Etiqueta: educación

Educación incorpora al protocolo d’acosu escolar orientaciones contra la discriminación por razones d’identidá sexual

La Conseyería d’Educación unvió güei a tolos centros d’enseñanza públicos, concertaos y privaos- unes orientaciones pa la prevención, detección ya intervención énte conductes qu’atenten contra la identidá sexual del alumnáu. Estes instrucciones incorpórense como anexu al protocolu contra l’acosu escolar, actualizáu’l pasáu mes de setiembre.

Les direcciones de los centros tendrán d’incluyir actuaciones y midíes de prevención, intervención y erradicación d’actitúes discriminatories por motivos d’orientación ya identidá sexual nel Proyectu Educativu de Centru y nel Plan Integral de Convivencia, enmarcaos na nueva llei educativa (LOMLOE). Tamién se van concretar na Programación Xeneral Añal (PGA).

Los centros educativos van tener que velar por una fayadiza protección del alumnáu que s’atope en situación d’esclusión social, discriminación y violencia polos mesmos motivos. En casu de que se detecten conductes qu’atenten contra la orientación ya identidá sexual, les direcciones van abrir un protocolu d’acosu escolar.

Estes instrucciones anunciaes pola conseyera Lydia Espina a principios de cursu- faen especial fincapié nel apartáu preventivu. Nesti sen, proponen a los centros impulsar actividaes de sensibilización, asesoramientu y formación empobinaes a tola comunidá educativa, actuaciones curriculares y midíes pa garantizar los derechos del alumnáu. Destaquen la formación rellacionada cola diversidá afectivu-sexual y el so tratamientu educativu, que va dir destinada a los equipos directivos, a los servicios d’orientación, equipos docentes y a les persones coordinadores de bienestar, al traviés de los Centros del Profesoráu y Recursos (CPR).

La conseyería establez la manera de proceder cuando se detecten conductes qu’atenten contra la orientación ya identidá sexual del alumnáu. Cualquier miembru de la comunidá educativa que tenga conocencia o barruntu d’un casu, tendrá de ponelo en conocencia d’un docente, tutor o tutora, l’equipu directivu o la persona responsable de la orientación. Nesi momentu, va activase’l protocolu contra l’acosu escolar vixente.

Les orientaciones numberen una serie de conductes susceptibles d’atentar contra la orientación ya identidá sexual: usu repitíu de nomatos peyorativos, chistes, burlles, menosprecios o insultos con connotación afectivu-sexual; amenaces, insultos o vexames rellacionaos cola orientación ya identidá sexual o qu’afalen a la violencia física. Estes conductes reprobables seríen estensibles a los espacios virtuales.

Tamién se tien en cuenta l’aislamientu del grupu nes actividaes escolares y extraescolares, la introversión, murnia y aflicción de la víctima; les repitíes ausencies inxustificaes al centru docente o les somatizaciones o biltos de descontrol emocional de les persones afectaes.

Si’l centru docente conclúi qu’esistió acoso escolar, tendrá d’ellaborar un plan d’actuación, que va contener midíes a adoptar cola víctima, con los y agresores y con los y les observadores pa correxir la situación detectada y evitar que se vuelva repitir.

Ente eses posibles midíes, figuren asignar un docente que empatice cola víctima y con capacidá pa encetar la so situación, en coordinación colos servicios especializaos d’orientación educativa y servicios sanitarios; crear un círculu protector de compañeros y compañeres o actuar colos acosadores, con el observadores y col grupu-clase nel que s’atopa’l presuntu acosador. Nesti últimu casu, desenvolveríense programes específicos sobre la diversidá sexual, según alcuentros y charres con persones espertes pa cavilgar.

A lo último, nel supuestu de que dalgún miembru de la comunidá educativa tuviera conocencia o barruntos de qu’un menor escolarizáu pudiera tar sufriendo xuna agresión física o asañamientu pola so orientación ya identidá sexual, va poner en conocencia de la dirección del centru que, con calter inmediatu, va derivar a los servicios sociales competentes. Si resultara amenaciada la salú o la seguridá del menor o adolescente, tendrá de comunicalo con urxencia a les fuerces y cuerpos de seguridá y/o al Ministeriu Fiscal, en cumplimientu de la llei orgánica de protección integral a la infancia y l’adolescencia frente a la violencia.

