El centru de crisis pa víctimes d’agresiones sexuales que punxo en marcha va un añu’l Gobiernu d’Asturies atendió hasta agora a 203 persones: 134 muyeres y 69 familiares. L’equipamientu entró en funcionamientu en payares de 2020 cola mira d’ufiertar acompañamientu dafechu a les demandes, necesidaes y tiempos de cada usuaria.
La directora xeneral d’Igualdá, Nuria Varela, y la coordinadora del centru, Victoria Carbajal, presentaron güei en rueda de prensa’l balance de los primeros doce meses del equipamientu y precisaron que, del total de 134 víctimes asistíes, 27 sufríen otres manifestaciones de violencia y fueron derivaes a distintos servicios especializaos.
Asina, nel primer añu abriéronse 107 espedientes a muyeres que cumplíen criterios d’intervención nel mesmu centru de crisis: 84 mayores d’edá, con edaes ente los 18 y los 67 años (con una media de 31) y 23 menores (con una media de 15 años). D’elles, 64 sufrieren violencia sexual fai menos d’un añu y otres 43 nun períodu anterior.
El 86% de les víctimes atendíes son españoles y el 14% tienen otres nacionalidaes.
Tocantes a la tipoloxía del delitu, atendiéronse los siguientes:
- Agresión sexual: 70 casos (65%).
- Abusu sexual: 7 casos (7%).
- Abusu sexual na infancia: 20 casos (19%).
- Acosu sexual: 10 casos (9%).
Per otru llau, 72 de les 107 víctimes que tienen abiertos espedientes nel centru de crisis presentaron denuncies poles agresiones sufríes, lo que supón el 67,3% del total.
Les profesionales del centru atendieron a unes 20 persones de media cada mes y la mayor parte de les víctimes que lleguen acompañaes van coles sos madres.
Un equipu especializáu al serviciu de les víctimes
Esti equipamientu pioneru, que cunta con un equipu de seis psicólogues y seis abogaes, amás de la coordinadora, ta preparáu p’asistir a muyeres con discapacidá física y intelectual y dispón tamién d’un serviciu de traducción, tanto pa usuaries inmigrantes como pa turistes y viaxeres que precisen facer usu d’esti serviciu.
Nos postreros doce meses, el centru atendió consultes de la mayoría de les comunidaes autónomes que, a partir del próximu añu, van abrir instalaciones similares nos sos territorios. Amás, a lo llargo d’esti períodu, la Dirección Xeneral d’Igualdá impulsó alcuerdos y protocolos colos colexos de l’abogacía d’Uviéu y Xixón, los colexos de procuradores, los cuerpos y fuerces de seguridá, los servicios sanitarios y los medios de comunicación, pa ufiertar una atención integral a les víctimes y ameyorar el tratamientu de les agresiones en prensa, radio y televisión.
El centru de crisis habilitó’l teléfonu 677 985 985 pa l’atención a les víctimes, tanto per llamada como por mensaxes de testu y wasap, que ta disponible 24 hores, tolos díes del añu.
