los hoteles. Ensin dulda, desincentívase l’establecimientu d’empreses en Xixón, diendo en contra de les polítiques que llevemos a cabu dende’l Parque Científico y Tecnolóxico y el Centru Municipal d’Empreses. Va tener repercusión nel empléu». En materia de tases municipales, Ana Braña detalló que soliciten la conxelación del preciu públicu pola recoyida de borrafes y l’agua. «Los impuestos y tases locales tienen d’ayudar a les families y facilitar a les empreses la xeneración d’actividá económica y empléu”.

    La conceyala de Foru mostróse contraria a los cambeos na bonificación a vehículos históricos porque «apenes circulen». No que cinca al IBI, proponen un cambéu na bonificación a families numberoses y una bonificación del 75% a los inmuebles nos que se desenvuelva l’actividá de mercáu, declaraos d’especial interés o utilidá municipal.

    La formación tamién refugó la medría d’un 60% nel preciu públicu de les Escueles Deportives al condideralo «una medría abusiva». Tamién la política d’accesu a los Museos a de la ciudá foi oxetu d’enmienda, esplicó Ana Braña. «Nun tien sentíu estender la gratuidá del accesu a los museos a les persones que nun tienen tarxeta ciudadana, porque les persones que nos visiten nun sufragen el so costu y caltenimientu», detalló la concejala de Foru.

  • Alfonso Baragaño, nuevu xerente d’Emulsa

    Alfonso Baragaño, nuevu xerente d’Emulsa

    Alfonso Baragaño, con 16 años d’esperiencia, ye’l nuevu xerente d’EMULSA. El xefe de la área económico financiera y de planificación y control sustitúi nel cargu a Pilar Vázquez que cesa nel cargu por xubilación. Baragaño coordinó los principales proyectos d’innovación y nueves tecnoloxíes enllantaos según los planes estratéxicos y el control de xestión de la empresa municipal. Llicenciáu n’Alministración y Dirección d’Empreses pola Universidá d’Uviéu, como formación complementaria realizó un cursu cimeru en Xestión d’Empreses de Servicios Públicos y un Programa Executivu en Control de Xestión, Estratexa ya Innovación.

  • Ordenances fiscales pa 2020: IBI diferenciáu, xubíes d’agua y borrafes y bus más baratu

    Ordenances fiscales pa 2020: IBI diferenciáu, xubíes d’agua y borrafes y bus más baratu

    La conceyala de Facienda, Marina Pineda, presentó esti miércoles el proyectu d’ordenances fiscales para 2020. Trátase d’un proyectu consensuáu con IX que recueye un IBI diferenciáu amás de subíes nes tases d’agua y borrafes y la baxada del preciu del autobús. El Conceyu destaca que se trata d’una propuesta «progresiva, equitativa y sostenible» que da pasos hacia una fiscalidá verde o la promoción de la cultura.

    Pineda destacó que’l proyectu nun supón una medría xeneralizada de la presión fiscal, que ta perbaxo de la media de los conceyos de más de 100.000 habitantes del restu del país. Sicasí, remarcó que «tenemos de ser conscientes de que nun ye posible caltener los servicios a la ciudadanía con una conxelación que dura yá más d’ocho años».

    La propuesta amenorga al 25% la bonificación pa vehículos históricos y suma bonificaciones pa vehículos híbridos

    El proyectu inclúi un IBI diferenciáu, con un tipu del 0,79, para los inmuebles de valor cimeru a un millón d’euros dedicaos a usos d’almacén, aparcamientu, ociu y hostelería, comercial y oficines. La propuesta amenorga al 25% la bonificación pa vehículos históricos y suma bonificaciones pa vehículos híbridos. Amás, auméntense les tases a caxeros automáticos y antenes de telefonía móvil.

    No que cinca a los precios de les empreses públiques, el proyectu d’ordenances fiscales pa 2020 contempla la xubida de les tases del 5% nel casu de la EMA y de 0,5 euros al mes na cuota doméstica d’EMULSA. Tamién se propón l’incrementu de precios de la zona azul. Nel casu d’EMTUSA, l’equipu de gobiernu plantega la gratuidá hasta los 16 años y la baxada del  preciu del billete con tarxeta ordinaria de 0,82 a 0,70 euros.

    La conceyala de Facienda yá empezó la ronda de contactos colos grupos políticos de la oposición. Esti miércoles aconceyó con Podemos y Ciudadanos y a partir d’esti xueves van siguir les xuntes col restu de grupos.

  • Los comedores escolares van costar 25 euros más al mes por escolín

    Los comedores escolares van costar 25 euros más al mes por escolín

    Les families de Xixón van tener que desembolsar alredor de 25 euros más al mes por neñu pol serviciu de comedor escolar. L’equipu de gobiernu que dirixe Ana González achaca esta situación al cambéu de los pliegos de contratación que Foru aprobó’l 2 d’abril en xunta de gobiernu. El cambéu de los pliegos inclúi un menú dafechu ecolóxicu una vegada a la selmana, amás del usu de productos de xata asturiana ecolóxica, quesos y miel. El conceyal d’Educación y Cultura, Alberto Ferrao, amosóse partidariu d’esta decisión p’ameyorar l’alimentación pero critica que nun se tuvo en cuenta la repercusión económica» qu’esto xenera nes families. «Tenemos que ver qué mecanismos o ferramientes vamos llevar a cabu. Les families nun pueden cargar cola totalidá d’esa xubida de precios».