15/03/2023
Educación abre la segunda convocatoria d’ayudes a los conceyos pa financiar places nueves nes escueles de 0 a 3 años

La Conseyería d’Educación publicó güei nel Boletín Oficial del Principáu (Bopa) la segunda convocatoria d’ayudes a los conceyos pa financiar infraestructures y equipamientos para la creación de nueves places públiques de primer ciclu d’Infantil (0 a 3 años). Les corporaciones disponen hasta’l 3 d’abril pa presentar les solicitúes.

Los conceyos beneficiarios van poder costear inversiones que se produxeren ente’l 1 de xineru y el 31 d’avientu de 2023. El pagu va ser antemanáu y los conceyos van tener un mes de plazu pa xustificar los gastos, a cuntar dende la conclusión de les actuaciones subvencionaes.

Nesta nueva convocatoria -enmarcada nel Plan de Recuperación, Tresformamientu y Resiliencia de la Unión Europea- van partise 6,35 millones en réxime de concurrencia competitiva. El Conseyu de Gobiernu autorizó esta partida en febreru.

El programa d’impulsu de la escolarización nel primer ciclu d’Educación Infantil contempla trés modalidaes d’ayudes:

Pa obres de construcción d’un nuevu edificiu o pa la rehabilitación integral d’un inmueble col fin de destinalo a escuela de 0 a 3, la cuantía de la subvención puede algamar los 150.000 euros per unidá.

Pa l’ampliación esterior d’aules n’edificios yá creaos, col fin de destinales a escuela de 0 a 3 años, les ayudes tienen una llende máxima de 90.000 euros per cada unidá.

Pa obres interiores d’adaptación de centros yá en funcionamientu que quieran destinar parte del edificiu a escuela de 0 a 3 años, les ayudes algamen una llende máxima de 70.000 euros por nuevu unidá.

El programa contempla tamién ayudes pa equipamientu interior o moblame d’hasta 60.000 euros per centru educativu.

La convocatoria d’ayudes vuelve priorizar a la población infantil d’unu y dos años, l’accesu en zones de mayor riesgu de probeza o esclusión social y la cobertoria de zones rurales, col propósitu de compensar los efectos qu’eses desigualdaes provoquen nel alumnáu.

02/03/2023
Educación evalúa al 95% del alumnáu de primeru de Primaria na fase inicial de la estratexa de detección d’altes capacidaes

La Conseyería d’Educación llogró evaluar al 95% del alumnáu matriculáu nel primer cursu de Primaria na fase inicial de la estratexa de detección d’altes capacidaes, empecipiada esti cursu y pionera a nivel nacional. Esto supón que s’arrexuntaron un total de 6.297 cuestionarios, unu per estudiante, rellenaos polos tutores de 273 centros escolares públicos y alcordaos.

La información percanciada nesta primer parte dexó ordenar al alumnáu en trés grupos distintos, que s’identifiquen con los colores d’un semáforu. Un total de 637 –señalaos con color coloráu- son quien presenten nicios d’altes capacidaes y agora van sometese a una evaluación sicopedagóxica para confirmar o refugar estes señales. Otros 308 estudiantes –arrexuntaos sol color naranxa- van tener un siguimientu específicu del personal docente. Los restantes formen parte de la categoría verde, que nun riquir más midíes venceyaes con esta iniciativa.

La conseyera d’Educación, Lydia Espina, participó güei en Llugones nuna xunta informativa sobre esta estratexa de detección ya intervención inclusiva, a la qu’asistieron la Unidá d’Altes Capacidaes, les direcciones de colexos de Primaria y orientadores de centros públicos y alcordaos.

Esta novedosa investigación pretende llograr el doble oxetivu d’ameyorar les tases de detección d’alumnáu con altes capacidaes y favorecer tamién una respuesta educativa que garantice’l máximu desenvolvimientu de les sos potencialidaes. Tamién se va reforzar la formación del profesoráu. Toes estes midíes escuerren el mesmu propósitu: ameyorar l’atención a la diversidá.

