El vicepresidente Juan Cofiño treslladó güei les ventayes que faen d’Asturies una rexón “escelente” pa invertir al empresariáu que participa en Madrid nuna xornada entamada poles cámares de comerciu asturianes, col sofitu del Principáu y de la Federación Asturiana d’Empresarios.
Mientres la so intervención nel foru, que se desenvolvió sol títulu Asturies como destín d’inversión empresarial na sede de la Cámara de Comerciu d’España, Cofiño repasó lo qu’ufierta la comunidá. “Asturies dispón de tolos incentivos económicos pal desendolque de l’actividá empresarial, asemeyaos al de cualesquier otru territoriu del Estáu, cola particularidá de la so consideraza de rexón de transición xusta, lo que nos da accesu a fondos adicionales que nos convierten nun territoriu competitivu”, valoró.
Tamién se refirió a la histórica “tradición industrial” del Principáu, mesmo qu’a la Universidá d’Uviéu, “inclinada na formación venceyada a los oficios rellacionaos cola industria y la empresa”. De la mesma, resaltó los recursos humanos disponibles, “bien entrenaos y especializaos na industria”.
Ente les fortaleces d’Asturies, el vicepresidente destacó “un clima sociollaboral sensatu y equilibráu, propiu d’una sociedá madura”, característica qu’atribuyó a “una práctica inveterada de concertación social, instaurada dende los años 80 del pasáu sieglu, y que foi recurrente y sostenida nel tiempu, independientemente de los líderes políticos, sindicales y empresariales de cada momentu”.
Otramiente, enfatizó’l “inmensu patrimoniu de suelu industrial, perfectamente urbanizáu y a disposición de cualesquier iniciativa empresarial”.
En materia d’infraestructures, resaltó “un área metropolitana bien comunicada en toles maneres y formatos, como autopistes, aeropuertu, puertos o ferrocarril y cola llegada del AVE algamándose”. “Bastante ye que, la principal empresa loxística del mundu decidió allugar una de les sos principales instalaciones n’Asturies”, amestó al respective de la llegada de Amazon a Siero.
Tamién indicó que, tres diverses reconversiones, dellos sectores del entramáu económicu “supieron tresformase pa remanecer con un musculu poderosu”. Nesti sentíu, citó los sectores agroalimentariu, metalúrxicu, naval, y otros que, “acompañaos d’iniciatives públiques y privaes fixeron posible una Asturies cada vez más diversificada, con actividaes bien consolidaes, como les rellacionaes col sector TIC, y delles emerxentes venceyaes col almacenamientu y la xeneración de nueves fontes d’enerxía, o’l hidroxenu”.
El vicepresidente esplicó qu’Asturies ta en plena transición d’un modelu económicu tradicional a otru verde y dixital y sorrayó que los nuevos fondos europeos Next Generation y los fondos de transición xusta, xuníos a los mecanismos de financiamientu ordinarios, “constitúin una oportunidá única que nun se puede esbardiar”. Igualmente, resaltó la collaboración público-privada como fórmula d’éxitu pal futuru de la comunidá.
Nel so analís, Cofiño valoró los “potentes y reconocíos dispositivos públicos educativos y sanitarios d’Asturies, compables colos de cualesquier gran capital”. A estos dos pilares del estáu de bienestar añedió “el patrimoniu natural y cultural de la comunidá, mesmo que la seguridá y l’espíritu d’acoyida” que, al so xuiciu, convierten al Principáu “nuna magnífica opción como destino inversor”.
Finalmente, ufiertó al sector empresarial l’apoyu del Gobiernu del Principáu “como aliáu proactivu pa que los sos propósitos n’Asturies lleguen a bon fin”.
Nel actu tamién intervinieron el secretariu d’Estáu d’Economía y Apoyu a la Empresa, Gonzalo García Andrés; la directora xeneral de la Cámara d’España, Inmaculada Riera, y los trés presidentes de les cámares asturianes.