    Pela so parte, la conceyala de Bienestar Social y Derechos, Natalia González, llamentó que nun se camudaren les bases de les beques comedor. «Tantu los baremos como los llindes d’ingresos podríen modificase por que la cobertoria de les beques comedor fuera mayor». Amás, González puntualizó que yá se ta estudiando la creación d’una convocatoria complementaria d’ayudes pa que l’impactu económicu nun recaya sobro les families.

    Según fontes del Conceyu, cabo la posibilidá de que les empreses recurran el procesu d’axudicación. N’él, tornóse una ufierta per baxada temeraria de los precios (ufiertaben los almuerzos a 0,01 euros siendo tornada la so xustificación). Si esto asocede, prorrogaríase’l contratu actual que caltendría los precios hasta que pueda aprobase l’axudicación definitiva, probablemente, ente avientu y xineru. Nel anterior contratu’l preciu que teníen d’abonar les families per un mes completu asitiar en 66,02 euros. Si se confirma definitivamente lo qu’agora ye una axudicación provisional, va pasar a rondar los 91,64 euros.

  • El pabellón de Xixón na Feria de Muestres recibió 68.335 visites

    El pabellón de Xixón na Feria de Muestres recibió 68.335 visites

    Nos 16 díes que tuvo abiertu al públicu, ente’l 3 y el 18 d’agostu, el pabellón de Xixón na Feria de Muestres d’Asturies recibió esta edición 68.335 visitantes. Namái l’añu pasáu, que tuvo dedicáu a los hermanos Castro, y el de 2013, que se dedicó al comerciu llocal, recibieron más visitantes. El día de mayor afluencia foi’l sábadu, 12 d’agostu, día que visitaron el pabellón de Xixón 8.241 persones. La esposición instalada anguaño nel pabellón llevó por título ‘Roma y Xixón. Una mirada virtual‘ y tuvo organizada por Divertia y la Fundación Municipal de Cultura.

  • L’alcaldesa desmiente que Xixón vaya celebrar ‘bautizos civiles’

    L’alcaldesa desmiente que Xixón vaya celebrar ‘bautizos civiles’

    L’alcaldesa de Xixón refugó esti martes la posibilidá de que la Casa Conceyu celebre los nomaos bautismos civiles. En declaraciones a los medios de comunicación, Ana González aseguró nun tener intención d’incluyir la celebración de ceremonies d’otorgamientu de carta de la ciudadanía nel Reglamentu de Llaicidá. «Esta propuesta nun sal en nengún documentu del PSOE nin d’IX nin hai nenguna propuesta conxunta», aseguró.

    Ana González refirióse d’esta manera a les informaciones publicaes pol diariu El Comercio sobre la ellaboración d’un Reglamentu de Llaicidá. Esta normativa, incluyía nel pactu de gobiernu ente PSOE ya Izquierda Xunida, inspiraríase na regulación de Rivas Vaciamadrid, que contempla la celebración de bautismos civiles.

    «El desendolcu de la llaicidá na ciudá nun significa tomar ritos relixosos de modo civil. Nun falamos d’eso», esplicó l’alcaldesa. La primera edil espresó’l «másimu respetu» a caúna de les confesiones relixoses, pero aseguró qu’esta regulación quier «separtar les creencies personales de la sociedá civil».

  • Xixón incorpora cuatro nuevos bomberos

    Xixón incorpora cuatro nuevos bomberos

    El Serviciu de Prevención, Estinción de Quemes y Salvamentos de Xixón cunta, dende esti miércoles, con cuatro miembros más nel equipu. Jaime Batalla, Enrique Otero, David Calleja y Adrián González son les nueves incorporaciones. Toos ellos tomaron posesión del so cargu como técnicos especialistes en prevención y estinción de quemes y salvamentu. Na firma, tuvo presente’l conceyal de Servicios d’estinción de Quemes, José Luis Fernández; el Xefe de Bomberos, Rodrigo López; y el Xefe de Serviciu, Javier Álvarez.

  • La militancia d’IX sofita’l preacuerdo de Gobiernu col PSOE

    La militancia d’IX sofita’l preacuerdo de Gobiernu col PSOE

    Lluz verde al alcuerdu de gobiernu de PSOE ya IX. La militancia de la coalición dio’l vistu bonu a la entrada d’Aurelio Martín nel equipu de Gobiernu como conceyal de Movilidá y Mediu Ambiente. La consulta celebrada esti domingu tuvo marcada pola baxa participacion. Un total de 180 persones exercieron el so derechu a votu d’un total de 785 llamaos a participar, el 22% del total. La resultancia del escrutiniu reflexó qu’un 92,22% de votos a favor del la propuesta, el 6,66% votó en contra, y el 1,11% votaron pola astención.

    Faustino Sabio, coordinador local, valoró la resultancia de la consulta positivamente: «El conxuntu d’IX Xixón manifestóse por abrir un nuevu ciclu políticu d’esquierdes na ciudá y empobinala escontra’l desenvolvimientu de polítiques centraes n’ameyorar la vida del conxuntu de la ciudadanía, dar respuesta a los retos económicos, ecolóxicos y sociales que tienen güei les nueses sociedaes, y pallo consideraron indispensable la participación d’IX nel Gobiernu de Xixón».