Antes de les vacaciones de Navidá, el tutores del primer cursu de Primaria rellenaron un cuestionariu propuestu pola Unidá d’Altes Capacidaes. Esi test analizaba 39 ítems arrexuntaos en trés bloques, sobre capacidá-creatividá, personalidá y motivación. Con esa información, configuróse’l semáforu que tuvo en cuenta dos índices correctores: la fecha de nacencia del alumnu o alumna –cuánto más nuevos, la puntuación amenorga- y l’efectu suxetivu de les valoraciones ente los distintos grupos.

01/03/2023
Más d’un centenar d’investigadores de la Universidá d’Uviéu van participar nel Día Internacional de la Muyer y la Neña na Ciencia

Más d’un centenar d’investigadores de la Universidá d’Uviéu súmase a la conmemoración el sábadu, 11 de febreru, del Día Internacional de la Muyer y la Neña na Ciencia, con un curiosu cartelu de conferencies, monólogos científicos, una campaña de sensibilización o un almuerzu científicu que, col lema YoSoiCientífica, pretende visibilizar la contribución de les muyeres na ciencia y captar nueves vocaciones ente les xeneraciones más nueves. Les actividaes, qu’anguaño lleguen a la so séptima edición, fueron diseñaes pol Vicerrectoráu d’Investigación, al traviés de la Unidá de Cultura Científica y de la Innovación (UCC+I) de la universidá asturiana.

Les principales acciones diseñaes pola Universidá d’Uviéu pal Día Internacional de la Muyer y la Neña na Ciencia son estes:

Pioneres de la ciencia

La universidá va espublizar, al traviés d’una esposición urbana, ilustraciones que representen a seis muyeres pioneres. Les científiques Margarita Salas, Hipatia d’Alexandría, Mary Anning, Hedy Lamarr, Marie Curie o Jane Goodall van tener una ilustración nos mupis d’Uviéu, Xixón y Mieres. La institución académica quier animar a la comunidá universitaria y a la sociedá asturiana a afayales y compartir en redes sociales informaciones sobre quién fueron, cuálos fueron les sos contribuciones o sobre si sirviéron-yos de referente ya inspiración. La Conseyería de Ciencia, Innovación y Universidá, al traviés de los Conceyos con Ciencia, distribuyó amás les ilustraciones por que seyan asitiaes en centros sociales, biblioteques o escaparates de tiendes y, d’esta miente, dar a conocer el llabor d’estes pioneres de la ciencia a públicu xeneral.

Elles cunten

Esta iniciativa ta integrada por un ciclu de conferencies de divulgación científica impartíes por investigadores de la Universidá d’Uviéu p’averar los estudios de muyeres de toles árees de conocencia. Les temátiques son diverses y van dende muyeres referentes o esperiencies personales hasta les sos trayectories profesionales o contribuciones científiques. Nesta edición, solicitaron participar 73 centros educativos de la rexón pa 5.562 alumnos d’Infantil, Primaria, Secundaria, Bachilleratu y FP. Mediu centenar de conferencies yá tán confirmaes y van impartise a lo llargo del mes de febreru. Dalgunos de los títulos más demandaos fueron Cómo he llegado a científica, Matemáticas, mujeres e inteligencia artificial ¿combinan? o Conciencia de mujer.

Almuerzu con Inxenieres

El vienres, 10 de febreru, a les 9:30 hores, trés estudiantes universitaries d’últimu añu de delles titulaciones del Campus de Xixón van visitar el colexu d’Educación Secundaria La Inmaculada, de Xixón, onde van compartir en grupos amenorgaos un almuerzu científicu y van charrar de manera distendida sobre la so trayectoria na so formación académica y proyectos presentes y futuros.

Ciencia con cabeza CienciaInclusiva

Esta actividá consiste nun espectáculu de títeres nel que les investigadores Beatriz Ramajo y Ana Elisa Valdés van representar a Marie Curie y Rosalind Franklin y van protagonizar dos monólogos científicos pa cuntar al alumnáu del Colexu Públicu d’Educación Especial Latores (Uviéu) y al Colexu Públicu d’Educación Especial Castiellu (Xixón) les sos vides y aportaciones a la ciencia. L’espectáculu va tener llugar el martes 14 y miércoles 15 de febreru.

