La Dirección Xeneral d’Igualdá del Gobiernu d’Asturies impulsó un alcuerdu col Colexu d’Abogaos d’Uviéu y el Colexu de l’Abogacía de Xixón pa ufiertar una atención xurídica especializada a les víctimes d’agresiones sexuales. D’esta miente, el Principáu conviértese na primer comunidá autónoma n’emprestar esti serviciu, gratuitu y de calidá, qu’aborde la necesaria especialización na defensa lletrada d’estes muyeres.
La directora xeneral d’Igualdá, Nuria Varela, y los decanos de los colexos d’abogaos d’Uviéu y Xixón, Luis Albo Aguirre y Benigno Villarejo Alonso, respectivamente, roblaron esta mañana l’alcuerdu pol que se va apurrir un serviciu especializao y gratuito de defensa xurídica a les usuaries del Centru de Crisis pa Víctimes d’Agresiones Sexuales del Principáu.
El serviciu xurídicu a les víctimes va emprestase al traviés de lletraos y lletraes qu’axunten los requisitos de formación, especialización y esperiencia profesional, col fin d’asegurar una atención col mayor nivel de calidá y competencia profesional a les muyeres. Asina, va ser el mesmu profesional quien va siguir cada asuntu dende l’entamu hasta’l final, dende la interposición de la denuncia hasta’l xuiciu oral, si se diera esta situación. Pa ello, la Dirección d’Igualdá ta impartiendo la formación necesaria a los y les abogaes pa’l cumplimientu d’un serviciu que protexa a les muyeres y evite la so revictimización nel procesu. Nestos momentos, 88 lletraos y lletraes participen yá nel cursu de 130 hores de duración.
Amás, el Gobiernu d’Asturies va aportar los fondos necesarios pa cubrir el costu del serviciu yá que, enagora, esta atención nun s’atopa integrada nel catálogu de prestaciones de l’asistencia xurídica gratuita.
Atención integral a les víctimes
Tanto’l Conveniu d’Istambul como’l Pactu d’Estáu contra la violencia de xéneru obliguen a los estaos a adoptar les midíes necesaries pa prevenir y dar respuesta a toa forma de violencia contra les muyeres, señalando específicamente la violencia sexual. Poro, el Gobiernu d’Asturies punxo en marcha va un añu’l Centru de Crisis pa Víctimes d’Agresiones Sexuales, que yá atendió a 203 persones: 134 muyeres y 69 familiares.
Esti recursu entró en funcionamientu en payares de 2020 coles mires d’ufiertar acompañamientu adptáu a les demandes, necesidaes y tiempos de cada usuaria. D’esta miente, son les profesionales del centru quien se mueven ellí onde lo riquen les víctimes, tanto si precisen atención psicolóxica, como treslladase a los servicios sanitarios o interponer una denuncia. Hasta agora les abogaes del recursu ufiertaben, dientro de les llendes de les sos competencies, l’asesoramientu xurídicu qu’agora se completa cola defensa lletrada gratuita.
Amás, coles mires de reforzar l’atención integral a les víctimes d’agresiones sexuales, la Dirección Xeneral d’Igualdá y la Viceconseyería de Xusticia collaboren anguaño nel diseñu d’un proyectu pilotu pa que les usuaries del centru de crisis puedan declarar dende’l mesmu equipamientu, ensin necesidá de movese a los xulgaos.
Nesti primer añu d’actividá, la Dirección Xeneral d’Igualdá impulsó alcuerdos y protocolos col 112, los colexos de l’abogacía d’Uviéu y Xixón, los colexos de procuradores, les fuerces y cuerpos de seguridá y los servicios sanitarios. Tamién buscó aliances con tolos medios de comunicación asturianos, que se comprometieron a nun publicar nengún datu personal que permita identificar a les víctimes d’una agresión sexual.
El centru cunta con distintos servicios, dende’l d’emerxencia que precisa inmediatez hasta procesos al llargu plazu, que s’empresten a muyeres y neñes mayores de 12 años nes 24 hores de los 365 díes del añu. L’equipamientu pioneru, que cunta con un equipu de seis psicólogues y seis abogaes, amás de la coordinadora, ta preparáu pa asistir a muyeres con discapacidá física ya intelectual y dispón de traducción, tanto pa usuaries inmigrantes como pa turistes y viaxeres que precisen aportar a esti serviciu.
El centru de crisis habilitó’l teléfonu 677 985 985 pa l’atención a les víctimes, tantu per llamada como por mensaxes de testu y wasap, que ta disponible 24 hores, tolos díes del añu.
Varela señaló que “nun paez casualidá que precisamente l’añu nel que se pon en marcha’l centru de crisis n’Asturies seya tamién nesta comunidá autónoma onde más aumentaron el númberu de casos de violencia sexual conocíos poles fuerces y cuerpos de seguridá, según l’últimu informe de criminalidá del Ministeriu d’Interior. Asina que, paez que l’oxetivu de trabayar frente a la impunidá ta consiguiéndose na midida na qu’ameyoren los datos de denuncies. Tamién facemos un balance positivu del fechu de que distintos xulgaos empiecen a pidir informes periciales al centru como centru especializáu n’agresiones sexuales” .
Nos postreros doce meses, el centru atendió consultes de la mayoría de les comunidaes autónomes que, a partir del próximu añu, van abrir instalaciones asemeyaes nos sos territorios. “Col centru de crisis, amás d’evitar la revictimización de les muyeres y consiguir qu’éstes tean acompañaes ya informaes en tou momentu por que puedan tomar les sos decisiones sabiendo les consecuencies de caúna d’elles, tamién pretendemos camudar el paradigma de la violencia sexual empezando pela parte más dañible: hai que consiguir que les víctimes dexen de ser xulgaes y empiecen a selo los violadores”, sorrayó Varela.
