El Gobiernu d’Asturies va destinar 483.806 euros al nuevu xulgáu de violencia sobre la muyer del Palaciu de Xusticia de Xixón, un espaciu independiente nel que la víctima va poder declarar con mayor comodidá, seguridá y intimidá.
La reforma prevista contempla l’adecuación d’una zona más de 500 metros cuadraos de superficie na sede xudicial, qu’anguaño permanez vacía, na segunda planta del bloque central del edificiu. Aproximao la metá de la superficie, unos 250 metros cuadraos, va destinase al xulgáu de violencia sobre la muyer, un área independiente que va cuntar con dos accesos: unu a la zona acutada, dende’l pasiellu de funcionarios, y otru a la parte d’atención al públicu, de manera que va caltenese la circulación diferenciada pa personal y usuarios, como nel restu del inmueble.
El nuevu órganu va cuntar con una oficina xudicial (106,5 metros cuadraos), zona d’atención en mostrador (27,44 metros cuadraos), área d’espera de públicu (19,35 metros cuadraos), despachos pa xuez y lletráu, sala d’entrevistes con dos accesos independientes y arquivu.
Esta actuación implica una meyora significativa sobre la situación actual, yá que les muyeres nun disponen d’un espaciu afayadizu y íntimu pa declarar y los distintos servicios del xulgáu tán distribuyíos pel edificiu.
Esta meyora súmase a la sala Gesell inaugurada’l pasáu marzu en Xixón, la primera d’estes característiques construyida n’Asturies, que supunxo un desembolsu de 85.000 euros financiaos con cargu a los fondos que la comunidá recibe del Pactu d’Estáu contra la Violencia sobre la Muyer.