10/02/2023
L’Asociación de la Prensa d’Uviéu defende, xunto con 26 asociaciones y ocho colexos, los graos universitarios en comunicación

Un total de 27 asociaciones y 8 colexos de periodistes de tol territoriu nacional suscribieron un manifiestu en defensa de los graos universitarios en comunicación, nel que señalen, amás, que los másteres o otros títulos de posgrau nun pueden considerase una formación equiparable al grau de llicenciatura en Periodismu o Comunicación Audiovisual. En concretu, según recueye’l testu, les 27 asociaciones y 8 colexos que suscriben el manifiestu, refuguen que “los posesores d’otros graos o llicenciatures universitaries ayenos al oficiu seyan consideraos periodistes por realizar un máster o un posgrado rellacionáu col mundu de la comunicación”.

El manifiestu tresllada que los graos en Periodismu o Comunicación Audiovisual impartíos poles universidaes españoles son “la única titulación necesaria y afayadiza pal exerciciu profesional, con independencia de que legalmente esta nun seya obligatoria pa exercer”. Amás, convida a les universidaes qu’imparten estes titulaciones a “revisar frecuentemente los sos planes d’estudiu, col fin d’actualizalos n’ares d’una formación afayadiza del so alumnáu”. El testu tamién ta suscritu per un centru universitariu, la Universidá Isabel I de Burgos.

A lo último, los firmantes del manifiestu conviden a tolos periodistes del país a integrase naquelles asociaciones y colexos profesionales que realmente defendan la titulación académica, p’aunir esfuerzos na llucha contra’l intrusismu y la dignificación del nuesu oficiu”.

Esta iniciativa naz tres la celebración, el pasáu mes de payares, d’una asamblea estraordinaria de la Federación d’Asociaciones de Periodistes d’España, FAPE, na que, por iniciativa de l’Asociación de la Prensa d’Uviéu, proponíase unu cambéu d’un artículu de los estatutos de la federación. En concretu, en dichu artículu oldéase la realización d’un máster o posgrau con una llicenciatura y dexa la entrada en FAPE de graduaos n’estudios ayenos al periodismu pero con cualquier máster o posgrado rellacionáu con comunicación. Na votación 25 asociaciones, que representen 183 votos, sofitaron la propuesta de cambéu ente que solo ocho asociaciones, que representen 245 votos, refugaron el cambéu y optaron por caltener esta vía d’accesu a la FAPE.

06/02/2023
CSI Educación denuncia que nun se tán cubriendo les places de Llingua Asturiana y Gallego-Asturianu

Profesores ensin plaza y places ensin profesor. Esa ye la situación que se vive n’Asturies nesti momentu según la CSI. Tolos martes, la Conseyería d’Educación publica les places que ye necesario cubrir, tanto n’Educación Primaria como n’Educación Secundaria. Y tolos xueves, cuando dende esta Conseyería s’espublicen les axudicaciones, vese que dalgunes de les places nun cunten con un profesor o profesora que les ocupe.

Llingua Asturiana y Gallego-Asturianu nun son los únicos casos nos qu’asocede, ye una situación que se repite n’otres especialidaes como Llingua Castellana en Secundaria. Sicasí, estes materies sí son los casos más llaceriantes, yá que’l profesoráu de dambes asignatures cunta con menos derechos que’l restu de los trabayadores de la educación asturiana. Al nun esistir la especialidá docente, tampoco nun esiste la posibilidá de presentase a oposiciones. Entós, les condiciones d’esti profesoráu son peores que les del restu. Ye un grupu de trabayadores con menos derechos que los sos compañeros y compañeres.

Esta última selmana, trés places de Llingua Asturiana en Secundaria quedaron ensin cubrir. «Y esta nun ye la esceición, sinón la norma dende qu’entamara’l cursu», denuncien dende la CSI. «Repítese lo mesmo en Primaria y en Secundaria, repítese lo mesmo en Llingua Asturiana y en Gallego-Asturianu. Toles selmanes un fenómenu idénticu dende setiembre», añeden.

Dende CSI Educación esixen a la Conseyería d’Educación que busque dalguna fórmula pa poner solución a esta situación. «Namás cola aprobación de la especialidá vamos ver los derechos del profesoráu de les nuestres llingües propies n’igualdá col restu; pero, hasta que la aprueben (lo que yá tendría que tar fecho va cuantayá), necesitamos dalguna midida que permita acabar col problema», reclamen.

03/02/2023
Educación convoca’l 22 de febreru les eleiciones sindicales del profesoráu de Relixón

La Conseyería d’Educación convocó pal miércoles 22 de febreru les elecciones sindicales pa escoyer a los nueve integrantes del comité d’empresa del profesoráu de Relixón. Esta representación correspóndese colos 246 docentes del colectivu qu’había censaos na fecha del preavisu electoral, el pasáu 26 d’ochobre.

La única mesa electoral va instalase nel IES Aramo, d’Uviéu, asitiáu na cai Trece Roses. L’horariu ininterrumpíu de votaciones va ser de nueve de la mañana a siete de la tarde. Tamién podrá votase per corréu ordinariu. Les instrucciones tán disponibles nel portal Educastur.

Un total de cuatro organizaciones sindicales presentaron les sos candidatures mientres el periodu habilitáu, del 10 al 20 de xineru. Trátase d’USU, USIPA-SAIF, ANPE-FSES y UNT.

Coincidiendo cola proclamación oficial de les candidatures, la directora xeneral de Personal Docente, Eva Ledo, axuntóse colos representantes sindicales pa xestionar los últimos detalles del procesu. Ledo destacó “el bon talante amosáu por toles organizaciones y el fechu de que nun se produció nin una sola reclamación a les llistes”. La campaña electoral va empezar el próximu vienres y va concluyir el llunes 20 de febreru. El 21 de febreru va ser la xornada de reflexón previa a los comicios.

26/01/2023
Fúndese’l suelu d’una clase del CP Rey Pelayo de Xixón

Ayeri xueves tuvo mui cerca de producise una desgracia nel CP Rey Pelayo de Xixón. El suelu de l’aula de 3 años venció primero que s’empecipiara l’actividá lectiva diaria, lo qu’evitó una calamidá ente’l profesoráu y l’alumnáu. A esta hora’l colexu queda catalogáu polos responsables como inaccesiblepor cuenta de los problemes estructurales que sufre.

Al centru educativu acudió la conseyera d’Educación, Lydia Espina, que manifestó que “la prioridá absoluta del Gobiernu d’Asturies y del Ayuntamientu de Xixón ye garantizar la seguridá de tola comunidá educativa” del colexu y “asegurar la escolarización del alumnáu”. Pa ello, la Dirección Xeneral de Planificación ya Infraestructures Educatives analiza dende primer hora de la mañana posibles espacios alternativos pa reasitiar temporalmente a ese alumnáu. Espina aseguró que la conseyería “ta preparada para cualquier continxencia” y que en Xixón “hai espacios abondos” p’acoyer a esos neños y neñes de forma provisional, polo que llanzó un mensaxe de tranquilidá a les families de los menores.

Pela so parte, el sindicatu SUATEA manifestó que nun-yos val con que «los responsables pertinentes alleguen y llamenten lo asocedío. Hai qu’actuar con contundencia y esixir responsabilidaes, yá que culpables hai, y l’alministración hai de ser garante del caltenimientu y caltenimientu de les infraestructures de la escuela pública asturiana. Detrás d’ello hai un interés políticu en subvencionar a la escuela alcordada mientres se quita de recursos y abandona la escuela pública per parte del Principáu y el conceyu de Xixón.» A esta quexa, añedieron que ye una situación lamentable que se produza con una alcaldesa qu’enantes yá fuera conseyera d’Educación.

13/01/2023
Educación estiende la gratuidá nes escueles de 0 a 3 años al 75% del alumnáu

La Conseyería d’Educación estiende la gratuidá nel ciclu de 0 a 3 años y a partir del próximu cursu eximirá del pagu de la matrícula a toes aquelles families con rentes inferiores a los 42.000 euros añales. La previsión ye que la midida beneficie al rodiu d’un 75% de los usuarios d’esti serviciu.

Esta iniciativa ye una de les propuestes destacaes del presupuestu autonómicu pa 2023 nel apartáu d’educación, que xube a 823,8 millones. Esta cifra supon una medría del 5,5% con respectu al exerciciu anterior.

L’apueste pola escuela de 0 a 3 años queda reflexada en dos apartaos concretos. Per una parte, inclúyense dos partíes de fondos europeos del Mecanismu de Recuperación y Resiliencia (MRR) por un importe de 8,64 millones pa siguir coles sovenciones a aquellos conceyos que creen nueves places. Esta cantidá crez un 114% al respective de 2022.

Per otru llau, crez hasta 21,3 millones el creitu añal ampliable que se destina al funcionamientu de la rede d’escueles d’infantil, que yá tán enllantaes en 48 conceyos. El Principáu calculó, poro, una medría del 19,62% del dineru que tresfier a los conceyos.

La conseyera d’Educación, Lydia Espina, presentó güei les principales llínees estratéxiques de los presupuestos en Cangues d’Onís, onde destacó que son unes cuentes positives que garanticen la meyora del estáu de bienestar al reforzar la sanidá, la educación y los servicios sociales. “Estes cifres representen l’apueste pola enseñanza. Nun momentu nel que baxa la matrícula del alumnáu, la inversión crez. Somos conscientes de la necesidá d’invertir nel sistema para caltener la calidá”, esplicó.

La parte educativa ta planiada pa encarar los retos más inmediatos, dende la meyora de les competencies dixitales de profesoráu y estudiantes a la implantación de la reforma educativa o la escolarización dende edaes tempranes.

Otra de les novedaes atopar nes ayudes pa los llibros de testu, qu’esperimenten una xubida significativa pa llegar al mayor númberu de families posible. La enseñanza pública, onde se caltien la xestión por aciu bancos de préstamu, recibe una dotación adicional de 873.079 euros, hasta 2,6 millones. La privada-concertada, coles sos ayudes directes, algama 558.342 euros, casi un 50% más.

El capítulu de personal xube a 623 millones, un 5,13% más qu’anguaño, y representa el 75,6% del total del presupuestu d’Educación pa 2023. Coles mesmes, la reconocencia al llabor del profesoráu caltener col Plan d’Evaluación Docente, dotáu con 36 millones, cinco más que nel exerciciu anterior. Esa crecedera obedez a trés conceutos: l’actualización de les cantidaes, les nueves incorporaciones y la regularización del profesoráu técnicu de FP, que pasa a formar parte del Cuerpu de Secundaria y con calter retroactivu.

05/12/2022
SUATEA considera la LOMLOE «una frustración y desencantu del profesoráu asturianu»

La implantación de la LOMLOE convirtióse dende’l cursu pasáu nún de los oxetivos principales de la Conseyería d’Educación. Dende SUATEA, d’acordies con otres organizaciones sindicales, planteguen a la Conseyería «la conveniencia d’aprovechar esti cursu 2022-23 pa dir entamando l’aplicación práctica de la mesma, ensin imponer plazos inmediatos al profesoráu. Una Llei qu’impon cambeos de caláu nel funcionamientu del sistema educativu nun debe d’empezar a aplicase ensin prever con antelación el procesu de desenvolvimientu, concreción y aplicación de la mesma.»

Sicasí, según la organización sindical, la Conseyería fixo casu omiso a estos pidimientos y decidió empecipiar el procesu, entá sabiendo que yeren munchos los flecos que taben por encetar. De primeres, taba la paradoxa d’empecipiar el cursu ensin conocer siquier cuálos yeren los currículos que correspuenden a cada espacialidá, cómo se diben a realizar les programaciones correspondientes, cuálos van ser los criterios educativos que se van utilizar a lo llargo del cursu, cómo se concretaríen los cursos de formación pal profesoráu y demás.
Al refugar el pidimientu de retardar la so aplicación hasta’l próximu cursu, la Conseyería impunxo unos plazos que se tán convirtiendo nuna fonte frustración y afandu pal conxuntu de la plantiya docente.

La pasada selmana empecipióse un cursu de formación de quien desempeñen nos centros la figura de Coordinador de bienestar emocional del alumnáu. Múltiples fueron les quexes recibíes per parte de persones que participaron na citada actividá por cuenta de que en la mesma informóse de los requisitos a cumplir por quien ostenten esa responsabilidá de la que se-yos informaba d’un eleváu númberu de funciones a realizar. Yá en septiembre, coincidiendo col entamu de cursu, dende SUATEA denuncien que lo que se precisa pa llevar a cabu esa función ye ampliar los recursos y la reconocencia d’ese trabayu nel horariu lectivu del profesoráu en llugar de dexalo a la disponibilidad horaria esistente nos centros.

16/11/2022